यूहन्ना 10
10
गोठालो र बगाल
1“म तिमीहरूलाई साँच्चै भन्दछु, जुन मानिस ढोकाबाट भेडागोठभित्र पस्दैन, तर कुनै अर्कै ठाउँबाट चढेर पस्छ, त्यो चोर र डाँकू हो। 2तर ढोकाबाट भित्र पस्ने मानिसचाहिँ आफ्नो भेडाको गोठालो हो। 3पहरेदारले उसको निम्ति ढोका खोलिदिन्छ, अनि भेडाहरूले उसको स्वर सुन्छन्। उसले आफ्ना भेडाहरूलाई नाउँ काढेर बोलाउँछ र तिनीहरूलाई बाहिर लैजान्छ। 4उसले आफ्ना सबै भेडाहरूलाई बाहिर निकालिसकेपछि ऊ तिनीहरूका अघि-अघि जान्छ, अनि उसका भेडाहरूले उसलाई पछ्याउँछन्; किनकि तिनीहरूले उसको स्वर चिन्छन्। 5तर तिनीहरूले नचिनेको व्यक्तिलाई कहिल्यै पछ्याउँदैनन्, बरु त्यसदेखि त तिनीहरू भाग्छन्, किनकि तिनीहरूले नचिनेको व्यक्तिको स्वर चिन्दैनन्।” 6येशूले यो दृष्टान्तको प्रयोग गर्नुभयो, तर उहाँले तिनीहरूलाई के भन्दैहुनुहुन्छ भनी तिनीहरूले बुझेनन्।
7त्यसकारण येशूले फेरि भन्नुभयो, “म तिमीहरूलाई साँच्चै भन्दछु, भेडाहरूका ढोका म नै हुँ। 8मभन्दा अघि आउनेहरू सबै चोर र डाँकूहरू थिए, तर भेडाहरूले तिनीहरूका कुरा सुनेनन्। 9ढोका म नै हुँ, जो मद्वारा भित्र पस्छ, ऊ बचाइनेछ; ऊ भित्र र बाहिर आउने जाने गर्नेछ, र खर्कमा चर्न पाउनेछ। 10चोर त चोर्न, मार्न र नाश पार्न मात्र आउँछ, म ता तिनीहरूले जीवन पाऊन् र त्यो प्रशस्त मात्रामा पाऊन् भनेर आएँ।
11“म असल गोठालो हुँ। असल गोठालाले भेडाहरूका निम्ति आफ्नो प्राण अर्पण गर्दछ। 12भाडाको मालिक भेडाहरूको आफ्नै होइनन्, त्यसकारण जब त्यसले ब्वाँसो आउँदै गरेको देख्छ, तब त्यसले भेडाहरूलाई छोड्छ र भाग्छ; त्यसपछि ब्वाँसोले बगाललाई आक्रमण गर्छ र तितरबितर पारिदिन्छ। 13त्यो मानिसचाहिँ भाग्छ, किनकि त्यो ता भाडाको मानिस हो, र भेडाहरूका लागि त्यसले केही वास्ता गर्दैन।
14“असल गोठालो म नै हुँ; म आफ्ना भेडाहरूलाई चिन्छु र मेरा भेडाहरूले मलाई चिन्छन्। 15जसरी पिताले मलाई चिन्नुहुन्छ, र म पितालाई चिन्छु, अनि म मेरो प्राण आफ्ना भेडाहरूका लागि अर्पण गर्छु। 16मेरा अरू पनि भेडाहरू छन्, जो यस गोठका होइनन्। मैले तिनीहरूलाई पनि ल्याउनैपर्छ। तिनीहरूले पनि मेरो स्वर सुन्नेछन्; र त्यहाँ एउटै बगाल र एउटै गोठालो हुनेछ। 17मेरा पिताले मलाई प्रेम गर्नुहुने कारण यही हो कि, म आफ्नो प्राण अर्पण गर्दछु, तर त्यो फेरि फिर्ता लिनका लागि। 18मेरो प्राण मबाट कसैले लिन सक्दैन, तर म स्वेच्छाले यो अर्पण गर्दछु। मसँग यो अर्पण गर्ने अधिकार पनि छ र त्यो फेरि लिने अधिकार पनि छ; किनकि यो आज्ञा मैले मेरा पिताबाट प्राप्त गरेको हुँ।”
19यी वचनहरूका कारण यहूदी समूहहरूको बीचमा फेरि फाटो आयो। 20तिनीहरूमध्ये धेरैले यसो भने, “यसलाई भूत लागेको छ, र यो बहुलाएको छ; यसका कुरा किन सुन्छौ?”
21तर अरूहरूले भने, “यी वचनहरू भूत लागेको मानिसका होइनन्। के कुनै भूतले दृष्टिविहीनका आँखा खोलिदिन सक्छ र?”
यहूदी अगुवाहरूद्वारा सोधपुछ
22यरूशलेममा मन्दिर समर्पणको चाड आयो। यो हिउँदको समय थियो। 23अनि येशू मन्दिरको क्षेत्रभित्र हुनुहुन्थ्यो, र सोलोमनको दलानमा हिँड्दैहुनुहुन्थ्यो। 24केही यहूदीहरू उहाँका वरिपरि भेला भए, र सोधे, “हामीलाई तपाईंले कहिलेसम्म दोधारमा राख्नुहुन्छ? यदि तपाईं नै ख्रीष्ट हुनुहुन्छ भने, हामीलाई स्पष्ट भनिदिनुहोस्।”
25येशूले जवाफ दिनुभयो, “मैले तिमीहरूलाई भनिसकेको छु, तर तिमीहरू विश्वास गर्दैनौ। मैले मेरा पिताको नाउँमा गरेका आश्चर्य कर्महरूले मेरो विषयमा नै गवाही दिन्छन्, 26तर तिमीहरूले विश्वास गर्दैनौ, किनकि तिमीहरू मेरा बगालका भेडाहरू होइनौ। 27मेरा भेडाहरूले मेरो स्वर सुन्छन्, म तिनीहरूलाई चिन्छु, र तिनीहरूले मलाई पछ्याउँछन्। 28म तिनीहरूलाई अनन्त जीवन दिन्छु, र तिनीहरू कहिल्यै पनि नाश हुनेछैनन्। 29मेरा पिता जसले ती सबै मलाई दिनुभयो; जो सबैभन्दा महान् हुनुहुन्छ, तिनीहरूलाई कसैले पनि मेरा पिताको हातबाट खोसेर लैजान सक्दैन। 30म र पिता एक हौं।”
31यहूदीहरूले फेरि उहाँलाई हान्नलाई भनी ढुङ्गाहरू टिपे। 32तर येशूले तिनीहरूलाई भन्नुभयो, “मैले तिमीहरूलाई मेरा पिताबाट धेरै ठूला आश्चर्य कर्महरू देखाएँ। तीमध्ये कुन कामको कारण मलाई ढुङ्गाले हान्छौ?”
33ती यहूदीहरूले जवाफ दिए, “यीमध्ये कुनै पनि कामका कारण हामी तिमीलाई ढुङ्गाले हान्दैनौं, तर परमेश्वरको निन्दा गरेको कारण, किनकि तिमी केवल मानिस भएर पनि परमेश्वर भएको दाबी गर्छौ।”
34येशूले तिनीहरूलाई जवाफ दिनुभयो, “के तिमीहरूका व्यवस्थामा ‘तिमीहरू देवहरू#10:34 भजन 82:6 हौ भनी मैले भनेको छु’ भनी लेखिएको छैन? 35त्यसकारण यदि जसकहाँ परमेश्वरको वचन आयो, तिनीहरूलाई त ‘देवहरू’ भनिन्छ, अनि धर्मशास्त्र भङ्ग हुन सक्दैन भने, 36पिताले उहाँको आफ्नैलाई झैं पवित्र र अलग गरी संसारमा पठाउनुभएको व्यक्तिका विषयमा चाहिँ के भन्ने त? त्यसो हो भने मैले ‘म परमेश्वरको पुत्र हुँ’ भनेकोमा मलाई किन ईश्वरनिन्दाको दोष दिन्छौ? 37मेरा पिताले जे गर्नहुन्छ, मैले पनि त्यही नगरेसम्म ममाथि विश्वास नगर। 38यदि मैले ती कामहरू गर्दछु भने, तिमीहरूले ममाथि विश्वास नगरे तापनि ती आश्चर्य कर्मलाई विश्वास गर; र तिमीहरूले यो जान्न र बुझ्न सक्नेछौ कि, पिता ममा हुनुहुन्छ र म पितामा छु।” 39फेरि तिनीहरूले उहाँलाई पक्रन खोजे, तर उहाँ तिनीहरूका हातबाट उम्कनुभयो।
40त्यसपछि येशू फर्केर यर्दन नदीपारि यूहन्नाले पहिले बप्तिस्मा दिने गरेका ठाउँमा जानुभयो। उहाँ त्यहाँ बस्नुभयो, 41र धेरै मानिसहरू उहाँकहाँ आए। तिनीहरूले भने, “यूहन्नाले कहिल्यै कुनै अलौकिक चिन्ह गरेनन्, तापनि यूहन्नाले यी मानिसका विषयमा बताएका सबै कुरा सत्य रहेछ।” 42अनि त्यस ठाउँमा धेरैले येशूमाथि विश्वास गरे।
Trenutno izabrano:
यूहन्ना 10: NCV
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
पवित्र बाइबल, नेपाली समकालीन संस्करण™
प्रतिलिपि अधिकार © 1998, 2006, 2021 Biblica, Inc.
अनुमतिसहित प्रयोग गरिएको छ। सम्पूर्ण अधिकार विश्वव्यापी रूपमा सुरक्षित रहनेछ।
Nepali Contemporary Version™, New Testament
Copyright © 1998, 2006, 2021 by Biblica, Inc.
Used with permission. All rights reserved worldwide.
