Nuk 2
2
Ɛsika awɛnɛ Jisɛs
1Ka nden yí Nton Ɔgɔstus ajɔnɔ Nton Aton ka ɛyiŋ ji abɨŋi si Rom, akɛɛ̀ ɛjighi si afan anɛ kpakpa ba are ka neyɔ ɛnɛ. 2Ɛjɔnɔ́ mgbɔghamba ɛfana anɛ ka nden yi Kuinirius ajɔnɔ̀ nton ɛjɨbɛ ji abɨŋi si Siriya, ka nɛyɔ Rom. 3Ɛrufa ka anɛ kpakpa amu ɛfana anɛ ji, nɛnnɛɛ amu kɛ ɛsisok ɛjɛ.
4Ɛru na ka Josɛf atɨmɛ ka ɛsisok ji abɨŋi si Nasarɛt ka ɛja Ganini amu ka Bɛtnɛghɛm, ɛsisɔkɔ Dafid ka ɛja Judiya atubsi yɛ aruu ɛbanab ɛjii ka Dafid. 5Amuu ka Meri yɔ ámi tama si ábanɛ kasoŋ akak abiŋ abɔɔ ka ɛfana anɛ. Ɛjɔnga si ákɨgha ka nɛɛ yɔku, Meri abɛnɛ ɛna bi ɛkpi si ka nɛwɛnɛ. 6Ɛsika áre fa, ɛwɛn ɛboɛ. 7Awɛnɛ mgbɔghamba mɔwɛ, mɔa nnom. Áfuɛ ka abɔɔ abom ka ɛkpaghante ji ara kɛɛ ɛjɔɔ anab ka ɛbru ɛnyam, atubsi mfom arɛ jɔn ka nna njo yi abɔɔ ka anɔŋɔ.
Ba ɛbaba ɛjɔɔ ka Bɛsɔna ateb Ɛsɔwɔ
8Ba Ɛbaba ɛjɔɔ ajɔnɔ ka ɛyɨgha abɔɔ akpere mfombi ka ɛnokon. 9Nsɔna-ateb Ɛsɔwɔ abru-bru, nɛgam Ɛsɔwɔ#2:9 Ɛgam Ɛsɔwɔ Nɛyɔ, ɛfɔŋɔ ka nɛkagha ɛnɛ ɛnem mfom aya asibi abɔɔ. Ɛkub ɛbɔb ba ɛbaba ɛjɔɔ. 10Nsɔna-ateb Ɛsɔwɔ atɔ abɔɔ: “Ba krɛ bɛ! Si mbaa ka nyɛbɛ ɛteb ka ntakpa ɛyɛbɛ netem ma nkɛɛ anɛ kpakpa 11si ɛnɛ ka ɛsisɔkɔ Defid ami wɛn Nninagha akɛɛ war; yɛ yɔ áre Kɨras ji Ntaa. 12Ji ɛkɔghɔ ɛgbɛrɛ ɛresi ɛyɛ mɔɔ yɔ afuɛ ka abɔɔ abom ka ɛkpaghante ji ára kɛɛ ɛnyam ɛjonɛnɛghɛ.”
13Fifa fifa, abembem Bɛsɔna-ateb Ɛsɔwɔ abru akpɛnɛ ka mgbɔghamba Nsɔna-ateb ákara Ɛsɔwɔ si,
14“Nɛgam ka Ɛsɔwɔ ka bɛsɔ bi ɛyɨre ɛgaga, ka
nɛna ɛjɔn ka nse ɛkɛ anɛ ba yɛ atɨŋɔ nɛnɔbɔ.”
15Ɛsika Nsɔna-ateb Ɛsɔwɔ afɛnɛ akru ka bɛsɔ, ba ɛbaba ɛjɔɔ atɔ atɛm, “Ɛmu ka ɛsisɔkɔ Bɛtnɛghɛm ɛmɛ yɛ njɛna ɛteb bi Agaga-Nton átebe war na.”
16Ajɛjɛn frifri asi ama yɛ Meri ka Josɛf ka mɔɔ yɔwɛ ka anɔŋ kɛ ɛkpaghante ɛjɔɔ. 17Nden yi abɔɔ ayɛ mɔɔ nyɔ, atɔ anɛ ba ajɔnɔ fa ji Nsɔnɔ ateb Ɛsɔwɔ atɔ abɔɔ atubɛ, 18ɛma jɔn ɛjo njɛnnjɛn ɛkɛɛ anɛ ba ayɔghɔ ji bɛ ba ba ɛjɔɔ atɔ abɔɔ. 19Ka Meri akɔkɔ ji ayɔghɔ akak ka netem afɨna nɔŋɔ ka nkater. 20Bɛ ɛbaba ɛjɔɔ afɛnɛ fɛnɛ ka ɛyɛbɛ netem, ɛyighi ka nɛkara akɛ Ɛsɔwɔ ka ɛjom ji abɔ áyɔghɔ afɨna áyɛ kanakan ka Nsɔnɔ eteb Ɛsɔwɔ atɔ abɔɔ.
21Ɛnumu afo anɨghanɛ, akɨbɛ ndor, abɨŋɛ si Jisɛs ɛsika Nsɔna-ateb Ɛsɔwɔ atɔ nnyɛɛ kà ayibi ɛna ɛbɛ.
22Nden ama si yi Meri aru ka njo abuk ɛsika ɛjɨghi Mosis ɛrɨgha, Josɛf ka Meri akɔ Jisɛs amu ka Jɛrusanɛm ama sɨghi abɔ akɛ Agaga Nton. 23Áne ɛsika ayɛnɛ ka nwɛr ajɨghi Agaga Nton si, “Abri mgbɔghamba mɔa nnom yɔku ka nɛɛ yɔ afɔfɔm ka amar Ɛsɔwɔ.” 24Áfɨna akɔɛ asɨgha abɔ akɛɛ Agaga Nton, akpɛnɛ ka nɛjɔɔ ɛmɛb bɨba. Árɛna yɛɛ ɛmɛb, akɔghɔ ɛbɨnagu bibaa, “Ɛsika ɛjɨghi Agaga Nton ɛrɨgha.”
25Nnɛ ɛwi ájɔnɔ ka nden nyi ka Jɛrusanɛm yɔ abɛnɛ nnɔbɔa nɛwɛmɛ afɨna ajɔn nea atiŋi nsɔn ka amar Ɛsɔwɔ yɔ ánɛ si Simiɔn, ará bri si áyɛ nɛnagha ni ɛbɨgha ka Isren atubsi Nɛfɛb Ɛsɔwɔ ɛjɔnɔ ka nɛ. 26Ka Nɛfɛb Ɛsɔwɔ ɛjibi ɛtɔɛ si yɛ akpɔghɔm akɨghana fɨnɛ amar ayɛ́ ayɛ Kɨras ji Nton áto. 27Nɛfɛb Ɛsɔwɔ ɛfɨnɛ sɔn Simiɔn ɛmu ka nkɔa njoa njɔm. Nɛyɛ ni ayɛ nnyɛ ka nsɛ Jisɛs ka abɨgha ka nɛ si ama nem ka nɛwɛmɛ abɔɔ ɛsɛbɛ. 28Simiɔn atáb mɔɔ nyɔ ka abɔ akara Ɛsɔwɔ si:
29“Agaga Nton, ɛsika ɔragha,
Nton nɔŋɔ nnea nɛtom ɛna akru ka nɛna si mmi yɛ nɛnagha ɛna.
30Ka amar ayɨŋa mmi yɛ Nninagha,
31yɔ ɔtɔŋɔ ka amar ane kpakpa:
32ɛfɔŋɔ ji ɛbɨgha ka nɛnagha ɛkɛɛ ɛyiŋ ka nɛgam akɛɛ anɛ ba Isrɛn.”
33Nsɛ ka nnyɛ anɔŋɔnɔŋɔ nsɔn ya arɨgha atubɛ ka nkater. 34Ka Simiɔn ánara abɔɔ afɨna atɔ Meri ji nnyɛ si: “Mmɔ nnyɔ abaa ma nem abembem anɛ agbɔ, bantiŋa ayar ka Isren, afɨna jɔn ɛjo ndɛŋe ji anɛ arɨgha abibia nsɔn atub, 35yi ɛtɨŋɔ nkater abɔɔ. Wɔ ɔwagha netem nna wɔsi ájima akparija.”
36Ɛjɔnɔ Ɛsɔgba Ɛsɔwɔ ji maŋka yɔ anɛ si Ana, mmɔa Penuen ka abɔanyɛ Asa. Akokon ka ɛtiŋi tiŋi; akaa ka nɛbana nnom ka nya ɛsima ka nnom ɛwɛ akpɔ asighɛ 37asa ka ɛgɔn tɛtɛ aka nnya atɨna anɛ ka ɛnɛ. Ára kà ka njoa njɔm ka njan ɛfen ka ɛnokon jiku jiku akɨgha njɔm. 38Atɨma atɔŋɔ abɔɔ akak Ɛsɔwɔ sam afɨna arag atub mɔɔ ka nɛnagha ɛnɛ ni anɛ ara bri ka Jɛrusanɛm. 39Ka nden yi Josɛf ka Meri ami nem kpakpa nsɔn ka ɛjighi Nton ɛsɛbɛ, afɛnɛ akru ka ɛja Ganini ka ɛjɨbɛ abɔɔ ji Nasarɛt. 40Fa yɔ mɔɔ arɨmɛ ka nɛyɔ ka ɛgbɛrɛ ɛjom ɛsika Nɛfɛb Ɛsɔwɔ ɛkɛɛ.
41Nnyɛ ka Nsɛ ara mughu ka Jɛrusanɛm ka nyagha nnya ama yighi ɛfo nɛfɔrɔ. 42Nden yi mɔɔ abeŋe nnya wobo ka ɛbaa, amu ka nɛ ɛsika ɛtɔŋɔ. 43Ka nden yi ɛyighi ɛkɨnɛ, ɛsika nnyɛɛ ka nsɛ ajɛnɛ na akru, Jisɛs asaa ka Jɛrusanɛm. Nnyɛ ka Nsɛ arɛ gbɛrɛ. 44Esika akɨno ɛkpo si arɨgha tɔŋɔ abɔɔ, ajɛn ɛfo tutu ka ama agbɛrɛ. Yi ariɛ yɛ, asɛbɛ ka ɛbɔŋɔ abɔanyɛ ka atɛm abɛ. 45Ɛsika ariɛ yɛ kɛ ɛbɔŋɔ anɛ abɛ, abɔɔ afɨna fɛnɛ ama sɛbɛ ka Jɛrusanɛm. 46Ɛkɔɔ afo asaa ka ayɛɛ ka njoa njɔm ka ajik ayoŋo atɔŋ akɛ ba akpikpɨne ká abɔmɔ abɔɔ abɔmɔ. 47Ɛjɔnɔ njɛn ɛjom ka atɔŋ anɛ nɛyɨghɔ nɛgana nɛgbɛrɛ ɛjom ka nɛkpɛ ni ɛrɛruɛ ka nnyɔ. 48Ka nden yi nsɛ ka nnyɛɛ akɔŋɛ, bɛji ɛkpɔ abɔɔ. Nnyɛ abɔmɛ, “Mmɔ, nnaŋ ka oné war na? Nsɔja ka naŋa ɛmia sɛb kɛtiŋi tiŋi.”
49Ka yɛ abɔmɔ abɔɔ si “Ɛgbɔnaŋ ka ɛsɛbɛm? Ɛnyim si ɛre yi ka nda jɔnɔ ka netom nsɔjɨŋa?” 50Abɔɔ ɛrɛ jibi ji yɛ arɨgha atɔ abɔɔ.
51Atɔŋɔ abɔɔ akru ka Nasarɛt, ane nsɔn ka ɛtiŋi mɔɔ; nnyɛɛ akɔ kpakpa nsɔn nyi akak ka netem. 52Ka Jisɛs aram afɨna beŋe ka nɛgbɛrɛ ɛjom ka Ɛsɔwɔ akɛɛ.
Trenutno izabrano:
Nuk 2: NDD-011
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©️2024 Luke Initiative for Scripture Translation
