TENYARTEM MAPA 8
8
1Aser pa südaktsütsübaji Sauli mulunga liasü.
Sauli Arogo Rishikangshiba
Item anogo nungji Yirusalem nung arogo anema rishikangshi tulu adok. Tenyartem dak alaka, parnok ajak Yihuda aser Samaria lima nung prokshia liasü. 2Bendanga agütsüba tamangertemi Stefan arem aser pa asoshi mangyim tulu liasü. 3#TMa. 22.4; 26.9-11 Saka Sauli ki shiai tua teburtem aser tetsürtem atsütena tepuokdak yua, arogoji raksatsütsü merang.
Samaria nung Osangtajung Sayutsüngiba
4Anungji prokshia aortemi parnok kolenisa ao idakji oji sayutsüngia ao. 5Filipa Samaria yimti-i lua Khrista indang parnok dang sayutsüngi. 6Filipi jembiba aser pai kechi temaitsü sayatenyatem inyak itemji parnoki ngua aser angashia telokti-i mulungsoa pai sayuba nungji temulung agüja anga. 7Kechiyong temenen tanela keta alirtem nungi temenen tanelatem ola tulu adoka, parnok dak nungi adokdaktsü. Togimra agi tonga alirtem aser tsüngtsükertem aika anebdaktsü. 8Anungji item yimti nungji tepela tulu liasü.
9Saka iba yimti nungji Simon ta ajaba nisung ka liasü. Pai temezüngba mapa inyaka, pei sasa tulu küma jembia Samaria nungertem süngmangdaktsü. 10Aser parnok ajaki tulutiba nungi tilatiba tashi, pa dang anga-a ashi, “Tsüngrem ain tashi tulu aketba nisungbaji ibai lir.” 11Aser parnoki pa dang anga, kechiaser talangka nungi pa temezüngba mapatem agi parnok süngmangdaktsü. 12Saka kodang Tsüngrem Yimli Osangtajung indang aser Yisu Khrista tenüng indang Filipi parnok dang sayutsüngi, parnoki amang, aser parnok tebur o tetsür ajonga baptitsü. 13Aser Simonia amang aser pa-a baptidaktsü aser pa-a Filip den senzü. Aser temaitsütem ain tulu sayatenyatem inyakba ngua, pa süngmang.
14Samaria nungertemi Tsüngrem O agizükogo ta kodang Yirusalem nung alirtemi angashi, parnoki Peter aser Yohan parnok dangi yok. 15Kodang parnok tonga aru, tamangertemi Tanela Temeshi agizüktettsü asoshi parnoki sarasadem. 16Kechiaser tang tashi parnok shinga daka Tanela Temeshi ano malui liasü. Parnokji Kibuba Yisu tenüng nung dang baptitsür liasü. 17Idangji Peter aser Yohani parnok dak teka agi nemet, aser parnoki Tanela Temeshi agizük.
18Saka tenyartemi teka agi nemetbaji ajanga Tanela Temeshi agütsübaji Simoni ngua, pai parnok nem sen bener arua agüja ashi, 19“Shiba daksa kü ket agi nemetdir, Tanela Temeshi pai agizüktsüsa kü nema iba ain agüjangma.” 20Peteri pa dang ashi, “Ne taribi sen ne den külemi tesamadaki idakjang, kechiaser Tsüngremer sempet sen agi alizüktsü ta nai bilemer! 21Iba mapa nung na asoshi shilem mesüra telemzükba maka kechiaser ne mulungjang Tsüngrem madang shitak masü. 22Anungji iba shisa tamajungba nungi temulung meyipang aser Kibuba dang meshiang, ashiko, ne mulung nung bilembaji pai atoktsü akok. 23Kechiyong na mim taku aser tamajung agi alenbanga lir” 24Simoni langzü, “Nai jembizükba o katia kü dak matongtsüsa, ni asoshi Kibuba dang mepishijangma.” 25Peter aser Yohani kuli agüja Kibuba O jembir külen, Parnok Yirusalemi shilang, aser Samaria yimtsüng aika nung Osangtajung sangoktsü.
Filip Aser Ethiopia Nungba
26Kibuba tenyar kati Filip den jembi aser ashi, “Aramesoang, aser anüdoklentip len Yirusalem nungi Gazai aluba lenmangi oang;” aji lisem lenmang#8.26: Lisem Lenmang: Tetezü nisungtemi kangabo mesenzüba mesüra mamshiba lenmang. liasü. 27Pai apusor ao; aser ajiang, Ethiopia nunger teyangluba nisung ka, Ethiopia chubatsür, Kandake kübok yimsüsür tongti ka shiba, lar rongsen ajak madak kibur liasü, pa Yirusalemi tekülemtsü tua liasü. 28Aser pa meyipa aludang, pei talungtsü nung mener, Isaia ainkar kaket züngya liasü. 29Tanelai Filip dang ashi, “Anasai oang, aser iba talungtsü jagi na-a tuang.” 30Filipi asema ao aser pai Isaia ainkar kaket züngya angashir ashi, “Nai azüngbaji angateter südi?” 31Saka pai langzü, “Kari kü dang rateta meshira ni koda sür angatettsü?” Aser pai Filip dang pa den atua amentsü mepishi. 32#Isa. 53.7 Pai züngya aliba Laiji ya liasü:
“Tetepsettsü san ka ama pa anir ao;
aser san chanui pa züng mejepba madang ola madok ama,
Yamaji pai pei tebang melapok.
33Pa mezüngmeshi aser pa o shitak mebendang;
pa putu indang shibai shitettsü;
kechiaser pa taküm alima nungi bener ogo.”
34Idangji teyangluba nisungi Filip dang asüngdang, “Kü dang shiangjo, ainkar jagi pei indang jembir asü mesüra tangar ka indang jembir?” 35Filipi jembitsü tenzük, iba Lai nungi tenzüker pa dang Yisu indang Osangtajung sayutsüngi. 36Aser parnoki ilen jagi aodang, lenmang nung tzü alidak tesem ka atong aser teyangluba nisungi asüngdang, “Ajiang, idaki tzü lir. Ni mebaptidaktsütsü asoshi tenokdangtsü kechi aka?” 37Filipi ashi, “Ne mulung ajak agi amangra, nai inyaktet.” Pai langzü, “Yisu Khristaji Tsüngrem Chir ta ni amanger.” 38Talungtsüji anenang ta pai ashi, aser tenaprongla tzü jagi ai aser Filipi paji baptitsü. 39Kodang parnoki tzü nungi adok, Kibuba Tanelai Filip anir oadok, aser teyangluba nisung jagi pa joko mangu; aser pa pei lenmangi pelashishia ao. 40Saka Filip Azota nung angu; aser Kaisaria tonga maru tashi ajanga aoba yimtitem ajak nung pai Osangtajung sayutsüngi.
Nu markerat:
TENYARTEM MAPA 8: AONAGABSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Ao Naga C.L. Bible
© Bible Society of India, 2004.
Used by permission. All rights reserved worldwide.
