LUKA 20
20
Phetolano le bamangwalo. Balemi ba babe. Basadutsei le bamangwalo
1Ka le lengwe la matšatši ao, ge a ruta batho Ntlongkgethwa a ba botša Ebangedi, gwa tla baperisita ba bagolo, le bamangwalo, ba na le ba bagolo; 2Ba mmotšiša ba re: Re botše; dilo tše o di dira ka maatlamang? Gomme ke mang e a go filego maatla ao?
3Yena a fetola a re: Le nna ke tlo le botšiša taba e nngwe; le mphetole. 4Kolobetšo ya Johane, a e be e etšwa legodimong, goba e be e etšwa bathong?
5Bjale ba eleletša ba re: Ge re ka re: E be e etšwa legodimong, o tlo re: Ge le sa ka la mo dumela le be le reng? 6Gomme ge re ka re: E be e etšwa bathong, batho ka moka ba tlo re thuma ka maswika, gobane, ge ba re Johane e be e le moporofeta, ba be ba kgodilwe. 7Ba fetola ba re: Ga re tsebe mo e tšwago gona.
8Jesu a re: Gona le nna nka se le botše gore ke maatlamang a ke dirago dilo tše ka ona.
9A thoma go botša batho seswantšho, a re: Motho e mongwe o be a lemile tšhemo ya merara, a e gafela balemi; yena a swara leeto la matšatši a mantši. 10Ka lebaka la gona a roma mohlanka wa gagwe a tla go balemi a re ba mo fe dienywa tša tšhemo yeo. Balemi ba mo itia, ba mo gomiša a le fela. 11A buša a roma mohlanka yo mongwe; le yena ba mo itia, ba mo goboša, ba mo gomiša a le fela. 12A boeletša, a roma wa boraro; le yena ba mo gobatša, ba mo kgoromeletša ntle. 13Ke mo mong wa tšhemo a itšego: Ke tlo dirang? Ke tlo roma morwamoratwa wa ka; mohlomong ba tlo re go bona yena ba mo šia. 14Yena, balemi ge ba mmona, ba lakana ba re: Yo ke yena moji wa bohwa. Tlang, re mmolaeng; bohwa bo tle bo lewe ke rena. 15Gomme ba mo kgoromeletša ntle ga tšhemo, ba mmolaya,
-- Bjale mong wa tšhemo o tlo ba dira bjang? 16O tlo tla a fediša balemi bao; mme tšhemo o tlo e gafela ba bangwe.
Ge ba ekwa a realo ba re: A go se ke gwa ba bjalo.
17Jesu a ba lebelela, a re: Ke eng ge se mangwalo a se bolelago ge a re: Leswika le baagi ba le nyaditšego, le bile la motheo wa sekhutlo? 18Gomme e a tlogo wela leswika leo o tlo dubagana; mme eo le tlogo mo wela, le tlo mo ritaganya.
19Baperisita ba bagolo le bamangwalo ba nyaka tsela ya go ka mo iša matsogo ka lona lebaka leo; fela, ba boifa batho; ka gobane ba be ba lemogile ge a šupile bona ka seswantšho seo. 20Ba dula ba mo hlapeditše ba bea balaledi ba re, ba ikgakantšhe ba itire baloki, gore ba mo tanye ka dipolelo tša gagwe, ba kgone go mmega mošate, ba mo gafele diatleng tša mmuši. 21Ba tla ba mmotšiša ba re: Moruti, re tseba gobane o bolela ka go loka, mme o ruta o sa bebe motho; mme tsela ya Modimo o e ruta ka go rereša. 22A go re loketše ge re ntšhetša Kesara lekgetho? Goba ga go a re lokela?
23Jesu a lemoga maano a bona, a re: Le ntekelang? 24Mpontšheng šeleng. E na le seswantšho sa mang, le leina ke la mang?
Ba fetola ba re: Ke tša Kesara.
25Jesu a re: Gona ntšhetšang Kesara tše e lego tša Kesara; Modimo le mo ntšhetše tše e lego tša Modimo.
26Ba šitwa go mo tanya ka polelo pele ga batho; ba tlabja ke phetolo ya gagwe, ba homola.
27Gwa tla ba bangwe ba basadutsei. Ke bao ba rego bahu ga ba tsoge. Ba mmotšiša ba re; 28Moruti, Moshe o re ngwaletše molao a re: Ge motho, mogolwagwe a ehwa a na le mosadi, mme a hwa a se na ngwana, monnagwe a tšee mosadi eo, a tsošetše mogolwane peu. 29Bjale go be go na le barwa ba motho ba ba šupago. Wa pele a tšea mosadi, a hwa a se na bana. 30Wa bobedi a tšea mosadi eo; le yena a hwa a se na bana. 31Wa boraro a mo tšea; le bohle ba ba šupilego ba mo tšea, mme ba hwa ba se na bana. 32Mosadi a šala, a ba a hwa le yena. 33Bjale ge bahu ba tsoga, mosadi e tlo ba wa mang, ge ba mo tšere ba šupile?
34Jesu a fetola a re: Bana ba lefase la mehla yeno ba a tšea, ba a tšeišwa. 35Fela, ba ba tlogo hwetšwa ba loketše go bona tša mehla e tlogo tla le go tsoga bahung, ba ka se ke ba tšea; ba ka se ke ba tšeišwa. 36Le go hwa, ba ka se ke ba kgona go hwa, gobane ba bjalo ka barongwa, ke bana ba Modimo ba batsogabahung. 37Ge e le gore bahu ba tlo tsoga, le Moshe o realo ka taba yela ya sethokgwa sa meetlwa, ge a re: Morena ke Modimo wa Aborahama, Modimo wa Isaka, Modimo wa Jakobo. 38Gomme Modimo ga se Modimo wa bahu, ke Modimo wa ba ba phelago; gobane ba mo phelela bohle.
39Ke mo ba bangwe ba bamangwalo ba fetotšego ba re: Morena, o iša gona. 40Gomme ga ba ka ba hlwa ba tlema pelo ba mmotšiša taba e nngwe.
41Yena a ba botšiša a re: Ba bolela bjang ge ba re: Kriste ke Morwa wa Dafida? 42Mme yena Dafida pukung ya Dipsalome o mmolela a re: Morena o boditše Mongaka a re: Dula ka letsogong la ka le letona, 43ke be ke dire manaba a gago bogato bja maoto a gago. 44Bjale Dafida ge a re: Mong a ka a era yena e ka ba morwa wa gagwe bjang?
45Batho ka moka ba theeditše a bolela le barutiwa ba gagwe, a re: 46Phemang bamangwalo ba ba kganyogago go itshepelela ka kobo tše telele, le go dumedišwa dikgorong, ba rata ditulo tša pele diphuthegong le dibaka tša ka pele menyanyeng. 47Ba metša malapa a basadi ba bahlologadi, ba ba fora ka thapelo tše telele. Ke bona bao molato wa bona kahlolong e tlogo ba o mogolo.
Nu markerat:
LUKA 20: NSO51
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Bible Society of South Africa 1986. Used with permission. All rights reserved.
