Ma꞉tiyu 3
3
Yoneko Tawakalubi Beyamo Wadulateledawate Godokono Tabo Dolamagiya꞉
Mak 1.1-8; Luk 3.1-18; Yon 1.19-28
1Ba꞉bene komo gogo da꞉petolamiya꞉, ba꞉ba tetelo Yoneko tawakalubi beyamo wadulateledawate pete Yudiya hopoeno dito hopolo Godokono tabo ba꞉ma ka꞉na polamagiya꞉, 2“La꞉eno kubane nohobila꞉la꞉, mabu Godote Ko Gawadubuma꞉ deda꞉na ba꞉be komote ba꞉ na꞉pe!” #Ma꞉t 4.17; Mak 1.15
3Ba꞉ hibila, Godokono ukui hawakalimidawa Aisayate dopamo Yonekono pe komoma꞉ tabo ba꞉ma ka꞉na goiya꞉,
“Lumagiti dito hopolo tabo ba꞉ma ka꞉na
ibulu kopegoema꞉ne,
‘Kodawoeno gabo na꞉hiduima꞉la꞉,
ebeno gabo na꞉tuputupuima꞉la꞉!’” #Ais 40.3
4Ba꞉ba tetelo Yonekono emede komo komopino emede komo huiyaha꞉, mabu ebete ka꞉molo-goe ipo kuba kaliko kau-goe tama kamaka꞉go pulinakui, ba꞉gala ebeno baa꞉ wawaka ba꞉gala molo benahanakui. #2 Gaw 1.8 5Ba꞉bema꞉ Yelusalema ko habanapi ba꞉gala komo Yudiya hoponapi ba꞉gala Yodane Tuli hapulu demedehonama꞉, ibi hiliyonomate Yonetamo tolamiya꞉ ebeno tabo ulihoma꞉, 6ba꞉bene iba꞉te ibino kuba da꞉nehawakalilameholiya꞉, ebete ibi Yodane Tulilo beyamo ba꞉bo wadulateliya꞉.
7Ba꞉ba tetelo Pa꞉lisi kapiyuimipi ba꞉gala Sa꞉diyusi kapiyuimipi,#Ya꞉suku tetelo Yu tawakalubino iya꞉tulamepa꞉te netewa kapiyuimi ipuwalo emedenama꞉, ba꞉bi kapiyuimi netewoeno mahilo ba꞉ Pa꞉lisi kapiyuimipi ba꞉gala Sa꞉diyusi kapiyuimipila. Ba꞉bi netewa kapiyuimipa꞉te ukui kapiyama꞉ keda꞉hanamiha꞉, iba꞉te olowabeletihuia꞉go emedenama꞉. Pa꞉lisi kapiyuimipa꞉godolo hiliyonomo tutumate pola꞉nama꞉, iba꞉te komo tutumu Godokono Bukane uwatiya꞉ ba꞉gala komo tutumu ibi ha꞉kiya ibino ukui mabuni uwatiya꞉. Ba꞉bema꞉ iba꞉te ba꞉bi tutumu hiliyonomo uwatete hidonomamo papamila꞉hanama꞉, ba꞉gala puya꞉te atu tutumu uwateheno Pa꞉lisi kapiyuimipa꞉te ibi kubapima꞉ ga꞉lanakuya꞉. Sa꞉diyusi kapiyuimipino komo hiya꞉la. Iba꞉te ha꞉kiya ibi Godoko ta꞉matapima꞉ ga꞉lanakuya꞉, huiyatiya ibino kateneno ubilo wapata꞉lamenama꞉, ba꞉bema꞉ iba꞉te Pa꞉lisi kapiyuimipino hiliyonomo tutumamo kapapamila꞉hanamiha꞉. komo ibi hiliyonomate Yonetamo tolamiya꞉ ebete ibi beyamo kowadulatelema꞉, huiyatiya Yonete ibi ulamete iba꞉tamo na꞉goiya꞉, “La꞉ bu kalulata! La꞉ pote ka꞉goelamiti beyamo wadulatelema꞉ da꞉pelamema, aba꞉, Godokono konomo mauba komote la꞉tamo a꞉kapa꞉mene? Ao, kopema꞉ne! #Ma꞉t 12.34; 23.33 8La꞉eno tepo ipuwa hiya꞉ma꞉ da꞉midilima, wadiyala la꞉ la꞉eno hibi komo hawakalimima꞉ hidohido komo nododila꞉la꞉. 9La꞉ ha꞉kiya la꞉eno ukuilo ba꞉ma ka꞉na akaga꞉lanakala꞉, ‘A modobola mabu A꞉ibalahamako ba꞉ aeno iniwa nabiwila.’ Ao, la꞉ a꞉kamodobamata! Na la꞉tamo hibi tabo begoemo, Godogodolo helo bitana ebete ba꞉moi nakolamo A꞉ibalahamakono gugudi kododilimima꞉! #Yon 8.33,39; Lom 4.12 10Ba꞉bema꞉ ka꞉lo Godote ebeno kabi adi, hiliyonomo nolohoha꞉ gao keha ebete luhuti koa꞉mo kiya꞉hekema꞉ne. #Ma꞉t 7.19; Luk 13.6-9
11“Komo la꞉ la꞉eno kubane dohobila꞉huima, nale ba꞉be komo kohawakalimima꞉ la꞉ beyamo wadulatelemata. Huiyatiya eta lumagino helo konomote naeno helo na꞉gogolona, ba꞉bema꞉ na hidoenoha꞉ ebeno nato ukulaleno beya agatamema꞉. Ebete naeno gala hapuni ba꞉pena, ba꞉bene ebete la꞉ Godokono Gobogobamo ba꞉gala ebeno koa꞉mo kopewadulatelema꞉na꞉ta. #Yon 1.26-27,33; Oel 1.5 12Iyo, ebete witi-laisoeno nonoka tama꞉mo miya꞉teno ilina a꞉lawi, ba꞉bene ebete witi-laisa nahoeno ebeno genama guamo ba miya꞉te nonoka koa꞉mo ba꞉bo kiya꞉hekema꞉ne, ba꞉be koete itana tetelo na꞉woena, a꞉kaha꞉gale.”
Yonete Ya꞉suku Beyamo Dadutiya꞉
Mak 1.9-11; Luk 3.21-22
13Ba꞉bene Ya꞉suti Ga꞉lili hopone Yodane Tula꞉mo Yonetamo piya꞉, ebete ebe beyamo kadutima꞉. 14Ba꞉ba tetelo Yonete na꞉goiya꞉, “Ama꞉le na beyamo adunatene modobola, huiyatiya mabu keka꞉ ama꞉ ba꞉be komo nagodone lawema꞉ da꞉pa꞉? Modoboha꞉!”
15Huiyatiya Ya꞉suti ebetamo na꞉goiya꞉, “Modobola a kododima꞉nema꞉, mabu Godokono tuputupu gabodo tolame ipuwalo ebete a hiliyonomo komo ododilima꞉ da꞉kiyaa꞉menakomene, ale ubiha꞉ma꞉ a꞉keda꞉hanakama꞉.”
Ba꞉ba tetelo Yonete Ya꞉sukunu tabamo papamiwatate ba꞉bo ododiya꞉. 16Ba꞉bene Ya꞉suti beyane ba podolo, ba꞉ba tetenomolo Godote ebeno Hunu Haba a꞉hiya꞉midutalo ba꞉bo umiya꞉, ba꞉gala ebete eta komo ba꞉ma ka꞉na kumiya꞉, Godokono Gobogobo gimai hola keba ka꞉nala꞉ka꞉ ba꞉ba ka꞉na pihitigate ebetamo dito pemediya꞉. #Yon 1.32 17Ba꞉ba tetelo tabote Hunu Habane ba꞉ma ka꞉na pihitiguya꞉, “Ba꞉moe ba꞉ naeno kapiya Gudunomola. Na ebetamo na꞉kalakalutamo.” #Ohale 2.7; Ais 42.1; Ma꞉t 12.18; 17.5; Luk 9.35
Trenutno izabrano:
Ma꞉tiyu 3: KNVA
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2006 The Bible Society of Papua New Guinea and Wycliffe Bible Translators, Inc.
© 2023 Wycliffe Bible Translators, Inc. All rights reserved.
