Jṉ. 2

Kananum nuatmanum Jesus ipiaamu

1Menaintiú tsawant naṉkaamasmatai nuatnaikiatin namper Kananum ámiayi. Kaná péprusha Kariréanmayauyi. Jesusa nukurí̱sha nui̱ pujumiayi. 2Jesussha ni unuiniamuri̱sha nu nuatnaiyamunam ipiaamu ármiayi.

3Winiu amukámtai Jesusa nukurí̱ Jesusan chicharuk “Winiu amuukái. Peṉké takakainiatsui.” 4Tutai Jesus chichaak “Nukuá, amesha tura Wisha nusha ¿warí íistiniaitiajⁱ? Winia kakarmar iniakmastin jeatsui” tímiayi. 5Nuyá̱ ajamarmia nuna ni nukurí̱ chicharainiak “Ashí ni tana nu umirkatarum” tímiayi. 6Nui̱ kayaja̱i̱ najanamu muits entsa yaraatai sais pujuarmiayi. Nú muitsnum Israer shuar ni uwejé̱ncha nawe̱ncha Yus shiir enentáimtursati tusar nijiamau ármiayi. Kame chíkichkia uchaintia tura sian rítrusha entsa yarakmin ármiayi.

7Nuyá̱ Jesus ajamainian “Jú̱ muitsnum entsa áimpratarum” takui̱ mete áimprarmiayi. 8Áimprarmatai Jesus chicharainiak “Pai, ishichik shikikrum nampera chichamprin suutarum” tutai nútiksaṉ túrawarmiayi.

9Nampera chichamprincha nu entsa winiu ajasún ¿tuyá̱ itiarma? nuna nékachiat umar nekapsamai. Kame ajamauka entsá júsaru ásar nékarmai. Tura nampera chichamprincha nuatna nuna untsuk 10chicharuk “Péṉker wíniun emka suíniatsuk. Tura ejemararmataiṉkia tímianchachin suíniatsuk. Túrasha ámeka péṉker winiu ikiusam yamái jí̱i̱kchamek” tímiayi.

11Jesus ju̱ túramu Kaná Kariréanam túrunamiayi. Núja̱i̱ṉkia Jesus emka ni kakarmari̱n paant iniakmasmiayi. Nuna iisar ni unuiniamuri̱sha Niin enentáimtusarmiayi.

12Nuna tura ikiuak Kapernáumnum wémiayi. Ni nukurí̱sha ni yachi̱sha ni unuiniamuri̱sha nemariarmiayi. Nui̱ṉkia untsurí tsawantka pujuscharmiayi.

Jesus Yusa Je̱e̱n wariṉsha suruktinian surimkiamu

(Mat. 21:12-13; Mar. 11:15-18; Ruk. 19:45-46)

13Israer shuara namperi̱, Paskua tutai ishichik ajasmatai Jesus Jerusaréṉnum wémiayi. 14Nui̱ jeá Yusa Uunt Je̱e̱n súruinian wainkiamiayi. Waakancha murikniasha yampitsnasha súriarmiayi. Chíkichkia awa̱sa súrutai̱ri̱n pujusár kuítian yapají̱niancha wainkiamiayi.

15Nuna wainiak asutkiartuatniun chapikia chapikmar nuja̱i̱ ashí waakartiuk murikri̱ntiuk a̱a̱ jí̱i̱rmiayi. Kuítian yapaji̱á awa̱sa súrutai̱ri̱ncha ayanturar ni kuítri̱n nuṉká utsantkarmiayi. 16Yampitsan surinniasha chicharuk “Ju̱ya̱ṉka jíintratarum. Winia Aparu Je̱e̱n surutai je̱a̱ najanawairap” tímiayi. 17Nuna iisar ni unuiniamuri̱ yaunchu Yus Papinium áarman enentáimprarmiayi. Ju̱ áarmaiti “Ame Je̱e̱m shiir atí tusan ti wakerukuitjiai.” YKan. 69:9

18Nui̱ṉkia Israer shuara uuntri̱ Jesusan aniniak “Ju̱na túramniaitjiai tusam ¿warí iniakmastatam?” 19Tura Jesus aya̱k “Ju̱ Je̱a̱ sá̱a̱kiakrumin menaintiú tsawant iniantaittiajai Wikia” tímiayi. 20Takui̱ Israer shuar chicharainiak “Kuaraintisáis uwitin ju̱na je̱a̱mtinian pujursarmiayi. Ámeka menaintiú tsawantash je̱a̱mtám” tiármiayi. 21Kame Jesus “Je̱a̱” páchiayat ni aya̱shi̱n tímiayi. 22Tuma asamtai Jesus ukunam jakamunmaya̱ nantakmiatai ni unuiniamuri̱ ni timian enentáimturar ni chichame̱ncha tura yaunchu Yus Papinium áarmancha “Nekasaiti” tu enentáimtusarmiayi.

Jesus ashí shuara enentái̱n nékawai

23Paskua nampertin ti untsurí Jerusaréṉnum pujuarmiayi. Nui̱ Jesus aents tujintiamun túramtai nuna wáinkiar Niin nekas enentáimtusarmiayi. 24Tuma ai̱ṉ Jesus ashí shuara enentái̱n nekarainia asa niṉkia nekas enentáimturainiawai tichamiayi. 25Niṉki ashí shuara enentái̱n neka asa chíkich ujatkat tusa atsumchamiayi.

Trenutno izabrano:

Jṉ. 2: jiv

Istaknuto

Podijeli

Kopiraj