မာကု 7
7
ပ်ုန်ဆုင်မဆာင်ဆောန် တာယာအူဟိူဝ်
(မဿဲ ၁၅.၁–၉)
1အခိင်ဒီန် ဖာရိရှဲဂဲ ပ်ုရ်ဒီဂါရ် တာဆရာနံပ်ဘေဲႇကျံမ်ဂဲ ယိူဝ်ႇဒိုရ်ကုင်ယေရုရှလင် လာ်ႈပေါဒေ က်ုရ်စုဒိုည်ႇ တပြောယေဆု။ 2ဖာရိရှဲဂဲ နွံရ်ႈလှူႈဒေငိူပ် တဘဲႇအ်ုန်ဂဲ ပ်ုရ်ဒီ တီဂဲကာဆပဲ၊
ပ်ုန်ဆ်ုန်ဒါႈအ်ုန်မိူဝ်ႈ၊ ဖာရိရှဲဂဲဒါႈ ထုင်ကာမှိူမ်ရ်ုရ်ဘီ ဂဲရ်ုရ်၊ တီဒေဂဲကာပါည် ဟောမ်ပ်ုန်ဟောမ်။ 3(က်ုန်မိူဝ်ႈ ဖာရိရှဲဂဲဂါရ် ဘီယုဒဂဲဒီန်၊ တိူဝ်ႈဒေဇောမ်ထုင် ပ်ုန်ဆာင်ဆောန်ဒဲႈ တာယာဒေအူဟိူဝ်၊ က်ုန်ကာပါည်ဘိူဝ်တီဒေ ကာကျာင်စိဒေ ဟောမ်ပ်ုန်ဟောမ်။
4အခိင်ဂဲႎီရ်ရောတ် ဒိုရ်တကာတ်မိူဝ်ႈ က်ုန်ကာပါည်ဆပဲဘိူဝ် ပ်ုန်ဒိူည်ဒေရအာတ်#၇.၄ အခိင်ဂဲႎီရ်ရောတ် ဒိုရ်တကာတ်မိူဝ်ႈ က်ုန်ကာပါည်ဆပဲဘိူဝ် ပ်ုန်ဒိူည်ဒေရအာတ်၊ က်ုန်ကာမိူဝ်ႈ ဂဲဟွည်ႇႎီရ်ရောတ်ဒိုရ်တကာတ် ဂဲက်ုန်ကာပါည်ဆပဲဘိူဝ်တိုဒေဆံင်မှာ်ႈ ရအာတ်။ ဂဲကာကျာင်စိဒေဟောမ်။ ဆဲႈဒီန် ဂဲတိူဝ်ႈပည်ဒေဒါထဲင် ထုင်ဇာမ်ပ်ုန်ဟံရ် ခိူည်ခိုည်ႇ ဆလောႇ၊ တလုင်ဒေါင်၊ က္လိုဒေါင်ဂါရ် ရအီတ်ဒေဂဲ။#၇.၄ တပံပ်ဘေဲႇပ်ုန်တဲမ်ပ်ုရ်ဒီဂဲ ကာယိူဝ်စိ ဂါရ် ရအီတ်ဒေဂဲ။)
5ဘံန်ညာခိူည်ဒီန် ဖာရိရှဲဂဲဂါရ် တာဆရာနံပ်ဘေဲႇကျံမ်ဂဲ ဆ်ုရ်မွံတ်ယေဆု၊ “ကောပ်ဆေ တဘဲႇမီဂဲ ကာဇောမ် ထုင်အူန်ကူန်မာ တာယာအယ်အူဟိူဝ်၊ ဂဲဒါတီ ကာဆပဲဒေ ဒါ့်ဟောမ်ပ်ုန်ဟောမ်အဲႈ။”
6ယေဆု ႎီရ်ဒါႈတဂဲ၊ “အခိင်ဟေရှာယ ရ်ုရ်ပရောဖက် ဂြည်အူန် အကျံင်ပဲမှာန်ညှိုႈ၊ ခိူည်ပ်ုန်ဒါႈအ်ုန် ပဲမိူဝ်ႈညှိုႈ ညာရာင်ဘီဆူဒေါ၊ ပ်ုန်တဲမ်အူန်အ်ုန်ဒီန်မိူဝ်ႈ၊
“ ‘ဖြာဒါႈ၊ ဘီဂဲအီုဝ်၊ မူရ်ဂဲ ဘိူည်ရိုဆေဂံတ်အော၊
က်ုန်မိူဝ်ႈနွံရ်ႈဖိူမ်ဂဲ ဆငါည်ညှိုႈ ဒိုရ်အော။
7ပ်ုန်ကိုကွည်ဂဲ တအော ကာထူစိ၊
ကောပ်ဆေတဒါႈခိူည်ဒီန် ဂဲဆာင်ဆောန် ဒဲႈဂိူဝ်ဥပဒေ ဒေင်လာ့်လာည်ဘီဂဲ၊
ညာခိူည် ပိင်ငျှံပ်အော။’
8“ပဲထေင်ဒိုည်ႇပဲတ် ပိင်ငျှံပ်ဖြာ ပဲတိူဝ်ႈဒိုည်ႇဒေဒါ ပ်ုန်ဆာင်ဆောန်ဘီဂဲ။”
9ဟွည်ႇဒီန် ယေဆုႎီရ်ဆီုပ်ဒေဒါႈ၊ “အတွပဲဒဲႈထုင် ပ်ုန်ဆာင်ဆောန်ဒေမြဲ ပဲလှညှိုႈဒေ ထေင်ဒိုည်ႇပဲတ် ပိင်ငျှံပ်ဖြာ။ 10မောရှေ ပိင်ငျှံပ်အူန်၊ ‘ရိုဆေကူန်မာပဲ၊ အဆေမိူဝ်ႈဟွည်ႇ က်ုန်အေႈကီန်တိူင် ကူန်မာဒေ ဒီဘ်ုပ်ဒေခါမ် တာမ်ယံမ်။’ 11ကောည်လိုည် ပဲက်ုန်ဒါႈ၊ ဘီအူကူ ဘိူည်ယိူဝ်ဂံတ် ပ်ုန်လှူ ဒဲႈအကျိုအူနဲနဲ တကူန်မာဒေ အ်ုန်က်ုန်ဒါႈ ‘မိူဝ်ႈကော်ဘန်ယာ့်’ (အိုမ်ငဲအ်ုန်မိူဝ်ႈ၊ ပ်ုန်လှူအီုဝ် ဟွည်ႇကာပ်ဒဲႈ တဖြာ)၊ 12အီကူဒီန် ကာလိုယာ့် ရ်ုရ်ဇောည် ကူန်မာဒေ၊ ပဲဆမာနံပ်ဒေ ဆာင်ဆောန်ညာခိူည်ဒီန်။ 13ပဲဆာင်ဆောန်ဒဲႈ တဘီဟံရ် ဒါဒေင်လာ့်လာည်အီုဝ် မိူဝ်ႈညှိုႈပဲထေင်ဒိုည်ႇပဲတ် ငဲဖြာ။ ဆဲႈဒီန် ခံင်ရ်ုရ်ပဲ ပ်ုန်ဟံရ် ယိူဝ်ထဲင်ဘာ့်ဘာ့်ဘိူဝ်ဘိူဝ်။”
ခံင်ဒဲႈဘီပဲန် ကာဆပဲ
(မဿဲ ၁၅.၁၀–၂၀)
14အခိင်ဒီန် ယေဆု ႎီရ်တောႇထဲင် ဖုင်ဘီက်ုရ်စု လာ်ႈတဒေ၊ အ်ုန်ဒါႈတဂဲ၊ “ဆတီုင်ဘိူဝ်ငဲအော ဒဲႈပဲနံပ်ဒိုည်ႇတွံန်ကူ။” 15ခံင်ယိူဝ်ႇဒိုရ်ရရိူဝ်ႇဘီ လီပ်တရန်ုဘီဒီန်၊ အူနဲမောမိူဝ်ႈ ကာယိူဝ်စိ အ်ုန်ဘဲဒေဒဲႈ ဘီပဲန်ကာဆပဲ။ မိူဝ်ႈဂိူဝ် ခံင်ယိူဝ်ႇဒိုရ်တရန်ုဘီ လေႈရရိူဝ်ႇဒီန် အ်ုန်ဆမာဒဲႈ ဘီပဲန်ကာဆပဲ။ 16#၇.၁၆ တပံပ်ဘေဲႇပ်ုန်တဲမ် ပ်ုရ်ဒီ ဂဲလှ်ုပ်အူန်ပဲတ် တအခါန်ဒျံတ် ၁၆၊ က်ုန်ယိူဝ်ဒေဟျာ့်၊ ဒဲႈယိူဝ်ဒေဆတီုင်၊ (ငိူပ်မေန် ၄.၂၃)။
17အခိင်ယေဆု ဟွည်ႇလေႈ ဒိုရ်ဖုင်ဘီက်ုရ်စုဂဲ ယာမ်အ်ုန်လီပ်တန်ုဂါင်၊ တဘဲႇအ်ုန်ဂဲဆ်ုရ်မွံတ် အကျံင်ငဲပုင်တဲႇဒီန်တအ်ုန်။ 18အခိင်ဒီန် ယေဆုဒါႈတဂဲ၊ “ပဲကာယိူဝ်ဂံတ် ငျံန်ပိင်ငျာ ဒိုရ်ဘီဟံရ်ဂဲ။ ပဲကာနံပ်၊ ယိူဝ်ႇဒိုရ်ရရိူဝ်ႇဘီ လီပ်တရန်ုဘီ ခံင်နဲမောမိူဝ်ႈဟွည်ႇ ကာဘဲစိဒေရ်ုရ်ဒဲႈပဲကာဆပဲ၊” 19“ကောပ်ဆေတဒါႈ ခံင်ကာဆပဲဒီန် ကာမိူဝ်ႈစိ အ်ုန်လီပ်တန်ုပ္လေဖိူမ်ဘီ၊ အ်ုန်က်ုန်ဟွည်ႇလီပ်ရောတ် တရန်ုႎဲ့ပုင်ဟောမ် လေႈဒိုည်ႇပွံတ်ဒေ တဘီုင်ရအိင်။” (တန်ုငဲအီုဝ်မိူဝ်ႈ ယေဆုဒါႈတဂဲ ခံင်ပ်ုန်ဟောမ်တွံန်နဲ ဘိူန်ဒိုည်ႇဟောမ်။)
20ဆဲႈဒီန် အ်ုန်ႎီရ်ဒါႈထဲင် တဂဲ၊ “ခံင်လေႈဒိုရ် တရန်ုဘီဒီန်၊ အ်ုန်ဆမာဒဲႈ ဘီပဲန်ကာဆပဲ။” 21အကျံင်ဒီန်မိူဝ်ႈ တရန်ုပ္လေဖိူမ်ဘီအီုဝ် ဆမာခံပ်က်ုရ်ယေင် ကာကျကာလ၊ ဆမာက်ုရ်လူတ်တပ်ုန်လဲဘီ၊ ဆမာရာတ်ဂြူဘီ၊ ဆမာပျံမ်အဆာႇဘီ၊ 22လောဖဒါင်၊ ဆမာအူန်ဖိူမ်ကာကျ၊ ကာအိုတ်၊ ဇောမ်ဂုင်ကာမ၊ ဆမာဒဲႈကာလနွံရ်ႈဖိူမ်ဒေ၊ ဆမာငဲအေႈ၊ ယိူဝ်မာနဒါင်ဂါရ် ဆမာႎါဝ်ရိူဝ်ဒီန် မိူဝ်ႈလေႈဒိုည်ႇ ဒိုရ်န်ုပ္လေဖိူမ်ဘီ။ 23ဘ်ုရ်ယိူဝ်ဖိူမ်ကာကျ ခံင်မှိူမ်ရအီရ်ႈ လေႈဒိုရ်ရန်ုတိုဘီအီုဝ် ဆမာဒဲႈဘီပဲန် ခံင်ကာဆပဲ။
ဖိူမ်ညှိုမ် အီပ်ုန်အူကူ
(မဿဲ ၁၅.၂၁–၂၈)
24ဘံန်ယေဆု ယိူဝ်ႇဒိုရ်အရာပ်ဒီန် အ်ုန်စွလာ်ႈ တအရာပ်ပြော ကုင်တုရု။ အ်ုန်လီပ်ပွံတ်ဒေ တဂါင်အူဂါင်၊ အ်ုန်ဘိူည်ကာဆ်ုန်ဒဲႈဂံတ် ဘီဂဲနံပ် ကာပဲန်စိဒေ မောတိုဒေ။ 25မာကွံန်ရပျာ ကီုရ်နံမ်ကာကျကာလ လီပ်စံပ်ဒီန်၊ ဘံန်အ်ုန်ယိူဝ်ဒေဆတီုင် အကျံင်ယေဆု၊ အ်ုန်လာ်ႈဇူပွံတ်ယေဆု အူဒီန်တောအူဒီန် မာ့်ဂြူပ်ပွံတ် တပြောဇိူင်အ်ုန်။ 26အီပ်ုန်ဒီန်မိူဝ်ႈ ခြိူဝ်မျိုဟေလသ၊ ကိူတ်တကပီုန်ကုင်ရှုရိဖိနိတ်။ အ်ုန်မှာန် ဒဲႈယေဆု ရူပ်လေႈပဲတ်ကီုရ်နံမ်ချှို ဒိုရ်တိုကွံန်ရပျာဒေ။ 27ကောည်လိုည် ယေဆုႎီရ်ဒါႈတအ်ုန်၊ “ဒဲႈဘိူဝ် ကွံန်ႎါအောဂဲ ဟောမ်ဟိူဝ့်ရအာတ်။ ကာကျစိ တတိူဝ်ႈပ်ုန်ဟောမ် ကွံန်ႎါအောဂဲ ဂံမ်ဒဲႈအအို့ဂဲဟောမ်။”
28အီပ်ုန်ဒီန် ႎီရ်ဒါႈ၊ “မိူဝ်ႈအေ့ ကီုရ်ညာ၊ ပ်ုန်ဟောမ်ကွံန်ႎါ ဇာ်ႈရခြူမ်ဘွည် တရူတရီတ်ဒီန် အအို့ဂဲအီုဝ် ယိူဝ်အေ့ထုင်ဇာမ် ထွံရ်ဒေဟောမ်။”
29ယေဆုဒါႈတအ်ုန်၊ “ကောပ်ငဲပ်ုန်ဂြည်မီအီုဝ် ႎေင်ပွံတ်မီတဂါင်၊ ကီုရ်နံမ်ချှိုဒီန်ဟွည်ႇလေႈ ဒိုရ်ကွံန်ရပျာမီယာ့်။”
30ဘံန်အီပ်ုန်ဒီန် ႎီရ်ႎေင်ပွံတ်ဒေတဂါင် အ်ုန်ယိူဝ်ဒေငိူပ် ကွံန်ရပျာဒေ ဒါ့်အီတ်နှေရ်ဒေတပါင်ချှံင်၊ ကီုရ်နံမ်ချှိုမိူဝ်ႈ ဟွည်ႇလေႈပွံတ်ဒေ ဒိုရ်တိုကွံန်ရပျာအ်ုန်။
ယေဆု ဒဲႈဘီဟျာ့်ဇံန်ကာခီုတ်ငဲ ချံမ်ဆာ
31ဟွည်ႇဒီန်ယေဆု ႎီရ်လေႈဒိုရ်အရာပ်တုရု လာ်ႈက်ုရ်ခါမ်ပွံတ် ကုင်ဇိဒုန်၊ အ်ုန်လာ်ႈရောတ်ပွံတ် တအိုမ်ဆက္လုင်ဂါလိလဲ ကပီုန်ကုင်ဒေကာပေါလိ။ 32အခိင်ဒီန် ဘီဂဲပ်ုရ်ဒီ တောႇဒေဒိူည် အီအူကူ ဟျာ့်ဇံန်ကာခီုတ်ငဲ ပေါတယေဆု၊ ဂဲမှာန် ဒဲႈယေဆု ဂံမ်တီဒေ တပါင်အ်ုန်။ 33ဘံန်ညာခိူည်ဒီန် ယေဆု တောႇလာ်ႈပွံတ်အီကူဒီန် တအရာပ်ယေန်ညီမ် ဒိုရ်န်ုဖုင်ဘီက်ုရ်စုဂဲ၊ အ်ုန်ဒါရ်ုန်ဂိုရ်တီဒေ စီလီပ်ပွံတ် တန်ုဘီုင်ဟျာ့်အ်ုန် အာရ်ခေါန်၊ ဟွည်ႇဒီန် ဘဲ့အိုမ်ဘဲ့ဒေ စူတ်ပွံတ် တကီုရ်တာႇ အီကူဒီန်။ 34အခိင်ဒီန် ယေဆု ဆိူန်ဂိူဝ်ႈဒေငိူပ် တပ္လေင် အ်ုန်ငှူရ် ဒါႈ၊ “ဧဖသ” အိုမ်ငဲဧဖသဒီန်မိူဝ်ႈ၊ “ဒဲႈအ်ုန်က်ုရ်ပိူဝ်ႈ။”
35ဒံင်အူကပြေ့ ဟျာ့်အ်ုန်ဒီန်မိူဝ်ႈ က်ုရ်ပိူဝ်ႈ၊ ဘံန်ဆနာႇကီုရ်တာႇအ်ုန် ညောတ်ညောတ် ဘိူန်ပွံတ်ဒေငဲလလ။ 36အခိင်ဒီန် ယေဆု ပိင်ငျှံပ်အူန်ဘီဂဲ မာည်ဂြည်အကျံင်အီုဝ် တအဆေ၊ အ်ုန်ဘိူည်ပိင်ငျှံပ်အူန်ဂံတ်ဂဲ ညာခိူည်ဒီန် ဂဲယိူင်ႎရဂြည်လှိူဝ်။ 37ဘံန်ဘီဂဲ ယိူဝ်ဒေဆတီုင် အကျံင်ဒီန် ဂဲအာမ်ညှိုႈညှိုႈ။ “အ်ုန်နံပ်ဒေရ်ုရ်ညာခိူည်အီုဝ် ဘ်ုရ်မောဒါႈဒေကျညှိုႈ၊” ဂဲဒါႈဒိုည်ႇခိူည်ဒီန်။ “အီအ်ုန်ဟျာ့်ဇံန်ကာခီုတ်ငဲလိုည် ဟွည်ႇဒဲႈအ်ုန်ယိူဝ်ဒေဆတီုင် ဘဲဒေငဲယာ့်။”
Trenutno izabrano:
မာကု 7: SPBT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
The Word for the World International and The Shwe Palaung Bible Translation Reviewer Committee.
