မာကု 12
12
ငဲပုင်တဲႇ ဘီက်ုရ်ႎါည် တန်ုကီုရ်ဘူမ်မရာတ်
(မဿဲ ၂၁.၃၃–၄၆; လုကာ ၂၀.၉–၁၉)
1အခိင်ဒီန် ယေဆုဂြည်ငဲပုင်တဲႇ တဂဲ၊ “ဘီအူကူ ဆ်ုမ်ကီုရ်ဘူမ်မရာတ်၊ ဟွည်ႇ ရ်ုရ်ရောင်ကာင်လံင်၊ အ်ုန်ကိူဝ်ႈပွံတ်ဘီုင် အတွရဒူည်ပ္လေမရာတ်၊ ရ်ုရ်ပွံတ်ရရဲ့ယာမ်။ ဟွည်ႇဒီန် အ်ုန်က်ုရ်ႎါည်ပွံတ် က်ုရ်ဘူမ်မရာတ်ဒေ တဘီရ်ုရ်စာင် အ်ုန်လေႈပွံတ်ဒေဒေင်။ 2ဘံန်ရောတ်အခိင် ပဲႈပ္လေမရာတ် အ်ုန်ပ္လေါည်လာ်ႈပွံတ် မှာည်ဒေအူကူ တဘီက်ုရ်ႎါည် ကီုရ်ဘူမ်ဒေဂဲ အတွတိူဝ်ႈပ္လေဒိုရ်ဂဲ။ 3ဘီက်ုရ်ႎါည်ကီုရ်ဘူမ်ဂဲ ဟွည်ႇတိုည်မှာည်အ်ုန်ဒီန် ဂဲလ်ုရ်ႈပွံတ်အ်ုန် ဆူတ်အ်ုန်ႎေင်ပွံတ်ဒေ ဆံင်မှာ်ႈမိူဝ်ႈကာဒဲႈအ်ုန်ဒိူည်။ 4ဟွည်ႇဒီန် စံဝ်ကီုရ်ဘူမ်ဒီန် ႎီရ်ပ္လေါည်လာ်ႈထဲင် မှာည်ဟံရ်ဒေတဂဲ အူကူ၊ ဘီက်ုရ်ႎါည် ကီုရ်ဘူမ်ဂဲဒီန် ဒါ်ႈပွံတ်ကိင်အ်ုန် ဂဲကဝ်ဆူ ဒဲႈအ်ုန်ဘ်ုပ်ဒေကဆေ။ 5ဘံန်ႎီရ်ပ္လေါည်လာ်ႈ မှာည်ဟံရ်ဒေအူကူ ဂဲပျံမ်ယံမ်ပဲတ်အ်ုန်။ အ်ုန်ဘိူည်ပ္လေါည်လာ်ႈဂံတ်ထဲင် တဘဲႇဟံရ်ဘာ့်ဘာ့်ဘိူဝ်ဘိူဝ်ဒေ ခိူည်ရအာတ်နာန်၊ ပ်ုရ်ဒီ ဂဲလ်ုရ်ႈ၊ ပ်ုရ်ဒီ ဂဲပျံမ်ယံမ်ဒိုည်ႇပဲတ်ဂဲ။ 6တအ်ုန်ဒီန် အတွပ္လေါည်လာ်ႈ ကီုတ်ဂိူဝ် ကွံန်ရံက်အူကူ၊ အ်ုန်ဒါႈ၊ ‘ဂဲစံမ်ဒီရိုဆေ ကွံန်ရံက်အောအီုဝ်ယာ့်၊’ ဘံန်လာ အ်ုန်ပ္လေါည်လာ်ႈပွံတ် ကွံန်ရံက်ဒေ တဘီက်ုရ်ႎါည်ကီုရ်ဘူမ်ဂဲ။ 7ကောည်လိုည် ဘီက်ုရ်ႎါည် ကီုရ်ဘူမ်ဂဲဒါႈ တဘူဂေါဟံရ်ဒေ၊ ‘အ်ုန်မိူဝ်ႈကွံန်အီမဲ စံဝ်ကီုရ်ဘူမ်၊ လာ်ႈအယ်ပျံမ်ပဲတ်အ်ုန်၊ က်ုန်ညာခိူည်ဒီန် အုဇာအ်ုန်အီုဝ် ဒီပဲန်ဒိုည်ႇအုဇာအယ်။’ 8ဘံန်ညာခိူည်ဒီန်၊ ဂဲတိူည်ပွံတ် ကွံန်အီမဲအ်ုန်၊ ဂဲဟွည်ႇပျံမ်ယံမ် ထုလေႈပဲတ်တိုအ်ုန် ရရိူဝ့်ကီုရ်ဘူမ်မရာတ်။”
9“ယေဆု ဆ်ုရ်မွံတ်ဂဲ၊ က်ုန်ညာခိူည်ဒီန် စဝ်ကီုရ်ဘူမ်မရာတ်ပီ ခိူည်မောအ်ုန်ဒီညာအဲႈ။ အ်ုန်ဒီလာ်ႈပျံမ်ယံမ်ပဲတ် ဘီက်ုရ်ႎါည်ကီုရ်ဘူမ်ဒေဂဲဒီန်၊ ဟွည်ႇဒီန် အ်ုန်ဒီအာပ်ဒဲႈပွံတ် ကီုရ်ဘူမ်မရာတ်ဒေဒီန် တတီဘီဟံရ်။ 10ကာမိူဝ်ႈပဲ ဟွည်ႇယိူဝ်ဒေဒီရ်ႈ တန်ုဘေဲႇကျံမ်၊
“ ‘မိုပ်ုန်ပဲတ် ဘီရ်ုရ်ဂါင်ဂဲဒီန်၊
ဒီႎီရ်ပဲန်ဒေမိုအရေဒါင် ဒိုရ်မိုဒိုည်ႇဒိုည်ႇ။
11ကီုရ်ညာဖြာ ဟွည်ႇရ်ုရ်အမှုအီုဝ်
ပဲန်ခံင်မှိူမ်အာမ် တရအာတ်ငါည်အယ်။’”
12ဘံန်ဘီအွံရ်ကိင်ယုဒဂဲနံပ် ယေဆု ဟောဂြည်ငဲပုင်တဲႇ ဒံင်ဒါႈတဒေ ဂဲရီန်ဒိုည်ႇဒေ တိုည်အ်ုန်၊ ကောည်လိုည် ကောပ်ဂဲယော ဖုင်ဘီကီုန် ဂဲလေႈလာ်ႈဒိုည်ႇပွံတ်ဒေ။
ပ်ုန်ဆ်ုရ်မွံတ် အကျံင်ထာမ်အခူန်
(မဿဲ ၂၂.၁၅–၂၂; လုကာ ၂၀.၂၀–၂၆)
13ဘီအွံရ်ကိင်ဂဲဒီန် ပ္လေါည်လာ်ႈပွံတ် ဖာရိရှဲဂဲပ်ုရ်ဒီဂါရ် ဘီလီပ်န်ုဖုင်ဟေရုဒ်ဂဲပ်ုရ်ဒီ တယေဆု ဆူတ်ဂဲဆ်ုရ်မွံတ် ဒဲႈဘိူန်ဒေတိုည်အ်ုန်။ 14ဂဲလာ်ႈဇူပွံတ်အ်ုန် ဒါႈ၊ “အိူဝ် တာဆရာ၊ ယဲနံပ်အေ့ မီဂြည်ငဲဆီုဝ်ငဲမှာန်၊ ငါည်အဆေမိူဝ်ႈ မီကာထာ့်၊ မီဆာင်ဆောန်ဆီုဝ်မှာန် ဒဲႈတဘီဂဲ ဒေင်တရာဖြာ။ အခူန်ပ်ုန်ထာမ်ယဲ တအင်ပါယာဆီဇာအီုဝ် က်ုရ်ဖြေင်ကော ဇောမ်ထုင်ဥပဒေ။ ယဲကျကော တထာမ် က်ုန်ကာမိူဝ်ႈ ကာကျ။”
15ကောည်လိုည် ယေဆုနံပ် ဂဲညာခိူည်ဘီဆူဒေါ ဆ်ုရ်မွံတ်၊ အ်ုန်ႎီရ်ဒါႈ၊ “ကောပ်ဆေ ပဲကဝ်ဆျှု စုင်ဇာမ်ဒိုည်ႇအော ညာခိူည်အီုဝ်အဲႈ။ တိူဝ်ႈပဲဒိူည်အောငိူပ် ရိူန်ဒဲင်ဂါအူပံင်။”
16ဂဲတိူဝ်ႈဒေဒိူည် ဒဲင်ဂါအူပံင် ဒဲႈတအ်ုန်၊ အ်ုန်ဆ်ုရ်မွံတ်ဂဲ၊ “အီအီုဝ်မိူဝ်ႈ ပုင်ရာင်အဆေဂါရ် ဇီုဝ်အဆေအဲႈ။”
ဂဲႎီရ်ဒါႈတအ်ုန်၊ “အီအီုဝ်မိူဝ်ႈ ပုင်ငါည်အင်ပါယာဆီဇာဂါရ် ဇီုဝ်အ်ုန်။”
17ဘံန်ညာခိူည်ဒီန် ယေဆု ဒါႈတဂဲ၊ “အုဇာက်ုရ်ဆဴင်ဒေ တအင်ပါယာဆီဇာ လိုအာပ်ဒဲႈ တအင်ပါယာဆီဇာ၊ က်ုန်မိူဝ်ႈအုဇာ က်ုရ်ဆဴင်ဒေ တဖြာ လိုအာပ်ဒဲႈ တဖြာ။”
အခိင်ဒီန် ဂဲညာအာမ်ဒိုည်ႇပွံတ် ယေဆု။
ပ်ုန်ဆ်ုရ်မွံတ် အကျံင်ႎီရ်ယိူဝ်ႇအီမ်ဒိုရ်ယံမ်
(မဿဲ ၂၂.၂၃–၃၃; လုကာ ၂၀.၂၇–၄၀)
18 #
တ ၂၃.၈
ဟွည်ႇဒီန် ကာယိူဝ်စိထုင်ဇာမ် မျိုဘီအီုဝ် က်ုန်ဟွည်ႇယံမ်ႎီရ်ယိူဝ်ႇအီမ်ဒေ အီအ်ုန်ကျာင်ဒေဒါႈ ဇဒ္ဒုကဲဂဲပ်ုရ်ဒီ လာ်ႈဇူဒိုည်ႇတယေဆု ဂဲဒါႈဒေငဲ၊ 19“အိူဝ် တာဆရာ၊ မောရှေ တဲမ်အူန်ထုင်ပိင်ငျှံပ် အတွယဲ၊ ‘ဘီအူကူအီုဝ် ယိူဝ်ဒေပ်ုန်လဲ ကာယိူဝ်ပဲတ်ကွံန်ႎါ အ်ုန်က်ုန်ယံမ်ပွံတ်ဒေ၊ အတွမာည်ဒဲႈ ခြိူဝ်မျိုႎည်ဒေဟြာည် ႎါအီမဲအ်ုန် ဒီဘ်ုပ်ဒေႎီရ်တိူဝ်ႈ ပ်ုန်လဲႎည်ဒေ ယာကမာည်ဒီန်။’ 20အာတ်ဒီန် ယိူဝ်ဂဲအူႎါႎည်ပူရ်ကူ၊ ႎည်ဒါင်ဂဲ ဟွည်ႇခံတ်ဒေ ကာယိူဝ်ကွံန်ႎါ ယံမ်ပွံတ်ဒေ။ 21ဟွည်ႇဒီန် ႎါအ်ုန်ႎီဒီ ႎီရ်တိူဝ်ႈဆိမ်ပွံတ် ပ်ုန်လဲႎီဒါင်ဒေ ကာယိူဝ်ဒေကွံန်ႎါ ႎီရ်ယံမ်ထဲင်ဒေ။ ႎါအ်ုန်ႎီဒျံတ် စံမ်ညာထဲင်ခိူည်ဒီန်။ 22ဂဲႎါႎည်ပူရ်ကူ အူကူဟွည်ႇအူကူ တိူဝ်ႈဆိမ်ပွံတ် ပ်ုန်လဲႎည်ဒေဒီန် ကာဒဲႈအူန်ကွံန်ႎါဒေကီုတ် ဂဲယံမ်ဒိုည်ႇဒေ၊ ဘံန်လာ အီပ်ုန်ဒီန်မိူဝ်ႈ ယံမ်ပွံတ်ဒေ။ 23ရောတ်ခိင်ခါဝ် ႎီရ်ယိူဝ်ႇအီမ် ဂဲက်ုန်ႎီရ်ယိူဝ်ႇအီမ် ဒိုည်ႇဒေ အီပ်ုန်ဒီန် ပ်ုန်လဲအဆေ အ်ုန်ဒီပဲန်ပွံတ်အဲႈ။ ကောပ်ဆေတဒါႈခိူည်ဒီန် ဂဲအူႎါႎည်ပူရ်ကူ ဟွည်ႇရမာဒိုည်ႇဒေ တအ်ုန်။”
24ယေဆုႎီရ်ဒါႈတဂဲ၊ “ကောပ်မိူဝ်ႈပဲကာနံပ်ဘေဲႇကျံမ်ဂါရ် အဖုင်တီုင်ဂိုဖြာ ပဲကျာင်ဒေက်ုရ်လူတ် ညာခိူည်အီုဝ် ကာမိူဝ်ႈအဲႈ။ 25ဘီအ်ုန်ဟွည်ႇယံမ်ဂဲအီုဝ် အခိင်ဂဲႎီရ်ယိူဝ်ႇအီမ်ဒေ ဂဲဒီကာယိူဝ်ယာ့် ဘီရ်ုရ်ခံတ်လေႈ၊ ဒီပဲန် ညာခိူည်တမန်ဇ်ုဂဲ ဂွည်တပ္လေင်။ 26ဆဲႈဒီန်၊ အကျံင်ဘီဟွည်ႇယံမ် ႎီရ်ယိူဝ်ႇအီမ်ဒေအီုဝ် တန်ုဘေဲႇကျံမ် မောရှေ တဲမ်အူန် ပဲကာတိူမ်ဒီရ်ႈဒေဒိူည် အကျံင်ဖြာ ငဲတမောရှေ န်ုယူပ်၊ ‘အောမိူဝ်ႈ ဖြာ အာဗြဟံ၊ ဖြာ ဣဇက်၊ ဖြာ ယာကုပ်။’ 27ဖြာအီုဝ် ကာမိူဝ်ႈစိ ဖြာ ဘီဟွည်ႇယံမ်၊ မိူဝ်ႈဖြာ ဘီဒါ့်အီမ်ဂဲ။ မိူဝ်ႈညှိုႈ ပဲက်ုရ်လူတ်ဒိုည်ႇယာ့်။”
ပိင်ငျှံပ် မျြံတ်ဒါင်
(မဿဲ ၂၂.၃၄–၄၀; လုကာ ၁၀.၂၅–၂၈)
28 #
လု ၁၀.၂၅–၂၈
အီအ်ုန်မိူဝ်ႈ တာဆရာနံပ်ဘေဲႇကျံမ် လာ်ႈပေါ ယိူဝ်ဒေဆတီုင် ပ်ုန်က်ုရ်မိုန်ဂဲ။ အ်ုန်နွံရ်ႈလှူႈဒေငိူပ် ယေဆု ႎီရ်ဂြည် က်ုရ်တောက်ုရ်ငျာ တဇဒ္ဒုကဲဂဲ၊ အ်ုန်ဆ်ုရ်မွံတ်၊ “ပိင်ငျှံပ်နဲမော မိူဝ်ႈညှိုႈ ပိင်ငျှံပ်မျြံတ်ဒါင်အဲႈ။”
29ယေဆု ႎီရ်ဒါႈတဂဲ၊ “ပိင်ငျှံပ်မျြံတ်ဒါင်ဇူႈအူ မိူဝ်ႈ၊ ‘အိူဝ် ခြိူဝ်မျိုဣသရေလ၊ ဆတီုင်ဘိူဝ်၊ ကီုရ်ညာဖြာ ဖြာအယ်အီုဝ် မိူဝ်ႈညှိုႈ ကီုရ်ညာဖြာအူဆူ။#၁၂.၂၉ ကီုရ်ညာဖြာ ဖြာအယ်အီုဝ် မိူဝ်ႈညှိုႈ ကီုရ်ညာဖြာအူဆူ၊ က်ုန်ကာမိူဝ်ႈ ကီုရ်ညာဖြာ မိူဝ်ႈဖြာအယ်အီုဝ်၊ ကီုရ်ညာဖြာအူဆူ။ 30လိုရံက် ကီုရ်ညာဖြာ ဖြာမီ၊ ဘ်ုရ်ယိူဝ်နွံရ်ႈဖိူမ်၊ ဘ်ုရ်ယိူဝ်ႎိငျံန်၊ ဘ်ုရ်ယိူဝ်အိုမ်ငျံန်ဂါရ် ဘ်ုရ်ယိူဝ်ရဲင်ဆွံန်မီ။’ 31ပိင်ငျှံပ်မျြံတ်ဒါင်ဇူႈအာရ်ဒီန် မိူဝ်ႈ၊ ‘လိုရံက်ဘူဂါင်ဘူရာပ် ခိူည်မီရံက်တိုဒေ’ ဆဲႈပိင်ငျှံပ် အာရ်ပါအီုဝ် ကာယိူဝ်ယာ့် ပိင်ငျှံပ်ဟံရ် ဒါင်ဒိုရ်အ်ုန်။”
32တာဆရာနံပ်ဘေဲႇကျံမ် ဒါႈတယေဆု၊ “ပ်ုန်ဒါႈမီမိူဝ်ႈအေ့၊ တာဆရာ၊ ထာဝရကီုရ်ညာဖြာအီုဝ် မိူဝ်ႈညှိုႈ ယိူဝ်ဂိူဝ်အ်ုန်အူဆူ၊ ဆဲႈကီုရ်ညာဖြာအီုဝ် ကာယိူဝ်ယာ့်ဖြာဟံရ်။ 33လိုရံက်ဖြာမီ တဘ်ုရ်ယိူဝ်နွံရ်ႈဖိူမ်၊ ဘ်ုရ်ယိူဝ်အိုမ်ငျံန်၊ ဘ်ုရ်ယိူဝ်ရဲင်ဆွံန်ဒေ၊ လိုရံက်ဘူဂါင်ဘူရာပ် ခိူည်မီရံက်တိုဒေ၊ က်ုန်ဒါဇောမ် ပိင်ငျှံပ်အာရ်ပါအီုဝ် မျြံတ်ဒိုရ်လှူအာပ်ကာပ်ဒဲႈ တိုဆံတ်ဂါရ် ယဇ်ပ်ုန်ဟံရ် ပါင်ယဇ်ပလာင် တဖြာ။”
34ယေဆုယိူဝ်ဒေငိူပ် အီကူဒီန် ဒါပိင်ငျာဒေႎီရ်ဂြည်၊ ဘံန်ညာခိူည်ဒီန် အ်ုန်ဒါႈတအ်ုန်၊ “မီကာဆငါည်ယာ့် ဒိုရ်တကပီုန်ကုင်ဖြာ။”
စမံင်အခိင်ဒီန် အဆေမိူဝ်ႈ ကာယာႇဆ်ုရ်မွံတ်ယာ့် ပ်ုန်ဆ်ုရ်မွံတ်လှာည်အူနဲ တယေဆု။
ပ်ုန်ဆ်ုရ်မွံတ် အကျံင်မေရှိယ
(မဿဲ ၂၂.၄၁–၄၆; လုကာ ၂၀.၄၁–၄၄)
35ယာမ်ယေဆု ဆုင်မဆာင်ဆောန်ဒဲႈ တန်ုကျောင်ဗိမာန်၊ အ်ုန်ဆ်ုရ်မွံတ်ဂဲ ပ်ုန်ဆ်ုရ်မွံတ်၊ “ကောပ်ဆေ တာဆရာနံပ်ဘေဲႇကျံမ်ဂဲ နံပ်ဒေဒါႈ မေရှိယ မိူဝ်ႈကွံန်ဒါဝိဒ်အဲႈ။ 36ႎိငျံန်ဆပဲဆောနွံရ်ႈဖိူမ် ဆူတ်ဒါဝိဒ်ဒါႈ၊
“ကီုရ်ညာဖြာ ဒါႈတကီုရ်ညာအော၊
မာ့်မီ လ်ုပ်ခေါန်ညှိုႈအော
မောဂိူပ်ပေါအခိင် အောဂံမ်အူန်ရာန်ဆူမီဂဲ ရခြူမ်ဇိူင်မီ။”
37“ဒါဝိဒ် က်ုန်တောႇ အ်ုန်မိူဝ်ႈ ‘ကီုရ်ညာ၊’ ခိူည်မော ညာဒေပဲန် ကွံန်ဒါဝိဒ်အဲႈ။”
ယေဆုဒဲႈဆဒိ လိုႎဲႈတာဆရာနံပ်ဘေဲႇကျံမ်ဂဲ
(မဿဲ ၂၃.၁–၃၆; လုကာ ၂၀.၄၅–၄၇)
ဖုင်ဘီက်ုရ်စုဒါင်ဂဲ နွံရ်ႈရျံန်ဖိူမ်ပျောဒေ ဆတီုင်ဒိုည်ႇငဲပ်ုန်ဂြည်ယေဆု။ 38အ်ုန်ဆီုပ်ထဲင်ဒေ ဆုင်မဆာင်ဆောန်ဂဲ၊ အ်ုန်ဒါႈ၊ “ပဲလိုအူန်ဆဒိ ႎဲႈတာဆရာနံပ်ဘေဲႇကျံမ်ဂဲအေ့။ ဂဲဆမာ ချူပ်ဒေဒါ ဆဒေါလှိူင် လာ်ႈလာ်ႈႎေင်ႎေင် တအရာပ်တကာတ် ဂဲယိူဝ်ဖိူမ် ဆ်ုန်ဒဲႈဘီရိုဆေကူပ်ယောမ်တဒေ။ 39တန်ုကျောင်ရဆောန်ဒဲႈတရာ ဂဲဆမာအုင်ဒေရံရ်ႈ ရမာ့်ကျ၊ တပ္လေါည်ဟောမ် ပ္လေါည်တျံင်မိူဝ်ႈ ဂဲဆမာအုင်ရဂွည်ကျ။ 40ဂဲဟွည်ႇတိူဝ်ႈဆီမ် ဂါင်ယာကမာည်ဂဲ၊ ဆမာညာရာင် ဆုတောင်လှိူင်လှိူင်။ ဂဲဒီဘ်ုပ်ဒေခါမ် ဂ်ုမ်အပေတ်ဇံန်။”
ရိူန်ပ်ုန်လှူ ယာကမာည်
(လုကာ ၂၁.၁–၄)
41ယာမ်ယေဆု မာ့်ပြောတိူဝ့်ခါမ်ရိူန်လှူ တကျောင်ဗိမာန်၊ အ်ုန်ငိူပ်ပုင်ဇာမ်ဘီဂဲ ဆ်ုရ်ရိူန်လှူတန်ုတိူဝ့်။ ဘီခြ်ုမ်ဆာဂဲဒီန် ဆွံင်လီပ်ဘ္လံမ်။ 42ဟွည်ႇဒီန် ယာကမာည်ဖ္လာန်အူကူ လာ်ႈပေါဒေဆွံင်လီပ် ရိူန်ဒဲင်ဂါအာရ်ပံင် တာန်အူပဲ။ 43အခိင်ဒီန် အ်ုန်တောႇဒေဒါႈတ တဘဲႇဒေဂဲ၊ “အောဂြည်ညှိုႈတပဲ၊ ရိူန်ပ်ုန်ဆွံင်လီပ် ယာကမာည်အီုဝ် ဘ္လံမ်ဒိုရ်ဘ်ုရ်ယိူဝ်အီအ်ုန်ဆွံင်လီပ် တန်ုတိူဝ့်ခါမ်ရိူန်လှူ။” 44“အကျံင်အ်ုန်မိူဝ်ႈ ဂဲဒိုည်ႇဒိုည်ႇအီုဝ် တိူဝ်ႈဒိုရ်န်ုအုဇာခြ်ုမ်ဆာဒေ ဂဲဆွံင်လီပ်။ ကောည်လိုည် က်ုန်မိူဝ်ႈယာကမာည်အီုဝ်၊ အ်ုန်ဘိူည်ဖ္လာန်ဂံတ်၊ အ်ုန်တိူဝ်ႈတန်ုပ်ုန်ဟျံင်အဆာႇဒေ ဆွံင်လီပ်ဒိုည်ႇ။”
Trenutno izabrano:
မာကု 12: SPBT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
The Word for the World International and The Shwe Palaung Bible Translation Reviewer Committee.
