Mark 3
3
Yesu, Rava Nimana Wanawana Ruꞌumana i Viyawahani
(Matthew 12:9-14; Luke 6:6-11)
1Mara emosi Yesu i wanavirameei po i rui aniviꞌemosi numana* auhinenina, ma nahidana rava nimana wanawana ruꞌumana i inanai i tughutughura. 2Ma rava ghehauhi hi ghohei da Yesu hina viwavui, yamna aubaina hi inaꞌinana vaimaiha, mepa da viyagohina au maratomna we ravana ina viyawahani. 3Ma ravana nimana wanawana ruꞌumana i riwei ipa, “Ma neꞌi po rava aunaohi ma mahiri.” 4Anima rava i raubayadehi ipa, “Metauna raugagayona* i ahi, viyagohina au maratomna: ahi ta dewai bo apoꞌapoe ta dewai, ta viyawahana bo ta vihiraghena?” Egha hita paribeei ma atapuhi hi genuwana. 5Anima amona i ghaighai ma i inana viravira babana nuwanuwahi i toghara, ma i vinuwaboya ma i riwa nae ravana nimana wanawana ruꞌumana auwarina ipa, “Nimam ma rodomi.” Ma nimana i rodomi yana i yawahana. 6Anima Pharisees* yaghiyaghinaꞌava hi nae, po guyau Herod ana boru#3:6 Guyau Herod ana boru yana (Herodians) Rome* a gabemani i vohagui ma ahi dobu ravahi hi benabenamei ma marina Pharisees* maitehi hi viꞌemosi ma ipa Yesu hina vihiragheni. We ravahi yana egha meyanai hitai turana. marina maitehi hi viꞌemosi po Yesu vihiraghenana hi viꞌogatarei.
7-8Yesu ma a tauvotagho maitehi hi nae hagahaga au gerahana, ma rava maghamaghauhi Yesu aiwa i dewadewaiya tuyeghana hi nonori po hi neꞌi auwarina. Ahi anineꞌi yana Galilee, Judea, Jerusalem, Idumea ma Jordan tupohi, anima Tyre ma Sidon meyagaihi auririvahi. 9-10Rava maghamaghauhi i viyawahanihi ma ghehauhi doridoriꞌahi yana yohora hi amdudugheꞌi hipa hita vodadani. Aubaina po a tauvotagho i riwehi po aubaina wam hi nonoghei, babana rava hi magha duma hi garigaribewani. 11Mepa nanaꞌarena rava aruwa apoꞌapoehi hi tanitaniwagehi Yesu hi inanai, yana aunaona hi peꞌu ma hi ghoreghore hipa, “Tam yana Maimaituwa Natuna!” 12Ma aruwahi i vighaꞌehi da havena rava hita riwehi da tauna aiyaꞌi.
Yesu, Tauvotagho Vinevinehi* 12 i Vinehi
(Matthew 10:1-4; Luke 6:12-16)
13Yesu i ghae oya autepana ma rava i rauhogharehi, i ghorehi po hi neꞌi auwarina. 14Ma maghauhi 12 i vinehi ma wava i verehi, tauvotagho vinevinehi.* Ma weꞌi aubaina i vinehi da tauna maitehi ma muriyai ita himira hopunehi rauguguya aubaina, 15ma vitaniwaga i verehi po aruwa apoꞌapoehi hina raukaiwenihi. 16Tauhi 12 ahi wava yana we nanaꞌarena:
Simon (yana Yesu i viwavai po Peter#3:16 ‘Peter’ anona ‘ghaꞌima’.),
17Zebedee natunatuna James ma a tevera John i ghorehi po Boanerges (Boanerges anona yana ‘waiparara natunatuna’),
18Andrew,
Philip,
Bartholomew,
Matthew,#3:18 Matthew ana wava ghehauna yana Levi.
ma Thomas,
James yana Alphaeus natuna,
ma Thaddaeus,
ma Simon yana Zealot#3:18 Zealot anona yana ‘rava boruhi Rome* babadahi tauvighaviyehi’.
19ma Judas Iscariot yana Yesu tauvibenabenameina.
Rava Hipa Aruwa Apoꞌapoena* Yesu ei Taniwagei
(Matthew 12:22-32; Luke 11:14-23, 12:10)
20Yesu, a tauvotagho maitehi hi naeme au numa, ma wate rava hi riyaneꞌi yana numa hi vihowai po egha emoꞌemosina hita am. 21A ghughuni hi nonori aiwa i tuputupuwa ma hipa, “Unuꞌununa i neyabayababa!” Aubaina hi neꞌi po hita taravaini po hita paꞌini.
22Mai Judea* ahi raugagayo tauvihanahanapuweina Jerusalemei hi ghaꞌiraꞌi po Yesu hi deedei hipa, “Beelzebub yana aruwa apoꞌapoehi ahi bada, Yesu ei taniwagei! Aruwa apoꞌapoehi ahi bada a kajijirei we aruwahi e raukaiwenihi.”
23Aubaina Yesu i ghorehi po hi neꞌi ma ampariruveruvei i vibabani auwarihi ipa, “Apo menanaꞌarena ma Taumodurere* ina vireta hopunenameei? 24Inapa dobu ina viꞌam kahakaha ma hinai tona vivira, yana na dobuna apo egha ina mahiri. 25Ma dam ina viꞌamkahakaha ma hinai tona vivira, yana apo na damna egha ina maꞌae. 26Yamna aubaina inapa Taumodurere ana dobu hinai amkahakaha ma hinai tona vivira, yana apegha hina mahiri apo hina peꞌu babana ahi mara i kwaha. 27Apegha meyanai rava kajikajijirana ana numa hina ruini po a purapura hina danenenei. Da aunaona hina raghiraghihi ma muriyai a purapura hina danenenei. 28Taꞌu riwa moinana a ririwemi, rava ahi dewa ma ahi babani, apoꞌapoehi atapuna apo Maimaituwa ina nuwaꞌaharei.* 29Ma aiya ravana Aruwa Vivireina ei jiboghi yana Maimaituwa apegha ina nuwaꞌaharei, babana naꞌi yana dewaboꞌa maꞌemaꞌe vavahaghana i dewai.” #3:29 3:28-30 Yesu wehidana aiwa e ririweiya yana we ravahi nuwanuwahi i toghara po egha hitai nuwanuwatuhu da hina wanatavirahi. Rava Aruwa Vivireina hei jiboghiya anona yana hipa Yesu tauna egha Maimaituwa a Vinevine,* ma aruwa apoꞌapoena* itai bagibagi. Ma Aruwa Vivireina ei hegheta da tauna yana Maimaituwa a Vinevine. 30Yesu i riwehi babana tauna Aruwa Vivireinei aruwa apoꞌapoehi i raukaiwenihi ma hi riwei hipa, “Aruwa apoꞌapoena* tauna ita ruini.”
Yesu a Ghughuni Moinana
(Matthew 12:46-50; Luke 8:19-21)
31Anima Yesu ayona ma varevarehina hi gheꞌeta po numa au mataꞌetana, hi mahimahiri ma ana riwa hi himiri. 32Rava maghamaghauhi hi tughura kwaviviroi ma hi maꞌamaꞌae ma hi riwei hipa, “Ayom, varevarehim ma novunovum yana au dowa hi ghoheghohei po hina inanam.”
33Yesu i paribeehi ipa, “Aiya ayoꞌuna ma varehiꞌuna?” 34Anima i inana viravira po rava auririvana hi tughutughura i inanahi ma ipa, “Ona inanai! We ravahi yana ayoꞌu ma varevarehiꞌu! 35Aiya ravana Maimaituwa a rauhoghara e dewadewai yana tauna varehiꞌu, novuꞌu ma ayoꞌu.”
Nu markerat:
Mark 3: TPA
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2010, Wycliffe Bible Translators, Inc. All rights reserved.
