Genesis 5
5
Din Polin Da Adan
(5:1a; 5:3-32)
1aNaey di listaan di polin Adan. 3Idi nantawen si Adan si 130, binmala di anak na ay is-iso na, et nginadananas Set. 4Natago pay laeng si Adan si 800 ay tawen yan waday odom ay anak na. 5Idi waday 930 ay tawena, natey.
6Si Set abe, idi nantawen si 105, binmala di anak na ay si Enos. 7Makdeng di, natago pay laeng si Set si 807 ay tawen yan waday odom ay anak na. 8Asi matey ay mantawen si 912.
9Idi mantawen pay si Enos si 90, binmala di anak na ay si Kenan. 10Nanbiyag pay laeng si Enos si 815 ay tawen yan wada abey odom ay anak na. 11Idi waday 905 ay tawena, natey.
12Idi mantawen abe si Kenan si 70, naianak si Mahalalel. 13Makdeng di, natago pay laeng si Kenan si 840 ay tawen yan wada abey odom ay anak na. 14Asi matey ay mantawen si 910.
15Idi mantawen pay si Mahalalel si 65, naianak si Jared. 16Makdeng di, nanbiyag pay laeng si Mahalalel si 830 ay tawen yan wada abey odom ay anak na. 17Asi matey ay mantawen si 895.
18Idi mantawen pay si Jared si 162, naianak si Enok.#5:18 Da Enok en Lamek (v.25) ay naibaga sin kapitolo ay nay et polin Set. Natken di kangadngadanan da ay polin Cain sin 4:17-18. 19Makdeng di, natago pay laeng si 800 ay tawen yan wada abey odom ay anak na. 20Asi matey ay 962 di tawena.
21Idi 65 di tawen Enok, naianak si Metusela. 22Nanipod sidi, siged di pakikadkadwaana en Diyos si 300 ay tawen yan wada abey odom ay anak na. 23Idi mantawen si 365, 24makikadkadwa pay laeng en Diyos, et namaiwed, tan inan Diyos sisya.
25Idi mantawen pay si Metusela si 187, naianak si Lamek. 26Manipod sidi, natago pay laeng si Metusela si 782 ay tawen yan wada abey odom ay anak na. 27Mantawen sisya si 969, asi matey.
28Idi nantawen pay si Lamek si 182, binmala di anak na ay lalaki, 29et nginadananas Noe#5:29 Mais-o di kadngean di Noe sin kalin di Hebreo ay din olog na et “nalaglag-an di ligat.” ay nangwani, “Din anak ay nay, palaglag-anena din ligat tako ay mangobla sin lota ay inpalawlawan Diyos.” 30Manipod sin naianakan Noe, natago pay laeng si Lamek si 595 ay tawen yan wada abey odom ay anak na. 31Asi matey ay mantawen si 777.
32Si Noe pay, idi enggay nantawen si 500, asi man-ganak si tolo ay lalaki ay da Sem en Ham ya si Jafet.
Nu markerat:
Genesis 5: KD
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2000, 2017 Wycliffe Bible Translators, Inc. All rights reserved.