LUK 23
23
Yisu Pilat Tsüngdang
(Mat. 27.1-2,11-14; Mar. 15.1-5; Yoh. 18.28-38)
1Aser parnok telok ajak apusoa pa Pilat madangi anir aru. 2Aser parnoki pa aitsümesoa ashi, “Iba nisung yagi ozü kin mashilen odakja, aser Kaisar nem alimelen agütsütsü aliba nungtema aser pa sasa paji Khrista Chuba ta jembiba onoki angu.” 3Aser Pilati pa dang asüngdang, “Na Yihuda nunger Chubaji asü?” Aser pai langzü, “Nai aji oda ashir.” 4Aser Pilati puti-ungertem aser telok dang ashi, “Ni iba nisung dak tai kecha mangur.” 5Saka parnoki tali sashia ashi, “Pai Yihuda ajak nung aser Galil nungi tenzüka iba yimti tashi sayua nisungtem rongrongdaktsür.”
Yisu Herod Tsüngdang
6Kodang Pilati ya angashi, iba nisungji Galil nunger asü ta asüngdang. 7Aser kodang pai paji Herod yimsüsüdak aliba ta metet, pai paji Herod dangi yok, kechiaser iba mapang nungji pa Yirusalem nung liasü. 8Kodang Herodi Yisu angu, pai kanga pela-a liasü, kechiaser pai Yisu indang angashia mapang talangka nungi pa ngunüa liasü; aser pai Yisu nungi temaitsü kar angutsü imla. 9Aser pai Yisu dang o aika asüngdang, saka Yisui pa dang kecha melangzü. 10Aser puti-ungertem aser tezülurtemi anasa arua noktaka ain adoka Yisuji aitsü. 11Herod aser pa temerangertemi pa dang mezüng meshia atala-a benshir külen pa nem sentsüprang sobutsü sobutsür Pilat dangi pa meyipa yok. 12Aser iba anogo nungjisa Herod o Pilat na tembar kümtet, kechiaser iba tejaklenjibo parnok kati ka den tsükchitepa liasü.
Yisu Tepsettsü Bendanga Agütsüba
(Mat. 27.15-26; Mar. 15.6-15; Yoh. 18.39—19.16)
13Idangji Pilati puti-ungertem aser yimsüsürtem aser nisungtemji külemi jatep aser parnok dang ashi, 14“Iba nisungi nisungtem mashileni odaktsür ka ama nenoki kü dangi anir arur, saka ajiang, nenok madang ni pa atitanger külen nenoki pa aitsüba indang pa dak tai kecha ni mangu, 15mesüra ano Herodia mangu, kechiaser pai pa asenok dangi yoka lir. Anungji tasütsü langa pai tai kecha meinyak; 16anungji ni pa dak repa-züker paji chiokdi.” 17Tang benjong mapang nung pai parnok nem puoka alir ka chioktsüla. 18Saka parnok ajaki ayimtena ashi, “Iba nisung tepsetang, aser onok dangi Baraba chiokang.” 19Paji yimti nung yim anema keptepba aser nisung tepsetba asoshi tepuokdak yua liasü. 20Aser Pilati tanaben Yisuji chioknüa parnok den jembi. 21Saka parnoki ayimtena ashi, “Angenlokang, pa kangki nung angenlokang.” 22Tasembenbuba pai parnok dang ashi, “Kechiba, iba nisungi kechi tamajung inyak? Pa dak tasütsüsa langa ashikülaka tamajung ni kecha mangur, anungji ni pa dak züka chiokdi.” 23Saka parnoki ola tulu agi ayimtena pa kangki nung angenlokang ta ashi. Aser parnoki ayimtenba ola jagi koktet. 24Yamaji parnoki kechi mepishi aji inyaktsü asoshi Pilati mela. 25Aser yimti anema keptepba aser nisung tepsetba asoshi tepuokdak puoka aliba shiba parnoki khangzük, Pilati paji chiok, saka parnoki mulungba ama pai parnok nem Yisu bendanga agütsü.
Kangki Nung Angenlokba
(Mat. 27.32-44; Mar. 15.21-32; Yoh. 19.17-27)
26Aser kodang parnoki pa anir ao, Kurini nunger nisung ka tenüng agi Simon yimti-i aruya liasü; parnoki paji atsüa aru aser pa dak kangkiji apuloktsü aser Yisu sülen aji bendaktsü. 27Aser telok jenti pa sülen anitak aser tetsürtemi pa atema mang yima anitak. 28Saka Yisui meyiper parnok dang ashi, “Yirusalem jalatem, ni asoshi tejeb saka nenok aser nenok chirnurtem asoshi jebang. 29Kechiaser ajiang, anogotem arudagi, koba nung parnoki ashitsü, ‘Tapunglatem aser kodanga tanur masortem aser kodanga mama meyongdaktsürtem temoatsü.’ 30Idangji parnoki tenemtem dang shia tenzüktsü. ‘Onok dak tsükang;’ aser tokongtem dang ashitsü, ‘Onok nembangang.’ 31Kechiaser parnoki süngdong tajem dak ya inyakra, süngdong taro nung kechi inyaktsü?”
32Aser tamajung benshiba tangar nisung ana pa den südaktsütsü asoshi anir aru. 33Aser kodang parnoki Tekolak Ret ta ajaba linük jagi aru, idakji parnoki pa kangki nung angenlok, aser tamajung inyakba nisung ka pa tajichilen aser ka tabelen ta kangki nung angenlok. 34Aser Yisui ashi, “Oba, parnok dang tai tokang, kechiaser parnoki kechi inyaker aji parnoki memetet.” Idangji parnoki an toktanga pa süoshi parnok rongnung lemsa. 35Aser nisungtemi anasa noktaker repranga liasü, saka yimsüsürtemi pa atala-a ashi, “Pai tangarbo kümzük; pa Tsüngremer Khrista, Teshimtetsangji süra, pai pei sasa kümzükang!” 36Aser temerangertemia pa dangi arua tasentzü agütsü aser pa atala-a ashi, 37“Na Yihuda nunger Chubaji süra, ne sasa kümzükang.” 38Aser pa kolaklenji iba tezüluba ya liasü. “IBAI YIHUDA NUNGER CHUBAJI lir.”
39Aser tamajung inyaker rongnung ka shiba pa den külemi meta, pai pa dak sensaja ashi, “Na Khristaji masü no? Ne sasa aser onok kümzükang.” 40Saka tangar ka jagi paji arüja ashi, “Asenok temerenshi kasa angur sür nung nai Tsüngrem metsübur no? 41Aser asenbo ya atangji tim dang; kechiaser asenbo asen yari tajangzük ngudagi; saka iba nisung yagi kecha tai meinyak.” 42Aser pai ashi, “Yisu na kodang ne Chuba yimli ain nung arudir, ni bilemtetangma.” 43Aser pai pa dang langzü, “Atangji ni ne dang shidi, tanüsa na kü den Paradise nung alitsü.”
Yisu Asüba
(Mat. 27.45-56; Mar. 15.33-41; Yoh. 19.28-30)
44Ibai terana baji shi liasü, aser asem baji tashi alima ajonga nung tesangwa madoki mangadok. 45Aser anüi pei tesangwa magütsüi aküm aser tenla kidang teyindangba sü tiyongi shimadok. 46Aser Yisui ola tulu agi ayimtena ashi. “Oba ne ket nung ni kü nela bendanga agütsür.” Aser aji shir külen pai pei taküm bendanga agütsü. 47Aser kechi atalok aji kodang noklang madak kiburi angu, pai Tsüngrem tenüng sanga ashi. “Atangji iba nisung temeshi liasü.” 48Aser tatalokbaji reprangtsü sentepba telok jagi kechi atalok aji angudang parnok ajaki pei teku nung tsünga kidangi meyipa ao. 49#Luk. 8.2 Aser pa den metetteper ajak aser Galil nungi pa sülen anitakba tetsürtemi oji nungi itemji repranga noktak.
Yisu Mang Aremba
(Mat. 27.56-61; Mar. 15.42-47; Yoh. 19.38-42)
50Tang Yihuda nunger yimti Arimathia nungi nisung ka tenüng agi Yosef liasü, paji yimsüsüba mungdang züngsem ka temeshi aser nisung tajung liasü. 51Shibai parnok nükjidong aser mapa nungji aura maka, aser Tsüngrem Yimli arubaji repranga liasü, 52iba nisung jagi Pilat dangi oa Yisu mang meshi. 53Aser pai aji ajungzüka sü tanük ka agi mei, aser lung nung angenpoka aliba leper koba nung nisung kodanga meyudang iba nungji ayu. 54Ibaji terenemba anogo aser amungnüji anasa aita liasü. 55Aser Galil nungi pa den aruba tetsürtemi tesülen anitak, aser leperji aser pa mangji koda yua liasü itemji parnoki angu. 56#Ani. 20.10; Taz. 5.14 Aser parnoki meyipa aru, aser teronem menemba aser temezütsüba pa mang asoshi renem. Aser amungnü ozüng amato parnoki anisüngzük.
Nu markerat:
LUK 23: AONAGABSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Ao Naga C.L. Bible
© Bible Society of India, 2004.
Used by permission. All rights reserved worldwide.
