SAN MATEO 17

An Jesús tatamilh

(Mr. 9:2-13; Lc. 9:28-36)

1La'achaxancha wilhchan la'pusli, an Jesús jat'a'alhcha tanchun talhman a'stitawk'a an Pedro chi ixt'uyunk'an yu wa lhit'ala'awnin, Jacobo chi Juan, wa ix'akstuk'an. 2La ix'ukxlakapuchak'an yu'uncha, an Jesús, tapaxalh, an ix'ukxpu wa xlimjcha walh, tacha an wilhchan, chi an ixla'ch'it wa sut'ut'ucha walh, tacha an jatunkunu'. 3Chi tatalakasulhcha an Moisés chi an Elías, ixtat'achiwiniycha an Jesús. 4An Pedro juniy an Jesús:

―Jamach'alhkat, Jesús, oxi li ani ikt'awnaw, li la'a'iy akyawya a'at'utu yu wa jach'itin cha'a': a'atam mi anucha, chi a'atam ix'anucha a Moisés, chi a'atam ix'anucha an Elías.

5Chunchaka ixnawt'ajun, walh jala'atanchanulhcha la'atam jataputs'i, wa xlimjnik'acha, chi an laka jataputs'i ixchiwinkancha, ixnawkan:

―Yucha aniya yu ikmapayniy kinTs'alh, oxi iklhiwilay, k'a'asmatnit'iti yucha.

6Akxni chunchacha ta'asmatlhi an ixt'alhtanan an Jesús, tala'ta'antatawilhcha, sawalhcha ixtalaktalhanan. 7Pus an Jesús, stalh jala'alh ixjalak'aych'apaycha, jajuniy:

―K'alakt'ayatcha jant'u k'alakt'alhanant'it.

8Akxni talaktalakatiyawcho'olhcha wa yucha an Jesuscha ixtala'ts'incho'oy.

9Chi akxni tata'alhtaju'cho'olhcha an a'stitawk'a an Jesús, jajuniy:

―Jant'u xamat'i k'a'unit t'ach'a an la'ts'int'it, sta akxni akla'awcho'oya kit'in yu ikwalh isTs'alh Lapanak.

10Wa chuncha an ixt'alhtanan an Jesús, talhisakmiy tajuniy:

―¿Pus tasu li an xamaestrojnin lhamap'a'sin tanajun li task'iniya li yucha an Eliasi p'ulhnaj kamilhi?

11Yucha jajuniy:

―Chun sawalh, an Elías p'ulhnaja kamina', kamina mala'asijnini chux an tanlhun. 12Pero klajunaw yucha kilachilhcha, pero jantu tamispalh, stak ta'ilhtulhi wa tani ta'ilhtuputulhcha, wachu chuni kata'ilhtuya an isTs'alh Lapanak.

13Pus akxni an ixt'alhtanan talhimacha'xalhi li yucha an jama'paxanaj Juani ixjalhixa'alay.

Ts'alh yu wa ixla'apaxt'o'a makxkay'un

(Mr. 9:14-29; Lc. 9:37-43)

14Akxni tacha'alhcha tan lhilhuw ts'anaks ixlakyakalh, pumatam lapanak la'cha'alh an Jesús, tatso'ottanilhcha, juniy:

15―Jamach'alhkat Jesús, lamapaynin ak'ink'uch'uninka an kints'alh, mu wa sawalh niy chi sawalhcha ma'alh'ajnan, a'lhuwcha ta'a'tay laka jikmi chi lakxkan. 16Yucha amint'alhtanani xajkalhiminita, pero jantu lay tak'uch'uy.

17An Jesús najun:

―¡Yu ch'away t'awnat jant'u jak'iklak'a'ininat'it, wa t'ani lap'ut'unatcha layat'itcha! ¿Tasu wanancha wa aktilat'a'aklatsukuyawi? ¿Tasu wanancha wa aktilalhilhitayaniyawi? ¡K'alhit'at'iti an ts'alh!

18Wa chuncha an Jesús, la'a'aymalhi an makxkay'un, pus makawlhcha an ts'alh, wa akxni ta'oxilhcha.

19Ixli'astan akxni wa ix'akstuchak'an ixtat'ayanalh an Jesús an ixt'alhtanan, stalh tala'alh, tajuniy:

―¿Tasu li jantu lay ijk'uch'uw kitnani?

20Yucha jajuniy:

―Mu wanaj wa k'isi jak'iklak'a'ininat'it. Li k'ajak'iklaka'inint'it masi wa tacha lakat'ikt'icha xatalhts'i mostaza, layi ka'una'it ani a'stitawk'a, anu kast'alh p'it'i, chi ka'ana', layi k'a'ilht'uya'it wa tuchicha. [21Ani makxkay'un chuncha kataxtuya li t'ap'ayniniyat'iti Dios ch'i li lhit'ask'ajayat'iti miwaytk'an.]

An Jesús jamak'atsaanipalayi li kaniya'

(Mr. 9:30-32; Lc. 9:43-45)

22Anchaka ixtat'ajun xalakaat'un Galilea, an Jesús, jajuniy an ixt'alhtanan:

―An isTs'alh Lapanak kama'axta'kana la ixmaknik'an an lapanakni, 23katama'niya', pero kala'awcho'oya ixlila'at'utu wilhchan.

Pus an ixt'alhtanan sawalhcha ixtalhita'oxila'alhiy.

Ixlimapalhlhi'anka ixlakata tajtan

24Akxni tacha'alhcha la'acha'an Capernaúm an Jesús, an Pedro tala'cha'alh an talhach'inin ixlakata tajtan, talhisakmiy, tajuniy:

―¿Amimaestrojk'an mapalhlhi'ani ixlakata an tajtan?

25―Chun, mapalhlhi'an ―jajuniya an Pedro.

Walh akxni tanuchalhcha an Pedro, tan ixwilh an Jesús, yuchacha p'ulh xa'alast'uk'a, junkan an Pedro:

―Pedro, ¿t'asuch'a lhiwilayi? An xarejnin ani lakamunulhpa, ¿tisiyu'unchacha yu talhich'iy an tanlhuncha lhimapalhlhi'ati? ¿Yu'uncha an yu tat'alamispay an rejnin u yu'uncha an yu jantu tat'alamispay?

26An Pedro juniy:

―Yu'uncha an yu jantu tat'alamispay.

Pus an Jesús juniy:

―Ah, pus an yu tat'alamispay jantu tamapalay. 27Pero masi chuncha kitnan kajamapalhniyaw, para li jantu tu'u katanawlh. K'ap'inchi an lakxkan, k'amu'uya'a ami'anzuelo, chi an yu p'ulhnaj k'ach'ap'ayawya'a jatanti k'ak'ikmaxt'uya'a a'xtam tumin, yuch'ach'a k'alhimap'ala'a kilakata chi milakata.

Nu markerat:

SAN MATEO 17: tpp

Märk

Dela

Kopiera