Matayo 8
8
Omuhaga
1Omugulu abere abiandagala oko kitwa, esyondeko nene mosyamukwama; 2neryo lebaya omuhaga mwamuhikako, mwamukukamire, ati, Mukama, wamanza, wangatoka nerinyerya. 3Naye mwakakya ebyala biwe mwamutulako ati, Nyanzire; were. Neryo-neryo ebihaga biwe mobyera. 4Yesu mwamubwira ati, Ulebaye subwire mundu; nikwa ugende, uyikanganaye oko muhereri, uhere erihitya eryo Musa ategeka, busana neriminyisyabo.
Erikirirya inene
5Omugulu ingira eKapernaumu, omukulu muguma wabasoda mwasa ahari, mwamugonga-gonga 6ati, Mukama omugombe wage agotsere omu nyumba iniabasire, akagalawa kutsibu. 7Naye mwabuga naye ati, Ngandiyayo inaya mulamya. 8Nikwa omukulu wabasoda mwamusubirya ati, Mukama, Sinyitolere ukingira omo nyumba yage; nikwa ubuge eKinywa kisa nomugombe wage akandilamibwa. 9Kusangwa nage ndi mundu wehamuli, ngwite abasoda ngategeka; ngabwira muguma nyiti, Ugende, iniagenda, nogundi nyiti, Asa, iniasa, ngabwira omugombe wage nyiti, Kola eki, akakikola. 10Yesu abere amowa, mwasweka, mwabwira abamukwama ati, Kwenene ngabuga nenyu, sinditabana erikirirya ringana neri, kutse nomo Israeli. 11Ngababwira nyiti, bangi baswalwa eyo eryuba rikahuluka neyo eryuba rikalengera basikala na Abrahamu, na Isaka, na Yakobo omo bwami bwelubula, 12nikwa abagala bobwami basyaguswa omo mwirimya weyihya; aho bandu basyarira nerirya meno wabo. 13Kandi Yesu mwabwira omukulu wabasoda ati, Ugende; ukolerawebyo ngoko wabiriikirirya. Nomugombe mwalamibwa oko katambi ako.
Nyinyi-byala wa Petero
14Yesu abere abiingira omo nyumba ya Petero, mwalangira nyinyi-byala wuwe iniagotsere nerihuhana; 15mwamutulya kwe byala, nerihuhana moryamulwako, mwahangana mwamutsumbira. 16Omwigolo-golo eryo mobamuletera bangi abari kwesyombinga; mwagusa esyombinga syoyihya omo kinywa kisa, mwalamya abosi ababya balwere. 17Bibererere ebyabugawa nomuminyereri Isaya ati, Mwatwala eriyiremwa ryetu mwaheka nesyondwala syetu.
Erikwama Yesu
18Nikwa omugulu Yesu alangira esyondeko nene simutimbireko, mwategeka ati basokere eyisirya. 19Nomusaki muguma mwamuhikako mwamubwira ati, Mukangirirya, ngandikukwama ehosi ukaya. 20Yesu mwamubwira ati, Esyoboha siwite ebyuna, nesyonyonyu syomo kyanya siwite esyonyutu; nikwa oMugala womundu siawite aherihira omutwe wuwe. 21Nogundi woko biga mwabuga naye ati, Mukama, uleke natayata tata. 22Nikwa Yesu mwamubwira ati, Ungwame, uleke abaholi bate abaholi babo.
Erikunga engetsi
23Abere abiingira omo bwato, abiga buwe mobamukwama. 24Neryo lebaya, eKihunga kinene mokyahuluka omo ngetsi, nobwato mobwasonda eritobera busana nebisunda; nikwa iye iniayire to. 25Nabo mobaya mubukya bati, Utulamaye Mukama; tukahwa. 26Naye mwabuga nabo ati, Mukubaha busana naki, inywe bandu berikirirya ike kwehi? Neryo mwahangana mwakunga ekihunga nengetsi; mohabya eriyibombeka inene. 27Na bandu mobasweka, bati, Oyu ni mundu musindoki kwehi? kusangwa ekihunga nengetsi bikamowa.
Abesyombinga
28Neryo omugulu ahika eyisirya, omo kihugo kyaBagerase, abesyombinga babiri mobahindana naye, ibakalwa omo masinda, ibakalire isihari mundu wangalaba omo nzira eyo. 29Neryo lebaya, mobalaka bati, Uri naki kwitwe, Uwe Mugala woMungu, kwehi? Wamasa eno eritwagalya emuliro womugulu kwehi? 30Nikwa habya ekihyo kyesyongurube nyingi sikarira hali hake kubo. 31Esyombinga mobyamugo-ngagonga siti, Wamatugusa eyihya, ututume omo kihyo kyesyongurube. 32Naye mwabuga nasyo ati, Mugende. Nasyo mosyalwamo mosyaya omo syongurube esyo; neryo lebaya, ekihyo kyosi mokyatibita ahasenzegerere mosyahika omo ngetsi, mosyaholera omo magetsi. 33Na barisya mobatibita, mobingira omo muyi mobatula ebyosi, nebya abalwe kwesyombinga. 34Kandi lebaya, omuyi gosi mobasa erihindana na Yesu; neryo babere babimulolako, mobamugonga-gonga bati alwe omo kihugo kyabo.
Nu markerat:
Matayo 8: NTN62
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Le Nouveau Testament et les Psaumes en Ndandi © British and Foreign Bible Society, 1962.
