Matalikilo 11
11
Caanda cilaamfu ca Babiloni
1Pakutaanguna bantu boonse bamucishi bakalinga kucitebo mulaka womwi alimwi bakalinga kusebenseshabo maswi a mulaka weenka uyo. 2Ono mukweendaanaendaana kwicwe bakashika kucinyika ca Babiloniya akwikala kweenka uko. 3Mpeeke boonse bakaamba ayi, “Kamwisa tuume ncelwa akushitenta kabotu.” Bakasebensesha ncelwa kuteshi mabwe, bakalinga kuyakisha manenekela. 4Lyalo bakaamba ayi, “Ono atuyake ndabala inene acaanda cilaamfu cishika kwiculu, kwaamba ayi tupange liina, akwaamba ayi tutapalanganini mucishi ca panshi.”
5Mpeeke Mwaami Lesa wakesa panshi mukubona ndabala inene acaanda cilaamfu ico cakayaka bantu abo, 6akwaamba ayi, “Ono aba bantu boonse mbamushobo womwi alimwi balaamba mulaka womwi. Aya ngamatalikilo aceeco nceshi banoocita. Onoono bantu aba bananookonsha kucita cili coonse ncebasuni! 7Atuye panshi tuye tufulunganye mulaka wabo kwaamba ayi banoobula kunyumfwana womwi awomwi.” 8Aboobo Mwaami Lesa wakabapalanganishisha kumbasu shoonse sha cishi ca panshi, lyalo bakacileka kuyaka ndabala inene iyo. 9Ndabala inene iyo yakeetwa ayi Babiloni ceebo uko Mwaami Lesa wakafulunganya mulaka wa bantu boonse, alimwi nkuswa kooko nkwaakapalanganishisha bantu kuya mumbasu shoonse sha cishi ca panshi.
Bamulunyungu lwakwe Shemu
(1 Maka 1:24-27)
10Bamulunyungu lwakwe Shemu mbaaba. Ndipakeenda myaaka yobilo muyoba ndiwakamana, Shemu ndyaakakwanisha myaaka ili 100, wakashala mwaana musankwa, Afakisadi. 11Kuswawaawo wakekala aimwi myaaka ili 500 alimwi wakashala baana abamwi basankwa abanakashi.
12Afakisadi ndyaakakwanisha myaaka ili 35, wakashala mwaana musankwa, Shela. 13Kuswawaawo wakekala aimwi myaaka ili 403 alimwi wakashala baana abamwi.
14Shela ndyaakaba amyaaka ili 30, wakashala mwaana musankwa, Eba. 15Kuswawaawo wakekala aimwi myaaka ili 403 alimwi wakashala baana abamwi. 16Eba ndyaakaba amyaaka ili 34, wakashala mwaana musankwa, Pelegi. 17Kuswawaawo wakekala aimwi myaaka ili 430 alimwi wakaba abaana basankwa abanakashi.
18Pelegi ndyaakaba amyaaka ili 30, wakashala mwaana musankwa, Leu. 19Kuswawaawo wakekala aimwi myaaka ili 209 alimwi wakashala baana abamwi.
20Leu ndyaakaba amyaaka ili 32, wakashala mwaana musankwa, Selagi. 21Kuswawaawo wakekala aimwi myaaka ili 207 alimwi wakashala baana abamwi.
22Selagi ndyaakaba amyaaka ili 30, wakashala mwaana musankwa, Nawoli. 23Kuswawaawo wakekala aimwi myaaka ili 200 alimwi wakashala baana abamwi.
24Nawoli ndyaakaba amyaaka ili 29, wakashala mwaana musankwa, Tela. 25Kuswawaawo wakekala aimwi myaaka ili 119 alimwi wakashala baana abamwi.
26Tela ndyaakaba amyaaka ili 70, wakashala baana basankwa, Abulamu, Nawoli, alimwi aAlani.
Bamulunyungu lwakwe Tela
27Bamulunyungu lwakwe Tela mbaaba. Tela wakalinga ishi Abulamu, Nawoli alimwi aAlani. Alani ngowakashala Loti, 28alimwi wakafwita mundabala ine mishaabo yakalinga kwiitwa ayi Ulu ili muBabiloniya, baishi kabacili boomi. 29Abulamu wakeeba Salai, alakwe Nawoli wakeeba Milika mwanaakwe Alani mwanakashi. Alani wakalinga ishi Milika alimwi aIsika. 30Salai taakalinga kushala.
31Tela wakanyamuka amwanaakwe musankwa Abulamu, Loti mushikulu wakwe uyo wakalinga mwanaakwe Alani, Salai mulokashi wakwe uyo wakalinga muka Abulamu, akuya kuKenani kuswa mundabala inene ya Ulu mucishi ca Babiloniya. Bakaya amukushika kuAlani uko nkobakaya mukwikala. 32Tela wakafwa kaacite myaaka ili 250.
Trenutno izabrano:
Matalikilo 11: BBBLI
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Lenje Bible with Deuterocanon © Bible Society of Zambia, 2003.