यूहन्ना 13
13
येशूकी चेलातेबे काम्बा टुबाते
1निस्तार चाड लेपा लेपा खाबा ओतान। था थे खोरोङ दि सा लुङबादुकी आबाते ओत्साने ग्युरला डोच्येते बेला लेपा खासुङ सिन येशूकी छ्या स्येबा ओतान। थेकी थे खोरोङगी ङिङज्ये खाबाते दुरू ओताते थे खोरोङ मिओनला थोई ङिङज्ये खिते सिन तेन्ला तेरा थुपासम्म तेन्गीन बिन्सुङ। 2थे छोमु ग्वासे येशू थे खोरोङ चेलातेबाताङ साप साप्ला स्यूबा ओतान। थेमे शैतानगीचेन येशूला चुक खाला धोका तेरा फाप्कीते सिन शिमोन फुज्युङ यहूदा इस्करियोत सेमगी नाङ लाप्कीन बिन्गीन सिन्दा ओतान। 3जस्तोङ खिता थुप्च्येते शक्ति आबातेकी थे खोरोङला बिन्दा ओत सिन येशूला छ्या ओतान। परमेश्वरगी थे खोरोङला दुरू ताङाते ईन थेमे था थे ओत्सादुराङ ग्युरला डुइन ओत सिनोङ थेला छ्या ओतान। 4थेमे साप सेइन सेइनलाराङ लाकीन थेकी थे खोरोङगी लाक्तु खोन्दाते खोलाक टोल्गीन केतापा तौलिज्यीक च्यिसुङ। 5थेमे नोतज्यीकला छ्यु लुगीन रेरे रेरे खाईन चेलातेबे काम्बा टुला तेरगीन थे खोरोङ केतापा च्यिबाते तौलिकी पिला तेरगीन खिताला स्यूसुङ।
6थोक खिन थे शिमोन पत्रुस दोन्दु लेप्सुङ। थेमे थेकीचेन “आबिई प्रभु, च्यि खुईका ङे काम्बा टुला तेरच्या?” सिन सासुङ। 7थोक सिरजीन थेकी “ङे च्यि खिन दुका सिन खुई थाल्लाराङ मोखोओ। दि बात खुई तिरीकामा छ्या स्येक्यो,” सिन सिदुक। 8थेरूई पत्रुसकी “मेङगो मेङगो, प्रभु खुई ङे काम्बा नोमुङ ठुता मेङगो,” सिन काम्बा ठुत ज्युता मोछोल्जीन थेकी “ङे खुई काम्बा टुकीन माबिन्सीन खो ङात्ताङ डिक्पाराङ मुथुबो,” सिन सिदुक। 9थेमे शिमोन पत्रुसकी “थोक ईन्सीन प्रभु, ङेते काम्बाकामा मेन, लाक्पाताङ गोःङ टुला नाङ,” सिन 10सिरजीन थेकी “ठु खाईन सिन्दाते मिकी खालि काम्बाकामा टुसीन ओङगो। ख्योकोन जीउ ठु खाईन सिन्दाते मि ईन। ईन्सीनोङ ख्योकोन नाङ गाङेराङचेन दोक्ते मेन,” सिन सिदुक। 11तिरी थे खोरोङला सुई धोका तेरगीते सिन लेमु खाला छ्या ओतेकीराङ थेकी “ईन्सीनोङ ख्योकोन नाङ गाङेराङचेन दोक्ते मेन,” सिन साबा ओतान।
12थोक खाईन चेलातेबे काम्बा टुकीन बिन्गीन सिन्नामेकी येशू थे खोरोङते लाक्तु खोन्च्येते खोलाक खोन्गीन च्याकीन थे खोरोङ ठाउँदु गाल्गीन देत्सुङ। थेमे थेकी “थाल्ला ङे ख्योकोनला च्यिला दोक खाईन बिन्दाते ईन्ताका सिन च्यि ख्योकोनगी खोसुङ? 13ख्योकोनगी ङाला खेराङ गुरू थेमे खेराङ मालिक ईन सिन खिदुक। ख्योकोनगी थोक साबाते ठीकराङ ईन। ङा ख्योकोनगी साबा च्योकराङ ईन। 14ङे ख्योकोन मालिक थेमे गुरू ईन्गीनोङ ख्योकोन काम्बा टुकीन बिन्दा ओत। ख्योकोनगीङ खेराङ नाङ दोक खिता फाप्क्यो। 15ख्योकोनगीङ ङे खाबाच्योक खित्स्यीत सिनराङ ङे थाल्ला दोक खाबाते ईन। ङे ख्योकोनला चुक खासुङा ख्योकोनगीङ खेराङ नाङ थोकराङ खि। 16दि बात ङेन। च्यि सासीन सुइँदे काम खित्कान्ते मि मालिकते भन्दा छ्ये मेन। थोकराङ खाला लोन केल डोकान्ते मिङ थे लोन तोङकान्ते भन्दा छ्ये मेन। 17दि बात ख्योकोनगी छ्या स्येबा ओत। खेराङगी छ्या स्येबा ओताच्योक खाईन कामोङ खासीन परमेश्वरगी ख्योकोनला आशी तेरग्यो।
येशूकी थे खोरोङला धोका तेरकान्ते बात खाबाते
(मत्ती २६:२०-२५; मर्कूस १४:१७-२१; लूका २०:२१-२३)
18दि बात ङे थाल्ला ख्योकोन गाङेला साबाते मेन। ङा ङाराङगी छाने खाबाते गाङेला छ्या स्येक्यो। परमेश्वर बातला ‘ङात्ताङ ङ्योम्बु देत्ला सोला थुला खित्कान्ते मिराङ ङे शत्रु ओङगो,’ सिन टिबा ओत।#भजन ४१:९ दि बात साबा च्योकराङ ओङगो। 19था थोक ओङजीन ख्योकोनगी ङाला परमेश्वरगीराङ ताङाते दुका सिन छ्या स्येस्यीत सिनराङ थोक ओङा भन्दा गोमाराङ ङे ख्योकोनला साबाते ईन। 20दि बात ङेन। ङे ताङाते मि जो ईन्सीनोङ थेला लेमु खित्कान्ते मिकी ङालाराङ मान खाबाते ईन। ङाला मान खित्कान्तेकीचेन ङाला दुरू तोङकान्तेलाङ मान खाबाते ईन,” सिन बात खासुङ।
21दि बात खाईन सिन्नामेई थेला आउदी मेलेबा लाबा ओतान। थेमे थेकी “दि बात ङेन। ख्योकोन नाङ दोक्पोईकी था ङाला धोका तेरग्यो,” सिन सिदुक। 22थोक सानामेई खोपरोङ नाङ थोक खित्कान्ते खाङ ईन्ताका सिन छक्क परे खिन चेलातेबा छ्येत छ्येत ताप्ला स्यूसुङ। 23थे खोरोङ चेलातेबे नाङ थेते ङिङज्येते चेला येशू ठाङनापाला ङेकीन देता ओतान। 24थेमे शिमोन पत्रुसकी गुरूला थोक खित्कान्ते खाङ ईन्दे सिन ठिना सिन थेला मिगी चाल खासुङ। 25पत्रुसकी थोक खानामेई थेकी थे ठाङनापा ङे ङेबालाराङ “प्रभु, खोल्ला थोक खित्कान्ते सु ईन्दे?” सिन ठिसुङ। 26थेमे थेकी “लो दि स्योबेन टुक्रा छाप्टोला पाला ङे जसला तेरगीदुक ङाला धोका तेरकान्ते मिचेन होथेराङ ईन,” सिन सिदुक। थेरूई थेकी स्योबेन टुक्राज्यीक छाप्टोला पाकीन च्याकीन शिमोन इस्करियोत फुज्युङ यहूदा इस्करियोतला बिन्सुङ। 27यहूदा इस्करियोतकी थे स्योबेन टुक्रा लिन्दाज्यीकताङ शैतान थे सेमगी नाङ स्यूसुङ। थेमे येशूकी थेला “खोरोङगी च्यि खिता फाप्च्या ओते थे होत्ता खि,” सिन सासुङ। 28थेकी यहूदाला च्यि खि साताका सिन थेरू साप साप्ला देतातेबा सुङगीङ छ्याःङ माखोसुङ। 29थेबा गाङे पैसा यहूदेकीराङ ज्य्वाकीन ओतान। थोगी चेलातेबा कोईकीचेन थेकी यहूदाला थोक साबाते चाड माने खिताला च्यि च्यि गोकीते ङ्यो साबाते ईन्दा, ना दुक्पा ङेताते मिओनला खइँदा बिन साबाते ईन्दा सिन विचार खासुङ। 30थे स्योबेन टुक्रा लिन्दाज्यीकताङ यहूदा खोक लाकीन फिनामा थेन्गीन गाल्सुङ। थे बेलाला मुन्दाक गाल्गीन सिन्दा ओतान।
येशूकी ङिङज्ये खितरीङ खि साबाते
31यहूदा थोक खाईन थेन्गीन गाल्नामेकीचेन येशूकी “थाचेन परमेश्वर ओत्सादुई वाबाते मि ङा चुक छ्ये ईन्दे सिन ख्योकोनगी थोङा ङेत्क्यो। थेमे ङे खित्सादु ख्योकोनगी परमेश्वर चुक छ्ये ईन्दाका सिन छ्या स्येक्यो। 32ङे परमेश्वर चुक छ्ये ईन्दे सिन छ्या स्ये च्युत्नामेई परमेश्वरगीङ थे खोरोङ फुज्युङला चुक छ्येज्यीक मान बिन्दा ओते सिन तेन्ला तेरग्यो। दि काम परमेश्वरगी था होत्ता खिओ। 33ङे फिजावे, था ङा काल्बासाक ख्योकोनताङ मेदेदो। थेजीन ख्योकोनगी ङाला छोल्ग्यो। ईन्सीनोङ थोङला यहूदीओनते छ्ये छ्ये मिला साबा च्योकराङ खाला थाल्ला ङा ख्योकोनलाङ च्यि सिते सासीन ‘ङा डोसादु ख्योकोन ओङा मुथुबो।’ 34था ङा ख्योकोनला दोक खि सिन कोत्क्यो। च्यि सासीन ख्योकोन खेराङ नाङ ङिङज्ये खितरीङ खि। ङे ख्योकोनला ङिङज्ये खाबा च्योकराङ खाला ख्योकोनबरीकीङ खेराङ नाङ ङिङज्ये खि। 35दोक खाईन ख्योकोनगी खेराङ नाङ ङिङज्ये खितरीङ खासीन ख्योकोन ङे चेला दुका सिन मि गाङेकी छ्या स्येक्यो,” सिन सासुङ।
येशूकी पत्रुसकी थे खोरोङला चुक खिते सिन साबाते
(मत्ती २६:३१-३५; मर्कूस १४:२७-३१; लूका २२:३१-३४)
36येशूकी थोक सानामेई शिमोन पत्रुसकी “प्रभु, खो खापा डोच्ये?” सिन ठिसुङ। थेमे थेकी “ङा डोसादु खो थरिङ ङात्ताङराङ ड्वा मुथुबो। ईन्सीनोङ खो तिरी ङीमाई थेरू लेप्क्यो,” सिन सिदुक। 37थोक सिरजीन पत्रुसकी “प्रभु, खो डोसादु ङा थरिङराङ च्यिला खुई तिङ ङ्याला ड्वा मुथुप्ते? खुई लाईदु ङा ङाराङ ज्यानराङ तेरग्यो,” सिन सिदुक। 38थेमे येशूकी “च्यि खुई ङे लाईदु खोरोङ ज्यान तेरग्यो साबाप? दि बात ङेन। था ङोमु पाखे छ्योबो फोत फोतसाकला पालो सुम खुई ज्येन मि दोन्दु ङाला ङोराङ मेस्येओ सिन सिओ,” सिन सिदुक।
Trenutno izabrano:
यूहन्ना 13: JUL
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1992 Wycliffe Bible Translators Inc. All rights reserved.
