Ruk. 16
16
Takatan wáinin
1Ju̱ métektaku chichamnasha Jesus ni unuiniamuri̱n unuiniamiayi.
“Kuítrintin áishmaṉka takatrí̱n wainniuri̱ amai. Tura nérenniun ujainiak ‘Ame waitramin ame kuítrumin náṉkamas ajapeawai’ tiarmai. 2Nuna antuk ni wainniuri̱n untsuk ‘¿Warinia ju̱sha turamainia? timiai. Yamaikia winia wáinniur áchattame. Tuma asamtai winia kuítruja̱i̱ itiurkamea nu iniaktursata’ timiai. 3Tutai takatan wáinin enentáimsamai. ‘Maa, wisha itiurkatjak’ timiai. ‘Nuṉka táurtinniasha jeatsjai. “Kuit surusta” títinniasha natsaamajai. 4Winia takatur atsakui yurumkan ajamprusarat tusan túrattajna nuna nékajai’ tu enentáimsamai.
5 Nuyá̱ nérenniun tumashmaku armia nuna aṉkant aṉkant untsukarmai. Emka tamia nuna chicharuk ‘¿Winia úuntur urutmá tumashmakuitiam?’ timiai. 6Nisha áimiuk ‘Asuitin sian taru tumashitjiai’ tutai takata wáinin chicharuk ‘Pai. Papinium tumashrum ana nu ju̱á wárikmasmek pujusam nu papí ja̱a̱kam chíkich papinium aya seṉkuintiachik aartá’ timiai. 7Nuyá̱ chíkich tumashmaku támatai ‘¿Amesha urutmá tumashitiam?’ tutai ni chichaak ‘Shana sian taru tumashitjiai’ timiai. Tutai ‘Pai. Papinium tumashrum ana nu ju̱i̱ti. Chíkich papinium aya uchaintiak aartá’ timiai.
8 Nuyá̱ takata wainniu uuntri̱ nuna nekáa ‘Ni yajauch túriniaitiat imiá enentáimniuiti’ timiai.” Nuyá̱ Jesus chichaak “Yus shuarja̱i̱ naṉkaamas Yus shuarcha ai̱ji̱a̱i̱ ni túratniuri̱niak takainiak imiá enentáimkia áiniawai. 9Ju̱ nuṉkanam anaṉkatin átsuk. Tura kuitcha aya ju̱ nuṉkanmaya̱ṉkete. Tuma asamtai atumsha kuítrumja̱i̱ ‘shuaran yáiṉtaj’ tu enentáimsatarum. Kuitji̱a̱i̱ yáiṉtin amukámtai atumsha amuicha je̱a̱nam ipiaamu átaj tusarum túratarum.
10 Shuar ishichik takakna nuja̱i̱ péṉker túrakka, núkap takakna núja̱i̱sha péṉker túrattawai. Tura ishichik takakna nuja̱i̱ péṉker túrachkuṉka, núkap takakna núja̱i̱sha péṉker túrashtatui. 11Tuma asamtai ju̱ nuṉkanmaya̱ anaṉkartin kuitji̱a̱i̱ péṉker túrachkurmeka, tuke átin ana nuja̱i̱ takastincha ¿itiur takastarmek? 12Takakmena nuna Yus ikiatmasuiti. Nuja̱i̱ péṉker túrachkurminkia atumnia átinia nuna ¿itiurak suramsatⁱ? 13Takarniúri̱ jimiará úuntrintin ajastinian tujintiawai. Warí, chikichnaka aneak chikichnaka nakitrashtatuak. Chikichan umiruk chikichnaka umirkashtatui. Yussha tura kuitcha mái̱ metek enentáimtuschamniaitrume” tímiayi Jesus.Mat. 6:24
14Pariséusha kuítian anen armia nu ashí ni táman antukar Jesusan wishikrarmiayi. 15Túmakui̱ Jesus nin chichaak “Atumsha aents íimmianum péṉker awajmamprume. Túrasha atumí enentái̱ncha Yus péṉker nékawai. Kame winia ‘naṉkamantuiti’ turutit tusa wakera nuna Yuska nakitiawai.
Yaunchu etserkamu tura yamái etserkamu
16 Juaṉ étsertsa̱i̱ṉ Muisais aar akupkámia nunasha tura Yúsnan etserin unuiniarmia nunasha antuktin ármiayi. Tura yamaisha tímiania ti shiir chicham awai. Yus akupeana nui̱ urukukit nuka paant etserkamuiti. Tura ashí shuar nui̱ pachinkiataj tusar ni kakarmari̱ji̱a̱i̱ṉ ti takainiawai. 17Túrasha yaunchu akupkámu ashí chicham uminkiatniuiti. Nu chicham uminkiashtinkia nayaimpisha nuṉkasha amukatniuja̱i̱ naṉkaamas itiurchataiti.
(Mat. 19:1-12; Mar. 10:1-12)
18 Áishmaṉ nua̱ri̱n ajapa chikichan nuatkuṉka tsanirmawai. Tura nuwa̱ ajapamu niniurtakka nusha núnisaṉ tsanirmawai.
Kuítrintin áishmaṉ Rásaruja̱i̱
19 Áishmaṉ kuítrintin amai. Nisha imiá shiir pushin ti kuit ainia nuja̱i̱ iwiarmamniuyayi. Tura tuke tsawant yurumak ti kuit amia nuja̱i̱ namperan najanmiayi. 20Tura kuítrincha amai ni naari̱ Rásaru. Nisha kuchaprúku tunamaruyi. Tuke tsawant kuítrinniu wáitiri̱i̱n pujuyayi. 21Ti tsukamak kuítrinniu ekentsa yurumtairi̱nia kakekan yuattsa wakerimiai. Tura ya̱wa̱sha ni kuchapri̱n nukatiarmai. 22Kuítrincha jakamai. Jakamtai jaka shiir pujutai̱nium Aprajám pujumia nui̱ nayaimpinmaya̱ suntar júkiarmai. Kuítrinniusha jakamai. Jakamtai iwiarsarmai. 23Jaka pujutai̱nium wáitias pujus paṉkái̱ íimias Rásarun Aprajámja̱i̱ pujuinian wainkiamai. 24Wainiak untsumuk ‘Apawá Aprajámá waitnentrurta, timiai. Rásaru tsara uwejé̱ja̱i̱ entsan uchupir winia iniai̱run imichturat akuptúrkata. Wisha ju̱i̱ jinium pujusan tí waitiajai’ timiai. 25Tutai Aprajám chicharuk ‘Uchiru enentáimprata. Ame nuṉká iwiaaku pujusam ti shiir pujumame. Antsu Rásaruka nui̱ ti yajauch pujumai. Tura nisha yamaikia ju̱i̱ áyamui tura ámeka wáitiame. 26Tura nú arant nánata ti uunt awai. Tuma asamtai ju̱yá̱ ai̱ wétinian wakeruiniayat tujintiainiawai. Tura ai̱ya̱ ju̱i̱ tátinian wakeruinia nusha tujintiainiawai.’
27 Nuiṉkia kuítrintin timiai ‘Nuiṉkia apawá Aprajámá, ju̱na seajme. Winia aparu je̱e̱n Rásaru akuptúrkata. 28Nui̱sha winia yatsur seṉku matsatainiawai. Nisha ju̱ wáitsatniunam tácharat tusa ujatrúkarti, tájame.’ 29Tutai Aprajám timiai ‘Muisais áarman tura Yúsnan etserin áarman takakainiawai. Nuna umikiarti.’ 30Tutai kuítrintin chichaak ‘Túrasha apawá Aprajámá, antsu jakamunmaya̱ nantaki̱ shuar we ujakam enentái̱n yapaji̱áwarainti.’ 31Takui̱ Aprajám chichaak ‘Muisais áarman tura Yúsnan etserin áarman anturainiachkuṉka jaka nantaki̱ we ujakmasha antukchartatui’ timiai” tú timiayi Jesus.
Trenutno izabrano:
Ruk. 16: jiv
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2009 Avant Ministries in cooperation with Wycliffe Bible Translators, Inc. All rights reserved.
