Luk 21

Kikabu kya mukyeetu wa mufwiiri

(Mal 12.41-44)

1Yesu bu kanaanguna kisoosi, wamono bisina bari mu kutuba mboongo mu kisweekulu. 2Wamono se mukyeetu mosi wa mufwiiri wahele na lubaku, watuba mwaa-mipata myoolo myantele. 3Tumi nde waleele ti: «Ngwanwa me nyiluleele ti: "Mufwiiri wamuwelu wumawu, bvuriri kutuba ti na baatu bobanso; 4bukuri bobanso babo, bi batubiri mu bikabu, bi bari na byo byayu-yulu; ngo kasi nde kunsa buwelu bwaandi, tubiri byobinso bi kabeeri na byo, bya kidziingu.»

Yesu wayaabisa ti Nzo-nzaambi sa bayitsaamuna

(Mat 24.1-2; Mal 13.1-2)

5Baatu babamosi, baba bilaana Nzo-nzaambi ti, yabweeyese mu matari mamabwe, na bitotolo byasakumunu. 6Yesu wabaleele ti: «Biluumbu biri mu kwiisa biri, mu bi luri mu kukengese beenu bi, ka kusaala tari ha yulu tari ko, dibahele kutsyaamuna.»

Mpasi na nkwamusunu

(Mat 24.3-14; Mal 13.3-13)

7Bo bamufuula, baleele ti: «Muyikisi, mu nkya ntaangu mimyo miba, na nkya kidiimbu mbasi-tsuku kisoongo ti mamo matubukiri?» 8Nde waleele ti: «Seenee madyeele mpisi luhele kuwumuka; bukuri baatu balaka sa biisa mu nkuumbu me, na sa beleele ti: "Me nyiri", na ti: "Ntaangu yikokisiri!" Ngo yaa lubanama ko. 9Mbasi-tsuku ha luyuka beenu badzoonsolo mu midziingu, na mu kisaangila, lo yaa luba na boomo ko, bukuri mimyo miyelemini kutekesele kumonoko. Ngo nsukulu ka yikwiisa mu mawasu ko.» 10Tumi nde wabweese kuleele kuri bo ti: «Mansi na mansi sa manwaana, na bimfumu na bimfumu sa byanwaana. 11Butoto sa bwatembele kwalaka, na mu mampele malaka sa mwaba manzala na biyoolo, sa kwaba misamu myansisi, na bidiimbu byabinene bifumuna ku yulu. 12Ngo tekesele momanso mamo, sa balukaanga na kulukwaamisa, sa balutsuundisa mu manzo mankutukunu, na kulutuba mu maboroko, sa balunata ha busu bwa bambyaasi na batumi, mu ntoono nkuumbu yaami. 13Yiyo sa yaba kuri beenu mpwaani ya kuteele me kimbaangi. 14Seenee dyo mu mitima myeenu ti: Lo yaa lutekisele kunyoongo mu ntoono ya kukalila manyutu meenu ko; 15bukuri me-meene, sa nyaluha mi ludzoonso na madyeele, kuri lo bataatu ba beenu, babangusina kulutungukila ko, na kuhaakula mi luleele ko. 16Babo baluyekele sa baba: bataayi na banguri, bampaangi, ba luri nkati-nsi, banduku. Sa badzusa babamosi mu beenu. 17Bobanso sa balubele mu ntoono nkuumbu yaami. 18Ngo kuri ti lufu lumosi lwa mutu weenu ludziimbila ko. 19Bu lunamitini, lo sa lwabvuukisa miheebulu myeenu.»

Yesu wayaabisa ti Yerusalemi sa baditsaamuna

(Mat 24.15-21; Mal 13.14-19)

20«Mu ntaangu yilumono, mikaangu mya bayongolo, midyeengikiri Yerusalemi, lo yaabeenu ti ntaangu ya kutsyaamuna bvula yikokisiri. 21Haho, babo baba ku Yudaya, lo bayitika kwaaku ku yulu milaandu; babo baba kunsa bvula, lo bapala kwaaku, na babo baba ku manseke, lo yaa bakoto mu dyo ko. 22Bukuri bibyo sa byaba biluumbu bya nsundusulu, biri momanso matinu sa meende mu mana. 23Kyaari kuri bakyeetu baba na mayimi, na babo bakwenwiisa baala mabeene, mu biluumbu bibyo; bukuri sa kwaba manyoongi malaka mu nsi yi, na nkesi dza Nzaambi sa dzabwa ha yulu baatu bamaba. 24Sa bafwiilila mu mbeesi yayila, na sa babanata ku bunkutu, mu mansi momanso, na bangooyi sa batsaamuna Yerusalemi natee ntaangu ya bangooyi yikukiri.»

Nyisulu Mwaana muutu

(Mat 24.29-31; Mal 13.24-27)

25«Sa kuba bidiimbu mu ntaangu, mu ngoondo na mu bambwetete; na ha butoto, makaanda sa mabwilikila kinkuuka, mu nsisi dza kiyomo kya mubu na mipaku mya maampa. 26Baatu sa bafwiila mu boomo, na mu kukiingila mamo mabwa mu nsi yoyinso ya baatu; bukuri mpinu dza mayulu sa dzibwa. 27Haho, bo sa bamono Mwaana muutu wukwisikila mu matuti, kunsa mpinu na nkeembu yayinene. 28Misamu mimyo, mibaanaa myeki baandika kumonoko, lo suungumeenu na siimbileenu mitu myeenu, bukuri nkuululu yeenu yikokisiri.»

Nyikusulu mu nkuma ya mungenge

(Mat 24.32-35; Mal 13.28-31)

29Yesu wabateele nkuma yimayi: «Taleenu mungenge na miti myominso; 30mibaanaa myeki teete, lo beenu-meene bu lutala, lu mwaayaaba ti ntoombo yeki bebele; 31bunubwo se beenu, mbasi-tsuku lumonaa ti mamo matubukiri, lo yaabee ti Kimfumu kya Nzaambi kyeki bebele. 32Mu ngwanwa me nyiluleele ti: Kiseendu ki ka kilabuka ko, lo momanso mamo mayirimini. 33Nsi na yulu sa byaluta, ngo Maampu maami, ka mari ndutila ko.»

Mufunu wa kuba naana

34«Seenee madyeele mu beenu-meene, mu kubata ti mitima myeenu mikwiisa kuba malemu, mu ntoono nwiinu yamansaalisi, nkolulu malu, na minyoongi mya kidziingu kimaki, na kuri ti kiluumbu kikyo kihele kulutubukila na sisuu, 35bunu siinga; bukuri sa kiisa ha yulu baatu bobanso badzakalaa mu nsi yansiina. 36Beenee naana, saambileenu mu mpisi ntaangu, mpisi lubaka makwa ma kubvuuka mu momanso makwiisa mamo, na kuba bateleme ha busu bwa Mwaana muutu.»

37Mu ntaangu ya mwiini, Yesu waba baanaa mu Nzo-nzaambi, ngo mu ntaangu ya butsuku, waba palaana mu kweba ku yulu mulaandu, wubateelaa ti wa Mi-olive. 38Mu minkya, baatu bobanso, baba kwiisa ku Nzo-nzaambi mu kumuywiila.

Trenutno izabrano:

Luk 21: MW2013

Istaknuto

Podijeli

Kopiraj