Ruk. 13
13
Ii enentái̱ yapaji̱átin
1Nu tsawantin chícham ujaktai tusar Jesusan tariarmiayi. Kariréanam Israer shuar ni waakari̱n máwar Yus susatai tusar pujuiniai̱ Piratu niin maa, nuna numpe̱n waaka numpe̱ja̱i̱ pachimpramun ujakármiayi. 2Tura Jesus chichaak “¿Warí enentáimsarum? Kariréanmaya̱ áishmaṉ tárumna nu, chíkich Kariréanmaya̱ áishmaṉja̱i̱ naṉkaamas yajauch ásar túrunawarai ¿tu enentáimprumek? 3Atsá, atumí enentái̱ yapaji̱áchkurmeka núnisrumek atumsha jakattarme. Nuna paant tájarme. 4Tura tiasiúchu áishmaṉ yakí̱ je̱a̱ Seruí kupiniak iniaak nekeṉkarmiania nu, ¿warí enentáimtarum? Chíkich Jerusaréṉnumia̱ shuarja̱i̱ naṉkaamas tunáa ásar túrunawarai ¿tu enentáimprumek? 5Atsá, tájarme. Atumí enentái̱ yapaji̱áchkurmeka núnisrumek atumsha jakattarme” tímiayi.
Ikiu numi nereachma
6Ju̱nasha Jesus métektaku chicham timia ju̱i̱ti.
“Shuar ni ajarí̱i̱n ikiu numin araamun takakuyi. Nerekchiash tusa iyumai. Túrasha nere atsumai. 7Nuiṉkia ni ajari̱ wáinniun chicharuk ‘Antukta, menaintiú uwitin ju̱na nere átai tusan waketrú pujajai túrasha peṉké wáinkiachjai. Ajakta. ¿Urukamtai ántrash wajastata?’ 8Tutai ajá wáinin timiai ‘Atsá uuntá, ju̱ uwitin wajasti. Wajamuri̱n takarsatjai tura péṉker nuṉkan matsatkatjai. 9Nuja̱i̱ nerekchampiash. Tura tuke nereachkuiṉkia nuiṉkia ajakta’ timiai” tímiayi.
Nuwa̱ punuá wewepturun Jesus tsuarma
10Ayampratin tsawantai̱ Israer shuar iruntai̱ je̱a̱nam Jesus unuiniak pujumiayi. 11Nui̱sha nuwa̱ pujumiayi. Nu nuwa̱sha tiasiúchu uwí tuke jaa pujumiayi. Íwianch nin yajauch awajás apuna tuke ikiaramiayi. Túramu asa paṉkái̱ nakuenkataj tukamá peṉké tujinmiayi. 12Jesus nuna wainiak chicharuk “Nawantru, ame jáamurmiya̱ aṉkant ajasume” tímiayi. 13Nuna tinia ni uwejé̱ja̱i̱ antiṉmiayi. Tura nú chichamaik nuwa̱sha paṉkái̱ nakuenkamiayi. Tura Yusa náari̱n uunt awajsámiayi. 14Tura Jesus ayampratin tsawantai̱ tsuaru asamtai Iruntai̱ Je̱a̱ uuntri̱ kajek iruntrarmia nuna chicharainiak “Sais tsawant takaschatniukait. Ayampratin tsawantai̱ tsuámartaj tusarum táchatniuitrume. Sais tsawant ana nui̱ tátiniaitrume” tímiayi. 15Tura Jesus chicharainiak “¡Ántar chichamtinia! ¿Atumí waakari̱sha atumí umpururi̱sha yumi aartai tusarum ayampratin tsawantin atíarum júatsrumek? 16Tura ju̱ nuwa̱sha atumí shuari̱ Aprajám shuarnumia̱ akiiniaiti. Ni tiasiúchu uwí iwianchi uuntri̱ Satanás yajauch awajás jiṉkiamuyayi. Nincha ayampratin tsawant ai̱ṉᵏⁱ yajauch awajsámunmaya̱ atíachminkiait” tímiayi. 17Jesus nuna takui̱ ni nemasri̱sha natsa̱a̱rarmiayi. Tura peṉké shuar ni péṉker túramuri̱n wáinkiar warasarmiayi.
Mustasa jiṉkiái
(Mat. 13:31-32; Mar. 4:30-32)
18Nuyá̱ Jesus chichaak “¿Yusa akupeamuri̱ wariji̱a̱i̱ṉ métektakuit? 19Mustasa jiṉkiaiji̱a̱i̱ métektakuiti. Mustasa jiṉkiaincha shuar ni ajarí̱i̱n araamiayi. Tsapái tsakaak uunt numi ajasmiayi. Ti uunt asamtai chiṉki ni kanawe̱n pasuṉmarmiayi” tímiayi.
Paṉ karin eṉketámu
(Mat. 13:33)
20Tura ju̱nasha tímiayi “¿Yusa akupeamuri̱ wariji̱a̱i̱ṉ métektakuit? 21Paṉ karin eṉketámuja̱i̱ métektakuiti. Trikiu nekeṉma núkap ana nui̱ nuwa̱ karinian ishichik eṉketámiayi. Túram ashí kariamiayi” tímiayi.
Yupikiach waiti
(Mat. 7:13-14,21-23)
22Jesus Jerusaréṉnum jeattsa weak untsurí peprunam wayá̱ unuiniarkutak wémiayi. 23Weai̱ chíkich shuar aniasmiayi “Uuntá, ¿uwemainia nu ishichkikiait?” 24Tutai Jesus chichaak “Yupikiach wáitiniam waya̱taj tusarum ti wakeritiarum. Kame untsurí waya̱taj tusar wakeriartatui túrasha tujintkiartatui, tájarme. 25Je̱á̱ nérenniuri̱ wáitin epenmiatai atumsha a̱a̱ wajarum nu wáitiniam wajasrum untsúakrum ‘Uuntá, uratritia’ títiatrume. Túrasha ‘Nékatsjarme. ¿Tuya̱ntskaitrum?’ turamtatrume. 26Nuyá̱ átum títiatrume ‘Túrasha uuntá, iisha ámiji̱a̱i̱ yurumámji, ámiji̱a̱i̱ umarmaji. Tura ii pépruri̱ncha unuiniamame.’ 27Túrasha ni títiatui ‘Tuya̱ntskaitrum, nékatsjarme, tátsujrumek. Yajauch túrintirmeka wini̱ya̱ṉka kanaktiarum.’ YKan. 6:8; 119:115
28 Nuyá̱ Aprajámsha, Isaksha, Jakupsha tura ashí Yúsnan etserin Yus akupeana nui̱ waya̱waru wainkiarum tura a̱a̱ ajapam pujusrum tí utkuram naim tásarara ajattarme. 29Tura Yus akupeana nui̱ etsa̱ tatainmaani̱ya̱sha etsa̱ akatainmaani̱ya̱sha araki̱a̱sha nuṉkaani̱a̱sha taar imia Israer shuarchaitiat yurumátai tusar pujusártatui. Tura atumsha ‘Aprajám shuaraitjiai’ táyatrum waya̱shtatrume. 30Nui̱sha yamái ukunmaani̱ ainia nusha emka ártatui tura yamái emka ainia nusha nui̱sha ukunmaani̱ ártatui” tímiayi.
Jerusaréṉnumaani̱ Jesus wema
(Mat. 23:37-39)
31Nu tsawantai̱ Pariséu aents Jesusan tariar “Irutis mantamattsa wakerutmawai. Tuma asamtai ju̱ya̱ṉka wetá” tiármiayi. 32Tutai Jesus chichaak “Werirum nú ku̱jancham chicharkuram ‘Iistá. Yamaisha ishichik tsawantin iwianchin jí̱i̱kin akupkartatjai túran jaancha tsuárartatjai. Tura ukunam amuktatjai’ tawai titiarum. 33Tura Jerusaréṉnumaani̱ ishichik tsawantin tuke wétiniaitjiai. Yúsnan etserin aya Jerusaréṉnumaṉ jákatniuiti.
34 ¡Jerusaréṉnumia̱tiram, Yúsnan etserin máiniaitrume tura Yus akatar akuptúrmakmania nusha kayaja̱i̱ tukurum máiniaitrume! Tuma ai̱ṉ atash ni uchirí̱n etektana núnisnak Wisha wéartajtsan wakerimjiarme túrasha nakitramarme. 35Iistarum. Atumniasha Yus ajapramaitrume. Tura ‘Yusa náari̱i̱n winiana nu shiir atí’ títiatrumna nú tsawant jeatsa̱i̱ṉ peṉké wáitkiashtatrume. Nuna tájarme” tímiayi Jesus.
Trenutno izabrano:
Ruk. 13: jiv
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2009 Avant Ministries in cooperation with Wycliffe Bible Translators, Inc. All rights reserved.
