मर्कुस 8
8
येसुन चार हजारकाइ ख्वाइल
(मति १५:२९-३९)
1ह्व दिननाइ फेरि मान्छेल्को बड्खो भिड येसु हक्लनाइ जम्मा हक्ला। होल्कोसिन खाइनार कुरो सकिसक्ल रल्ति, अनि येसुन चेलाल्काइ आफि हक्लनाइ बालाइके बल्-ल्याक, 2“ह्य मान्छेल्को भिड देखिके मुइलाइ दया लाग्ले, किनारइभने हेलत तिन दिनसम्म मुइसिन आछत, र हेल्कोसिन खाइनार कुरो पुनि सकिसक्लाछि। 3हेलत मद्दे कोइ-कोइ ता बद्दुरबान आइलाछत। हेल्काइ मुइनिन भोक्ले घर पाठाइनाइ भने ता जाइतिन-जाइतिन बाटनाइ मुर्छा पर्छत हुदो।”
4चेलाल्किन येसुलाइ बल्ला, “ह्य केइ बइहक्नार उजाड ठउँनाइ कछ्यान खाइनार कुरो आनिकइ ख्वाइ?”
5येसुन चेलाल्काइ सोद्ल्याक,“तोराल्कोसिन कइटो पिठो आछि?”
चेलाल्किन बाज्ला, “सातुटो।”
6येसुन भिडकाइ भुइनाइ बस्नार आग्या दिल्याक। अनि सातुटो पिठो हातनाइ लिके परमेसोरलाइ धन्नेबाद दिलपछि पिठो टुक्रा पार्ले र भिडकाइ बाड्दिखन बाजिके चेलाल्काइ दिल्याक र चेलाल्किन भिडकाइ बाड्दिल्याक। 7होल्कोसिन केइ स्याउनाइ माछलत पुनि रल्ति। येसुन माछकर लागि धन्नेबाद दिके चेलाल्काइ बाडइ लाइल्याक। 8सेब्बाल्किन आघाउन्जेल खाइला र खाइके उघ्रिल टुक्रालत जम्मा गर्तिन सात डालो भरल्ते। 9उछिका खाइनाराइ मान्छेलत चार हजार जत्ता रइला। अनि येसुन होल्काइ पाठाइ दिल्याक। 10अनि येसु तुरुन्तइ चेलाल्कोसिन लाउनाइ चडिके दलमनुथाकर छेत्रनाइ जाइले।
फरिसिल्किन चिन्न माङ्लाइ
(मति १६:१-४)
11फरिसिलत येसु हक्लनाइ आइके बाद-बिबाद गरइ लाग्ला। होल्किन येसुलाइ परिछ्या गर्तिन बाज्ला, “हाइलाइ स्वर्गबान आइनार एउटो चिन्न देखाउ।”#मति १२:३८; लुक ११:१६ 12येसुन भित्रबान लामो सास फेर्तिन बाज्ले,“ह्य पुस्तान किनारे चिन्न हेरइ चाइछत? साँच्चि, मुइ तोराल्काइ बल्छु, ह्य पुस्तान कुनइ चिन्न देखइ पाइनाराइ बइनेत।”#मति १२:३९; लुक ११:२९
13अनि येसुन होल्काइ छाडिके फेरि लाउनाइ चडिके पारपटि जाइले।
फरिसि र हेरोदकर खमिर
(मति १६:५-१२)
14चेलाल्किन आफ्ने साथनाइ खाइनार कुरो बोकइ बिर्साइला। होल्कोसिन लाउनाइ एउटो मात्र पिठो रल्ति। 15येसुन चेलाल्काइ चेतावनि दितिन बल्-ल्याक,“तोरा फरिसिल्को र हेरोदकर खमिरदेखि होसियार हको।”#लुक १२:१
16“हाइसिन पिठो बइहक्ल हुदान येसुन इन्खा बल्ल हुदो” बाजिके चेलालत आफि-आफिनाइ कुरो गरइ लाग्ला।
17येसुन ह्य था पाइके होल्काइ बल्-ल्याक,“तोराल्कोसिन पिठो बइने बाजिके किनारे कुरो गर्छो? तोराल्किन अजइ देख्लाइ र बुज्लाइ बइने? केति तोराल्को मन अजइ कठोर आछि? 18आँखि हक्तिन पुनि तोरा बइदेखो? कान हक्तिन पुनि तोरा बइसुनो? केति तोराल्काइ याद बइन्या,#यर ५:२१; इज १२:२; मर्क ४:१२ 19जब मुइनिन पाँचुटो पिठो टुक्रा पारिके पाँच हजारकाइ ख्वाइल बिर्साइलो, तोराल्किन उघ्रिल पिठो कति डालो उठाइलो?”
होल्किन बाज्ला, “बार डालो।”
20 “अनि सातुटो पिठोन चार हजारकाइ ख्वाइतिन तोराल्किन उघ्रिल टुक्रालत कति डालो उठाइलो?”
होल्किन बाज्ला, “सात डालो।”
21येसुन होल्काइ बल्-ल्याक,“अनि केति तोराल्किन अजइ बइबुजो?”
बेथसेदाकर अन्धा देख्नार हक्ल
22ह्व पछि येसु चेलाल्कोसिन बेथसेदा आइले र केइ मान्छेल्किन एउटो अन्धा मानुसलाइ येसु हक्लनाइ आन्ला र होलाइ छुइदेउ बाजिके बिन्ति गर्ला। 23येसुन ह्व अन्धालाइ डोराइतिन गाउँबान बाइर आनल्ते। अनि होक्र आँखिनाइ थुक लाइदिल्ते र आफ्ने हात ह्व उप्रान धरिके होलाइ सोदल्ते,“केति तुइ केइ देख्छस?”
24अनि होइनिन वरिपोरि हेर्तिन बाज्ले,“मान्छेल्काइ देखइ ता देख्छु तर होलत गाछठि हिनिधर्ल पो देख्छु।”
25येसुन फेरि होक्र आँखिनाइ हातिन छुइले। अनि होइनिन नियालिकइ हेर्तिन सेब्बे कुरो छर्लङ्ग देख्नार हक्ले। 26अनि येसुन होलाइ बलल्ते,“गाउँनाइ नपसिकइ सरासर घर जा।”
येसु कुन हो?
(मति १६:१३-२०; लुका ९:१८-२१)
27ह्व पछि येसु चेलाल्कोसिन कइसरिया फिलिप्पि सहरकर नजिके गाउँहुदो जाइले। बाटनाइ जाइतिन गर्तिन येसुन आफ्ने चेलाल्काइ सोद्ल्याक,“मान्छेल्किन मुइलाइ कुन हो बाज्छत?”
28चेलाल्किन बाज्ला, “कुन्नुल्किन बप्तिस्मा दिनार युहन्ना, कुन्नुल्किन एलिया, अनि कुन्नुल्किन चाइ अगमबक्ता मद्दे एउटो हो बाज्छत।”#मर्क ४:१४-१५; लुक ९:७-८
29येसुन होल्काइ फेरि सोद्ल्याक,“तोराचाइ मुइ कुन हो बाज्छो?”
पत्रुसिन बाज्ले, “तुइ परमेसोरिन पाठाइल खिरिस्ट हो।”#मति १०:३८; लुक १४:२७; युह ६:६८-६९;८:३४
30अनि येसुन ह्य कुरो कुनुल्काइ जुनबल्खन बाजिके कडा आग्या दिल्याक।
येसुन आफ्ने मर्नार बारेनाइ बाज्ल
(मति १६:२१-२८; लुका ९:२२-२७)
31अनि येसुन चेलाल्काइ आफ्ने बारेनाइ इत्तिके बल्-ल्याक, “मानुसकर बेटाकिन धेरे दुख भोगइ पर्छि, मुख्य अगुवाल्किन, मुख्य पुजारिल्किन र धर्म-गुरुल्किन इन्कार गर्छत र मार्नाराइ आछत। तर तिन दिननाइ ह्व मर्लबान फेरि जिउँते हक्नारआछ।” 32इत्तिके येसुन चेलाल्काइ परस्ट बल्दिल्याक। ह्य सुनिके पत्रुसिन येसुलाइ अर्को दिस लाकाइके हाकारल्ते। 33अनि येसु फनक्क फर्किके चेलाल्काइ हेर्तिन पत्रुसलाइ हाकार्तिन बलल्ते,“ए सइतान, मुइबान बद्दुर जा, किनारइभने तोर बिचार परमेसोरदिस बइने तर मानुसदिस आछि।”
34अनि येसुन चेलाल्काइ र उछि हक्लाइ मान्छेल्को भिडकाइ बालाइके बल्-ल्याक,“कोइ मोर चेला हकइ चाइछइ भने होइनिन आफिलाइ इन्कार गर्दिक र आफ्ने कुरुस बोकिके मोर पछि लाग्दिक।#मति १०:३८; लुक १४:२७ 35किनारइभने जुनिन आफ्ने जिबन बाचाइ चाइछइ होइनिन ह्व गुमाइछइ, तर आफ्ने जिबन मोर लागि र सुसमचारकर लागि दिनारिन चाइ आफ्ने जिबन बाचाइनारआछ।#मति १०:३९; लुक १७:३३; युह १२:२५ 36मानुसिन सेब्बे सन्सारलाइ आफ्ने हात पारिके पुनि आफ्ने जिबन चाइ गुमाइछइ भने होलाइ केति फाइदा हकल्ते र? 37अर्थात गुमाइल जिबन किनिखे पाइ सक्छइ र? 38अनि ह्य बेभिचारि र पापि पुस्तानाइ जुन मुइ र मोर बचनदेखि लाजाइछइ, मानुसकर बेटाक पुनि ब्वाककर महिमानाइ र पबित्र स्वर्गदुतकोसिन आइतिन ह्व देखि लाजाइनारआछ।”
Trenutno izabrano:
मर्कुस 8: MAJH
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2024 (Active), Mother Tongue Translators Society and Wycliffe Bible Translators, Inc. All rights reserved.
