JOHAN 12
12
Bethani Nyu Terzü Pe Jisu Yünkethyü
(Mt 26:6-13; Mk 14:3-9)
1Lo Jisu le nkenkechwi nga jon tsero le bin zun kethyü ka a-le kerika kesinyu dan nyu thyü nrhün keshü Lazar le kebin rünyi Bethani nyu ryülo. 2Lo anyugun le tsüje a-genyu me zen-o ho; tson-o Martha le tha pe mejün; ai Lazar we me zen-o bin-o ho kethyünyu thyü. 3Tsükatsü Maria le Nard pe kethyü terzü a-min ketsen sher peha pen ryüo pe Jisu pha yünshü njüo a-npvü a-shün pe Jisu pha shon. Tsontsin ka tsünyu terzü rün tsü le süla. 4Ai Iskariot Judas tsekethyü senthyükelonyu dan nyu nme hisiki Jisu tenshü nrün gü le zoshü. 5“Nyuthyüo hilo pe deneri tsishen heilo njüo pe rhokedyü nyu tsüshü mvula?” 6Ai a-le tha kendinyu phin kerüchün genyu jo hi zo mvule, a-le kerühu nyu lo a-ben ka raka khin le bin-o tha pe tsünyu keshü khilo lotse kehü genyu.
7Tsüselo Jisu le, “A-no a-kesha thyülo, a-le a kesun nyü genyu ketsen shü laso. 8Kechamvule kendinyu le hagun zen zin bin hünyo; ai awe hagun zen zin binlo keho genyu.”
Lazar Dushvukela Rhiso Kela
9Tson-o Judanyu temi danda le Jisu le tsünyu bin tsekethyü shalo njüo Jisu nri titse kethyü ntimvule a-le kesinyu dan nyu thyü nrhünni kelo Lazar-e nrishü titseo tsünyu ryü. 10Ai peshükedanyu dan le Lazar ko dushvu kela ndo sola. 11Lo tsüle a-genyu Judanyu kechon le Jisu tenyenlo kela genyu.
Jisu Le Zankechwi Thyüo Jerusalem Nyu Keyü
(Mt 21:1-11; Mk 11:1-11; Lk 19:28-40)
12Tsüsinyü nga nyu ryü kebin temi kechon le Jisu le Jerusalem nyu ryü kezhü shalo. 13Lo anyugun le kvunyü sen-o Jisu teno titseo chwigü nra sen-o, “Hosana, Npugü zan sen-o ryü kezhü gü Israel nyu Rajagü no kvukelo gü thyü lolo!” tsonshü.
14Lo tsükitsü Jisu le gada nme hyulo njüo a-ge binlo; tsü rüla nduka,
15“Sion Nyugi, nle nshvu nya chi!
Hire, n rajagü le gada nme ge
bin-o ryü zhü,” tse kethyü thu njü nyo.
16Jisu le senthyükelonyu dan le nyeka we tsü rüchünlo mvu; ai Jisu le zankechwi thyükelo siki a-rüla jo tsü thu kenjü lo mele a-ge tha thyükeshü tsü rüchünlo.
17Tson-o a-le sika nyu Lazar kolo njüo kesinyu dan nyu thyü nrhünni kelo keshanyu temi dan le Jisu no zankechwi thyükelo higü thyüshü. 18Tsügenyu temi dan le a-zen keteno; kechamvule a-le tha zansü hi thyükeshü shakelo genyu. 19Farisinyu le anyugun npvü kenthon-o, “Hire, ngun le thame thyülo nrün ndi sele; kazü gü le a-sithen tin laso,” tson sola.
Griknyu dan me Le Jisu Fü Keryü
20Tson-o rüshvu titseo nga nyu keryü nyu dan nyu Griknyu ko peha le hü. 21Lo temi tsüdan le tsonchü sen-o Galil lojvü Betsaida rünyi nyu bin kehü Filip ki ryüo a-ka, “Kedagü, agun le Jisu shwishü nyü hü nle.”
22Lo Filip le ryüo Andria ka zoshü. Andria lo Filip au le gü Jisu ka zoshü.
23Lo Jisu le au ka, “Temi Nyugü le zankechwi thyülo nrün tegi kevüja güle ryü bin laso. 24Ale hagun ka zo tsentsü shüti, shye pen me le kazü nyu chetsüo sishü mvu yatselo a-npvü bin kehü gwünzin, ai sishülo a-sha nsha salo hünyo. 25Temi lihigüe a-keyhun so pe a-hon thyülo titse kehünyu le nke lati; ai temi lihigüe kazü hinyu a-keyhun so hü kemvunyu le pe kethonthen kerhün nyu shülo ti. 26Temi lihigüe a lothyü kenyünyu no a sithenlo chi; tsonlo yatselo a lokethyünyue no abin ka binlo ti. Temi lihigüe a lothyü kehünyu Pvügüe tsünyu soti.
Temi Nyugü Penso Mvulokeshvu
27“Ntsoka we anyun keyhunkerunlo laso; tsügenyu ale nyu zo semon? Apvü, tegikevüja hinyu a kenilo lo. Ai tegikevüja higenyu ale hinyu ryü. 28Apvü, N zan no zankechwi gü thyülo!”
Tsontsin tsangge thakhwen nme le, “Ale kerikae a-zan no chwishü, lo chwini shüti,” tson ryü. 29Tsügenyu tsüka kebin temi dan le jo tsü shashüo, “Tsang le senshü sele; kechanyu nme le zo, tsangge lokethyünyu nme le a-nthonshü kethyü le!” tsonso.
30Lo Jisu le zonishü, “Jo higü hile a genyu ryü mvule hagun genyu ryü le. 31Ntsoka kazü hi ketso bin laso; lo ntsoka kazü nyu kedagü hüla ti. 32Lo awe kazü hinyu apen solo yatselo, anpvü temi aphu ten sen-o aki ryü loti.” 33A-le nyu si thyüo si tiyo tsekethyü tsinshü nrün genyu a-le jo hi zoshü.
34Tsontsin temi dan le a-ka, “Agun le tejvü nyu sha kelo le Khrista we kethonthen bin hü tse shalo, lo nle nyuthyüo, ‘Temi Nyugü penso mvulo shvu,’ tse hü nla? Temi Nyugü hile segü la?”
35Tsügenyu Jisu le anyugun ka, “Keben gü le gwüngwa nyesin hagun zen bin loho so.Kezün no hagun ge ryü mvulo titse kethyü genyu keben gü kebin ka tinchwilo, kechamvule kezün nyu tsonchü kehünyu le a-le dikipon güzhü yo sha hümvu. 36Keben gü nyenyu thyülo nrün genyu keben gü le bin ketse ka keben gü tenyenlo.” Jisu le jo hi zoshüo anyugun kebu tinla.
Judanyu Le Jisu Tenyenmvu Kela
37A-le himhundyü ki anyugun mhundyü nyu tha ndunkethyü kechon thyüshüe anyugun le a-tenyenlo mvula. 38Tson-o Isaya sidyükeshagü le nduka,
“Npugü, segü le ajo tenyenlo
la?
Lo Npugü kekvu pe senyu mhundyü
ka hishü la?” tson zokeshü jo tsü penlo so.
39Tsügenyu anyugun le tenyenlo nrün ndila; lo Isaya le nduka kezo le:
40“Anyugun no anyugun
yhütyü pe hyulo,
lo anyugun nyun pe
rüchünlo,
tson-o raniryüo ano anyugun
thyü ngwashü nrün kenshvu genyu,
A-le anyugun yhütyü thyü pe
no pola,
lo anyugun nyun-e thyü pe
no rü laso.” tson-e sin njü nyo.
41Isaya le Jisu zankechwi kehyu genyu a-rüla zo-o johi zokeshü.
42Ai kechanyu dan nyue kechon le a-tenyenlo; ai Farisinyu genyu kehun ka nyu anyugun zan nke kela kenshvu genyu anyugun le zomvu la. 43Kechamvule anyugun le Sunggigü no anyugun keshwen nyeki temi no anyugun keshwen we anyugun kenyü kvu kela genyu.
Jisu Jo Le Me Nmu Nrün
44Lo Jisu le nra sen-o, “Temi lihigüe a tenyen kehünyu le a ntimvule a nikeshügü tenyen hünyo. 45Lo temi lihigüe ahyu kehünyu le a nikeshü gü hyu hünyo. 46Temi lihigüe a tenyen kehünyu, tsünyu no kezün nyu bin mvulo nrün genyu ale keben thyüo kazü hinyu ryü. 47Lo temi lihigüe ajo shalo njüo zenlo hümvu yatselo,ale a-nkhinla hümvu; ale kazü hi nkhinla titse ryü mvule, kazü gü kenilo titse ryü kethyü genyu. 48Temi lihigüe a kenila lo ajo zenlo hü kemvunyu le tsünyu kenkhin nme le bin nyo; ale zo keshü tsüle jon kekhin nyü tsünyu nmu ti. 49Kechamvule ale a npvü zo tsüryü mvu; ai a nikeshü Pvügü le ano nyu zoshü mvulo shvuyo lo nyu tse kethyü pe zoshü tiyo pe aka zoshü laso. 50Lo a-jo hokeshü hile kethonthen kerhün jo tsekethyü ale shabin nyo. Lo ale jozo kehü hile Pvügü le pe zo keshü hontse ale zo hünyo.”
Nu markerat:
JOHAN 12: REGSBSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
