Zɛnɛse 6
6
Núu-kpune ŋɔŋwana-lɔɔi
1Tãi núu-kpune è ƃûu ƃò la ǹɔii su dí lóŋ-nɛyâa támaa maa sɔlɔ ƃói, 2Ɣâla ǹônii-sinaai dí núu-kpune ǹônii-nɛyãai kàa dílɛlɛɛ. Nya ƃe diai kélee dí díwɛ̂lii, dí díkùla a dínɛyâa. 3Nya ƃe Yâwɛɛ è mò ǹyɛɛ, “Ŋámɔ̂leŋ fé pâi lɛɛ̂i núu-kpune kponôi wɔlɔ-wɔlɔ da wɔlɔ-wɔlɔ, kpɛ́ni fêi, gáa a pɔ̂rɔ, kɛ́lɛ ŋɔfúlu-laai a pâi kɛ̂i nɔ́ a kóraŋ ŋuŋ tɔnɔ pôlu buu feerɛ (120).” 4Núu yée-laa mu siɣɛɛ wála-wala-ŋa dí kɛ̀ ǹɔii su a maa tãi tí. Naa pôlu ma tãi Ɣâla ǹônii da núu-kpune ǹônii-nɛyãai dí díkîe-ni kùla lai, dí nîa-pɛlɛɛ maa sɔlɔ ƃô. Ǹûai ŋí ƃé kɛ̀ a ŋwala-wala-ƃelai wɔlɔ-wɔlɔi tí su, nyii-ŋai dí láa è sîa ǹɔii gwaa kélee mai.
5Yâwɛɛ è gàa a gɛɛ núu-kpune ŋɔŋwana-lɔɔi è kɛ̀ a gɛ́tɛ ǹɔii ma, díkoi-mɛni-ŋai díkɛ ƃô a nyɔ́mɔɔ a tãi kélee. 6Nya ƃe malôŋ è tòo Yâwɛɛ ma a gɛɛ è núu-kpune kpɛ̀tɛ ǹɔii ma nyii ǹíi sòli a ŋánaai. 7Nya ƃe Yâwɛɛ è mò ǹyɛɛi, “Ŋa pâi núu-kpune su karâi nyii ŋá gbɛ́tɛ ǹɔii ŋí mai, fɛnɛ-sãa, ɣála-sãa da koôŋ-sãa kélee. Kpɛ́ni fêi, malôŋ toɔɔi ḿâ a gɛɛ ŋá díkpɛ̀tɛ.” 8Kɛ́lɛ Yâwɛɛ è Nôa ŋɛ́i malôŋ kàa.
Nôa è yá-ŋa kéleŋ kpɛ̀tɛ
9Nôa ŋɔsuui pîlaŋ-pere ká ŋí. Nôa è kɛ̀ a núu sãa. Zɔŋ fé kɛ́ ní ma ŋɔtãi ma. Nôa è Ɣâla nîa-mɛni kɛ̀. 10Nôa è lóŋ-surɔ̂ŋ saaƃa maa sɔlɔ ƃô. Dîa ƃe kɛ̀ a Sɛ̂ŋ, Aaŋ da Zafɛ. 11Nya ƃe fúlu sãa kélee dí ǹɔii su kâra Ɣâla ŋɛ́i. Dí ǹɔii láa fɛ̂ɛ a ŋwana-lɔ̂ɔ. 12Ɣâla è ǹɔii kàa zu karaa, kpɛ́ni fêi, fúlu-sãa kélee tûa-pere è kɛ̀ a nyɔ́mɔɔ ǹɔii ma.
13Ɣâla è mò Nôa ma ǹyɛɛi, “Ŋa gbɛ̀tɛ ŋ́gili ŋa a gɛɛ ŋá fúlu-sãa kélee su kara, kpɛ́ni fêi, ǹɔii láa fɛɛ̂i a díŋwana-lɔɔi. Mɛni ma ŋa pâi dísu karâi. 14Yá-ŋa kéleŋ kpɛtɛ ímɛni ma. Lôŋpo-ŋa tée zu. Zu da bôlu-pere sia a béle-malaŋ. 15Berei ŋí ƃé fɛ̂ɛ í gbɛtɛ la: géleŋ ŋɔkôya é kɛ́ a kɔ́ɔ-ƃɔlɔnii ŋuŋ náaŋ pôlu buu lɔ́ɔlu (450), ŋɔsu-kɛtɛ é kɛ́ a kɔ́ɔ-ƃɔlɔnii buu lɔ́ɔlu mɛi feerɛ káo lɔ́ɔlu, ŋɔmu-siɣe é kɛ́ a kɔ́ɔ-ƃɔlɔnii buu náaŋ káo lɔ́ɔlu. 16Géleŋ mɛi pɛ́lɛ í gbôŋ too bɛ̂rɛ ma. Géleŋ é kɛ́ a zeɛɛ gîe mɛi saaƃa. Mu-pere, zâmai, da mɛi-pere é kɛ́ ma. 17Kpɛ́ni fêi, ŋa pâi ya-fɛɛ kɛ́tɛ tɛɛ̂i ǹɔii su a gɛɛ ŋá ŋ̀éniɛi ŋí su fúlu sãa kélee su kara. Ǹyaŋ zɛŋ kélee gáa ǹɔii mai a pâi saâi. 18Kɛ́lɛ ŋa pâi ŋ́gono teêi íyêei. Ka ílônii ká lɔ́ géleŋ su da ínɛnîi é pɛ́lɛ ílônii dínɛyâai dîa. 19Fúlu sɛŋ sii kélee tɛ́ géleŋ su, zirɛ da záa, a gɛɛ ka dîa-ni ká lɛ́ɛ a káfulu. 20Ŋ̀ɔni sîi kélee, sua sîi kélee, da ɣála-sɛŋ sii kélee, í dísîi siɣe feerɛ-feerɛ a gɛɛ ka dîa-ni ká lɛ́ɛ a káfulu. 21Mii-sɛŋ sii kélee, síɣe máŋ nyii-ŋai ǹɛ́lɛɛi mìi mɛni mai, í díŋa tɛ́ mà, ka dîa-ni kámɛni ma.” 22Nôa è nyíŋi kɛ̀. È mɛni-ŋai kélee ŋàa-see kɛ̀ nyii-ŋai Ɣâla è mò ma a gɛɛ é gɛi.
Trenutno izabrano:
Zɛnɛse 6: KWB
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2012 Bible Society in Liberia