یُوحنّا 1
1
زندگی دا کلام
1ابتدا ءچ کلام ہا تے کلام خُدا دے نال ہا تے کلام خُدا ہا۔ 2اِیہو ابتدا ءچ خُدا دے نال ہا۔ 3سبھ چیزاں اُوندے وسیلے خلق تھیّاں تے جیہڑا کُجھ خلق تھئے، اُنہاں ءچوں کوئی چیز اُوندے بغیر خلق نئیں تھئی۔ 4اُوندے ءچ زندگی ہئی تے او زندگی اِنساناں دا نُور ہئی۔ 5نُور اندھارے ءچ چمکدا ہے تے اندھارا اُوندے اُتے غالب نہ آیا۔
6خُدا ہِک بندے کُوں بھیجیا جِیندا ناں یُوحنّا ہا۔ 7او اِیں واسطے آیا جو او نُور دی گواہی ڈیوے تاں جو سارے اُوندے وسیلہ نال اِیمان گِھن آوݨ۔ 8یُوحنّا خود تاں نُور نہ ہا پر نُور دی گواہی ڈیوݨ آیا ہا۔ 9سچا نُور جیہڑا ہر ہِک اِنسان کُوں روشن کریندے، دُنیا ءچ آوݨ آلا ہا۔
10او#1:10 یعنی یسُوع مسیح، حقیقی نُور تے ابدی کلام، جیندے وسیلے نال سبھ کُجھ خلق تھیّا۔ دُنیا ءچ ہا تے دُنیا اُونکُوں نہ پچھانڑیا بھانویں جو دُنیا اُوندے وسیلے نال پیدا تھئی۔ 11او اُوندے ءچ آیا جیہڑا اُوندا آپنڑا ہا پر اُوندے آپنڑیاں اُونکُوں قبول نہ کیتا، 12پر جِتنیاں اُونکُوں قبول کیتا یعنی جیہڑے اُوندے ناں اُتے اِیمان گِھن آئے ہِن، اُوں اُنہاں کُوں خُدا دے فرزند بنڑݨ دا حق بخشیا۔ 13او نہ خون کنُوں، نہ جِسمانی خواہش کنُوں تے نہ اِنسان دے اِرادے کنُوں بلکہ خُدا کنُوں پیدا تھئے#1:13 کہیں قوم دے نال تعلق رکھنڑ نال اساں خُدا دے لوک نئیں بنڑ سگددے۔ ایہ جِسمانی نئیں بلکہ رُوحانی عمل ہے جیہڑا صرف خُدا کر سگدے۔۔
14کلام جِسم اِختیار کیتا تے ساڈے وچال راہندا ریہا۔ اساں اُوندا جلال ڈِٹھا جیہڑا فضل تے سچائی نال بھریا ہویا ہا، ایجھا جلال جِینویں باپ دے اِکلوتے پوتر دا ہوندے۔
15اُوندے بارے ءچ یُوحنّا گواہی ڈِتی تے اُچی اواز ءچ آکھیا جو ”ایہ اُوہو ہے جیندے حق ءچ مَیں آکھیا ہا جو جیہڑا میڈے بعد آوݨ آلا ہے، او مَیں کنُوں افضل ہے کیوں جو او مَیں کنُوں پہلے موجود ہا۔“
16او فضل کنُوں بھریا ہا تے اساں اُوندے فضل ءچوں فضل اُتے فضل پایا۔ 17کیوں جو شریعت تاں مُوسیٰ دے وسیلے ڈِتی گئی پر فضل تے سچائی یسُوع مسیح دے وسیلے مِلی۔ 18خُدا کُوں کڈھائیں کہیں نئیں ڈِٹھا پر اِکلوتا پوتر جیہڑا باپ دی گود ءچ ہے، اُوں ای اُونکُوں ظاہر کیتا۔
یُوحنّا بپتسمہ ڈیوݨ آلے دی تبلیغ
19تے یُوحنّا دی گواہی ایہ ہے جڈاں یہُودیاں یروشلیم تُوں کاہِن تے لاوی اُوندے کولھ ایہ پُچھنڑ کیتے بھیجے جو ”تُساں کوݨ ہیوے؟“ 20اُوں اِنکار نہ کیتا بلکہ صاف صاف اِقرار کیتا جو ”مَیں تاں المسیح #1:20 مسیح خُدا دا مقرر بادشاہ تے نجات ڈیوݨ آلا ہے۔ نئیں۔“
21اُنہاں یُوحنّا کنُوں پُچھیا، ”وَل تُساں کوݨ ہیوے؟ کیا تُساں ایلیّاہ ہیوے؟“
یُوحنّا جواب ڈِتا، ”مَیں نئیں۔“
”کیا تُساں او نبی ہیوے؟“
یُوحنّا جواب ڈِتا، ”نئیں۔“
22بس اُنہاں پُچھیا، ”وَل تُساں کوݨ ہیوے؟ ساکُوں ڈساؤ، تاں جو اساں آپنڑے بھیجنڑ آلیاں کُوں ڈسا سگوں۔ تُساں آپنڑے حق ءچ کیا آدھے ہیوے؟“
23اُوں آکھیا، ”جِینویں یسعیاہ نبی آکھیا ہے
’مَیں بیابان ءچ ہکل ڈیوݨ آلے دی اواز ہاں جو
رب دی راہ کُوں سِدھا بنڑاؤ#یسعیاہ 40:3۔‘۔“
24فریسی فرقے دے جیہڑے لوک بھیجے گئے ہَن، 25اُنہاں یُوحنّا کنُوں ایہ پُچھیا، ”جے تُساں نہ المسیح ہیوے، نہ ایلیّاہ، نہ او نبی تاں وَل بپتسمہ کیوں ڈیندے ہیوے؟“
26یُوحنّا جواب ءچ اُنہاں کُوں آکھیا جو ”مَیں تاں پانڑی نال بپتسمہ ڈیندا ہاں پر تُہاڈے وچال ہِک بندہ موجود ہے جِینکُوں تُساں نئیں جانڑدے۔ 27او میڈے بعد آوݨ آلا ہے تے مَیں تاں اُوندی جُتی دا تسمہ کھولنڑ دے وی لائق نئیں۔“
28ایہ واقعات یردن دریا دے پار بیت عنیاہ ءچ پیش آئے جِتھاں یُوحنّا بپتسمہ ڈیندا ہا۔
خُدا دا لیلا
29ڈُوجھے ڈینہہ یُوحنّا یسُوع کُوں آپنڑے کولھ آندے ڈیکھ تے آکھیا ”ڈیکھو ایہ خُدا دا لیلا #1:29 یعنی دُنیا دے گُناہاں کُوں مِٹاوݨ کیتے خُدا دی مُہیا کیتی ہوئی قُربانی۔ ہے جیہڑا دُنیا دا گُناہ چا تے گِھن ویندے۔ 30ایہ اُوہو ہے جیندے بارے ءچ مَیں آکھیا ہا جو ’میڈے بعد ہِک بندہ آوݨ آلا ہے جیہڑا مَیں کنُوں افضل ہے اِیں واسطے جو او مَیں کنُوں پہلے ای موجود ہا۔‘ 31مَیں خود تاں اُونکُوں نہ جانڑدا ہم پر مَیں اِیں واسطے پانڑی نال بپتسمہ ڈیندا آیا تاں جو او بنی اِسرائیل اُتے ظاہر تھی ونجے۔“
32وَل یُوحنّا ایہ گواہی ڈِتی جو ”مَیں رُوح القُدس کُوں کبوتر وانگُوں اسمان کنُوں لہندے ڈِٹھے تے او اُوندے اُتے کھڑ گِیا۔ 33مَیں تاں اُونکُوں پچھانڑدا نہ ہم پر جئیں میکُوں پانڑی نال بپتسمہ ڈیوݨ کیتے بھیجیا ہا اُوں میکُوں ڈسایا جو ’جیندے اُتے رُوح القُدس کُوں لہندے تے کھڑ دا ڈیکھیں، اُوہو رُوح القُدس نال بپتسمہ ڈیسی۔‘ 34بس مَیں ڈِٹھے تے گواہی ڈِتی ہے جو ایہ خُدا دا پوتر ہے۔“
یسُوع دا پہلا شاگرد
35ڈُوجھے ڈینہہ یُوحنّا آپنڑے ڈُو شاگرداں نال اُتھاں کھڑا ہا۔ 36اُوں یسُوع کُوں اُتھوں لنگھدا ڈیکھ تے آکھیا ”ڈیکھو! ایہ خُدا دا لیلا ہے۔“
37ایہ گالھ سُنڑ تے اُوندے ڈوہائیں شاگرد یسُوع دے پِچُھوں ٹُر پئے۔ 38یسُوع مُڑ تے اُنہاں کُوں پِچُھوں آندے ڈِٹھا تاں اُنہاں کنُوں پُچھیا، ”تُساں کیا گولھیندے ہیوے؟“
اُنہاں آکھیا، ”ربّی، (یعنی اُستاد) تُساں کِتھاں راہندے ہیوے؟“
39اُوں جواب ڈِتا ”جُلو ڈیکھ گِھنو۔“ بس او نال ٹُر پئے تے او جاہ ڈِٹھی جِتھاں او راہندا ہا تے باقی ڈینہہ اُوندے نال گُزار ڈِتا، ایہ ڈاہویں گھنٹے دے نیڑے دا ویلا ہا۔
40اُنہاں ڈوہائیں ءچوں جیہڑے یُوحنّا دی گالھ سُنڑ تے یسُوع دے پِچُھوں تھی پئے ہَن، ہِک اندریاس ہا جیہڑا شمعون پطرس دا بِھرا ہا۔ 41اندریاس پہلا کم ایہ کیتا جو آپنڑے بِھرا شمعون کُوں گولھ تے اُونکُوں آکھیا جو ”ساکُوں المسیح مِل گِیا ہے۔“ (مسیح دا مطلب خُدا دا چُنڑیا ہویا بادشاہ #1:41 متن ءچ خرِستُس لِکھیا ہے۔ اِیں یُونانی لفظ تے عبرانی لفظ مسیح ڈوہائیں دا مطلب سر اُتے تیل وِیٹ تے بادشاہ تے بچاوݨ آلا تھیوݨ کیتے مقرر کیتا ہویا بندہ ہے۔ ہے۔) 42او اُونکُوں یسُوع دے کولھ گِھن آیا۔
یسُوع اُوندے اُتے نِگاہ کیتی تے آکھیا، ”تُوں یُوحنّا دا پوتر شمعون ہیں۔ ہُنڑ کنُوں تیڈا ناں کیفا ہوسی۔“ (کیفا دا ترجمہ پطرس ہے جِیندا مطلب پتھر #1:42 یُونانی لفظ پطرس تے ارامی لفظ کیفا ڈوہائیں دا مطلب پتھر یا چٹان ہے۔ ہے۔)
یسُوع فِلپُس تے نتن ایل کُوں سڈیندے
43ڈُوجھے ڈینہہ یسُوع گلیل ءچ ونجنڑ دا اِرادہ کیتا تے فِلپُس کُوں آکھیا، ”میڈے پِچُھوں تھی پو۔“
44اندریاس تے پطرس وانگُوں فِلپُس دا وطنی شہر بیت صیدا ہا۔ 45فِلپُس، نتن ایل کُوں مِلیا تاں اُونکُوں آکھنڑ لگا جو ”جِیندا ذِکر مُوسیٰ توریت ءچ تے نبیاں صحائف ءچ کیتے، او ساکُوں مِل گِیا ہے۔ او یُوسف دا پوتر یسُوع ناصری ہے۔“
46نتن ایل پُچھیا، ”کیا ناصرت ءچوں کوئی چنگی چیز نِکل سگدی ہے؟“
فِلپُس آکھیا، ”جُل تے خود ای ڈیکھ گِھن۔“
47یسُوع نتن ایل کُوں آندے ڈِٹھا تاں اُوندے بارے آکھیا، ”ڈیکھو! ایہ اصلی اِسرائیلی ہے، اِیندے ءچ مکر نئیں۔“
48نتن ایل پُچھیا، ”تُساں میکُوں کِینویں جانڑدے ہیوے؟“
یسُوع جواب ڈِتا، ”فِلپُس دے سڈݨ کنُوں پہلے جیہڑے ویلے تُوں ہنجیر دے درخت تلے ہَویں مَیں تیکُوں ڈیکھ گِھدا ہا۔“
49نتن ایل آکھیا، ”ربّی! تُساں خُدا دے پوتر ہیوے۔ تُساں اِسرائیل دے بادشاہ ہیوے۔“
50یسُوع جواب ءچ اُونکُوں آکھیا، ”کیا تُوں ایہ سُنڑ تے جو مَیں تیکُوں ہنجیر دے درخت دے تلے ڈِٹھا ہا، اِیں واسطے اِیمان گِھن آئیں؟ تُوں اِیں کنُوں وی وڈے وڈے کم ڈیکھسیں۔“ 51وَل اُونکُوں آکھیا، ”مَیں تُہاکُوں سچ آدھا ہاں جو تُساں اسمان کُوں کُھلا تے خُدا دے فرشتیاں کُوں اُتے ویندے تے اِبنِ آدم اُتے لہندے ڈیکھسو#پیدائش 28:12۔ دانی ایل 7:13۔#1:51 جِیں ویلے خُدا یعقُوب نال ہم کلام تھیّا تاں یعقُوب فرشتیاں کُوں سیڑھی تُوں چڑھدے تے لہندے ڈِٹھا پر ہُنڑ یسُوع خُدا دے نال رابطے دا ذریعہ ہے۔۔“
Trenutno izabrano:
یُوحنّا 1: SKRV
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Modern Central Saraiki Bible © 2024 Strategic Resource Group
