Matayo 4
4
Lisoshelomu lia Yesu
1Lamao Yesu lɔkɛsɔmɔ la Bolimo ko nda liɔmbɛlɛ okasoshelomo la Satana. 2Omao Inde lokila bieka ko bacho kama inɛi, la löwa la ocho, lamao Inde looka isiyɛ. 3Ayaka Bososheli ende Inde, inde mbo— Eya to mbo wende Wana wa Mungu ongaka to mbo e-batalɛ-ba bakinjweke beila. 4Yesu lomutola mbo— Losotomo nda lokasa loa Mungu mbo—
Boto aitoyalaka la liwawi ko l’eoka ya beila kongo,
Kangä eoka ya lioi la lioi elitokuswa nda bɔnɔkɔ wa Mungu.
5Limɔ Bososheli lɔkɛsɛ Inde ko nda bokenge ewuchomu#boko Yelusaleme inde loemes’Inde olikolo lia losambɔ loa ndakɔ ya Mungu, 6inde loonga lande mbo— Eya to mbo wende Wana wa Mungu, kushaka bindo yaɛ se, eoka losotomo nda lokasa loa Mungu mbo—
Atoonga la bakitomo bande mbo batinganeke laɛ
La batotolak’Aɛ nda besamba yau mbo
Otaomana litindi liaɛ nda litalɛ.
7Yesu loonga lande mbo— Ko ongoma losotomo nda Lokasa loa Mungu mbo— Ososhelëke Ngɛnɛ Mungu waɛ. 8Liasi Satana lɔkɛsɛ Inde amamwito lande olikolo lia löngo lofi fafo, omao inde lɔɛnɛs’Inde yakakaelo bitotina ya wenda la bɛfɛkɔ ya yao, 9inde mbo— Botulamela’mi se ndosemola’mi imi kofaef’Aɛ ebi bitotina. 10Limɔ Yesu loonga lande mbo— Kɛndɛ, Satana, eoka losotomo nda Lokasa loa Mungu mbo—
Tulamelaka ngo ko Mungu waɛ se,
Semolaka ko Inde kongo.
11Lamao Satana lomach’Inde, la bakitomo ba Mungu loyakukya Inde. 12Okäkä nde Yesu mbo Yoane akandomökö nda bɔnyɔlɔlɔ, Inde lɔkɛ nda Ngalilai, 13limɔ Inde losekwa nda Nasaleta, Inde lokayalaka nda Kafenauma bokenge ebole tina la eliya nda biese ya Sebulona la Nafatali, 14mbo baoi ebaongäkä bɔtɔndɔli ako Yesaya bakɔchɔmɔkɔ, mbo—
15Yese ya Sebulona la yese ya Nafatali,
Mboka ya eliya, faki yasi ya Yaledene,
Ngalilai eyele yese ya ebati BaYuda,
16Bato ebayalaka nda lilima basɔɛnɛ liangangi lifi.
Ebayalaka nda elele ya liɔmbɛ lia liwa
Liangangi lisoangangel’iyo.
Lotomo lioi loa Baeki ba Oso
17Ko nda mbile ena Yesu loakola ndonangola mbo— Kalanganaka eoka Bɔkɔta wa Use bosoya tina.
18Akɛndɛ̈kɛ̈ Yesu nda ngɔngɛ ya Eliya ya Ngalilai Inde lɔɛnɛ bato ambale, boloo la etungani, bako Simona, oyatangomökö imɔ ko Petelo, la Andelo, ani batoluwä wɛngɔ eoka baaka baluwi ba swi. 19Yesu loonga lau mbo— Tütaka’mi la itoyales’inö baluwi ba bato. 20Lisasaya iyo lomacha wɛngɔ wau, iyo lotüta Inde. 21Akɛndɛ̈kɛ̈ Inde sumbu liasi, Inde lɔɛnɛ batolome basi ambale, bako Yakobo wana wa Sebedayo la Yoane, etungani yande nda watɔ amamwito la sango wau ako Sebedayo, ani batowamba wɛngɔ wau; Yesu lot’iyo lioi. 22Kwamao iyo lomacha watɔ la sango wau, iyo lotüt’Inde.
23Yesu akɛndɛ̈kɛ̈ nda yese etotina ya Ngalilai, okaekese nda bisɔngɔmɛlɔ yau; Inde lokanangokole Mboli Ilau ya Bɔkɔta; Inde losäsesa eba kambo la eba biale ya bɔfɔɔnɔ la bɔfɔɔnɔ ebiayaläkä la bato omao. 24Lokuku loande lookana nda yese etotina ya Sulia, iyo loeshekel’Inde batotina ba kambo l’ebayaläkä la ngwo la bemusi ya bɛfɔnɔ wike, l’eba belimo ibe, l’eba tosekakɔkɔ, l’eba lonyango, la Inde losäsekes’iyo. 25Biindi ya bato lotütak’Inde, bato ebasekwäkä nda Ngalilai la Dekapoli la nda Yelusaleme la faki owale wa Yaledene.
Nu markerat:
Matayo 4: NTKE58
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Le Nouveau Testament in Kele (Lokele) © British and Foreign Bible Society, 1958, 2019.
