YOHAN 4
4
Yisu Aser Samariatsür
1Yohan dang nungi Yisui nütsüng timba kümdaktsür aser baptitsür ta Farisitemi angazükogo ta Yisui meteta liasü. 2Saka Yisuibo shinga baptija maliasü; pa nütsüngtemiang baptitsü. 3Aser pai Yihuda lima toktsü aser Galil-i meyipa ao. 4Pai Samaria lima ajanga aotsüsa aküm; 5anungji Yakobi pei chir Yosef nem kechi ali tila ka agütsü iba li anasa Samaria nunger yim Saikar-i aru. 6Yakob tzübu yangji liasü. Lenmang nung belemseter, Yisu tzübu kümbang nungji mena liasü. Aji terana baji meta liasü.
7Samariatsür ka ajagi tzütai aru. Yisui la dang ashi, “Kü nem tajemtsü tzü kua,” 8kechiaser pa nütsüngtem yimti jagi chiyungtsü alitsü oadoker liasü. 9Samariatsür jagi pa dang ashi, “Na Yihuda nunger ka sür nung ni Samariatsür ka dang tajemtsü tzü koda meshir?” (Kechiaser Yihuda nungeri Samaria nunger den keyin mechiteper). 10Yisui la dang ashi, “Nai Tsüngrem sempet meteta ali asübo shibai ne dang tajemtsü tzü meshir, nai pa dang meshir lila, aser pai ne nem takümtsü tzüji agütsür lila.” 11Tetsür jagi pa dang ashi, “Tulur, na tzü tatettsü kecha maka aser tzübuji tarok; ajangla nai kong nungi takümtsü tzü angur? 12Ozü tebou Yakob, shibai onok nem tzübuji agütsü aser pa, par chirtem aser pa shirurutem dena iba nungjagi ajem, pa dang nungi na tuluba asü?” 13Yisui la dang ashi, “Shibaisa iba tzü jemdir tanaben tzüratsü, 14saka shibaisa ni agütsüba tzüji jemdir pai kodanga metzüratsü; saka ni pa nem agütsüba tzüji pa dak teti takümtsü pokteta tzüpokdak ka akümtsü.” 15Tetsür jagi pa dang ashi, “Ni metzüratsü aser yagi tzütai marutsüsa iba tzüji kü nem agüjang.”
16Yisui la dang ashi, “Oang aser ne kinungpu jar yagi arung.” 17Tetsür jagi pa dang ashi, “Ni kinungpu mali.” Yisui la dang ashi, “Ni kinungpu mali ta nai shitak shiogo, 18kechiaser ne kinungpu pungu liasü aser tang na shiba den lidagi paji ne kinungpu masü. Nai ya atangji shiogo.” 19Tetsür jagi pa dang ashi, “Tamarener, na ainkar ka ta ni meteter. 20Ozü tetsü-teboutemi iba tenem nung külem, aser kechi nung nisungtemi külemtsü tim aji Yirusalem ta nenoki ashir.” 21Yisui la dang ashi, “Tetsür, kü o nung amangang, nenoki iba tenem nung süshia, Yirusalem nung süshia, Tebu dang mekülemtsü mapang ka arudagi. 22Nenoki kechi memetet aji külemer, saka onoki kechi metet aji külemer kechiaser tekümtetji Yihuda nunger nungi lir. 23Saka ochi nung külemertemi Tebu dang Tanela nung aser atangji nung külemtsü mapang arudagi aser aji tang lir; kechiaser pa külemertem asütsü Tebui ibala bushir. 24Tsüngrembo Tanela, aser shiri pa külemdir Tanela nung aser atangji nung külemtsü tim.” 25Tetsür jagi pa dang ashi, “Mesia (shiba dang Khrista ta ajar) arudagi ta ni metet; kodang pa arudir pai onok nem ajak metetdaktsütsü.” 26Yisui la dang ashi, “Ne den shibai jembir aji Pa.”
27Idangji pa nütsüngtem aru aser pai tetsür ka den jembiba angudang parnoki süngmang. Saka “Nai kechi aginür? ta mesüra kechiba nai tetsürla den o jembir?” ta pa dang shingaia meshitet. 28Anungji tetsür jagi tzü mori toktsür yimtaki ia nisungtem dang ashi, 29“Ni kechisa inyak item ajak kü dang shiogo, ibala nisung ka aruagi ajiang; ibai Khristaji asü na?” 30Anungji parnoki yimtak nungi adoka Yisu dangi aruya liasü. 31Iba tsüngda nungji nütsüngtemi pa dang mepishia ashi, “Tesayur, chiyungang.” 32Saka pai parnok dang ashi, “Nenoki memetetba kü chiyungtsü kar.” 33Anungji nütsüngtemi jembitepa ashi, “Pa nem kari chiyungtsü langka bena arua agütsü asü?” 34Yisui parnok dang ashi, “Ni tenyaba mulung chia inyaktsü aser pa mapa atalokdaktsütsü, aji kü chiyungtsü.” 35Ano ita pezü lir külen idangji aluruwa arutsü ta nenoki mejembir no? Ajiang ni nenok dang shidi, “Roka asoa alulen ajiang, tang tarutsü junga mesünga lir. 36Shibai arur pai taa angur, anungji alu atenba aser aluruba tenaprongla külemi pelateper. 37Kechiaser kati atener aser kati arur ta ashiba o yagi putepa adoker. 38Kechi nung nenoki belema meinyak aji arutsü ni nenok yok; tangari belema inyakogo aser parnok belema inyakba rongnung nenoka aden.”
39Tetsürla jagi “Ni kechisa inyaka liasü item ajak pai kü dang shiogo” ta kuli agüja ashi nung iba yim nungjagi Samaria nunger aikati pa dak amang. 40Anungji kodang Samaria nunger pa dangi aru, pa parnok den liang ta parnoki pa dang mepishi aser pa yangji ananü ali. 41Ano jenti-i pa o ajanga amang. 42Aser parnoki tetsür dangji ashi, “Nai ashibayong onoki amanger masü, saka onok sasa ya angashiogo aser ibai atangji Kümtetdakbaji lir ta onoki metet.”
Tamarener Ka Jabaso Anebtsüba
(Mat. 8.5-13; Luk. 7.1-10)
43Anogo ana süir külen pai yang nungjagi Galili ao. 44#Mat. 13.57; Mar. 6.4; Luk. 4.24 Kechiaser ainkar kaji pei lima nung nüngsang maka ta Yisui pei sasa kuli agütsü. 45#Yoh. 2.23 Anungji pa kodang Galili aru, pai Yirusalem nung benjong mapang nung inyakba ajak ngua Galil nungeri pa agizük; kechiaser parnoka benjong jagi oa liasü.
46Anungji Galil nung aliba Kana yim, kechi nung pai tzü agi yi kümdaktsü ajagi pa tanaben aru. Iba mapang nungji tamarener jabaso ka Kapernaum nung shiranga liasü. 47Kodang pai Yisu Yihuda nungi Galili aruogo ta angashi, pai Yisu dangi ao aser pa arur par jabaso anebjang ta pa dang mepishi, kechiaser tanurji tasür liasü. 48Anungji Yisui pa dang ashi, “Nenoki temaitsütem aser tesüngmangtsü mapatem mungura mamangtsü,” 49Tamarener jagi pa dang ashi, “Kibur ozü chir masüdangsa alungma.” 50Yisui pa dang ashi, “Oang, ner jabaso taküm lir.” Yisui pa dang ashiba oji pai amang aser pai ao. 51Pa luya alidang par kilirtemi par jabaso taküm lir ta shia pa den ajurutep. 52Anungji pai parnok dang pa kodang nungi jungtutsü tenzük ta asüngdang. Anungji parnoki pa dang ashi, “Yashi ka baji meta nungi rameni pa toktsü.” 53Anungji “Ner jabaso taküm lir” ta Yisui pa dang iba mapang nungji ashi ta tebui metet; aser pai pei sasa aser par kibong ajaki amang. 54Ano ibai Yisu Yihuda nungi Galil-i arur inyakba temaitsü tanabuba liasü.
Nu markerat:
YOHAN 4: AONAGABSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Ao Naga C.L. Bible
© Bible Society of India, 2004.
Used by permission. All rights reserved worldwide.
