लूक 2
2
येशुनदी जन्म
मत्तय 6:9-15
1आ दिन्मुलाला रोमी सम्राट अगस्तद आज्ञा आय्या की, आंता प्रांतदी फेरनोंदणी शेशेदेंक दावाला. 2इदी पहिलाद फेरनोंदणी उंड्या यप्पुड क्वीरीनिय इड सिरीया प्रांतोड राज्यपाल उंड्या. 3आंदार फेरनोंदणी शेशेदेंक मनामना उरुक फोईर.
4इंगा योसेफ पण गालील प्रांतलोन नासरेथ उरनुस यहुदीया प्रांतलोन दाविदान बेथलहेम इ उरुक फोया येनटीक की वाड दाविद घराणा लोन्टोड इंगा कुळ लोन्टोड उंड्या. 5फेर राशी इद्देंक, येवात दानसंगा वानदी इड्याम आयन्या आ रंजलमनशी मरीया दान वाड संगा येतकेन फोया. 6मग इल्ला आय्या, वार आंदे उंडीनाप्पुड दानी दिनाल पूर्ण आय्यी, 7आदी दान पहिला बीडाक जन्म इच्या इंगा आदी वान बट्टाला गुंडाळीच्या इंगा कोट्टामला फेट्या येनटीक की धर्मशाळाला निल्चेदेंक वारकी जागा शिक्का लेद.
8आद्दे भागला, मेंढपाळलु मोब्बुलोन वेळला शेल्ला नीलची मनाद खांड राखायदूर. 9अचानक, परमेश्वर वगा दूत वार मुंदार प्रकट आय्या इंगा प्रभुनदी महिमाद तेज वारभोवती पसराशा इंगा वार शेंगेम आद्रीर. 10द्यावरदूत वारनी आन्या आद्रा कुंडा; याद फेद्दा आनंद आंता मंदीक आय्येद उंडाद दानदी सुर्वाता नीन मिक शेपतान. 11बेथलेहेम, दाविद नगरला इबद मी कस्रोम ताराशेतोड फुट्टीनाड! वाड ख्रिस्त प्रभुड उंडाड. 12मी कस्रोम इदी खून उंडी की, बीडा बट्टाला गुंडाळीची कोट्टामला फंडामतीनोड मिक कंपीच्ची.
13मग येकायेकी मोळामलोन सैन्यद समुदाय द्यावारदूत देगार वच्या इंगा स्वर्गदूत द्यावारदी स्तुती शेस्का आनीर,
14“मोडामला द्यावारकी गैारव
इंगा पृथ्वीमिंदा या मनसुला बद्दल
वाड संतूष्ट उंडाड वार नडमा शांती.”
15इंगा इल्ला आय्या की द्यावारदूत वार देगारनुस स्वर्गलोंग फोया, आप्पुड मेंढपाळलु वगामेगारनी आनीर, नंडा, मनाम बेथलहेमकी फदाम इंगा याद माटा परमेश्वर मनाक शेप्या आदी सुदाम. 16आप्पुड वार घाईघाईला फोईर इंगा वारकी मरीयाद, योसेफ इंगा कोट्टामला फेट्टीने बीडा वारकी कमशा. 17आप्पुड मेंढपाळलु वारनी सुशीर आ बीडा बद्दल येम शेपनेद उंड्या आदी वार आंदारकी शेप्पीर. 18आप्पुड इनेतोर आंदारकी आ मेंढपाळलु शेप्पीने माटा मिंदनुस आश्चर्य चकीत आय्यीर. 19गान मरीयाद इ आन्नी माटला मिंदा मनन शेशी आय मना अंत:करणला फेट्या. 20यंकसार वार मेंढपाळलु वारकी शेपदेंक वच्चीन्या दानलेकाने इ आन्नी माटलु इनी इंगा सुशी द्यावारदी गैारव इंगा स्तुती शेस्का वापस फोय्यीर.
21यन्मीद नाळाक आंटे सुंताद दिनमु वच्चीनेंका वान फेर येशु फेटदेंक वच्या. इदी फेर वाड कडपुला उंडाकाना मुंची द्यावारदूत फेट्टीन्या.#2:21 उत्पत्ती17:12; लेवी 12:3
परमेश्वर भवनला येशुनदी समर्पण
22मुंदारकी मोशेन नियमशास्त्रनुसार वानदी शुध्दीकरनदी दिन्मु वच्चीनेंका वार वान फइक यरुशलेम शहेरकी येतकेन वच्चीर; आदी दिन कस्रोम की, वान प्रभुनकी समर्पण शेय्याला.#2:22 लेवी 12:6 23आंटे प्रत्येक पहिला फुट्टीने नर प्रभून कस्रोम पवित्र आनाला इल्ला याद प्रभुन नियमशास्त्रला राशिनेद उंडाद दानलेकाने शेय्याला.#2:23 निर्गम 13:2,12 24इंगा प्रभून नियमशास्त्रला शेप्पीनेलेका पारव्यालदी जोडा लेकाते कबुतरी रोंड फील्लाल यज्ञ अर्पणशेय्याला आंका वार वान आंदूक येकेन वच्चीर.#2:24 लेवी 12:8
शिमोन इंगा वानी स्तोत्रल
25आप्पुड सुडांडा, यरुशलेमला शिमोन फेरोड येवाड तरी वगा मनशी उंड्या. वाड नीतीमान इंगा भक्तिमान उंड्या. वाड इस्राएल सांत्वनदी दावा सुदू#2:25 इस्राएल सांत्वनदी दावा सुदू येरूशलेम द छूटकारद दावा सुस्ताड इंगा पवित्र आत्मा वान मिंदा उंड्या. 26इंगा प्रभून ख्रिस्तन सुशीन शिवाय निक साव दाक फोई इल्ला पवित्र आत्मा वानकी प्रकट शेशीन्या. 27इंगा वाड आत्माला उंडीनाप्पुड परमेश्वर भवनलोंक वच्या इंगा आप्पुड आम्मा आब्बाड येशु बीडान, वान बद्दल नियमशास्त्र रीतीलेका शेशेदेंक, नोनिक येकेन वच्चीर, 28आप्पुड शिमोन येशुन मना शेतल्या तीसकुन्या इंगा वाड परमेश्वरकी धन्यवाद शेशा इंगा आन्या,
29“हे प्रभु, इप्पुड नू नी वचनलेका नी दासनी शांतीता फोनीस्तुनाव#2:29 शांतीता फोनीस्तुनाव शांति गोंन सची होतं .
30येनटीक की ना कडंलु निद तारण सुशिनाय,
31आदी नू आन्नी राष्ट्रला मंदी समक्ष सिद्ध शेशीनाव.
32आदी यहुदी लेनोरकी प्रगटीकरण आयदेंक येलगु इंगा नी इस्राएल मंदीद वैभव इल्ला उंडाद.”
33वान बद्दल शेप्पीने माटलाता वान आम्मा आब्बाड आश्चर्यचकीत आय्यीर. 34इंगा शिमोन वारकी आशीर्वाद इच्या इंगा वान आम्मा मरिया दान आन्या, सूड, इस्रायलला शेंगेम मंदीद फडेद इंगा लेशेद आयदेंक इंगा येवान विरुद्ध मंदी माटलाड्यार इल्ला वगा चिन्ह आयदेंक इन नेमाशिनाड.
35दीन कस्रोम की, शेंगेम मंदी अंत:करणलोन विचारलु उघड कावाला इंगा नी स्वता:द जेम पण तलवारता आरपार आय्यी.
संदेष्टी हन्ना
36आंदू हन्ना फेरुद वगा संदेष्टीद निलदू. आदी आशेर वंशलोन फनूएल कुतुर उंडी आदी शेंगेम मुसलीद आयन्या. आदी फेंडली आयनेंका दान मोगुन संगा योड यंडलु निलच्या. 37आदी चैाऱ्याऐंशी यंडलाद विधवा उंड्या इंगा परमेश्वर भवन इडशी फोवांदे उपवास इंगा प्रार्थना शेशी आदी फद्दीनमाप निरंतर आराधना शेस्तुन्या. 38आदी आद्दे वेळला देग्गार वच्ची द्यावारकी धन्यवाद इच्या. येवार यरुशलेम सुटकाराद दावा सुदूर वार आंदारकी आदी वान बद्दल शेप्या.
येशुनदी बाळपण
39आप्पुड वार प्रभून नियमशास्त्र लेका आंता पूर्ण शेशिनेंका, वार गालील प्रांतलोन नासरेथकी वार ऊरुक वापस फोय्यीर. 40बीडा फेद्दावोड आयका फोया इंगा शक्तीला इंगा ज्ञानला वाढास्का फोया इंगा द्यावारदी कृपा वानमिंदा उंड्या.
41दर याडाद वान आम्मा आब्बाड वल्हांडण फंडगा कस्रोम यरुशलेम शहरकी फोदुर.#2:41 निर्गम 12:24-27, अनुवाद 16:1-8 42आप्पुड वाड बारा यंडलावोड उंड्या, वार फंडगा रितीलेका फइक यरुशलेम शहरकी फोय्यीर. 43आप्पुड फंडगाय आन्नी दिन्मुल आंदु नीलचीनेंका वार इल्लुक वापस वच्चेदेंक येल्लीर. गान बीडा येशुड यरुशलेमलाने यंकाक निलची फो गान वान आम्मा आब्बानकी येरक्का लेकुंड्या. 44वाड जताक प्रवास शेशेतोर प्रवासीला संगा उंडी इल्ला समजाशी वार वगा नाडदी दावा नडस्केन फोय्यीर यंकसार वार गोनगोतला इंगा मित्रलाला वान फुडकेदेंक सुरु शेशीर.#2:44 15 ते 20 किलोमीटर वगा नाडा 45आप्पुड वाड वारकी शिक्काक फो, आंका वार यरुशलेम शहरकी वापस वच्चीर इंगा आंदू वार वान फुडकेदेंक आंटीर. 46इल्ला आय्या की, मूड नाळा बाद वार यरूशलेमकी वापस वच्चीर आप्पुड वाड वारकी परमेश्वर भवनला शिक्या, वाड शिक्षकलाला कुसनी वारदी इनदू इंगा वारनी प्रश्नल आडगुदू. 47येवार वानदी इनीर वार आंदार वान समजबुद्धीता इंगा उत्तरलाता चकीत आय्यीर. 48यप्पुड वार वान सुशीर आप्पुड वार आश्चर्य चकीत आय्यीर. वान आम्मा वान आन्या, “बीडा, नू मासंगा इल्ला येनटीक शेस्ती? मेब्बाड इंगा नीन यंता चिंता शेस्का नीनु फुडकुका वस्तीम.” 49येशुड वारनी आन्या, “मीर नन्नु येनटीक फूडकुदूर? नीन ना परमेश्वर आब्बान इंटल्या उंड्याला, इदी मीक यरका लेकुंड्या येम?” 50गान वाड याय माटलू वारसंगा माटलाड्या आय वारकी तेलवालेद. 51इंगा वाड वारसंगा नासरेथ नगरकी फोया इंगा वाड वार आज्ञाला निलच्या. वान आम्मा इ आन्नी माटलु दान अंत:करणला दाशी फेट्या.
52येशुड ज्ञानला इंगा शरीरला द्यावार इंगा मनसुला कृपाला वाढास्केन फोया. #2:52 1शमुवेल 2:26, नितीसुत्र 3:4
Trenutno izabrano:
लूक 2: Wrr
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
CC BY SA
