लूका 21
21
बिधुवा कि भेँटी
(मर्क. 12:41-44)
1येशू देखनएडटो रहए, तओ धनी आदमीनके उनको अपनो-अपनो भेँटी मन्दिरको दानपत्रमे डारत देखी। 2बा एक गरीब बिधुवाके हुवाँ दुई पैसा चढात फिर देखी जौनको मूल्य बहुत कम रहए। 3तओ येशू कही, “नेहात्तओ मए तुमसे कहात हओं, दानपत्रमे चढान बारेन मैसे जा गरीब बिधुवा औ सबनसे जद्धी चढाइ हए। 4काहेकी जे सब अपन प्रसस्ततासे भेँटी चढाइ हएं, पर जा बिधुवा गरीब हुइके फिर सब दइदइ, जो बाके ठिन बचो रहए। हियाँतककी बो फिर, जो बोके जिन्दा रहानके ताहीं चाहो रहए।”
अन्तके दिनके चिन्हा
(मत्ती. 24:1-41; मर्क. 13:1-31)
5अब कोइ-कोइ, सुथरे-सुथरे पत्थर और दानपत्रमे पाएभए समानसे सजाओ भओ मन्दिरके बारेमे बात करन लागे। तओ येशू कही, 6“तुम जो देखरहे हओ, अइसो समय आबैगो, जब एक पत्थर उपर दुस्रो पत्थर नाए रहाबैगो, बे सब भसक जएहएं।” 7बे येशूसे कहीं, “महान गुरु, जे सब कब हुइहएं? और जे बात हुइहएं तओ का चिन्हा होबैगो?”
8येशू कही, “होसियार रहओ, तुमके कोइ नाए बहकाबए। मिर नाउँमे तमान आदमी, ‘मए बहे हओं और समय ढिँगै आइगओ हए,’ कहिके कहामंगे। बिनके पिच्छु तुम मत् लगियओ। 9जब तुम युद्ध और लडाइको हल्ला सुनैगे तओ मत् डरैयओ, काहेकी पहिले जे घटना होनए पणैगो, पर अन्त तुरन्तए नाए होबैगो।”
10तओ येशू बिनसे कही, “जाति-जातिके आदमी जाति-जातिके आदमीके बिरुद्धमे, और राज्य राज्यके बिरुद्धमे उठंगे। 11भयङकर हालाचाला हुइहए। तमान ठाउँमे अनिकाल और महामारी हुइहए, भयङकर आतङ्क हुइहए, और स्वर्गमे बडो चिन्हा होमंगे। 12पर जे सब बात होनसे अग्गु आदमी तुमके पकणंगे, और सतामंगे, और तुमके यहूदी सभाघरमे सौँपदेहएं, और जेलमे डार देहएं। तुमके मिर नाउँको खातिर राजा और हाकिमके अग्गु पुगाए देहएं 13पर तुमर ताहीं जा एक गवाही देन मौका हुइहए। 14जहेमारे अपनएके बचानके ताहीं का कहामंगे कहिके अग्गुसे चिन्ता मत् करियओ। 15काहेकी मए तुमके अइसो मसकन बारो मुँहुँ और बुद्धि देहओं, कि तुमर बिरोधी तुमएं जबाफ घुमाए नाए पएहएं। और नए तुमर बात काट पामंगे। 16पर तुमर अइयादौवा, ददाभइया, नातेदार और सँगी फिर तुमके पकणाए देहएं, और तुम मैसे कोइ-कोइके बे मारङगे। 17मिर नाउँके बिश्वास करनके कारण बहुत आदमी तुमर दुश्मन हुइजए हएं। 18पर तहुँफिर तुमर मुणको एक बार टुटन तक फिर नुक्सान नाए हुइहए। 19तुम परमेश्वरमे बिश्वासयोग्य रहाबैगे कहेसे परमेश्वर तुमर जीबनके बचाबैगो।”
यरूशलेमको नाश
(मत्ती. 24:15-21; मर्क. 13:14-19)
20येशू कही, “जब तुम यरूशलेम सहरके सेननसे घेरे देखैगे, तओ जानलियओ, कि बाको बिनास ढिँगै आइगओ हए। 21तओ यहूदिया परदेशमे होन बारे पहाड घेन भाजएं। सहर भितर होन बारो बाहिर भाजएं, और बाहिर गाउँमे होन बारे सहर भितर नाए घुसएं। 22काहेकी बो, बदला लेन बारो समय होबैगो, ताकी पबित्र-शास्त्रमे लिखो सब बात पुरा होबए। 23बे दिनमे गरबबती और दुध खबान बारी बैयरके ताहीं डर लागन बारो समय होबैगो, काहेकी पृथ्वीमे बडो संकट आबैगो, और जा जातिके उपर क्रोध आए पणैगो। 24बे तरवारसे मारे जामंगे, और सब देशमे कैदी बनाएके लैजाए जएहएं। और गैर-यहूदी आदमीनको समय पुरा नाए होनतक बे यरूशलेम सहरके जितके टाँग तरे कब्जा करहएं।”
येशूक लौटके आनको संकेत
25येशू कही, “दिन, जोनी और तारामे अचम्मोको चिन्हा दिखाइ देबैगो, समुन्दरको गर्जन और डर लागन बारो लणुरासे पृथ्वीमे भए सब जाति-जातिके आदमी संकटमे पणके व्याकुल होमंगे। 26दुनियामे होन बारो घटनासे डराएके आदमी बेहोस होमंगे, काहेकी बादरमे भओ सब शक्ति इतएउतए डगमगाए जाबैगो। 27तओपिच्छु मए आदमीको लौंणाके, महान शक्ति और बडो महिमाके सँग बद्रिमे आत देखंगे। 28जब जे बात होनलागंगे, तओ ठणियओ और अपन मुण उपर उठैयओ, काहेकी तुमर मुक्ति ढिँगैयए होबैगो।”
परमेश्वरको राज्य ढिँगै हए
(मत्ती. 24:32-35; मर्क. 13:28-31)
29येशू बिनसे एक कहानी कही: “अञ्जीरको रुखा और सबए रुखाके देखओ, 30बिनको पालुवा निक्रत देखके तुम जानजात हओ, कि अब घामु बढन बारो हए। 31अइसीयए तुम फिर जब जा चीज होत देखैगे, तओ परमेश्वरको राज्य ढिँगै हए कहिके जानजैयओ।
32नेहात्तओ मए तुमसे कहात हओं, जे सब घटना पुरा नाए होनतक जा जमानाके कोइ फिर मनै नाए मरंगे। 33बादर और पृथ्वी खतम हुइजए हए, पर मिर कहो भओ बचन सदामानके ताहीं रहाबैगो।”
सदामान तयार रहाओ
34येशू कही, “जहेमारे होसियार रहियओ, अइसे तुमर मनको लापरबाही, दरोहपान और जीबनको चिन्तासे तुमर मन सुस्त नाए होबए, और बो दिन तुमर उपर इक्बरी फन्दा जैसो नाए आए। 35काहेकी फन्दा, पुरा पृथ्वीमे रहान बारेन सबके उपर आबैगो। 36जहेमारे संसार रहाबओ, और हर समय परमेश्वरसे प्राथना करत रहाबओ, ताकी तुम जे सब आन बारे घटनासे बच पाबओ। और मए, आदमीको लौंणाके अग्गु ठाणनके लायक बन पाबओ।”
37और येशू बे दिनमे यरूशलेमको मन्दिरमे शिक्षा देत रहए, और रातके बाहिर जाएके जैतून काहन बारो डँगामे रात बितात रहए। 38और भोरभए उठके सब आदमी, बाको बचन सुननके ताहीं यरूशलेमको मन्दिरमे येशूके ठिन आत रहएं।
Trenutno izabrano:
लूका 21: THRNT
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
