Югьан 7
7
Иса машквраз гъягъбакан
1Дидхъантина Иса Галилей уьлкейиъ лицури гъахьну, гьаз гъапиш Дугъаз Ягьудия уьлкейиз гъягъюз ккунди адайи, фицики душваъ Думу жугьдарикан бязидариз йикӀуз ккунди айи.
2Гьадму вахтна жугьдарин Пажарин машквар багахь шулайи. 3Ва гьаддиз Исайин чвйири дугъаз кӀуру:
– Уву мушвʼан, Уву апӀурайи ляхнар Яв ученикаризра рякъруси, Ягьудия уьлкейиз машквраз гъарах. 4Сарира чан гьунарар жиниди апӀури шулдар. Гьарсариз ккунду чибкан адмийириз аьгъю дубхьну. Хъа Уву гьацисдар гьунарар апӀураваки, гъит Увкан вари дюнʼяйиз аьгъю ибшри!
5Дугъан чвйиркьан Дугъахъ хъугъри гъахьундар.
6Исайи дурариз кӀуру:
– Йиз вахт мегьел гъафундар, хъа ичв фуну вахтна вушра хай шуличв. 7Му дюнʼяйихьан учву даккун апӀуз хьибдар, хъа Узу даккунди ву, фицики Узу дидин вари ляхнар писдар, гунагьвалиндар ву, кӀураза. 8Хъа машквраз учву гъарахай. Узу думу машквраз гъягъидарза, Йиз вахт мегьел улубкьнадар.
9Гьамци дупну, Иса Галилей уьлкейиъ гъузру. 10Саки Чан чвйир машквраз гъушхъан, Исара жиниди гьадина гъягъюру.
11Жугьдарин гьякимари машквран вахтна Иса агуйи. «Наан а гьадму Адми?» – гьерхуйи дурари. 12Дугъкан халкьдин арайиъ гизаф гьюжатар ахьнайи: садари, Думу ужур ву, хъа тмундари, Дугъу халкь алдатмиш апӀура, кӀуйи. 13Амма гьюкумдрарихьан гучӀбу, Дугъкан ачухъди сарира кӀурдайи.
Исайи Аллагьдин хулаъ аьгъювалар улупуб
14Иса Аллагьдин хулан гьяятдиз дуфну, аьгъювалар улупуз хъюгъган, машквран гьацӀ вахт дубшнайи. 15Жугьдар мидʼин мюгьтал духьнайи.
– Мугъаз наънан гьамкьан аьгъяйкӀан? – кӀуйи дурари. – Дугъу наанкӀа дурхнадар, аьхир.
16Исайи гъапи:
– Йиз аьгъювалар Йиздар дар, хъа Узу Гьауриндар ву. 17Шлиз Дугъан ният тамам апӀуз ккундуш, гьацириз гьаму аьгъюваларикан аьгъю хьибди, дурар Аллагьдихьан вуш, даршиш Узу Йиз Узкан кӀурайидар вуш. 18Шли чан-чахьан кӀураш, гьацири чаз хусуси ад гъазанмиш апӀура. Хъа шли чав гьауриз ад гъазанмиш апӀураш, гьацири дугъриди кӀура, ва дугъан кӀваъ кучӀал адар. 19Учвуз Къанун Мусайи тувну, гьаци даринхъа? Гьаци вушра, учвкан сарира Къанун тамам апӀурадар. Узу фтин бадали йикӀуз ккундучвуз?
20– Уву амрихъан душнава! – жаваб туву гъварч духьнайидари. – Шлиз Уву йикӀуз ккунди а?
21Исайи дурариз жаваб вуди гъапи:
– Узу саб аьламат улупайизра, учву вари мюгьтал духьначва. 22Мусайи учвуз суннат апӀин гъапну, дугъридан, думу Мусайихьан дар, хъа ата-бабйириланмина дуфнайиб ву, ва учву султ йигъанра кмиди суннат апӀури шулчва. 23Мусайин Къанун дючӀрюбгъбан бадали, учву султ йигъанра адмийин суннат апӀураш, Узу султ йигъан адми сагъ гъапӀну кӀури, Узʼин хъял гьаз иливначва? 24Зиълан лишнариинди суд мапӀанай, суд апӀинай дугъри вуйи суддиинди!
Адмийири Иса Месигь вуди гьисаб апӀуб
25Ерусалимдиан вуйи бязи агьлари кӀуйи:
– Му ихь гьякимари йикӀуз ккайи Адми даринхъа? 26Лигайчва, Дугъу ачухъди аьгъювалар улупура ва сарира Дугъаз фукӀара кӀурадар. Мумкин ву, гьякимариз Думу дугъриданра Месигь вуйиб аьгъю гъабхьнушул? 27Амма ухьуз, Гьадму Кас наънан вуш, аьгъяхьуз. Хъа Месигь гъафиган, саризра аьгъю хьидар, Думу наънан вуш.
28Ва гьадмуган, Аллагьдин хулаъ аьгъювалар улупурайиган, Исайи аьхю сесниинди гъапи:
– Узура аьгъячвуз, Узу наънан вушра, аьгъячвуз. Гьаци вушра Узу Узхьан гъафир дарза. Шли Узу гьаънуш, Гьадгъахъ хъугъуз хай шулу, аммаки Думу учвуз аьгъдарчвуз. 29Хъа Думу Узуз аьгъязуз, фицики Узу Гьадгъухьан гъафир вуза ва Узу Гьадгъу гьаъну.
30Гьадмуган дурариз Думу дисуз ккун шулу, амма сарира Дугъак кучундар, гьаз гъапиш Дугъан сяаьт дуфнадайи. 31Халкьдикан гизафдар Дугъахъ хъугънийи ва дурари кӀуйи: «Месигь гъафиган, Дугъхьан Гьаму КасдихьантӀан артухъ аьламатар улупуз шулинхъа?»
Жугьдар Иса дисуз чалишмиш хьуб
32Исайикан халкьдин арайиъ гьамцдар гафар-чӀалар деерхьну, фарисйирина жугьдарин аьхюну маллйири Думу дисуз Аллагьдин хулан гъаравлар гьаъру.
33Гьадму вахтна Исайи халкьдиз кӀурайи:
– СацӀибсана Узу учвухъди гъуздиза, хъасин Узу мина Гьаурихьна хътакидиза. 34Узухъ лицури хьидичва, хъа дихъидарчвуз, гьаз гъапиш учвхьан Узу наан шулуш, гьадина гъюз хьибдарчвухьан.
35Жугьдари чпин арайиъ кӀури гъахьну:
– Думу, ухьхьан агуз даршлуси, наана гъягъюз ккайкӀан? Белки Дугъаз, Грек уьлкейин шагьрариз душну, дурарин арайиъ яшамиш шулайи ихь агьалйириз вая грекариз аьгъювалар улупуз ккунди ашул гьа? 36Дугъу ухьуз: «Узу агури хьидичва, хъа дихъидарчвуз», ва «Узу наан шулуш, гьадина гъюз хьибдарчвухьан», – гъапи гафариинди Мугъаз фу пуз ккунди айкӀан?
Исайи Гирами Рюгьнакан пувал
37Машкврин аьхиримжи, вартӀан машгьур йигъан Исайи, гъудужвну, аьхю дихниинди кӀуру:
– Фуж дахаргнаш, гъит гьадму Узухьна гъюри! 38Ва фуж Узухъ хъугъраш, гъит гьадгъу убхъри! БикӀбариъ кӀура: «Дугъан кӀваан чӀиви штарин нирар ахмиш хьиди».
39Исайи гьамци Гирами Рюгьнакан гъапнийи. Думу Исайихъ хъугънайидариз рукьиди. Думу вахтназ Гирами Рюгь мегьел тувну адайи, гьаз гъапиш Иса сабан Аллагьдин аднаъ ахънадайи.
Жугьдарин улихь-кӀулиъ айидар Исайихъ хътругъуб
40Му гафар гъеерхьиган, халкьдин арайиан сякьюдари кӀуру:
– Му дугъриданра Пайгъамбар ву.
Хъа жарадари кӀуйи:
– Му Месигь ву!
41– Галилей уьлкейиан Месигь гъюб мумкин вуйинхъа? – къаршуди кӀуйи дурариз. – 42Гирами китабариъ, Месигь Давудрин насликан ва Давуд бабкан гъахьи Вифлеем шагьриъ Думу бабкан хьиди, кӀура.
43Гьамци Исайин гьякьнаан халкьдин арайиъ гьюжат абхънийи. 44Дурарикан бязидариз Иса дисуз ккун гъабхьнийи, аммаки сарира Дугъʼина хил за гъапӀундайи.
45Хъа Иса дисуз гьау Аллагьдин хулан гъаравлар жугьдарин аьхюну маллйирихьна ва фарисйирихьна кьяляхъ хътакнийи.
– Думу гьаз дидисну гъахундарчва? – гьерху дурари гьаъдарихьан.
46– Гьадму Касдиси мегьел гьич сарира саб вахтнара кӀури гъахьундар! – жаваб тувнийи гъаравлари.
47– Гьаяман, Дугъу учвура алдатмиш гъапӀуншалчву гьа? – гъапи дурариз фарисйири. – 48Гьюкумдрарикан Дугъахъ гьич фужкӀа хъугънинхъа? Ясана фарисйирикан фужкӀа? 49Дугъахъ хъугърудар Къанун аьгъдру авамар ву ва дурар Аллагьдин нянайикк ккайидар ву!
50Хъа дурарин арайиъ улихьна вахтари Исайихьна гъафи Никодим кӀуру кас айи, ва дугъу дурариз гъапи:
51– Ихь Къанунди ихтияр туврайинхъа, сабан адмийихъ хъпебехъди ва дугъу ву тахсир гъапӀнуш аьгъю дарапӀди, дугъан суд апӀуз?
52– Гьаяман, увура Галилей уьлкейиан вушала гьа? – гъапи дурари. – Уву Гирами бикӀбар аьгъю апӀин ва яв уву гъавриъ ахъдива Галилей уьлкейиъ гьич сар пайгъамбарра бабкан дархьуб.
53Ва дурар алдагъну хъасин хулариз гъягъюру.
Nu markerat:
Югьан 7: ТабГК
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Институт перевода Библии, 2010, 2013, 2016, 2018, 2023
