Mako 14
14
Kaupo kopangana zopaya Yesu
(Mt 26:1-5; Lk 22:1-2; Yh 11:45-53)
1Kwenze kwisala tyala masiku aŵili kuti chifwike chisangalalo cha Pasaka na chisangalalo cha masiku akulya mkate uliye chofufumisha. Akulu ŵa ansembe na asambizyi a Malamulo enzopangwa njila yofisika yakuti amukatilemo Yesu nomupaya. 2Koma emvwana kuti, “Tisachite zoteti pa nsita ya chisangalalo, pangazochitika vyongo pa winji wa ŵanthu.”
Mwanakazi muyakine oŵilikizya Yesu ku Betaniya
(Mt 26:6-13; Yh 12:1-8)
3Nsiku iyakine Yesu enze ku Betaniya, mu ngʼanda ya Simoni woitiwa wa Mambombo. Penzokulya kwiwela mwanakazi muyakine enze na nsupa ya mafuta onunkhila a nada amtengo wapatali. Mwanakazi wala efwaya nsupa yala nozoleka mafuta ŵala pa mutu pa Yesu.
4Ŵanthu ayakine pameneapo eipilwa nonena kuti, “Chikomo ni chinji kucheneka mafuta onunkhila teti? 5Mafuta amene aŵa sembe esitishiwa pa mtengo wa ndalama zinyinji zokwanila mazana atatu za siliva , nopasa ndalama izi ku ŵanthu wozingwa.” Nipo ŵanthu ŵala emukalipila mwanakazi wala.
6Koma Yesu enena kuti, “Mulekeni mwanakazi uyu. Mumsaushilanji? Vawanichitila ni viweme ngako. 7Ŵanthu wozingwa muli nawo nsita zonse. Tetyo pamupangwa kuŵachitila za lusungu mungaŵachitile. Koma newo muzenkhalelini nane nsita zonse. 8Uyu wachita zenzowamila kuchita. Wazolekelatu muŵili wangu na mafuta onunkhila, kuti auŵamyiletu paukaliyoikiwa mu manda. 9Nukuuzyani vyendi kuti kuli konse kwamene ŵanthu okoŵilizya Uthenga Uweme pa chalo chonse cha pansi, okolaŵilapo pa zawachita mwanakazi uyu, kuti ŵanthu okomukumbukila.”
Yudasi opangana na akulu ŵa Ansembe zotwala Yesu
(Mt 26:14-16; Lk 22:3-6)
10Pa vuli pake, Yudasi Iskalioti, yumo mwa asambili kumi na aŵili, eluta kwa akulu ŵa ansembe kuti akamutwale Yesu kuli wove. 11Akulu ŵa ansembe pechimvwa izi esangalala ngako nipo emulonjeza kuti azempase ndalama. Tetyo yove etatika kusakila mpata wakuti amutwalilemo kwa wove.
Yesu ochita chisangalalo cha Pasaka na asambili ŵake
(Mt 26:17-25; Lk 22:7-14; Yh 13:21-30)
12Pa nsiku yotatika ya chisangalalo cha masiku akulya mkate uliye chofufumisha, pamene ŵanthu penzopaya mbelele zochitila chisangalalo cha Pasaka, asambili ŵa Yesu echizomukonsha kuti, “Kansi tikawamyile kuni malo olyelamo chisangalalo cha Pasaka?”
13Yesu etuma asambili aŵili, noŵauzya kuti, “Nkhoyani mu mzinda. Mukakumane na mwanalume alutwike nongo ya manzi. Mukamukonkhe. 14Mu ngʼanda mwamene mwatiakaloŵe, mukamuuzye mwine wa ngʼanda kuti, ‘Asambizyi okonsha kuti, chipinda cha alwendo chakuti Asambizyi azelyelemo chisangalalo cha Pasaka na asambili ŵake chili kuni?’ 15Yove akakuwonesheni chipinda chikulu chapalulu, mwamene mwawamyiwa zonse zupangwika. Mwamene umo niye mwamuti mukawamyile vakulya.”
16Asambili ŵala esiya Yesu noloŵa mu mzinda wala nipo efwana ngani mwechiŵauzyila Yesu. Nipo ewamya chisangalalo cha Pasaka.
17Pekwifipa Yesu ewela na asambili ŵake ŵala kumi na aŵili. 18Wonse pechinkhala pansi notatika kulya, Yesu echiti, “Nukuuzyani vyendi kuti yumo wa mwewo wanikulya naye anitwale kwa alwani ŵangu.”
19Asambili ŵala echimvwa chitinthi, etatika kumkonsha kuti, “Kansi ningaŵe newo?”
20Yesu eŵayasuka kuti, “Ni yumo wa mwewo otoŵela nane mu mbale imo. 21Mwana wa Munthu akuyopayiwa kulingana na mwakulaŵilila Malembo pa za yove. Koma anashamu munthu wamene atiakatwale Mwana wa Munthu. Chenze chiweme kuti munthu woteti aliyovyalike.”
Mgonelo wosilizya wa Asikulu
(Mt 26:26-30; Lk 22:15-20; 1Ak 11:23-25)
22Wove penzokulya, Yesu etola mkate, notembezya Mulungu, nousuna–suna, noyaŵila asambili ŵake ŵala na kuti, “Aneni, uyu ni muŵili wangu.”
23Etola soti cheso, notembezya Mulungu, nochitwala kwa asambili ŵake, na kumwa wonse.
24Nipo eŵauzya kuti, “Uyu ni mlopa wangu wosimikizyila chipangano cha Mulungu. Mlopa wamene uyu nuutaya chikomo cha ŵanthu anyinji. 25Nukuuzyani vyendi kuti nikamwepolini soti vinyo wa mpesa kufwikila pa nsiku yamene nizamwe walomba mu Ufumu wa Mulungu.”
26Pechiimba nzimbo efuma na kuya ku Lupili ya Olivi.
Yesu olaŵililatu kuti Petulo azeamukane
(Mt 26:31-35; Lk 22:31-34; Yh 13:36-38)
27 Pa vuli pake Yesu eŵauzya asambili ŵake kuti, “Mwewo monse muniwutuke nonisiya neka. Pala Malembo onena kuti,
‘Nipaye chiŵeta,
kuti mbelele zangu zikamwazike.’
28Koma nikazouka kwa akufwa nizenitangule ni newo kuya ku Galileya.”
29Petulo echiti, “Ngakhale wonse autuke nomusiyani, newo neka yai.”
30Yesu emuuzya kuti, “Nukuuzyani vyendi kuti lelo yamene na usiku wamene uno, kombwe akaliyolila kachiŵili, unikane katatu kuti uniziŵalini.”
31Petulo elaŵila soti mosimikizyila kuti, “Ngankhale anipayile pamo na mwewo, newo nikamkanenilini” Asambili ayakine wonse ŵala elaŵila chimozi–mozi.
Yesu olomba ku Gesemani
(Mt 26:36-46; Lk 22:39-46)
32Yesu na asambili wake echiya ku malo ayakine, oitiwa Gesemani. Tetyo eŵauzya asambili ŵala kuti, “Mwewo nkhalani pano. Newo nikuyolomba.” 33Etola Petulo, Yakobe na Yohane. Yesu ekatiwa na chitinthi novutika mu mtima. 34Eŵauzya kuti, “Mu mtima mwangu muli chitinthi chikulu ngako chakufwa nacho. Mwewo nkhalani pamene pano, nipo ŵani menso.”
35Eluta pa nthangu patontho, noliponya pansi, notatika kulomba. Echiti, “Keno ni chololewa nsita yoyofya ino inipitilile.” 36Enena soti kuti, “Abba, Atata, mwewo mungachite chilichonse; munifumyilepo cheso ichi chamatamano. Koma muchite cha mupangwa mwewo, osati chanupangwa newo.”
37Pechiwelela kwa asambili ŵala eŵafwana ali mtulo. Tetyo ekonsha Petulo kuti, “Simoni, kansi uli mtulo na wewo? Kansi wakangiwa kunkhala menso pa kansita katontho teti? 38Ŵani menso mwewo mwakulomba, kuti mungapone mu mayezyelo. Mtima upangwisisha, koma muŵili ni woŵeŵa.”
39Efumapo soti na kuyolomba na malizu amene wala. 40Pechiwelela soti, eŵafwana ali mtulo, chikomo vikope vawo venze voŵeŵa na tulo. Tetyo wove esoŵa choyasuka.
41Pechiwelako kachitatu, echiti, “Kansi mukalilele nopumula? Kwasila. Koma lomba, nsita yala yafwika. Mwana wa Munthu otwaliwa ku ŵanthu wochimwa. 42Ukani, tiyeni takuya. Uyu wazonitwala wala wafwika.”
Yesu okatiwa
(Mt 26:47-56; Lk 22:47-53; Yh 18:2-12)
43Yesu akalulaŵila teti, nsita yamene iyo nipechifwika Yudasi, yumo wa asambili wake kumi na aŵili wala. Ewela na winji wa ŵanthu alunyamule vingwandali na nkholi. Ŵala ŵanthu eŵatuma na akulu ŵa ansembe, Asambizyi a Malamulo, na akulu a mpingo.
44Wamene enzokuzo mutwala eŵauzya mwati akamziŵile kuti, “Wamene wati ni kafyofyone, ni wamene uyo. Mukamukate na kuya naye, osamutaya.” 45Pechiwela Yudasi, eingofwikila pa Yesu, nonena kuti, “Asambizyi!” Pechichita tetyo emufyofyona. 46Ŵala ŵanthu emukata Yesu nomumanga. 47Koma muyakine wa asambili esolola chingwandali notema wanchito wa Mkulu wa ansembe, mpaka nomutenda kwatu.
48Yesu eŵakonsha ŵala ŵanthu kuti, “Chikomo ni chinji mwachito nitolela vingwandali na nkholi, ngani kuti nine nyankapondo? 49Nsiku na nsiku nenze namwe mu ngʼanda ya Mulungu nosambizya, mwewo muliyowele kuti munikate? Koma izi zuchitika teti kuti zikwanishile Malembo mwechinenela.” 50Pameneapo asambili ŵake ŵala wonse eutuka nomsiya yeka.
51Mulumbwana muyakine enzokonkha Yesu, enze evwinikila nyula yeka, aliye chovwala chiyakine. Ŵanthu ŵala epangwa kumkata. 52Koma yove eingoikolopola nyula yala noutuka chinthaku.
Yesu ku Kaupo Kakulu ka Ayuda
(Mt 26:57-68; Lk 22:54-55,63-71; Yh 18:13-14,19-24)
53Tetyo ŵala ŵanthu eluta naye Yesu kwa Mkulu wa ansembe. Kwamene kwala kwiungana wonse Akulu ŵa ansembe, akulu ŵa Ayuda, na Asambizyi a Malamulo. 54Petulo enzomukonkhelela Yesu patali, mpaka kunja kwa ngʼanda ya Mkulu wa ansembe wala. Enkhala pansi pamo na amalonda enzoyota nawo mulilo.
55Akulu ŵa ansembe ŵala na wonse a mu Kaupo Kakulu ka Ayuda enzosakila umboni wonenela Yesu kuti amupaye, koma aliyoufwane. 56Ŵanthu anyinji enzomulaŵilila za wenye, umboni wawo uliyokatizyane.
57Ayakine epanama notatika kumunenela za wenye. 58Echiti, “Uyu munthu sewo timumvwa kulaŵila kuti, ‘Newo nizenipasule Ngʼanda iyi ya Mulungu, yomangiwa na ŵanthu tyala nipo pakayopita masiku atatu nizenimange iyakine yosamangiwa na ŵanthu.’” 59Koma angankhale ni tetyo zolaŵila zawo zenzelini zokatizyana.
60Mkulu wa ansembe wonse epanama pa menso pawo, nomkonsha Yesu kuti, “Kansi wewo uliye choyasuka? Ni zotyani aŵa ŵanthu zakukunenela?” 61Yesu eingonkhala chelele, osayasuka kanthu.
Pameneapo Mkulu wa ansembe wala emukonsha soti kuti, “Kansi ni wewo chendi Messiya, Mpulumushi Wolonjezewa, Mwana wa Mulungu wochinzikiwa?”
62Yesu eyasuka kuti, “Eee, ninewo. Nipo muzemuwone Mwana wa Munthu ali nkhezi ku kwanja kwendi ya Mulungu wamphamvu zonse. Muzemumuwone akuza mu mikumbi.”
63Tetyo Mkulu wa ansembe wala ekezula vovwala vake, na kuti, “Kansi pamene apa tingapangwe soti mboni ziyakine? 64Mwazimvwila mweka kunyoza Mulungu. Mulingilila tyani?”
Wonse elamula kuti owamila kupayiwa. 65Ayakine etatika kumtila mata, nomuvwinikila ku menso, nomunyata mbama, nonena kuti, “Lotela, ni ŵani wakunyata?” Amalonda ŵala nawo etatika kumunyata.
Petulo okana Yesu
(Mt 26:69-75; Lk 22:56-62; Yh 18:15-18,25-27)
66Petulo enze kunja kwa mpanda. Msimbi muyakine nyanchito wa Mkulu wa ansembe efwika pameneapo. 67Pechiwona Petulo oyota mulilo, emulolesha, nonena kuti, “Na mwewo mwenze na Yesu wa ku Nazaleti.”
68Koma Petulo ekana kuti, “Zamene izo newo nuziziŵalini, nipo nuzimvwishalini.” Nipo efuma na kuya cha ku mulyango. Pameneapo kombwe elila.
69Koma msimbi wala emuona, nouzyake amene enze pameneapo kuti, “Uyu naye enze mu umba imo.” 70Koma Petulo ekana soti.
Pepepita ka nsita, ŵanthu enze pameneapo emuuzya Petulo kuti, “Ni chendi nawe soti niwe wa umba yamene yala. Kansi kwanu wewo ni ku Galileyalini?”
71Koma Petulo etatika kulishamika nolapa, “Ni chendi, munthu wa munena newo numziŵalini.”
72Nsita yamene iyo, kombwe elila kachiŵili. Tetyo Petulo ekumbuka malizu ŵala a Yesu onena kuti, “Kombwe akaliyolila kachiŵili, unikane katatu kuti uniziŵalini.” Pameneapo Petulo etatika kulila.
Trenutno izabrano:
Mako 14: GMN
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
The Gospel of Mark in Nsenga © Bible Society of Zambia, 2013.
