Mattayo 3
3
Girrukkwiida Yohaaneeda Abattiisachchi
(Mark 1:1-8; Luk 3:1-18; Yoh 1:19-28)
1Askwearjoojikka ghwahidu Yohaaneeda Abattiisachchi, ak gwarukkwiida ng'asheega Aseetta aba dareapcheeda Yudeeya, nea gwayeenniisa; 2“Aduukkuunana, aba gideaba sugoochcheandumeeda humng'eeda nineekkiit.” 3Aba gideaba nii dea ghayi rugu sibaneeda suguura Isaaya gil nea gwayi,
“Ghuutta siida nyearra dareapcheeda
Asna naweeda Ng'uttamiida
Olleappa naweadinngaaschi.”
4Nea abeeda Yohaana gookkweali eaghwada sisna buudeega ngamiya nea gwarattiisa manandaannyi ghealooda; hamittaannyi ea deashamga gil ea maleeda ghamiilalga. 5Ak gaweesa Yerusaleemu, ea ng'eanyiida Yuudeeyeeda sean, ea daroorakka sean bea murdajeega Yordan, 6ak geeppattiisan aba jeedeenda Yordan nea ghamwas gideaba nisin ring'eega. 7Hean nea ghwadaa Farisayajeega saang'a ea Sadukayajeega nea ghapka headaannyi goobattiisan, gwayeeshsha, “Ee dayeega udang'usheega! Gwareekuseeng'wa ng'eaha ea amng'awana nyarasta jea ghwahidu? 8Asi ajiila haghweega miisa duukkuunooda, 9nea adootteemsheesi geat aba jeesingeagwa gideaba, ‘Geandeawi ghweanda nea Abrahaamu,’ aba gideaba geayeeshshiineegwa, Aseetta ghoammu gagatkat lagheang'su ghoaw diibiga Abrahaamu. 10Nea joommooda asiyiin guumsheakka geediga, ak geetta maji haghwega miyaas gajealach ak geejaksa jeeda beasta. 11Geabattisananeegwa beega aba dukkuunooda, nea dea jea ghwaduupnaan geash gaburdeawean uurda, nea mammisean eara sareenda geakkaaschi; niny gaygoobattiisananeegwa Gurorooda Ghaydit ea beasta. 12Niny gidaannyi alleeliida gwanda geattindaannyi, ak gaygoobuus muuchchi bugharjeandaannyi, ak gooweamsa nganoadaannyi gijigooda, nea looyda gayghaghwarda aba beesta maygamis.”
Giibattiisanda Yeesu
(Mark 1:9-11; Luk 3:21-22)
13Damandida ghwaan Yeesu nea gwaleabu Galilaaya ea ghwahitta Jordaani heeda Yohaana, eebaattiisan. 14Hean gagasa Yohaana ghaheawa nea gwayeeshsha, “Geagasayi aniini gideaba gajabaattiisan ak giwuni ang'iing'i heedeanyu?” 15Ghwasha Yeesu nea gwayeeshsha, “Mwasa ghamneawa; aba gideaba nii gidamiisindaneasa gil sinooda ng'asheega sean doabiiw.” Ak ghamwas Yohaana. 16Ng'atta giibaattiisanda Yeesu, nea gwascheeng'na jeeda beega; hean ng'ulla ghwajaada humng'eeda ak ghwadaa Gurorooda Aseetta nea gwashubeanda gharibajeanda, ak goobissa uhuudaannyi; 17deagheatta, ghwanya ghuutta nyaasha humng'eeda nea gwayi, “Nii Balleandeanyu abwariinyi, ahoosanani.”
Nu markerat:
Mattayo 3: DTGANT09
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Datooga New Testament © Bible Society of Tanzania, 2009.
