Югьан 8
8
«Гунагь ктрури дугъʼина гъван гатӀабхьри»
1Хъа, Иса Елион дагъдиина гъягъюру. 2ГвачӀнин ухди Думу хъана Аллагьдин хулаъ ачмиш шулу. Дугъан багахь халкь уч хьуз хъюгъру ва Исайи, деъну, аьгъювалар улупуру.
3Гьадму вахтна Къанундин мялимарина фарисйири Исайихьна, кьяппавал апӀури гъидису дишагьли хуру ва думу халкьдин улихь дерккну, 4дурари Исайиз кӀуру:
– Мялим! Гьаму дишагьли кьяппавал апӀурайи вахтна дидиснайир ву. Му чан жилирихъди дарди, жарарихъди хъайи. 5Мусайи чан Къанундиъ мицисдариин гъван уьлюбх дупна. Хъа Уву фу кӀурава?
6Му, Иса ахтармиш апӀбан ва Дугъак тахсир кипбан бадали, саб багьна абгуз ккунди гьерхрайиб вуйи.
Амма Исайи, ис алахъну, дурариз саб фикирра тутрувди, тӀубʼинди жилиин фу-вуш бикӀури гъахьну. 7Исайи Чахьан гьерхри хътадакрайиган, кӀул за дапӀну, дурариз кӀуру:
– Учвкан шли затра гунагь гъапӀундарш, гъит гьадгъу сарпирди му дишагьлийиина гъван гатӀабхьри! 8Ва хъана, Чан кӀул ис дапӀну, жилиин бикӀувал давам апӀуру.
9Му гафар гъеерхьиган, аьхюдарилан хъюгъну, душвʼин алидар са-сарди гьудучӀвну гъягъюру ва аьхириъ Исана гьадму дишагьли гъузру. 10КӀул за дапӀну, Исайи дугъхьан гьерхру:
– Эй дишагьли, увук тахсир кипрайидар наши? Уву сарикьан тахсиркар гъапӀундарин?
11– Сарикьанра, йиз аьхю кас, – пну, жаваб туву дугъу.
– Узура уву тахсир апӀурадарза; гъарах ва сану гунагь ляхнар мапӀан, – гъапи Исайи.
«Узу аьгъяйиш, Йиз Адашра аьгъю шуйчвуз»
12Кьандиси халкьдихъди Иса хъана улхуру:
– Узу му дюнʼяйиз акв вуза. Фуж Узухъди гъахьиш, дицир мучӀушнаъ улдугну хьидар, дицирихъди уьмрин акв хьибди.
13– Уву Яв Увкан шагьидвал апӀурава, – кӀуру фарисйири. – Яв шагьидвал гьякьюб дар.
14Исайи жаваб тувру:
– Эгена Узу Йиз Узкан шагьидвал апӀури удучӀвураш, Йиз гафарихъ хъугъуз хай шулу, фицики Узуз аьгъязуз Узу наънан гъафнуш ва наана гъягъюраш. Хъа учвуз, Узу наънан гъафнуш ва наана гъягъюраш, аьгъдарчвуз. 15Учву сар-сарин, инсанарин уьлчмейиинди суд апӀурачва, хъа Узу саринра суд апӀурадарза. 16Эгерки Узу ичв суд апӀуйишра, Йиз суд гьякьюб хьибдийи, фицики Узу сар дарза, Узухъди Узу гьау Адашра хъазухъ. 17Хъа ичв Къанундиъра, кьюр касдин шагьидвалихъ хъугъуз хай шул, кӀури дибикӀнавучв. 18Учу кьюр шагьид вуча: Узу ва Узу гьау Адаш.
19– Хъа Яв Адаш наан аяв? – гьерху дурари.
– Учвуз я Узу, я Йиз Адаш аьгъдарчвуз, – гъапи Исайи. – Эгер учвуз Узу аьгъяйиш, Йиз Адашра аьгъю шуйчвуз.
20Му гафариинди Исайи, Аллагьдин хулан гьяятдиъ, садакьйир иврушван гъвалахъ дийигъну, аьгъювалар улупури, гъапнийи. Гьаци вушра Думу сарира гъидисундайи, гьаз гъапиш Дугъан сяаьт сабан улубкьнадайи.
Жугьдар Исайин гъавриъ ахърадар
21Ва хъана Исайи гъапнийи:
– Багарихьди Узу гъягъюраза. Учву Узу агуз хъюгъдичва, аммаки ичв гунгьариъди йихидичву. Узу гъушушваз, учвхьан гъюз хьибдар.
22– «Узу гъушушваз учвхьан гъюз хьибдар», – гъапиган, Мугъан фу кӀуру гаф вуйкӀан? – кӀурайи жугьдари чиб-чпигъ. – Дугъаз Учв йикӀуз ккундайкӀан дарш?
23Исайи гъапи:
– Учву исккан вуйи дюнʼяйиан вучва, хъа Узу заълан вуза. Учву гьаму дюнʼяйиан вучва, хъа Узу му дюнʼяйиан дарза. 24Узу учвуз гъапунзачвуз:
«Гунгьариъди йихидичву!» Узу Гьарганур Аллагь вуйибдихъ эгер учву хътругъиш, учву вари гунгьариъди йихидичву!
25– Гьаци вуйиган Уву Фуж вува? – гьерхру дурари.
– Узу учвуз гьарган бинайиан кӀурайи Гьадмунур вуза, – жаваб туву Исайи. – 26Учвкан, Узхьан гизафдар пуз ва ичв суд апӀуз шуйзухьан. Амма Узу, гьаму дюнʼяйиз Узу Гьаурихьан фу гъеебхьнуш, анжагъ гьадму кӀураза, хъа Узу Гьаур гьякьлу ву.
27Дугъу Чан Адашдикан кӀурайибдин дурар гъавриъ ахъундайи.
28Исайи давам гъапӀу:
– Учву Инсаниятдин Бай за гъапӀиган, гьадмуган аьгъю хьибдичвуз, Узу Гьарганур вуйиб, ва Узу Йиз Узлан фукӀара дарапӀруб: Узу анжагъ Адашди улупуб кӀураза. 29Хъа Узу Гьаур Узухьди хьа – Дугъу Узу сарди гъитнадар, фицики Узу гьарган Дугъаз ккуниб апӀураза.
30Гьаму гафарилантина Дугъахъ гизафдар хъугънийи.
Исайи гунгьариккан азад хьуваликан пуб
31Хъасин Исайи Чахъ хъугънайи жугьдариз гъапи:
– Эгер учву Йиз Гаф учвуъ гъюбхиш, гьякьикьи Йиз ученикар хьидичва, 32гьадмуган учвуз гьякьвал аьгъю хьибдичвуз ва диди учву азад апӀиди.
33– Учу Ибрагьимдин наслар вуча ва саб вахтнара саризра лукӀар гъашидар дарча! – гъапнийи дурари. – «Азад хьидичва» кӀуруган, гьамдиинди Увуз фу пуз ккунди авуз?
34Исайи дурариз жаваб туву:
– Гьякьлу вуйи гьякь кӀуразачвуз: гьарсар шли гунагь апӀураш, гунагьвалин лукӀ ву. 35ЛукӀ гьарган (девлетуйин) хизандиъ яшамиш шули гъузидар, хъа бай душваъ яшамиш гьарган хьиди. 36Фила учвуз Бали азадвал тувиш, анжагъ гьадмуган учву азад адмийир хьидичва. 37Учву Ибрагьимдин тум вуйиб Узуз аьгъязуз, гьаци вушра учвуз Узу йикӀуз ккундачвуз, фицики Йиз Гаф учвуъ убчӀвнадар. 38Учвуз Йиз Адашдихь гъябкъюбдикан кӀуразачвуз, хъа учву учвуз ичв адашдикан гъеебхьуб тамам апӀурачва.
39– Ич адаш – Ибрагьим! – жаваб туву дурари.
Исайи дурариз кӀуру:
– Эгена учву Ибрагьимдин чан гьякь баяр вуйиш, учву Ибрагьимдиси апӀрийчва. 40Хъа учвуз Узу йикӀуз ккундачвуз. Чаз Аллагьдикан деебхьнайи гьякьвал учвуз улупурайи Гьадму Адми йикӀуз ккундачвуз! Гьамци гъапӀнийинхъа Ибрагьимди?! 41Ваъ, учву ичв адашдиси апӀурачва!
– Учу Къанундиинди вуйи баяр вуча! – наразивалиъ ахъу дурар. – Ич сар адаш вуйич – Аллагь!
42Исайи дурариз жаваб туву:
– Эгер ичв адаш Аллагь вуйиш, учвуз Узу ккунди хьидийчвуз, фицики Узу Аллагьдихьан гъафир вуза ва Гьадгъахьна гъягъюраза. Узу Узхьан дуфнадарзаки – Гьадгъу Узу гьаъну. 43Учву Йиз Гаф кьабул апӀурадарчва? 44Ичв адаш иблис ву, ва учву ичв адашдин интӀи тӀулар тамам апӀуз шад вучва. Хъа думу гьарган адмийир пуч апӀрур ву, ва дугъаз гьякьвал душман ву, гьаз гъапиш дугъаъ гьякьвал адар. Дугъу кучӀал апӀурайиган, кучӀал дугъан багъри чӀал ву, гьаз гъапиш думу кучӀлях ву ва кучӀларин адаш ву. 45Хъа Узу учвуз гьякь кӀуруган, учву Узухъ хъугърадарчва. 46Учвкан шлихьан Узу, гунагьвал апӀурава, кӀури, дисуз шул? Ва эгер Узу учвуз гьякь кӀураш, гьаз учву Узухъ хъугърадарчва? 47Фуж Аллагьдинур вуш, гьадму Аллагьдин гафарихъ хъпехъура. Учву Аллагьдин даруган, гьаддиз учву Узухъ хъпехъурадарчва.
Исайи Чакан ва Ибрагьимдикан пуб
48– Дюзди кӀура учухь: Уву самариялужви вува ва амрихъан душнайир вува, – гъапи Дугъаз жугьдари.
49Исайи жаваб туву:
– Узу амрихъан душнадарза: Узу Йиз Адашдин гьюрмат уьбхюраза, хъа учву Узу нянайиз хурачва. 50Узу Узуз аднахъ хъергнайир дарза, Жарар а – Гьадмунур ву хъергнайир ва суд АпӀрур. 51Гьякьлу вуйи гьякь кӀуразачвуз: шли Йиз Гаф чаъ гъюбхиш, аьсрариъ гьацириз аьжал рябкъидар.
52– Магьа учуз гьамус якьинтӀан аьгъю гъабхьунчуз, Уву амрихъан душнайир вуйиб, – жаваб туву дурари. – Ибрагьим гъакӀну, пайгъамбрарра гъийихну. Хъа Уву: «Шли Йиз Гаф чаъ гъюбхиш, аьсрариъ гьацириз аьжал рябкъидар!» кӀурава. 53Дугъриданна дукӀнайи ич аба ИбрагьимтӀан Уву артухъур вуна? Ясана – гъийиху пайгъамбрартӀан? Хъа Уву Фуж вуди гьисаб апӀурава?
54Исайи жаваб туву:
– Эгер Узу Йиз ад апӀураш, Йиз ад фукӀара дар. Хъа Узу Йиз Адашди адлу апӀура – учву ичв Аллагь вуйич КӀурайири. 55Учвуз Думу гьич саб вахтнара аьгъюр дайчвуз, хъа Узуз Думу аьгъязуз. Эгер Узуз Думу аьгъюр дарзуз, гъапнийиш, Узура учвусир кучӀлях вуди гъахьнухьидийи. Хъа Узуз Думу аьгъязуз ва Узу Дугъан гафниин алза. 56Ичв аба Ибрагьим Узу дюнʼяйиз гъюру йигъ рябкъидиз пну, шадвали ацӀру. Дугъаз му йигъ гъябкъну ва шадра гъахьну.
57– Яв сабан хьуцӀур йискьан дубхьнадарив, хъа Увуз Ибрагьим гъяркъюнвуз?! – чӀигъар апӀуз хъюгъю жугьдари.
58Исайи жаваб туву:
– Гьякьлу вуйи гьякь кӀуразачвуз: Ибрагьим хьайиз Узу Айир ва Вуйир вуза.
59Гьадмуган дурар, Исайиз йивуз, гъванарихъан хъчӀихуру. Саки Иса гьитӀикӀуру ва гьадрарин кьялгъянтина Аллагьдин хулʼан удучӀвуру.
Nu markerat:
Югьан 8: ТабГК
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Институт перевода Библии, 2010, 2013, 2016, 2018, 2023
