Ruk. 12
12
1Nu tumai̱ shuar ti untsurí káunkarmiayi. Ti kaunka ásar nawe̱n mái̱ najatnai ajarmiayi. Tura Jesus ni unuiniamuri̱n tútan juárkimiayi. “Pariséu túrutairi̱ wakaprutai mash karía núnis ashí ni túramuri̱ shiir íisminiaitiat antsu túrashtinian enentáimtuiniawai. 2Núnisaṉ ashí paantcha ana nu iwiainiakma átatui. U̱kma ana nusha nekaamu átatui. 3Nu tuma asamtai kiritniunam tímiarmena nusha tsawái̱ tsáapin ajasmanum antunkattawai. Tura je̱a̱ init pujusrum ishishmasrum tímiarmena nusha a̱a̱ ti paant etsernaktatui.
Yusak ashamkatniuiti
(Mat. 10:28-31)
4 Amikrutiram, aya aya̱shmin main ainia nu ashamkairap tájarme. Aya̱shmin maa nú arantka máshtatui. 5Tura ya nekas ashamkatniuitrum, nuna paant jintintiáttajrume. Ame aya̱shmi maa, nuyá̱ ámin jinium akuptámkamnia nu ashamkatarum. Imiá nekas Yus ashamkatarum tájarme.
6 Jimiará chiṉki ishitiúpchich ishichik kuitji̱a̱i̱ surukchatniukait. Túrasha Yussha nu chiṉkin peṉké kajinmátkishtatui. 7Wats ashamkairap. Untsurí chiṉkiji̱a̱i̱ naṉkaamas Yuska atumín enentáimturmarme. Warí ame intiashmin mash Yus nekapmaruiti.
(Mat. 10:32-33; 12:32; 10:19-20)
8 Ashí shuar ashí iimiainiamunam Winia Aents Ajasu tutain Winia natsantruiniatsna núnaka Wisha Yusa suntari̱ iimiainiamunam natsantrashtatjai. 9Antsu shuar iimiainiamunam Winia natsantrana núnaka Wisha Yusa suntari̱ iimiainiamunam natsantrattajai.
10 Winia, Aents Ajasu tutain, shuar yajauch chichartakuiṉkia nusha tsaṉkuramniaiti tura Yusa Wakaní̱ncha yajauch chicharkuiṉkia nuka peṉké tsaṉkurachminiaiti.
11 Wats Israer shuar iruntai̱ je̱a̱nmasha tura Israer shuara úuntri̱ncha úuntnumsha juramainiakui aninmainiakuisha warintiajak tusam ti enentáimsaip. 12Ame áimkiatin jeamtai Yusa Wakaní̱ ame títiatmena nuna jintintrámattawai” tímiayi.
Kuítiak enentáimtuschatniuitji
13Chíkich áishmaṉ Jesusan chicharuk “Uuntá, ii aparí̱ ikiurtámkimiaj nuna yatsur winiasha nakak surusti titiá” tímiayi. 14Tutai Jesus “Áishmaṉka, nu túratin atumín anaikiamukaitiaj.” 15Nuyá̱ tímiayi “Péṉker enentáimsatarum. Ni takakna núja̱i̱ṉ shuar iwiaaku áchatniuiti. Tuma asamtai kuítrintin ajastin aya nuke enentáimsaip.”
16Nuyá̱ ju̱na métektaku chichaman unuiniak “Kuítrintin áishmaṉ ni ajarí̱ya̱n arakan tí nukap juukmai. 17Tura ‘¿Tí nukap asamtai tui̱ṉ ikiustaj. Itiurkatjak?’ tu enentáimsamai. 18‘Wats wi nékajai. Winia ikiutai̱ je̱a̱run ashiran nú naṉkaamas úuntan najanattajai. Túran ashí nuiṉ ikiustájai. 19Nuiṉkia “núkap uwí shiir pujustinian ikiusman takustatjai. Tuma asamtai ayampran yurumán umaran shiir pujustatjai”’ timiai. 20Tura Yus nin chicharuk ‘Enentáincha. Ju̱ kashi jakattame. Imiá nukap ikiusma takakmena nusha ¿yamaisha yana átata?’ 21Tura shuar kuítian níniunak ikiauntumna nuka núnisaiti túrasha Yusja̱i̱ iisam kuítrinchaiti.”
Yus ni uchirí̱n péṉker wainiui
(Mat. 6:25-34)
22Nuyá̱ ni unuiniamuri̱n Jesus chicharainiak “Warí yuarik pujustajⁱ tura wariṉ entsartajⁱ tusarum nuke ti enentáimsairap. 23Yus iwiaaku átinian amasu asa yurumkancha amastatui. Tura aya̱shniasha najana asa entsatáincha amastatui. 24Chiṉkiniam enentáimsatarum. Nisha arakmainiatsui. Juuk yurumkan ikiuiniatsui. Tuma ai̱ṉ ni yurumke̱n Yus tuke suawai. Atumsha chiṉkiji̱a̱i̱ naṉkaamaschakaitrum. 25Tura yaki ti enentáimna nuja̱i̱ nú naya ajasminiait. 26Kame yúpichuch ana nusha túrachminiaitiatrumsha ¿urukamtai chíkich ainia nusha ti enentáimtarum?
27 Iistá, kuku̱jsha takakmachuitiat tura nájanchaitiat ti shíirmach áiniawai. Yaunchu akupin Saramúṉsha ti shiir iwiarmamniuitiat kuku̱jia tímianchauyayi. 28Iis, nupa̱ yamái tsakaawai tura kashin aents tsupikiar jinium apeánáwai. Tuma ai̱ṉ Yus ti shiir awajeatsuk. Nuna tura asa atumniasha nú péṉker waitmakchattawak. ¿Urukamtai Yus nekas enentáimtatsrum? 29-30Ju̱ nuṉkanam ana nu ti pachikiairap. Chíkich shuar Yusan nékainiatsna nu wariṉ yuattajⁱ tura umartajⁱ nuna ti pachiniawai. Tura atumsha tu enentáimsairap. Urukatjak tiirap. Ame Apa nayaimpiniam pujana nu ashí atsumarmena nuna nékawai. 31Antsu emka Yusna nu enentáimtustarum. Túrakrumni̱ṉkia atsumamna nuna Yus suramsattawai.
Kuítian pachis Jesus unuiniamu
(Mat. 6:19-21)
32 Winia murikrutiram ashamkairap. Untsuríchuitrume. Túrasha atumí Aparí̱ ni akuptáiri̱i̱n pachitmaktasa ti wakerutmarme. 33-34Kuítrum tui̱ aa, nui̱ tuke enentáimtittiarme. Tuma asamtai takakrumna nu surukrum atsumainia nu susatarum. Nuka eṉketai̱ arut ajatsna nui̱ eṉkeatniua núniskete. Túrakrum nayaimpinmaya̱ kuit amúatsna nu íkiauwearme. Nui̱sha kasa nu kuítian kasamkataj tusa waya̱chminiaiti, tura ka̱ya̱sha nu kuítian yúatniun tujintiawai.
Anearar wekasatniuitji
35-36 Ju̱ enentáimsatarum. Ni uuntri̱ nuatnaikiatin nampernumia̱ taa ‘uraitia’ takui̱ takarniúri̱ jinia ekemákar wárik urattiai tusar nakáa pujuiniawai. Atumsha núnisrumek Wi atumí Uuntri̱ támatai, shiir itiaatai tusarum anearum wekasatarum. 37Ni uuntri̱ taak iwiáa pujuinian wáinkiarai nuka shiir pujuiniawai. Nu úuntak iwiar ‘ekentsa yurumtainiam pujustarum’ ni takarniúri̱n títiatui tura yurumkan súsartatui. 38Kashi ajapéṉ taaksha tura tsawa̱a̱na ai̱ taaksha ni takarniúri̱n iwiáa pujuinian wáinkiuiṉka, nu takarin shiir pujuiniawai. 39Tura ju̱sha nekaatarum. Je̱e̱nniua nu, kasa tátinian nékaitkiuṉka iwiáa pujusa̱a̱yi. Kasa wayá̱ kasamkatniun suritkia̱a̱yi. 40Atumsha núnisrumek anearum pujustarum. Wi Aents Ajasu tutai aya aneachmanum tátatjai” tímiayi.
Péṉker takarin yajauch takarniuja̱i̱
(Mat. 24:45-51)
41Nuyá̱ Pítiur aniasmiayi “¿Aya ínkik unuiniartaj tusam nu métektaku chicham tamek. Kame ashí nekaawarat tusamek tame?” tímiayi. 42Tutai Jesus chichaak “Atumsha péṉker takatan wáinniua núnisketrume. Takatan wáinin ni uuntri̱ takatrí̱n takainia nuna yurumátin jeamtai ayurkamna núiti ni úuntri̱n shiir umirna nu tura péṉker enentáimtana nu. 43Ni uuntri̱ taa takatrí̱n tímiatrusaṉ túran wáinkiuiṉkia nu wainniusha shiir enentáimsamniaiti. 44Umirin asamtai ni uuntri̱ ashí ni warirí̱n waitrukat tusa apujsattawai. Nuna paant tájarme. 45Tura nu takatan wainniusha ‘úuntur wau táchattawai’ tu enentáimias ni uuntri̱ takarniúri̱n yajauch awajeakuiṉkia tura niṉki ti yurumá ti umar nampeakuiṉkia 46nuiṉkia ni uuntri̱ ni nákachmanum aya aneachma taa ti asutiáttawai. Umichu pujuinia nui̱ akupkáttawai.
47 Takarin ni uuntri̱ wakera nuna nékayat iwiartsuk umitsuk pujakka ti awatramu átatui. 48Túrasha takarin nékachu asa asutniámnia túrakka ishichik awatnartatui. Núkap susamu ana núnaka núkap seawartatui. Núkap ataksamu ana núnaka núnisaṉ naṉkaamas seawartatui.
Jesus shuaran akantrartatui
(Mat. 10:34-36)
49 Jiji̱a̱i̱ nekapsatniua nútiksanak nuṉkanam jinia ikiapártaj tusan támajai. Tura túrunat tusan ti wakerajai. 50Imiantinia núnisaṉ itiurchat ukatrúktatui. Nusha wárik amuukat tusan ti wakerajai. 51Ashí aents shiir pujusárat tusa táwiti tu enentáimtursachukaitrum. Kame núchaiti antsu aents akannáirat tusan táwitjiai. 52Yamaiya̱ jukimiutak chikichík je̱a̱nam seṉku ainia nu akannakar menaintiú jímiaran nakitrar jímiarsha menaintiun nakitrartatui. 53Núnisaṉ apasha ni uchirí̱ji̱a̱i̱ nakitniairartatui. Nukusha ni nawantri̱ji̱a̱i̱ nakitniairartatui. Tsatsarí̱sha ni najatí̱ji̱a̱i̱ nakitniairartatui.”
(Mat. 16:1-4; Mar. 8:11-13)
54Jesus aentsun chicharuk ju̱nasha tímiayi “Atumsha nantu akatainmaani̱ ki̱ármatai ‘yutuktatui’ tátsurmek. Nusha nekas tárume. 55Tura nuṉkaani̱ya̱ nase násenkamtai ‘séeji̱k átatui’ tárume. Tura nekas tárume. 56Yuraṉminmasha nuṉkanmasha túruna nu nékarme. Túmaitiatrumsha ju̱ tsawantai̱ túrunattana nusha ¿itiura nékatsrum? ¡Maaj, ántraitrume!
Nemasrum nawamkata
(Mat. 5:25-26)
57 Túrasha péṉker ana nusha ¿urukamtai atumek enentáimsarum wáintsuram? 58¡Írutramuram úuntnum júramkuiṉkia jintiá wésamek ‘iwiarartai’ titiá! Túrachkumni̱ṉkia akupniúnam juramkittiame. Tura nisha suntarnum akuptámkattawai. Tura sepunam eṉketmattawai. 59Tura nekasan tajai, nui̱ eṉkemámka ashí akí akikmá ajachkumka jíinkishtatme” tímiayi.
Trenutno izabrano:
Ruk. 12: jiv
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2009 Avant Ministries in cooperation with Wycliffe Bible Translators, Inc. All rights reserved.
