Luka 5

Prota adunari a dishepujllu

1Jezus ara ningi gjolu a Gjenesaret, sh'ômёnjjё s'pinxja ningi nës tas avxa zborru a Dumёxё. 2Ell vёxu dau varki tu marxëna di gjol, ma burbacjё avja dupunatё dit varkё shi ma lla rrjetëli. 3Ell s'alënё tu unё di nёsi sh këftё tas s'i dёpërta di marxënё. Dapoja stёtu mpadi shi ahurhji tas mvjacё ômёnjjё di pi varkё. 4Kёnd bitisi di greri, i'j xësi a Simon: “Fux ma dёparti sh aminё rrjetëli ti akëcari peshti.” 5Simon i'j xёsi: “Mvëcëtor, hjim kurmac tutё nôptja sh nu avem akëcatё cëva, ma, ti hëtërja a zborru a tëll, us l'a mёnёm.” 6Ashё fecёrё sh akëcarё ahtënt mullt peshti, kit ma s'dësёka rrjetëli. 7Astumsёna, llu fecërё ku mёna acëllor ci ara tu allantё varkё tas vinja shi s'ja xhuta. Ej vinёrё, shi dali varki s'i umpllurё ahtёnt mullt kit ti pucёnё s'fundusja. 8Kёnd u vëxu aistё gjeji, Simon Pjetri gëxu pi xënuqi dininti a Jezus shi xёsi: “O Domne, dёpërtjaxëti di mini, kё est om ku mullti amartii.” 9Ell, sh tuc acej ci ara ku nёs, s'çudusirё di tutё acell peshti ci akёcarё. 10Ako ara sh Jakob, sh Gjon, hjij dja Zebedeu ci ara kusurinj ku Simeon. Astumsёna Jezus i'j xësi a Simeon: “Nu t'ja spari, di tora us ti fac peshkatar ti ômënj.” 11Kёnd skosёrё varkili tu marxёnё ej l'allësarё tuti, shi fuxirё dupi Jezus.

Jezus vindëkё un llënxut ku lebrё

12Kёnd Jezus ara tu unë kasabai, vini un burbat ci ara umpllut ku lebrё. Kёnd vёxu Jezus, ell gëxu pёrdinc, shi i'j feci rixhai: “O Domne, ma s'vre tini poc tas s'mi pёstresht.” 13Jezus timsi mёna, dedi pi nёs sh i'j xësi: “Voj. Pёstrjati!” Sh'lebra s'llё di-unôrё. 14Jezus i'j xësi tas s'nu i'j spunё a içvёrruj, sh i'j xësi: “Duti lla preftu, sh fё unё kurbani ti vindёkara a ta, kum ari xësё Moisiu. Aistё as'hjibё ka dëshmii”. 15Zborru ti Jezus s'llo di hëbari jucёdo, sh ômënjjё totëna sh'ma mullt s'aduna tas avxa sh tas s'i vindëka di llëngôrëli a llor. 16Ma ell fuxi tu un bilok pust, sh allëvda Dumёxё.

Vindёkara a unuj ullogu

17Unё xuё Jezus ma mvëca ômёnjjё sh ako ara ndoj farisenj sh dhaskalёnj a nomlu a Moisiu, ci avja vinitё di tuti hôrrё ali Galilei, di Judei shi di Jerusalem. Fuqia a Domnëlu ara ku Jezus tas vindёka. 18Tu aist qëro ndoj burbac ma aducja tu unё barrelё un ullog. Ej ma s'çukutja tas su hjigё tu kasa ju ara Jezus, shi s'u bёga dininti a lluj, 19ma nu shtja di këtu s'intrë, kë avja mullc ômënj. Dapoja s'alёnarё tu çatii, skosёrё qyramidhili sh o-punarё namёsa di kasё, dininti a Hristollu. 20Kёnd vëxu pistusera a llor, Jezus i'j xësi a ullogu: “Om, ci sёnt llati amartiili.”

21Skribёnjjё sh farisenjjë ahurhjirё tas xhudёkё: “Kaj esti aist ci j'esi dininti a Dumёxё? Kaj allt di Dumёxё pôti s'lla amartiili?” 22Jezus o-duqi mintja a llor sh xësi: “Këce mintuic ashё t'u inëma a vôstё? 23Ci esti ma lёshôrë s'xëc ‘c'i sënt llati amartiili’ ama ‘skôllё sh imnё’? 24Gjini, ma, tas u shtic ci Hjiju a Omu ari fuqii tas s'i lla amartiili tu aistё dunei,” i'j xësi a ullogu: “skollё, ja barrela sh fux akasё”.

25Ell si skullё di-unôrё, dininti a llor, llo barrela shi nesi akasё, sh tut allëvda Dumёxё. 26Tuc s'çudusirё, allёvdarё Dumёxё, sh ku frikё xësërё: “Azё avem vëxutё çudii.”

Akjёmara a Levi

27Dapoja Jezus ishё, vëxu un om ci aduna taksili ku numa Levi, ci stёtja apus tu trapeza a taksёllu shi i'j xësi: “Hajdi dupi mini.” 28Ell l'i allësё tuti, s'i skullё shi i'j nesi dënёpoj.

29Levi ashtërrё ti Jezus unё cinё mari tu kasa a lluj. Tu trapezё ku nёsh ara apunac mullc ômёnj di acej ci aduna taksili.

30Astumsëna farisenjjё shi skribënjjё xhuduka kondra a llor sh xëcja: “Këce mëkac shi bjec ku acej ci adunё taksëli shi ku acej ci fak amartii?”

31Jezus ll'u turrё xhuvapi: “Nu sënt vërtoshjë acej ci ar nevoje ti jatërru, ma llëndëcjë. 32Mini nu am vёnitё tas ndreg ndrepcjё, ma acej ci fak amartii, tas s'i tôrrё kiti Dumёxё.”

Presёnjli

33Astumsënё farisenjjë i'j xësërё a Jezus: “Dishepujё a Joan cёn presёni totёna shi allavdё Dumёxё. Ashё fak shi dishepujё a farisenjllu, ma a tёj mёkё sh bja”.

34Jezus ll'u xёsi: “A pôti s'cënё presёni krushqjё kënd garambollu esti ku nёsh?

35Ma us jinё qёrollu kënd us o-rrëqastё garambollu, shi astumsëna, tu aceli xёli,

us cënё presёni.”

36Dapoja ll'u spusi unё meselei: “Içvërr nu tajë unё bukatё di stranj nou tas petёkё ku nёsë un stranj veq, kё bukata di stranj nou us'i dësikё, shi nu treci ku stranju veq. 37Içvërr nu aminё jin nou tu qeli veqi, kё jinu nou us dёsikё qela shi us'i vjarsë. Ashë sh qela us nagё qёrutё. 38Tjaca jinu nou, o-minё tu qeli nau.

39Içvërr nu vra s'bja jin dit qeli nau, kёnd ma ninti ari bjutё jin veq, kё xёci: ‘veqja esti ma bunё’”.

Nu markerat:

Luka 5: ARUM

Märk

Dela

Kopiera