Gn 4
4
Laj Kaín ut laj Abel
1Li winq kiwank rik'in lix Eva li rixaqil; ut a'in kixsiya laj Kaín: “B'anyox re li Qaawa', xinmaatani jun k'uula'al sa' xk'ab'a' li Qaawa'”, chan li winq. 2Chirix a'an kiwank ajwi' laj Abel, li riitz'in laj Kaín. Laj Abel a'an aj k'iiresihom karneer ut laj Kaín a'an aj k'alom.
3Sa' jun kutan laj Kaín kixmayeja ru li rawimq chiru li Qaawa'. 4Jo'kan ajwi' laj Abel kixmayejaheb' li xb'een raleb' li xkarneer ut chixjunil li xxeeb'ul. Li Qaawa' kisaho'k xch'ool rik'in laj Abel jo'wi' rik'in li xmayej,#4,4 Heb 11,4. 5ab'an ink'a' kisaho'k xch'ool rik'in laj Kaín ut li xmayej. Jo'kan naq q'axal kijosq'o'k laj Kaín ut lumlu kikanaak. 6Toja' naq kixye li Qaawa' re laj Kaín: “K'a'ut naq yo aajosq'il ut lumluukat xaq? 7Wi ta us li nakab'aanu, ma ink'a' tab'i' tento raj naq taataqsi laawilob'aal? Ab'an wi ink'a' us li nakab'aanu, chire li kab'l wank li maak, naxaaqank chanchan josq' aj xul, yo chawatawankil. A'ut laa'at tatruuq chi xq'axb'al ru”.
8Chirix chik a'an kixye laj Kaín re laj Abel li riitz'in: “Yo'o sa' k'aleb'aal”. Ut naq wankeb' sa' k'aleb'aal, laj Kaín kixkut rib' sa' xb'een laj Abel li riitz'in ut kixkamsi.#4,8 Sab 10,3; Mt 23,35; Lk 11,51; 1 Jn 3,12. Li maak nokooxjach rik'in li Yos jo' ajwi' rik'ineb' li qas qiitz'in; ut naxk'am chaq sa' ruuchich'och' li kaqalink, li raaxiik', li kamsink. Sa' xtiklajik chaq, laj Adán kiraj raj xnimob'resinkil rib' chiru li Qaawa' ut, chirix a'an, laj Kaín kinumtaak sa' xb'een li riitz'in ut kixkamsi. 9Toja' naq li Qaawa' kixye re laj Kaín: “B'ar wank laj Abel laawiitz'in?”. Kichaq'ok laj Kaín: “Ink'a' ninnaw. Ma laa'in tab'i' aj ilol re li wiitz'in?”, chan.
10Kixye li Qaawa': “K'aru xab'aanu? Li xkik'el laawiitz'in toj sa' ch'och' yo chi q'oqonk chiwu.#4,10 Heb 12,24. 11Jo'kan b'i', tz'eqtaananb'ilaqat xb'aan li ch'och' li x'uk'uk re xkik'el laawiitz'in li xakamsi laa'at. 12Us ta taak'anjela li ch'och', ab'an ink'a' taa'uuchinq; ut taab'eeni aj chik aawib' jo' aj eelel sa' ruuchich'och' chi junelik”.
13Toja' naq laj Kaín kixye re li Qaawa': “Q'axal nim linmaak, maamin tinkuy xtojb'al rix. 14Anaqwan laa'at tinaawisi sa' li ch'och' a'in ut laa'in tento naq tinmuq wib' chawu. Tinb'eeni wib' jo' aj eelel sa' ruuchich'och', ut yalaq ani taatawoq we, tinxkamsi”.
15Ab'an li Qaawa' kixye re: “Ink'a', moko jo'kan ta. Li taakamsinq re laj Kaín, a'an wuqub' sut xtojb'al rix li xmaak tixk'ul”.
Ut li Qaawa' kixk'e jun reetalil laj Kaín re naq yalaq ani taatawoq re, ink'a' tixkamsi. 16Ki'elk laj Kaín chiru li Qaawa' ut kikanaak sa' li na'ajej Nod xk'ab'a', sa' releb'l saq'e, junpak'al Edén.
Eb' li ralal xk'ajol laj Kaín
17Laj Kaín kiwank rik'in li rixaqil, ut a'in kisiyank ut kirala laj Enok. Moqon laj Kaín kixyiib' jun tenamit ut Enok kixk'e cho'q xk'ab'a', jo' naxk'ab'a'in li ralal. 18Laj Enok kiwank jun ralal, laj Irad xk'ab'a'. Laj Irad a'an xyuwa' laj Mejuyahel; laj Mejuyahel a'an xyuwa' laj Metusahel, ut laj Metusahel a'an xyuwa' laj Lámek. 19Laj Lámek kiwank wiib' rixaqil: li xb'een a'an x'Adá xk'ab'a' ut li xkab' xSilá xk'ab'a'. 20Lix Adá kirala laj Jabal: a'an xyuwa'ileb' laj k'aak'alenel ketomq aj b'eeneleb'. 21Li xk'ab'a' li riitz'in a'an aj Yubal, a'an xyuwa'ileb' laj aarp ut laj xolb'. 22Lix Silá kiwank ajwi' jun xk'uula'al, aj Tubal-Kaín xk'ab'a': a'an xyuwa'ileb' laj tenol ch'iich', a' li q'anch'iich' ut li kawilch'iich'. Li ranab' laj Tubal-Kaín a'an xNahamá.
23Sa' jun kutan kixye laj Lámek reheb' li rixaqil:
“Adá ut Silá, chineerab'i;
rixaqilex laj Lámek, cherab'i li waatin.
Kinkamsi jun li winq xb'aan naq kinxtiq';
kinkamsi jun saaj al xb'aan naq kinxsak'.
24Li taakamsinq re laj Kaín wuqub' sut tixtoj rix xmaak;
a'ut li taakamsinq re laj Lámek
wuqlaju xkaak'aal chik tixk'ul li xtojb'al rix xmaak”.
Laj Set ut eb' li ralal xk'ajol
25Laj Adán kiwank wi' chik rik'in li rixaqil, ut kiwank jun xk'uula'al, aj Set kixk'e cho'q xk'ab'a': “Li Yos xk'ehok we jun chik ink'uula'al cho'q reeqaj laj Abel li kikamsiik xb'aan laj Kaín”, chan li winq.
26Jo'kan ajwi' laj Set kiwank jun ralal, ut aj Enós kixk'e cho'q xk'ab'a'. A'an kitikib'ank re xyaab'ankil xk'ab'a' li Qaawa'.
Trenutno izabrano:
Gn 4: QQC
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Q'eqchi DC Bible © Bible Society in Guatemala, 2005.