Lukasi 20

Mbuli ya ludali lwa Yesu

(Matei 21:23-27; Malichi 11:27-33)

1Zuwa limwe, Yesu nayali yawalangusa wanhu honhu ha kusalila na kuwatagusila Mbuli Inojile, watambika wakulu na walangusa wa malajizo ga Musa na wakulu wamwe nawoya, 2Walonga, “Tulonjele! Kwangudita mbuli azi kwa ludali lwachi, ama yalikohi yakupele ludali luno?”

3Yesu nakawalonjela. “Na heni ndowauzani, 4ludali lwa Yohani lwa kubatiza nalulawa kilanga kwa Nguluwi ama kwa wanhu?”

5Ila hewo nawalonga ahi, “Wone tulonje nalulawa kilanga, kotuuza, ‘Lekachoni hamumkundile?’ 6Na wone tulonje nalulawa kwa wanhu, wanhu weng'ha wa hano wotutowa na maganga, mina weng'ha nawakunda kota Yohani nayali mloli wa Nguluwi.” 7Nawamlonjela, “Hatuvizelele alo ludali nalulawa kohi.”

8Yesu nakawalonjela, “Na heni siwalonjela ndangudita mbuli zino kwa ludali lwachi.”

Nhelo ya walimi na mgunda wa zabibu

(Matei 21:33-46; Malichi 12:1-12)

9Yesu kazangulangusa wanhu yolonga kwa nhelo ayi, “Munhu yumwe nakalima mgunda wa zabibu, nakawabasila walimi, heye nakaheluka isi ya kutali, kekala ako mihela minji. 10Mhela wa kubeta, ayo munhu kemigala chitumagwa kwa wala walimile yakahole kumgunda gojilelile mizabibu. Ila wala walimile wamsubula ayo chitumagwa na kumhilusa ne chinhu. 11Yula munhu nakamigala chitumagwa yunji, ila hewo kahila wamtowa ayo chitumagwa na kumbasa soni na kumhilusa ne chinhu. 12Kahi kamigala wa kadatu, heye ayo lowamlumize, wamuwinga. 13Yula yawele na mgunda nakejesa, ‘Ndodita choni? Ndomgala mwana wa heni ndimganile, yolonga heye womhulichiza.’ 14Wala walingulima lowawene, wazangilonjela, ‘Ayu ndo yohalila. Tumkopole leka kuhalila kwa heye kuwe kwa hetwe.’ 15Lelo Nawamlavya hafungo mwa mgunda wa mizabibu. Wamkopola.?”

Yesu nakauza, “Yula yawele na mgunda kowadita ndaze wala walimi?” 16“Kokuya kuwabagamiza awala walingulima, na kowapa walimi wanji awo mgunda wa zabibu.”

Wanhu lowahuliche yolonga ahyo, nawalonga, “Hebu haiwa ahyo!”

17Ila Yesu kawalola, nakawalonjela gano, “Maandiko Matakatifu gana mana yachi?

“ ‘Iganga lilemigwe na walinguzenga,

lelo liwa iganga likulu lya msisi!’

18Wone munhu yogwa mchanya mwa iganga alyo, kobeneka pasapasa na wone iganga limgwile munhu yoneche, lyomhondanga.”

Mbuli ya kulavya kodi.

(Matei 22:15-22; Malichi 12:13-17)

19Walangusa wa malajizo ga Musa na watambika wakulu nawavizela, yaliyowalangusa kwa nhelo ayo yowalangusa hewo, wazangugana wambate bahala, ila nawadumba wanhu 20Wazangupala mhela unojile. Wapala wanhu wazengidita wanoga, kumuuza. Aho wali wogana wambate na kumgala kuli ludali lwa chilongozi. 21Wala wapugajizi nawamlonjela, “Mlangusa, tuvizela hegwe kwangulangusa na kulonga aku wokomya, tuvizela hambe umbagule munhu, kwangulangusa nzila za Nguluwi. 22Lelo tulonjele iwa goya kumpa mndewa wa Loma kodi?”

23Yesu nakavizela aho wangumjeza, nakawalonjela, 24“Mndajile sendi ayo. Ndaze mutwi na itagwa ali ndo lya whaani?”

“Mutwi wa Kaizali.” Nawedichila.

25Yesu nakawalomjela, “Goya, mmigalile Kaizali gawele ga Kaizali na mmigalile Nguluwi gawele ga Nguluwi.”

26Aho hali wanhu walemwela kumgwiliza, wekala tulu wochijesa vyoyawalonjele.

Mbuli ya kuzilipuka

(Matei 22:23-33; Malichi 12:18-27)

27Wala Masadukayo, nawawele walonga kuduhu uzilipuko kwa wabagame, woya hali Yesu, wazangulonga. 28“Mlangusa, Musa nakatwandichila, ‘Wone mng'holozo yumwe yaje ne kulela mwana, yogana munhu yumwe wa lukolo lwenu yamhalile ayo mdala, yamlelele wana mng'holoze.’ 29Lelo mhela umwe kwali na wanhu saba wa lukolo lumwe. Yula yalongole kamhola, hamba nakabagama ne kulela mwana. 30Mng'holoze wa keli nakamhola yula mdala mlekwa, naye kahi nakabagama. 31Na wakadatu hiho. Wazanguluta hiho mbaka weng'ha saba nawabagama haduhu yalechile mwana kuli yula mdala. 32Logadumile, yula mdala na heye nakabagama. 33Lelo zuwa lya wabagame kuzilipuka mdala ayo kowa mdala wa yalikohi? Weng'ha saba na wali wamhesile.”

34Yesu nakawalonjela, “Walume na wadala wa mihela aji wanguhola na kuholeka, 35Ila wala Nguluwi yowawika mbaka mhela wa kuzilipuka, howohesa ne kuhesigwa hebu. 36Awo howobagama kahi, kwa vila, wowa kota wahilisi wa kilanga wa Nguluwi. Na ndo wana wa Nguluwi mina hewo walawa kuli wanhu wabagame. 37Ila kuzilipuka kwa wabagame, Musa kahi nakakunda mbuli azo kuli gandichigwe gelile. Yolajila hala honhu hali chisosolo lochali chikwaka chiluli, kangumchema Mkulu kota Nguluwi wa Abulahamu na Nguluwi wa Isaka na Nguluwi wa Yakubu. Lelo heye hawele, 38Nguluwi wa wanhu wabagame, ila Nguluwi wa wanhu wakomu, mina wala yawachemile kowali, wangikala na heye.”

39Walangusa wa malajizo ga Musa nawalonga, “Mlangusa kwidichila goya ng'hatu.” 40Mina huganile kumuuza kahi chinhu chinji.

Mbuli Ya munhu yabachigwe mafuta

(Matei 22:41-46; Malichi 12:35-37)

41Yesu nakauza, “Lekachoni wanhu walingulonga Kilistu Mlohozi ndo mwana wa Daudi? 42Mina yuye Daudi kangulonga mlichitabu cha heye cha zabuli,

“ ‘Mkulu, nakamlonjela Mkulu wa heni,

kalise nzingo ya heni ya kudilo,

43mbaka ndiwawiche wang'honyo wa hegwe, wawe

chigoda cha kuwichila magulu ga hegwe.’

44Daudi na kamchema ahyo heye, ‘Mkulu,’ Yowa ndaze lelo, Kilistu Mlohozi yawe mwana wa Daudi?”

Yesu kanguwadeuza walangusa wa malajizo

(Matei 23:1-36; Malichi 12:38-40)

45Yesu nakawalonjela walanguswa hali wanhu weng'ha, 46“Milolele na walangusa wa malajizo ga Musa hewo waganaaga kukola wavalile kanzu, wangana kulamsigwa na wanhu watanganiche kuli masoko. Na kikalisa kumwando mli ng'handa za kusalila na kuhola vigoda vya kumwando hali mnvina. 47Wanguwabunza wadala walekwa na wangihada hewo wanoga kwa kulanda kwa sala zihejile. Zuwa Nguluwi loyowazapa wanhu, wotagusigwa kwa wihe lukami ng'hatu!”

Nu markerat:

Lukasi 20: Chividunda

Märk

Dela

Kopiera