LUKAS 2

Vu'da vi Yesu Kristu, sa ŋomda co hay Betlehem

1May hay buur namna kayni, lawta may vi Cesar Augustus pa, kay ŋa sumuna hay nagata pete. 2Ŋata jewta na'ta li kayni hay li ma Kiriniyus musi guverner hay Siriya. 3Sumuna kaf kalay ɗo sesiya, gigekaw hay nagata valamu valamu. 4Yosef fokay hay Nasaret hay Galileya pa, kal kulo hay Yuda hay hoyok-ziyna vi David yum Betlehem, kay nam hay jafna vi David, hay ziyna vi David kaw. 5Nam tuɗ ɗo selem kayni, tapay kuɗ tuwsi hiɗi cata valamu Mariya ta goy darayta, na'a haya' ziy goy ŋolo. 6Van li nala, hay li ma nisi co ɗawni, liyn ma pukka vi Mariya coowa. 7Na' vuɗ goora va' ma jewna, kutulukum hay sligara, burum hay jokŋa kulumna, kay liyn may as kisi hay ziy ma bur rogoynɗi.

8Hay nagat na'ta, sa ŋom fokŋa ka'a, nisi ay goy busaya, ŋom fokŋa visiya hay henjeta. 9Sunda-wuralawna vi Bum-sumuna col voksiya, gajijita vi Bum-Sumuna li haraŋ kisiya, tuwsi cuk nar ŋolo. 10May sunda-wuralawna di tisiya: Ligi narɗi, kay humgiya, nan margi labara ma ŋaana, ma firita kuɗum ŋolo, ma li tam sumuna kafe: 11Vaydi sa ma su'da vuɗawa tigiya hay hoyok-ziyna vi David, namu mi Kristu, Bum-Sumuna. 12Kayni mi va ma ɗek kalamna: Nigi ma fi goora kutulukiya, buri hay jokŋa vi kulumna wan'.

13Wulini wulini vok ma ŋolla tap kuɗ sunda-wuralawna subur Lawna di'e: 14Gajijita tam Lawna hay liy ma kulona, gajijita gaa kay nagata, tam sum sa kiram ŋaana.

15Hay li ma sa sunda-wuralawna kalawa kulo'o hay wuralawna, sa ŋomda di jar-tuwsiya: Wulini nay tuɗay ta-ta hay Betlehem, kay ɗuw slen ma lin kayni, slen ma Bum-Sumuna dum taya. 16Nisi kalay gosoy wit', nisi fi Mariya hiɗi Yosef hiɗi goora buri hay jokŋa vi kulumna. 17Hay li ma nisi wumu, nisi visi labara kay slen ma diys goy tisiya kay goora kayni. 18Nisi kaf sa hum kayni jiɓer ŋolo kay va ma sa ŋomda dum tisina, 19May Mariya ŋom yoboyn kayni kaf hay dika'a, na' var kalamu. 20Sa ŋomda kaliya, nisi subur Lawna, gum deɓe kaw kay slen ma nisi humumu, ma nisi wumu kaw.

Nisi mar Yesu hay Tempella, nulla vi Simeyon

21Hay li ma buurta glafandita coowa, nisi kaam gosaya, tunum semda valam ala Yesu kaw, ki sunda-wuralawna di tam Mariya jew a na' sli haya nala.

22Hay li ma buura vi poor-goyta visi coowa kuɗ gatta vi Musus, nisi maram hay Yerusalem kay vulum kir Bum-Sumuna hay Tempella, 23Ki ɗo'ay hay gatta vi Bum-Sumuna nala ala: Goor juf ma vuɗ jewn kaf ma vulumis goy tam Bum-Sumuna, 24Kay li ɗifini hiɗi guk-gabayn ma' lebo guk-diwen ma' kla, ki ɗo'ay hay gatta vi Bum-Sumun nala.

25Hay na'ta sa mara ay hay Yerusalem kep yum Simeyon, san kayni ɗigere, nam viy kuɗ Lawna kaw; nam ay cub teŋ-irta vi Israyel, Ŋusta-Peldetta ay kalamu. 26Ŋusta-Peldetta ɗekem ala nam ma wi mittaɗi ta-ta iram ma cuk kay Kristuna vi Bum-Sumuna tuwa. 27Ŋusta zutumiya kay nam ma tuɗ hay Tempella. Hay li ma sumay Yesu maramu kay hob vun dita vi gatta, 28Nam vum hay ɓisiya, subur Lawna di'e:

29Wulin kayni, bum-yalla,

hin sa ma sunda vaŋu kal goyo hiɗi sle'ta

kuɗ yoboyna vaŋu.

30Kay iran wi su'da vaŋawa,

31Su'da ta naŋ kota'awa vok ir sumun kaf,

32Haraŋa kay ɗek wid-ŋayayta mi jaf-sumun kaf,

gajijita vi sumuna vaŋu sa Israyella kaw.

33Bum Yesu hiɗi sulumu jiɓer ŋolo kay sle ma Simeyon dum kalamna. 34Simeyon gisi bolo, nam di tam sulum Mariya ala: Humagu, goor kayni ka'a kay ni-gaata hiɗi fok-kulota vi sumun ŋolo hay Israyel, nam ka'a kay ɓuraw-vunda. 35May nak kaw, kew-gaferaŋa ma jikag dikagu, kay varta vi sumun ŋolo ma ma goy haraŋi.

Anna, cata jobta-Lawna

36Hay na'ta cat kepe ay zaw', na' ti cat ta jobta, ya' Anna, goota vi Fanuwel, na' hay jafna vi Aser. Busata va' kalay ŋolo. Hay li ma jufa' sla' hay wayata va' kayni, na' li busat hiɗi nam siɗiya tuta. 37Bugolda na' musi duhulu ta-ta busata va' co dok-glafandi yam fiɗi, na' may hin Tempella noŋɗi, dok-dok hay falayta hiɗi henjeta kaf na' ka sun Lawna hay laata hiɗi siɗawta. 38Na' kaw co'o hay leer namna; na' subur Lawna, na' law goy kay Yesu tam nisi kaf sa ka cub butta-goyta vi Yerusalem.

39Hay li ma nisi hob vun slen kaf kuɗ gatta vi Bum-sumuna hobna, nisi hot hay Galileya, hay hoyok-ziyna visiya Nasaret. 40May goora wuliya, muɗ dono'o, asay hiɗi yalla, slugota vi Lawna mus kalamu.

Hay li ma Yesu co busat doogo yam ma', nam kal kulo hay Tempella

41Hay busat kaf sumay Yesu ka tuɗ kulo hay Yerusalem kay li yuldeta vi Paskata. 42Hay li ma busata valam co doogo yam ma', nisi kalay kulo hay Tempella ki nisi ka li dok-dok nala. 43Hay li ma buura visi vatawa, hay li ma nisi ka hot vo'o, goora Yesu hinis hay Yerusalem, may sumiyam may wi kaynɗi. 44Nisi var ala nam ka hiɗi nuroysi sa rogoyna, nisi busa hay hagat he' kay garam jar jar sugolaysina hiɗi sum sa nisi wisina. 45May hay li ma nisi fumɗi, nisi hotay hay Yerusalem kay garamu. 46May buur ɦidi bugolda, nisi fum hay Tempella, nam ka musi jar sumay hatta, ka hum caw slena, ka job caw slena kaw. 47Nisi kaf sa ka humumna viy goy diwiŋ', nisi muɗ ɦuyum' kay yalla valamu hiɗi hot-dita valamu kaw. 48Hay li ma sumiyam wumu, nisi muɗ ɦuyum', sulum dumu: Goora, naŋ lum tuma na kayn mi mige? Ɗuwaŋ tige, nanu hiɗi buŋu ka garaŋ hiɗi tiyt hay dikma'a. 49Nam disiya: Nigi garanu kay mige? Kay la nanige kaw nan ma mus hay ziyna vi bunu, nigi may wi kaynɗi su? 50May yoboy namna ma nam dum tisin kayni nisi may humum cawamɗi.

51Bugolda nam jikay gaa'a hiɗi nisiya ta-ta co hay Nasaret. Nam hum kuɗsi ŋaa'a, sulumu ŋom yoboyn kayni kaf hay dika'a. 52Yesu wul kulo hay yalda, nam muɗ ŋolo, nam ŋaa'a vok ir Lawna, vok ir sumuna kaw.

Trenutno izabrano:

LUKAS 2: Massana

Istaknuto

Podijeli

Kopiraj