KANTHOUNA 45
45
Joseph'ne Aiyei Teinao Rapnung A Heiri Huwo Toubi Yunthutpikur
1 #
Pao 7.13. Heirouri Joseph'ne aiyei pongra heiklei thimi rapbei maibongra ani mul leichangmakura; heitounei ani ungraobi kyun, “Thimidei hukhatkhi keipongra heileimaka, wathukkurchilaka.” Heirouri Joseph'ne aiyei pongra thimidei hukhatkhi heileimakur kheenrou, aiyei teinao rapnung a heiri huwo toubi yunthutpikur. 2Heirou ani hou chouni ungraobi chapburnarouri Egyptbei thimi rapnekhi, heirou Pharaohyei Bommainikhi mayekkur. 3Heirouri Joseph'ne aiyei teinao rapnung shun, “Keiri Josephme, kai pawari asilumpha ringleihuiko?” Heiya aiyei teinao rapne Josephya munarouri ngakwurbi aiyei kngai tlou mallangchangmakkur.
4Heitounei ngamrou Joseph'ne aiyei teinao rapya shun, “Nane keipongra yenkarnaknanungei keine nanungei shunchalei.” Heitounei yani aiyei pongra yenkarnakkur. Heirouri ani loushun, “Keiri nane Egyptra yorlhakkur naiyei naowa Josephme. 5Asinungri nani keiya bi arou yorwurnei ngamrou nai lhawai ninglahwurbi naitamya malungkhapi toumakka; kouweiyo toulanungri Dunpune kaiyei chaan awaya kalpinanungei toubi keiyari nai maibongra bi atamrou louyilkur. 6Ngamri ram arouwei butam thukkurri awane kum'khni tlungura; heirou hilloukhi klah-mrimni lou trunbinikhi trunwai lukmakrouri kum'phanga khatkhi hungrou watleihui. 7Heirou Dunpune tlaipangpal arouwei naiyei chaanya kalpinanungei toubine hiromcha keiyari nai maibongra bi arou louyilpikur; heirou naiyei yucharap kounakyakhi kalpinanungei toubi louyilpikurme. 8Heirou asinungri, nani keiya bi arou yukyilkur nimak, heiya Dunpune marshikbini yuyerkurme, heitoubi Ane keiyari Pharaohyei pa hoiyerkur, heirou aiyei cheemmai namyerrei dourakhi pu hoiyerkur, heitoubi Egyptyei ram namyakhi pukhoini thikulpinanungei Pu hoiyerpikurme. 9Heineri nani khrangtoubi, kai pawanung hungbini anung hungyunpilaka, ‘Neiyei chanapawa Joseph'ne asitoubi shunthunglei, Dunpune keiyari Egyptbei ram namyei doura Pu hoiyerwurla, keiyei leinara yuwalo, karyimwurbi touthilmakalo. 10Heirou neiyari Goshen ramra paalyerrou, heitoubi nangle, neiyei chanao raple, heirou neiyei chawa rapbei chanao rapkhi heirou neiyei yaorul, halrul rapkhi, heirou neiyei klei putchei-lalthumrap nammakhi keipongra leiyerrou. 11Heitoubi keine neiya watmaknungei thulpirou, kouweiyo toulanungri butam thukrouri kum'phanga watleihui; heinimanungri nangle neiyei cheemmaiyei lalthumrap nammari luilhakurbi nangkhi kanring thimi khat hoiroume.’ 12Asinungri keiyei murhakni nanungei yunpikur awaya naiyei mitnikhi heirou keile pukmalkna naowa Benjaminyei mitnikhi kmu heiriya. 13Heirou keine Egyptra nungkngaini klei awaya nai muwurkhounei pao heirapya kai pawanung nani hungyunpilak; heitoubi nani pawaya bi arou khrangni yukruiheilak.” 14Heisitoubi ani aiyei naodongwa Benjaminya ngakra kuirkolbi chapkur; heirou Benjaminkhi aiyei ngakkhungra kuirkolbini chapkur. 15Heiyakhi duinara ani aiyei teinaorap deiyakhi waiknaini machupbi chapkur; heihillouri aiyei teinao rapne akou wari sharilkur.
16Heirouri Pharaoh'nekhi “Josephbei teinaorap yuleime” tounei pao heiya loumayeknarou, Pharaohkhi heirou aiyei shokrap nammakhi nungaiyura. 17Heirouri Pharaoh'ne Josephnung shun, “Neiyei teinao rapya asitoubi shunpilaka, ‘Nane naiyei gadha rapya putphani sheembaangbi Canaan ramra kallenglaka; 18heitoubi nai pawale, naiyei nurap-chawarap nammakhi yukruiheibini keileinara yulaka; heirou keine Egyptbei ramra namyerrouwei lhangaina bi khatya nanungei pirouwa, heitoubi ram heirouwei thuk trunwairap namma heiya nani chamailaka.’ 19Heirou yaya asitoubikhi yunpilaka, ‘Nane naiyei chanao rapya, heirou naiyei nu rapya tungyernanungei Egyptrei sapuk kaari rapkhi urlaka, heitoubi nai pawaya yukruiheibi bi arou yulaka. 20Heirou nai lakurkhou ramle putcheirap heinungei'tlim nani koukhi ukningra kardonkhoumaklo, ngamri Egyptbei ramrei klei yerrouwei lhangai heiri nanungei hoiyerrouwa,’ toubine shunpilaka.”
21Heirouri Israellei thimi rapne kyun heinakrimni loutoukur, heirou Joseph'nekhi Pharaohyei chay pikur hilthungni yanungei sapuk kaari rapkhi marshikpibi, yani lamrakra chamainungeikhi sheempithungkur. 22Heisitoubi ani aiyei teinaorap napung kantangnung phirul rankhi khatsol pithungkur, heiya Benjamin'nungeiri ani lapa shekel macha'khyumle, heirou phirulkhi ran phangatam khatkhi lhakpithungkur. 23Heirouri ani aiyei pawanungkhi heisibil marshikpithungkur; Egyptrei klei putchei lhangai-lhangai rapkhi khalthutbini sapuk putchip khatle, heirou aiyei pawaei chanung-mainungei tsai-ankhi sapuk pui putchip khatkhi, heiyakhi duinara yuyei'kaalnang lamrakra aiyei pawani chamainungei toubine mumtol heirou anchumkhi marshikbi pithungkur. 24Heisitoubi aiyei teinao rapya ani shaalyerkur; heitoubi yani shaalyoukur heirouri ani yanungei shunthung, “Nane lamrakra khatle khat karhalrilmakno,” toubine shunmatuthungkur. 25Heisitoubi yani Egyptrei yenshaallurbi, yai pawani leithungna ram Canaanra hungtlungura. 26Heirouri yani yai pawanungei, “Josephri ringleihuime, heirou ani Egyptbei ram namyerwaei Pu khoini paalbi leileime,” toubi pao hungtamkur. Heirou Jacobri ukningra biso-bibalkhi naimakura, ngamri yaikyun tlou heiwaya uklumchangmakura. 27Heirouri yani Joseph'ne yanungei yunthungkur warirap namma heiri anungei hungyunpikur; heirou Joseph'ne aya yukruiheinanungei toubi pithungkur sapuk kaari rapya loumunarouri, yaipawa Jacobri kalthi malungpilkur. 28Heitounei Israel'ne kyun, “Keiri malung pillurame, keiyei chanapawa Josephri ringleihuime, kei hibongnung keine aya yumurilheiroume.”
Nu markerat:
KANTHOUNA 45: MARIBSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.