LUK 21
21
Amitsür Tenla
(Mar. 12.41-44)
1Pai reprangketa yok aser takartemi parnok sempet sen tenla sen rizüngdak enokya angu; 2aser sensaker amitsür kati idakji poisa ana enoktsüba pai angu. 3Aser pai ashi, “Atangji ni nenok dang shidi, ajak dang tali iba sensaker amitsüri enoktsüogo; 4kechiaser parnok ajaki parnok rongsen moshia akaba nungi tenla sen rizüngdak enoktsü, saka lai la sensakba nungi la taküm asoshi akaba ajak enoktsü.”
Tenla Ki Raksatsü Indang Shinba
(Mat. 24.1-2; Mar. 13.1-2)
5Aser kari tenla ki indang, ya koda tajinütsü lung aser tenlatem agi tobur junga yanglu ta jembidang, pai ashi, 6“Nenoki kechi jembir item asoshi anogotem arutsü, kodang lung ka manung ka melokshi-i yangi anünga malitsü.”
Timtem Aser Rishikangshi
(Mat. 24.3-14; Mar. 13.3-13)
7Aser parnoki pa dang asüngdang, “Tesayur, süra itemi kodang ataloktsü? Aser kodang ya ataloktsü mapang anasa aitdir temaitsüji kechi alitsü?” 8Pai ashi, “Nenok mashileni anir moudaktsütsü kümdangang kechiaser aikati kü nüng nung arua, ‘Ni paji’ aser ‘mapang tongogo’ ta ashitsü! Parnok sülenji tanitakma, 9Kodang nenoki raraba aser rongrongba osang angashidir, tsübua telima, kechiaser itemi tamasa ataloktsüla; saka tatemji idangjibo masütsü.”
10Idangji pai parnok dang ashi, “Kini kin anema aser yimli-i yimli anema apusotsü. 11Aser menoknok tulu aser tesem tesem nung ayawara aser tashitak wara alitsü aser anüng nungi tetsübutsü aser temaitsü tulu adoktsü. 12Saka item ajak marudang kü nüng atema parnoki parnok teka nenok dak sotaktsü aser sinagogtem aser tepuokdak nung nenokji bendanga agüja rishikangshitsü. 13Idangji nenoki kuli agütsütsü mapang alitsü. 14Anungji nenoki koda langzütsü aji mapang matongdang yongi mebilemtsü lemtetang. 15Kechiaser nenok tsükchirtem ajaki makoktsüba aser melangzüktettsüba tebang aser shisatsü ni nenok nem agütsütsü. 16Saka nenok tsüraburtem aser adianutem aser kimangtem aser tembartem ajanga ang nenokji bendanga agütsütsü, aser nenok karbo parnoki südaktsütsü. 17Aser kü nüng atema ajaki nenok sempatsü. 18Saka nenok kolak nung aliba kujang kata mesamatsü. 19Nenok taremzükba ajanga nenoki nenok takümji ajangzüktettsü.
Yirusalem Raksatsü Indang Shinba
(Mat. 24.15-21; Mar. 13.14-19)
20“Saka kodang Yirusalemji temerangertemi meketbanga nenoki ngudir, idangji iba teraksatsüba mapangji anasa ta metetang. 21Idangji Yihuda lima nung alirtem tenemi jenang, aser shirnok yimti tiyong nung ali parnoka pila-a oang, aser shirnok oagi yimtsüng nungji ali parnoki yimti jagi teyima. 22Kechiaser zülua aliba ajak ataloktsü asoshi ya tayang küpzükba anogotem lir. 23Iba tensa nung temang mazüngi alirtem aser mama yongdaktsürtem asoshi aiatai! Kechiaser alima nung timtem tulu aser iba nüburtem madak Tsüngrem terasaba tulu alitsü. 24Aser parnok nok agi laotsü; aser parnokji pua kintem ajak dangi anir aotsü. Aser Bendangertem mapang matalok tashi parnoki Yirusalemji ajemshitsü.
Nisung Chir Aruba Anogo
(Mat. 24.29-31; Mar. 13.24-27)
25“Aser anü, ita aser petinutem nung temaitsü alitsü alima nung kintemji tzüyim aser tzüsem arütepba ola agi tamataridaktsüba nungji tim atemtsü. 26Nisungtemji tetsübu aser alima nung anendaka aliba tataloktsü jagi süchia aotsü, kechiaser anüng aintem anokshitsü. 27Idangji parnoki Nisung Chir mepet nung ain aser sentsüwangshi tulu keter aruba angutsü. 28Kodang itemji atalokmesodir, azüklen reprangang, aser nenok kolak roka tuang, kechiaser nenok tekümtet anasa aiter.”
Mungudong Nungi Tatishitsü
(Mat. 24.32-35; Mar. 13.28-31)
29Pai parnok dang o-entepba ka ashi, “Mungudong dak aser süngdongtem ajak ajiang, 30parnok kodang süngo lanu adokdir, joko mei anasa lir ta nenoki meteter. 31Yamajisa kodang nenokia item ataloka aruba ngudir, Tsüngrem Yimli anasa lir ta metetang. 32Ni nenok dang atangji shidi, ajak matalok tashi iba putu süia maotsü. 33Anüng o ali na süitemtsü, saka kü o mesüitemtsü.
Mita Alitsü Nüngdak
34“Saka nenok sasa indang kümdangang, aji mesüra chidiyungdi aser yi mesepba aser iba taküm shisa bulu agi nenok temulung taret akümtsü, aser iba anogoji sang ka ama arutsü 35Kechiaser yamaji alima ajak nung alir madangi arutsü. 36Tataloktsü aliba item ajak nungi nenoki jenbutettsü aser Nisung Chir tsüngdang noktaktsü asoshi, nenoki mapang shia saksalema sarasademang.”
37Aser anogo shia pai tenla kidang sayua liasü, aser aonung shia pai oa Oliv ta ajaba tenem nung ayip. 38Aser anepungi nisung ajaki tenla kidangi pa o angatsü pa dangi aru.
Nu markerat:
LUK 21: AONAGABSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Ao Naga C.L. Bible
© Bible Society of India, 2004.
Used by permission. All rights reserved worldwide.
