TENYARTEM MAPA 4
4
Peter Aser Yohan Mungdang Tsüngdang
1Peter aser Yohan ano telok den jembia alidang, putirtem aser tenla ki anüker tirtem aser Sadukitem, parnok dangi jashia aru, 2kechiaser parnoki nüburtem dang sayua aser Yisu tasü nungi shia aruba indang sangdong, koba agi tasürtem shia arutsü indang kuli agütsür. 3Anungji parnoki tenaji apu aser tananü tonga tepuokdak ayu; kechiaser ibai nikongdang kanga menur liasü. 4Saka osang angashirtem ajaki amang, aser nisungtem yongsük meyirijang pungu shi aküm. 5Tananüji parnok yimsüsürtem, tamburtem aser tezülurtem Yirusalem nung atenshi. 6Temaba putir Ana, Kaifa, Yohan, Alexander aser kwika temaba putir kimang liasü parnok ajak idakji liasü. 7Peter aser Yohan parnok tsüngdang noktakdaktsü aser yamai asüngdang, “Kechi tashi mesüra shiba tenüng nung nenoki ya inyaker?” 8Idangji Peter Tanela Temeshi agi sünga, parnok dang ashi, “Nüburtem madak yimsüsürtem aser tamburtem; 9tsüngtsüker nisung ka dang tajung inyakba atema onok dang asüngdanger süra, 10Nazaret nunger Yisu tenüng nung; shiba nenoki kangkidong nung angenlok aser Tsüngremi shia arudaktsü, pa tenüng nung iba nisung aneber nenok madang noktaka lir ta nenok ajak aser Israel nungertem ajaki metetang.
11Nenok kisürtemi koba lung shimdok, aji kinük nung tongtiba aküm. 12Aser tangar shinga daka tekümtet mali, kechiaser kechi agi nenok kümzüktsüla, anüng kübok meimchir rongnung tangar tenüng kecha agüja mali.” 13Saka Peter aser Yohan tasü aitba angudang aser oda parnok mazüngba nisung aser mashi-memeteter ta ajiteta arudang parnoki süngmang. Aser parnokji Yisu den liasü ta parnoki meteta aküm. 14Tanepba nisungji Peter aser Yohan den noktaka angudang parnoki iba anema kecha meshitet. 15Saka parnok mungdang nungi pila-ang ta ashi aser parnok o parnok na jembitepa ashi, 16“Item nisung dang asenoki kechi inyaktsü? Kechiaser parnok ajanga atangji tesüngmangtsü aser temaitsü sayatenya ka inyakogo ta Yirusalem nung alir ajaki meteta lir aser asenoki aji nunga ta meshitet.”
17Saka nüburtem rongnung iba tatalokba indang o prokshia modaktsütsü atema, oda tang nungi Yisu tenüng nung shinga danga parnoki mejembitsüla ta shia asenoki parnokji amokmerena nungtemdi. 18Anungji parnoki tena aja aser Yisu tenüng nung teraka mejembitsü mesüra mesayutsüla ta ozüng agütsü. 19Saka Peter aser Yohani parnok dang langzü, “Tsüngrem dang nungi nenok dang ang tashi angatsüji Tsüngrem madang tim asü masü nenoki lemtetjang. 20Kechiyong onoki kechi nguogo aser angashiogo iba indang mejembi-i ang meliteter.” 21Parnoki tanaben tena arütsü aser parnok chiokadok. Nüburtem alibayong parnoki tena merenshitsü mokoki aküm, kechiaser kechi atalok iba asoshi ajaki Tsüngrem tenüng sanga liasü. 22Kechiyong shiba dak iba tanebtsüba temaitsü sayatenya inyak, iba nisungji arishi küm lir dak chia liasü.
Amangba Purtemi Sarasademer
23Peter aser Yohan chioker külen parnoki medemertem dangi aru aser puti-ungertem aser tamburtemi parnok dang ashiba ajak sangoktsü. 24#Ani. 20.11; Neh. 9.6; TKe. 146.6 Kodang parnoki ya angashi, parnok ajak külemi ola adoka Tsüngrem dang sarasadem, “Kibuba, nai anüng, ali, tzüyim aser item nung aliba ajak yanglu; 25#TKe. 2.1,2 (LXX)aser Tanela Temeshi agi ozü tebou Dawid, ne tenzüker bang ajanga ashi,
‘Kechiba kintemi ain adok,
aser nüburtemi amajok o jembi?
26Kibuba anema aser pa Khrista anema alima chubatemi noktak,
aser yimsüsürtemi külemi atenshi.’
27 #
Luk. 23.7-11; Mar. 15.1; Yoh. 18.28,29 “Atangji Bendangertem aser Israel nüburtem den külemi Herod aser Pontias Pilati iba yimti nung ne temeshi Yisu shiba nai mezüja shimtet, pa anema tasa asa.” 28Ne tashi aser terenemba nung anojungi alidang nai kechi inyaktsü renem, ibaji parnoki inyak. 29Anungji tang, Oh Kibuba, parnoki amokmerenbaji ajiang, aser ne tenzükertemi tasü ita ne osang ajak jembitsü tashi agüjangma, 30aser ne temeshi tenzüker Yisu tenüng ajanga temaitsü sayatenya aser tesüngmangtsü mapatem inyaktsü asoshi ne tanebtsüba teka sala-angma ne tenzükertemi kanga tasü ita ne o jembitsü mela-angma.” 31Kodang parnok sarasadema liasü, parnok sentepa alidak kiji anokshi aser parnok ajak Tanela Temeshi agi asüng, aser parnoki Tsüngrem O tasü ita jembia liasü.
Oset Ajak Arok Meyong
32 #
TMa. 2.44,45 Aser amangba purtem telok ajongaji temulung aser tanela ka dang liasü; aser parnok katia pei akabatem pei meyong ta mashi, saka kechisarena arok meyong dang liasü. 33Ain tulu agi tenyartemi Kibuba Yisu shia aruba indang kuli asü, aser Tsüngrem taochi tulu parnok madak liasü. 34Kechiaser parnok rongnung shinga kecha agia anünga maliasü; kechiyong ali mesüra kimung akartemi itemji ayok, aser teyokzükba senji bener arua 35tenyartem tsüngdang yutsü. Aser nisung shia pei nüngdak yari parnoki lema agütsü. 36Aser Levi kidong nungi Kupra linük nung aliba nisung, Yosef, shiba dang tamangertemi Barnaba ta aja, 37Pai pei ali ayok aser senji bener arua tenyartem tsüngdang yutsü.
Nu markerat:
TENYARTEM MAPA 4: AONAGABSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Ao Naga C.L. Bible
© Bible Society of India, 2004.
Used by permission. All rights reserved worldwide.
