THILTHAWHAI 14
14
Paula le Barnaba Ikoniomah
1Chun, Ikonioma chun Judahai inkhâwmna inah an lût rêl a, thu an hril hlak a, chuongchun, Grik le Juda tamtak khawmin an ring ta rau a.
2Nisienlakhawm, ring nuom naw Judahaiin Jentailhai lungril an infui a, unauhai chu an intheidatir a.
3Chuleiin, Lalpa thu huoitaka hrilin chutaka chun sâwt rei an um a, ama chun, inchikna le thilmakhai an kuta inthawtirin, a lunginsiet thu ân hriettir hlak a.
4Chun, khuoa mipuihai chu an inkhing tah a; aṭhenin Judahai chu an ṭan a; aṭhenin tirkohai chu.
5Chun, Jentailhai, Judahai, an hotuhai le chun, tirkohai chu inzakumtaka siem le lunga dêng tuma an thaw ding laiin anni chun an lo hriet a,
6Lukaoni ram bawka chun, Lustra le Derbe khuoa le a vêl ramhaia chun an tlân hmang a;
7chuonga chun, Chanchin Ṭha an hril pei a.
Lustra khuoah Paula lungin an dêng
8Chun, Lustraa chun ke zeng tû amanih a ṭhung hlak a, a pieng tîra inthawk keinbai hrim a na, kein a lâwn ngai nawh a.
9Ama chun, Paula thu hril a ngai a, chun, Paula chun, ama chu a en zing a, damna dingin ringna a nei ti a hriet a,
10rawl inringtakin, “I kein ngîr tlûn rawh,” a ta. Chun, ama chu ân châwm tho a, kein a lâwn tah a.
11Chun, mipuihaiin Paula thil- thaw chu an hmu phingleh, Lukaoni ṭawngin inringtakin, “Pathienhai chu mihriem angin ei kuomah an hung ṭum tah a ni hi!” an ta.
12Chun, Barnaba chu, “Jupitar#Jupitar (Roman), Zeus (Gk.)” an tih a, Paula chu, thu hriltu lem a ni leiin, “Merkuri#Merkuri (Roman), Hermes (Gk.)” an tih a.
13Chun, Jupitar biekin khaw- hnâwma um chu, a thiempu chun sebâwng chalhai le, pâr ṭhihrui limhai, kawtkhâr kâwlah a hung lâk a, mipuihai le chun biekna dingin that an tum a.
14Nisienlakhawm, tirko Barnaba le Paula chun, chu chu an hriet phing- leh, an puon an keithlêr a, mipui lai chun an inchâwm lût a, an khêk a.
15“Puhai, iengdinga hieng thilhai hi in thaw am a na? Keini khawm in nungchang ang put mihriem kan ni hi; hieng thil teplohai hi in nghatsan a, vân hai, hnuoi hai, tuisuoriet hai, an sûnga um po pohai siemtu Pathien hring kuoma chun in hung kawpna dingin Chanchin Ṭha kan hung intlun cheu a ni hi.
16Chu Pathien chun, tienlaiin hnam tin mâni lampui seng hraw a phal hlak a.
17Nisienlakhawm, ama inhriettir- na um loin ân siem ngai nawh. Chuongchun, thil a thaw ṭha hlak a, vâna inthawka ruohai le kum ṭhat kumhai a pêk cheu a, in lungril fâk ding le lâwmnain a suktlaipêk hlak cheu kha,” an ta.
18Chun, chuong thu chun, mipuihaiin anni biekna dinga ran an that ding chu an khap zo hrâm a.
19Nisienlakhawm, Antiokei le Ikonioma mi Juda tuhai amanih chutaka chun an hung a, mipuihai chu an zâwr thlûk tah a; chuongchun, Paula chu lungin an dêng a, thia an ring leiin khuoa inthawk chu an hnûk dawk tah a.
20Nisienlakhawm, inchûktirhai chu a vêla an ngîr laiin, a hung tho a, khuoa chun a lût nâwk tah a. Chun, a zînga chun Barnaba leh Derbeah an fe tah a.
21Chu khuohai kuoma chun, Chanchin Ṭha an hril a, inchûktir tamtak an siem hnungin Lustraa hai, Ikonioma hai, Antiokeia hai, an kîr nâwk a.
22“Rinum tamtak tuorin Pathien ramah ei lût ding a ni hrim a nih,” tiin inchûktirhai lungril an sukdet a, ringnaa chun um zing dingin an infui a.
23Chun, kohran tinah upahai an ruot pêk pei a, bu nghei puma an ṭawngṭai zoin, an ring Lalpa kuoma chun an inkawltir pei a.
Suria rama Antiokeiah an kîr nâwk
24Chun, Pisidia ram chu an fang suok a, Pamphulia ram chu an tlung a.
25Chun, Pergaa thu an hril zoin Attaliaah an zu feh a;
26chutaka inthawk chun lawngin an suok a, Antiokei chu an hung tlung nâwk tah a, chu chu a thil thaw zo ta chu thaw dinga unauhaiin Pathien lunginsietna inkawltira an suokna kha a nih.
27Chun, an tlung hnungin ko- hranhai chu an ko khâwm a, Pathienin anni hmanga, thil a thawhai po po le, Jentailhai ta dinga ringna kawtkhâr a hawngpêkziehai chu an hril a.
28Inchûktirhai lai chun sâwt rei an um tah a.
Nu markerat:
THILTHAWHAI 14: HMARCLBSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
