မာကု 9
9
1ဟွည်ႇဒီန် အ်ုန်ဒါႈတဂဲ၊ “အောဂြည်ညှိုႈတပဲ၊ ဘီပ်ုရ်ဒီ ဒါ့်ဇံင်က်ုရ်တောအီုဝ် ကြိူည်ဂဲယိူဝ်ဒေငိူပ် ကပီုန်ကုင်ဖြာ ပြေ့စုင် တအဖုင်တီုင်ဂိုဒေ ဂဲညံမ်ဘိူန်စိယံမ်။”
ပုင်ရံင် က်ုရ်လှာႇ
(မဿဲ ၁၇.၁–၁၃; လုကာ ၉.၂၈–၃၆)
2 #
၂ ပေ ၁.၁၇,၁၈ ဟွည်ႇဘိုန်တောရ်ဆငီ ယေဆု တောႇဂိူဝ်ဒေဒိူည်လာ်ႈ ပေတရု၊ ယာကုပ်ဂါရ် ယောဟန် ဟာရဂွည်ကွည်ဒေ တပါင်ဆိုရ်ဇာရ်။ အခိင်ဒီန် ပုင်ရံင်ယေဆု က်ုရ်လှာႇပွံတ်ဒေ တရအာတ်ဂဲ၊ 3ဂြူဒါအ်ုန်ဒီန် ညာဘ္လောႇဘ္လူႇ ဂူႈလာ်ႈပွံတ်ဒေ၊ တန်ုကတဲကံမ်ဖာအီုဝ် အဆေမိူဝ်ႈ ကာဘဲစိဒေလ်ုရ်ႈ မောအ်ုန်ဂိူပ်ဘ္လောႇဘ္လူႇ ညာခိူည်ဒီန်။ 4အခိင်ဒီန် တဘဲႇအ်ုန်ဂဲ အွည်ကူ ယိူဝ်ဒေငိူပ် မောရှေဂါရ် ဧလိယ ပေါရောတ်ဒေက်ုရ်မိုန် ဇောမ်ယေဆု။ 5အခိင်ဒီန် ပေတရုဒါႈဒေဂြည် တယေဆု၊ “အိူဝ် တာဆရာ၊ အရာပ်အီုဝ် ကျညှိုႈတဂွည် အတွအယ်။ ဒဲႈယဲရ်ုရ်ဘိူဝ် ကီုရ်ဟူပ်အွည်ကြောင် အတွမီ အူကြောင်၊ အတွမောရှေ အူကြောင်၊ အတွဧလိယ အူကြောင်။” 6ဘံန်ဂဲ ယောလူတ်လာည်၊ ပေတရု ကာနံပ်ပ်ုန်ဒါႈဒေ ပဲန်အ်ုန်ဒါႈညာခိူည်ဒီန်။
7 #
မ ၃.၁၇; မာ ၁.၁၁; လု ၃.၂၂ အခိင်ဒီန် ဆိုရ်အူတ်လှိူရ်ႈပေါ ကီုရ်မုအ်ုန်ဖလူမ်ဒိုည်ႇဂဲ၊ ငဲဂံရ်ႈလေႈ ဒိုရ်တဆိုရ်အူတ်ဒီန်ဒါႈ၊ “အ်ုန်အီုဝ် မိူဝ်ႈကွံန်ရံက်အော၊ ဒဲႈပဲဆတီုင် ငဲအ်ုန်အေ့။” 8ဘံန်ညာခိူည်ဒီန် ဂဲက်ုရ်ပံတ်ဒေငိူပ်ပွံတ် က်ုရ်ႎျံရ်ဒေ၊ ဆဲႈယေဆုအူကူ ဂွည်ရူမ်ဇောမ်ဂဲ၊ အဆေမိူဝ်ႈကာယိူဝ်။
9ယာမ်ဂဲလေႈဒိုည်ႇဒေ ဒိုရ်တဆိုရ် ယေဆုပိင်ငျှံပ်အူန်ဂဲ၊ “ပဲမာည်လာ်ႈဂြည်တအဆေ ခိူည်ပ်ုန်ယိူဝ်ပဲငိူပ်ဒေဒိူည်အီုဝ် ကြိူည်ကွံန်ဘီအီုဝ် ႎီရ်ယိူဝ်ႇအီမ်ဒိုရ်ယံမ်ဒေ။”
10ဂဲဘိူည်ဇူဂံတ်ငဲ ပ်ုန်ပိင်ငျှံပ်အ်ုန် ဂဲလာည်က်ုရ်မိုန်က်ုရ်ဂြည်တဒေ၊ “ဆေမိူဝ်ႈ ခိူည်အကျံင်ဟွည်ႇယံမ် ႎီရ်ယိူဝ်ႇအီမ်ဒေဒီန်အဲႈ။” 11#မ ၁၁.၁၄ဟွည်ႇဒီန် ဂဲဆ်ုရ်မွံတ်ယေဆု၊ “ကောပ်ဆေ တာဆရာနံပ်ဘေဲႇကျံမ်ဂဲ တဒါႈ ဧလိယ ဒီဘ်ုပ်ဒေ လာ်ႈရောတ်ပေါဇံဝ် ရအာတ်အဲႈ။”
12ယေဆုႎီရ်ဒါႈ၊ “ဧလိယ လာ်ႈရောတ်ပေါဇံဝ်ရအာတ်ဒီန် မိူဝ်ႈအေ့ အတွရဲန်ဒေရ်ုရ်တွံန်နဲ။ က်ုန်ညာခိူည်ဒီန် ကွံန်ဘီအီုဝ် ဒီဘ်ုပ်ဒေခါမ်ဇာ ဒုခႎိူည်ဒနာဂါရ် ဒီဘ်ုပ်ဒေက်ုရ်တူႈထဲင် ဘီဂဲႎဲႈထေင်ဒေ၊ ကောည်လိုည် ဆေညာ တန်ုဘေဲႇကျံမ်တဲမ်အူန် ညာခိူည်ဒီန်အဲႈ။” 13“ကောည်လိုည် အောဂြည်ညှိုႈတပဲ ဧလိယ ဟွည်ႇရောတ်ယာ့်။ ခိူည်ပ်ုန်တဲမ်အူန် တန်ုပံပ်ဘေဲႇကျံမ် ဘီဂဲဒီန်မိူဝ်ႈ ဟွည်ႇရ်ုရ်ဒိုည်ႇ ပ်ုန်ဆ်ုန်ရ်ုရ်ဒေ တပါင်အ်ုန်ယာ့်။”
ယေဆုရူပ်လေႈ ကီုရ်နံမ်ချှို ဒိုရ်ကွံန်ရလျံင်အူကူ
(မဿဲ ၁၇.၁၄–၂၁; လုကာ ၉.၃၇–၄၃)
14အခိင်ဂဲရောတ်ဒေလာ်ႈက်ုရ်စု တရဂွည် တဘဲႇဟံရ်ဂဲ၊ ဂဲယိူဝ်ပဲတ်ဒေငိူပ် ဖုင်ဘီက်ုရ်စုဂဲ က်ုရ်ႎျံရ်ဒိုည်ႇပြော တဘဲႇဟံရ်ဂဲဂါရ် တာဆရာနံပ်ဘေဲႇကျံမ်ဂဲပ်ုရ်ဒီ ဒါ့်က်ုရ်ထေင်ဒေ။ 15ဘံန်ဘီဂဲ ယိူဝ်ဒေငိူပ်ယေဆု ဂဲညာအာမ်၊ ဂဲခူန်ဒေလာ်ႈဇူ ငဲတက်ုရ်ယိူဝ်ပွံတ် တအ်ုန်။ 16ယေဆုဆ်ုရ်မွံတ် တဘဲႇဒေဂဲ၊ “အကျံင်ဆေ ပဲဒါ့်က်ုရ်ထေင် ဇောမ်ဂဲအဲႈ။”
17ယာမ်ဒီန် န်ုပါင်ဘီက်ုရ်စုဂဲ ယိူဝ်ဘီအူကူဒါႈ၊ “အိူဝ် တာဆရာ၊ အောဒိူည်လာ်ႈ ကွံန်ရလျံင် ကာခီုတ်ငဲအော တမီ ကီုရ်နံမ်ချှိုလီပ်စံပ် တအ်ုန်။ 18တွံန်ကီုရ်နံမ်ချှိုဒီန် လီပ်စံပ်တအ်ုန်၊ အ်ုန်ဆမာ ပ်ုန်ဂေႈဆကြ်ုပ်ပဲတ်အ်ုန် တပါင်ကတဲ၊ ဟွည်ႇဒဲႈဘူရ်ႈလေႈ တမူရ်အ်ုန်၊ က်ုရ်ဂြီတ်ဟြာင်ဟောမ်ဒေ ဆမာပ်ုန်ခေါပဲတ်တိုအ်ုန်။ အောဘိူည်ဒါႈဂံတ်တ တဘဲႇမီဂဲ ရူပ်လေႈဒဲႈ ကီုရ်နံမ်ချှိုအီုဝ် ဂဲကာဘဲလိုည်ဒေရူပ်။”
19ကီုရ်ညာဒါႈတဂဲ၊ “အိူဝ် အမျိုကာယိူဝ်ဖိူမ်ညှိုမ်၊ ခိင်ခါဝ်ဘ်ုရ်မော အောဒီဘ်ုပ်အောဂွည်ရူမ်ထဲင်ဇောမ်ပဲ၊ ခိင်ခါဝ်ဘ်ုရ်မော အောဒီဘ်ုပ်ရျံတ်အောတပဲအဲႈ၊ ဒိူည်လာ်ႈကွံန်ရလျံင်ဒီန် တအော။” 20ဂဲဒိူည်လာ်ႈကွံန်ရလျံင်ဒီန် တယေဆု။
ဘံန်ကီုရ်နံမ်ချှိုဒီန် ယိူဝ်ဒေငိူပ်ယေဆု၊ အ်ုန်ပ်ုန်ခေါဟာ့်ပွံတ် ကွံန်ရလျံင်ဒီန် အူဒီန်တောအူဒီန်၊ အ်ုန်ဟွည်ႇပ်ုန်ဂေႈဆကြ်ုပ်ပဲတ် ကွံန်ရလျံင်ဒီန် တပါင်ကတဲ ဘူရ်လေႈပွံတ်တမူရ်အ်ုန်၊ ညာအီတ် က်ုရ်ပ္လူက်ုရ်ပ္လါႇပွံတ်တိုဒေ။ 21ယေဆု ဆ်ုရ်မွံတ် ကူန်ကွံန်ရလျံင်ဒီန်၊ “အ်ုန်ပဲန်ညာခိူည်အီုဝ် ဘ်ုရ်မောဟွည်ႇဇီုဝ့်အဲႈ။”
ကူန်အ်ုန်ဒါႈ၊ “အ်ုန်ပဲန် ညာခိူည်အီုဝ် အိုရ်ယာမ်အ်ုန်ဒျံတ်ဒျံတ်။” 22“ကီုရ်နံမ်ချှိုအီုဝ် ဆ်ုန်ဒဲႈအ်ုန်ယံမ် ပ်ုန်ဂေႈဆကြ်ုပ်အ်ုန် တပါင်ငံရ်၊ တရန်ုအိုမ် က်ုရ်စံပ်က်ုရ်ဘာ၊ ကောည်လိုည် မီက်ုန်ဘဲ က်ုရ်ႎေဇောည်ဘိူဝ်ယဲစိ။”
23ယေဆုဒါႈတအ်ုန်၊ “ဆေညာ မီနံပ်ဒေဒါႈတအော မီက်ုန်ဘဲဒီန်၊ အတွဘီအ်ုန်ယိူဝ်ဖိူမ်ညှိုမ်အီုဝ် ဘိူန်ပဲန်တွံန်နဲ။”
24ကူန်ကွံန်ရလျံင်ဒီန် ပြိုႈရျံင်ဒေဒါႈ အူဒီန်တောအူဒီန်၊ “အောညှိုမ်အေ့၊ မစဘိူဝ်အောစိ ဒဲႈအောဘိုန်ပဲတ် ဖိူမ်ကာညှိုမ်အောအီုဝ်။”
25ဘံန်ယေဆု ယိူဝ်ဒေငိူပ် ဖုင်ဘီက်ုရ်စုဂဲ ခူန်လာ်ႈဇူဒေ အ်ုန်ပိင်ငျှံပ်ဆုင်မ ဒဲႈဆဒိ တကီုရ်နံမ်ကာကျကာလဒီန်၊ “အိူဝ် ကီုရ်နံမ်ချှိုဟျာ့်ဇံန်ကာခီုတ်ငဲ၊ အောဒဲႈငဲအမိင်တမီ၊ လေႈပွံတ်မီ ဒိုရ်တို ကွံန်ကညောမ်ဒီန်၊ မီမည်ဂွည်ႇလီပ်ယာ့်ထဲင် ရန်ုအ်ုန်။”
26အခိင်ဒီန် ကီုရ်နံမ်ချှိုပီ ပည်ပြိုႈဒေရျံင်၊ ဘံန်အ်ုန်ဟွည်ႇဒဲႈ ကွံန်ရလျံင်ဒီန် တကြိုတ် လေႈပွံတ်ဒေဒိုရ်တိုအ်ုန်၊ အ်ုန်ပဲန်ပွံတ် ညာခိူည်တိုဘီယံမ်၊ ဘီတွံန်ကူဂဲ ဒါႈဒိုည်ႇ၊ “အ်ုန်ယံမ်ယာ့်။” 27ကောည်လိုည် ယေဆု ဘာပွံတ်တီ ကွံန်ရလျံင်ဒီန် ပျိူဝ်ႇယိူဝ်ႇပွံတ်တိုအ်ုန် အ်ုန်မိူဝ်ႈယိူဝ်ႇပွံတ်ဒေ။
28ဟွည်ႇဒီန် ယေဆု လီပ်ပွံတ်ဒေ ရန်ုဂါင်၊ တဘဲႇအ်ုန်ဂဲ က်ုရ်ရာတ်က်ုရ်မောဒေ ဆ်ုရ်မွံတ်အ်ုန်၊ “ကောပ်ဆေ ယဲကာဘဲယဲ ရူပ်လေႈပဲတ် ကီုရ်နံမ်ချှိုဒီန်အဲႈ။”
29ယေဆုႎီရ်ဒါႈ၊ “ခိူည်ကီုရ်နံမ်ချှိုအီုဝ် ဆဲႈဆုတောင်အူနဲ ကာဘဲစိ ရူပ်လေႈအ်ုန်။”
ယေဆုႎီရ်ဂြည် အကျံင်အ်ုန်ဒီယံမ် လှိူဝ်ႈအာရ်
(မဿဲ ၁၇.၂၂–၂၃; လုကာ ၉.၄၃–၄၅)
30ယေဆုဂါရ် တဘဲႇအ်ုန်ဂဲ လေႈဒိုရ်အရာပ်ဒီန် ဂဲက်ုရ်ခါမ်လာ်ႈပွံတ် တကပီုန်ကုင်ဂါလိလဲ။ ကောည်လိုည် ယေဆု ကာဆ်ုန်ဒဲႈအဆေနံပ် ဒေရောတ်က်ုရ်တောဒီန်။ 31ကောပ်ဆေတဒါႈခိူည်ဒီန် အ်ုန်ဆာင်ဆောန်ဒဲႈ တတဘဲႇဒေဂဲ၊ “ကွံန်ဘီအီုဝ် ဒီဘ်ုပ်က်ုရ်တူႈအာပ် တတီဘီဂဲယာ့်၊ ဂဲဒီပျံမ်ယံမ်ပဲတ်အ်ုန်။ ကောည်လိုည် က်ုန်ဟွည်ႇဘိူန်အွည်ဆငီ အ်ုန်ဒီႎီရ်ယိူဝ်ႇအီမ်ဒေ။”
32တဘဲႇအ်ုန်ဂဲ ဘိူည်ကာနံပ်ဂံတ် ငဲပ်ုန်ဂြည်အ်ုန်၊ ဂဲကာယာႇပဲတ် ဆ်ုရ်မွံတ်အ်ုန်။
အဆေမိူဝ်ႈညှိုႈ အီမျြံတ်ဒါင်
(မဿဲ ၁၈.၁–၅; လုကာ ၉.၄၆–၄၈)
33ဟွည်ႇဒီန် ဂဲရောတ်ဒိုည်ႇ တကုင်ကပေရနောင်၊ ယာမ်ဂဲဂွည်တရန်ုဂါင် ယေဆုဆ်ုရ်မွံတ် တဘဲႇဒေဂဲ၊ “ယာမ်ပဲလာ်ႈတရဒေင် အကျံင်ဆေ ပဲဒါ့် က်ုရ်ထေင်ဒေဂြည်အဲႈ။”
34 #
လု ၂၂.၂၄
ကောည်လိုည် ဂဲကာႎီရ်ဒါႈယာ့်ဆံင်မှာ်ႈ ဂွည်ညီမ်ညီမ်ပွံတ်ဒေ၊ ကောပ်ဆေတဒါႈခိူည်ဒီန် ယာမ်ဂဲလာ်ႈတရဒေင် ဂဲမေန်ဟွည်ႇက်ုရ်ထေင် အကျံင်အဆေမိူဝ်ႈညှိုႈ အီမျြံတ်ဒါင်။ 35#မ ၂၀.၂၆,၂၇; ၂၃.၁၁; မာ ၁၀.၄၃,၄၄; လု ၂၂.၂၆အခိင်ဒီန် ယေဆုဒါ့်မာ့်ဒေ၊ အ်ုန်တောႇပွံတ် တဘဲႇဒေကိူရ်အာရ်ကူ ဒါႈတဂဲ၊ “အဆေမိူဝ်ႈဟွည်ႇ က်ုန်ဆ်ုန်ပဲန်ဘီဇူႈအူ ဒီဘ်ုပ်ရောတ်ဘိူဝ်ရဘံန် ဘ်ုပ်ပဲန် မှာည်ဘီဒိုည်ႇဒိုည်ႇ။” 36ဟွည်ႇဒီန် အ်ုန်တောႇပွံတ် ကွံန်ကညောမ်ဒျံတ်အူကူ ဒဲႈအ်ုန်ဇံင်ဒေ တက်ုန်ဒီဂဲ။ ဇာ့်ပွံတ်အ်ုန် တပေါႇတီဒေ ဒါႈတဂဲ၊ 37#မ ၁၀.၄၀; လု ၁၀.၁၆; ယော ၁၃.၂၀ကောပ်ဇီုဝ်အော အီအ်ုန်ရံပ်အူန် ကွံန်ကညောမ်ဒျံတ်ဂဲ အူကူအူဆိူဝ်အီုဝ် မိူဝ်ႈဂဲရံပ်အူန်အောယာ့်။ အီအ်ုန် ရံပ်အူန်အောဒီန် ကာမိူဝ်ႈစိဂဲ ရံပ်အူန်ဂိူဝ်အောအူကူ၊ မိူဝ်ႈဂဲရံပ်အူန်ပါည် အီအ်ုန်ပ္လေါည်လေႈအော။
အီအ်ုန်ကာက်ုရ်ခံတ် ဇောမ်အယ် မိူဝ်ႈဘီလ်ုပ်အယ်
(လုကာ ၉.၄၉–၅၀)
38ယောဟန်ဒါႈတအ်ုန်၊ “အိူဝ် တာဆရာ၊ ယဲယိူဝ်ယဲငိူပ် အီအူကူ ဒါဇီုဝ်မီရူပ်လေႈပဲတ် ကီုရ်နံမ်ချှို၊ ကောပ်အ်ုန် ကာမိူဝ်ႈဘီဇောမ်ယဲ ယဲခြဲအေ့ယဲဒိူည်အ်ုန်။”
39ယေဆုဒါႈတဂဲ၊ “ပဲမာည်ခြဲအ်ုန်၊ ကောပ်ဆေတဒါႈခိူည်ဒီန် အကျံင်အ်ုန်ဒါဇီုဝ်အော ဟွည်ႇပျ ဖုင်တီုင်ဂိုလက္ခဏာဒီန် ကာဇီုဝ့် အဆေမိူဝ်ႈ ကာယာႇယာ့် ငဲပ်ုန်ဘဝ်တအော။” 40#မ ၁၂.၃၀; လု ၁၁.၂၃အီအ်ုန်ကာက်ုရ်ခံတ် ဇောမ်အယ် မိူဝ်ႈဘီလ်ုပ်အယ်ယာ့်။ 41#မ ၁၀.၄၂အောဂြည်ညှိုႈတပဲ၊ ကောပ်ပဲမိူဝ်ႈတဘဲႇအော အီအ်ုန်ဒဲႈပဲတျံင်အိုမ် အူဆလောႇ ဒီဘ်ုပ်ဘိူန်ညှိုႈ အကျိုကေစူအ်ုန်။
ကဝ်ချောႇ အတွရ်ုရ်အပေတ်
(မဿဲ ၁၈.၆–၉; လုကာ ၁၇.၁–၂)
42“အီအ်ုန်ဒဲႈ တန်ုကညောမ်ညှိုမ်အော အူကူအူကူ ရ်ုရ်ပဲန်အပေတ်ဒီန်၊ အီကူဒီန် ဟောည်မိုပံရ်ဒါင် တရမောင်အ်ုန် က်ုန်ဘ်ုပ်ဒေခါမ် ပျာ်ႈလေႈ တန်ုအိုမ်ပါင်လာည် အတွအ်ုန်ႎရကျ။ 43#မ ၅.၃၀တီမီဒီန် က်ုန်ဒဲႈဖိူမ်ပ်ုန်ညှိုမ်မီ ပဲန်က်ုရ်လူတ် က္လပဲတ်အ်ုန်၊ လဒိုရ် မီဒိူည်တီဒေအာရ်ခေါန် လီပ်တရန်ုငံရ်ရာည် ကာနံပ်ဒေယံတ်၊ က်ုန်ဒါတီအူခေါန် လီပ်ဂွည် တန်ုအဆာႇအီမ် အတွမီႎရကျ။ 44#၉.၄၄ တပံပ်ဘေဲႇ ပ်ုန်တဲမ်ပ်ုရ်ဒီဂဲ လ်ှုပ်အူန်ပဲတ် တအခါန်ဒျံတ် ၄၄၊ တအရာပ်ဒီန် ႎါႇဘြဲ့ဆမာဂဒေဟောမ်မိူဝ်ႈ ကာနံပ်ဒေယံမ်၊ ငံရ်ရလာရ်ႈမိူဝ်ႈ ကာနံပ်ဒေယံတ်ယေန်၊ (ငိူပ်မေန် တအခါန်ဒျံတ် ၄၈)။ 45ဇိူင်မီဒီန် က်ုန်ဒဲႈဖိူမ်ပ်ုန်ညှိုမ်မီ ပဲန်က်ုရ်လူတ် က္လပဲတ်အ်ုန်၊ လဒိုရ် မီဒိူည်ဇိူင်ဒေအာရ်ခေါန် လီပ်တရန်ုငံရ်ရာည် ကာနံပ်ဒေယံတ် က်ုန်ဒါဇိူင်အူခေါန် လီပ်ဂွည် တန်ုအဆာႇအီမ် အတွမီႎရကျ။ 46#၉.၄၆ပံပ်ဘေဲႇပ်ုန်တဲမ် ပ်ုရ်ဒီ လ်ှုပ်အူန်တအခါန်ဒျံတ် ၄၆၊ တအရာပ်ဒီန် ႎါႇဘြဲ့ဆမာဂဒေဟောမ်မိူဝ်ႈ ကာနံပ်ဒေယံမ်ဂါရ်၊ ငံရ်ရလာရ်ႈ ယာမ်မောမိူဝ်ႈ ကာနံပ်ဒေယံတ်ယေန်၊ (ငိူပ်မေန် တအခါန်ဒျံတ် ၄၈)။ 47#မ ၅.၂၉ပ္လေငါည်မီဒီန် က်ုန်ဒဲႈဖိူမ်ပ်ုန်ညှိုမ်မီ ပဲန်က်ုရ်လူတ် စာ့်လေႈပဲတ်အ်ုန်၊ လဒိုရ် မီဒိူည်ပ္လေငါည်ဒေ အာရ်ခေါန် လီပ်တငံရ်ရာည် ကာနံပ်ဒေယံတ် က်ုန်ဒါပ္လေငါည်အူခေါန် လီပ်ဂွည်တရန်ု ကပီုန်ကုင်ဖြာ အတွမီႎရကျ။ 48တအရာပ်ဒီန် ‘ႎါႇဘြဲ့ဆမာဂဒေဟောမ်မိူဝ်ႈ ကာနံပ်ဒေယံမ်၊ ငံရ်ရလာရ်ႈမိူဝ်ႈ ကာနံပ်ဒေယံတ်။’ ”
49“ညာခိူည်ဒါဆောႇ ဒဲႈတိုယဇ်ဆပဲ၊ ဘီတွံန်ကူအီုဝ် ဒီဘ်ုပ်ဒေက်ုရ်တူႈ ဒါငံရ် ဒဲႈတိုအ်ုန်ဆပဲ။”
50 #
မ ၅.၁၃; လု ၁၄.၃၄,၃၅ “ဆောႇဒီန်ကျအေ့။ ကောည်လိုည် ဆောႇအီုဝ် က်ုန်ကာယိူဝ်စဲမ် ခိူည်မောပဲညာဒေ ႎီရ်ဘဲဒေဘိူန်ထဲင် အိုမ်ဆငဲႈအ်ုန်အဲႈ။
“ဒဲႈတတိုပဲဒီန် ယိူဝ်ဆောႇ၊ ပဲလိုက်ုရ်ရံက်ဒေ အူကူတောအူကူ ဂွည်ရူမ်ရူမ်ရာႈရာႈအေ့” အ်ုန်ဒါႈတဂဲခိူည်ဒီန်။
Trenutno izabrano:
မာကု 9: SPBT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
The Word for the World International and The Shwe Palaung Bible Translation Reviewer Committee.
