THILTHAWHAI 16
16
Lustraa inthawkin Timothein Paula a zui
1Chun, Derbe le Lustraa chun a fe bawk a; chun, chutaka chun, a hming Timothe inchûktir pakhat a um; ama chu ringtu Juda nuhmei naupa a na, a pa ruok chu Grik a nih;
2Lustra le Ikonioma unau umhai chun, ama chu an inpâk hlak a.
3Paulain ama chu a kuoma fe ve dingin a dit a; chuongchun, chu tienga Juda umhai lei chun, a ser a tanpêk a, a pa chu Grik a nih ti an hriet vawng sih a.
4Chun, khaw tinah an fe malamin Jerusalema tirko le upa umhai thurêl kha zâwm dingin unauhai kuomah an pêk pei a.
5Chuongchun, kohranhai chu ringnaa chun an det tah a, ni tin an pung ta deu deu a.
Makedoniaa fe dinga kona
6Chun, Thlarau Inthiengin Asia rama thu hril a khap leiin Phrugia le Galati ram chu an fang suok a;
7chun, Musia ram kâwl an tlungin Bethunia ramah lût an tum a, nisienlakhawm, Isu Thlarauin a phal si nawh.
8Chuongchun, Musia ram chu an khêl a, Troasah an fe thla tah a.
9Chun, zânah Paulain a mang angin Makedonia rama mi mi pakhat ngîrin, “Makedonia ramah hung kai la, mi ṭhangpui rawh,” tia ngên ngênin a hmuh a.
10Chun, chu mang chu a mang zo phingleh, Makedonia rama chun fe kan tum tah a, an kuoma Chanchin Ṭha hril dingin Pathienin a mi ko ti kan hriet a.
Paula le Sila, Philippi khuoah
11Chun, Troasa inthawk chun lawngin kan suok a, tluongtakin Samotrakiah kan riek a, a zînga chun Neapoliah kan fe nâwk a;
12chun, chutaka inthawk chun Philippiah kan feh a, chu khuo chu Makedonia rama khaw pakhat a nih, chu biela chun khaw pawimaw tak a na, Roma inthawka mi inpêmhai khuo a nih. Chu khuoa chun ni tam rei kan châm a.
Luda piengtharna
13Chun, Châwlniin kul kawtkhâr puo tienga vadung panga, ṭawng- ṭaina hmun ni dinga kan ringa chun kan feh a; chun, kan ṭhunga nuhmei hung khâwmhai kuoma chun thu kan hril a.
14Chun, a hming Luda, puon senduk zawrtu, Thuotira khuoa mi, Pathien betu nuhmei pakhatin kan thu a hriet a; chun Paula thu hril zâwm dingin Lalpa chun a lungril a sukvar tah a.
15Chun, ama le a sûnghaiin baptisma an chang zo chun, “Lalpa ring tak zeta in mi ruot chun, ka inah hung tlung ro,” tiin a mi ngên a mi ngên a, a mi chel tah a.
Khawhri hnawt dawk thu
16Chun, ṭawngṭaina hmuna kan fe lai chun suok nunghâk tû amanih, khawhri aisânthiem zâwlin a mîn tuokpui a, ama chun a aisân lei chun a puhai chu sum tamtak ân hmutir hlak a.
17Ama chun Paula le keini a mi zui a, “Hienghai, sandamna lampui hriltu cheu hi, Achunghnungtak Pathien suokhai an ni hi,” tiin a khêk a.
18Chuong ang chun, ni sâwt rei a thaw hlak a. Chuongchun, Paula chu a lungni ta nawh a, a nghah a, khawhri kuoma chun, “Isu Krista hmingin a sûnga inthawkin suok thu ka pêk che,” a ta. Chun, chu lai tak chun a suok nghâl tah a.
Philippi khuoa Paula le Sila intângna
19Chun, a puhai chun an sum hmuna ân hmang ti an hriet a, Paula le Sila chu an man a, hotuhai hmaah dâwr hmunah an kei lût a.
20Chuongchun, thu rêltuhai kuomah an ṭhuoi a, “Hienghai hi Judahai an na, kan khuo an sukbuoi bêk bêk a,
21dân kan pawm thiengnaw le kan zâwm thiengnaw dâm an hril a, Rom mi kan ni sih a,” an ta.
22Chuongchun, mipuihai khawm chu tirkohai thaw ding chun an hung inthawk veh a, thu rêltuhai chun an puonhai an the thlâkpêk a, hmawla vuok thu an pêk a.
23Chun, vawi tamtak an vuok zoin intângna inah an khum a, a vêngtu kuomah himtaka vêng ding an ti tlat a.
24Chuong ang lâwma thu an pêk leiin rip sûngrilah a khum a, an kehaia chun thing kawl ân buntir a.
25Nisienlakhawm, zân rila chun, Paula le Sila chu Pathien kuomah an ṭawngṭai a, hla an sak a, intânghai chun an ngai a;
26chun, kârloin simkhawleihnuoi nasatakin a hung inhnîng a; chun, kawtkhâr po po chu ân hawng nghâl a, mi tin kawl bunhai chu a hung insût vawng tah a.
27Chun, a vêngtu a ininnghil chu a hung har a, intângna in kawt- khârhai chu inhawngin a hmuh a, intânghai chu an tlân hmang amanih a ta, kâwlhnâm a phawi a, insukhlum a tum a.
28Nisienlakhawm, Paula chu rawl inringtakin a khêk a, “Iengkhawm inlaw naw, kan rêngin hitaka hin kan la um vawng annâwm,” a ta.
29Chun, a vêngtu chun khâwn- varhai a lam a, ân châwm lût a, ṭia inthin pumin Paula le Sila hmaah a bawkkhup a.
30Anni chu a ṭhuoi suok a, “Puhai, sandama um dingin ieng am ka thaw ding?” a ta.
31Chun, anni chun, “Lalpa Isu ring la, chuongchun, sandamin um i tih, nang le i sûnghai leh,” an ta.
32Chun, a kuoma le a ina um po pohai kuoma chun Pathien thu an hril a.
33Chu zân chun, chu lai le le chun, a ṭhuoi a, an vuokna invuolhai chu a sâwpfai a; chun, ama le a sûnghai po po chun baptisma an chang nghâl tah a.
34Chun, a inah a hang ṭhuoi a, fâk ding a pêk a, chun, Pathien an ring leiin, ama chu, a sûnghai po po le chun an hlim ta bêk bêk a.
35Chun, nisa a suok chun rorêltuhai chun, “Kha hai kha insuo rawh,” ti dingin manmihai an tir a.
36Chun, intângna in vêngtu chun, Paula kuomah an thu a hril a, “Rorêltuhai chun insuo ding cheuin mi an hung tir a; chuleiin, tuhin hung suok unla, thlamuongtakin fe ro,” a ta.
37Nisienlakhawm, Paula chun an kuomah, “Rom mi kan ni sih a, kan thiem le kan thiem naw hre loin vântlâng mithmuin an mi vuok a, intângna inah an mi khum a; tuhin inrûkin an mi hnawt suok vei ding a ni maw? Ni der naw ni; anni ngei hung hai sienla mi hung ṭhuoi suok raw hai se,” a ta.
38Chuongchun, manmihai chun, chuong thu chu rorêltuhai kuoma chun an hril a. Chun, Rom mi an nih ti an hriet chun an ṭi tah a.
39An va feh a, an thlêm a, an ṭhuoi suok a, khuoa inthawk chun fe hmang dingin an ngên a.
40Chun, intângna ina inthawk chun an suok a, Luda ina chun an lût a; chun, unauhai chu an hmuh a, an thlamuon a, an suok tah a.
Nu markerat:
THILTHAWHAI 16: HMARCLBSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
