यूहन्ना 1
1
थे बात सिराते देमा वाबाते बात
1दि सा नाम ज्वा भन्दा गोमाराङ थे बात सिराते ओतान। थे परमेश्वरताङ ङ्योम्बुराङ ओतान। थेमे थेचेन थे खोरोङराङ परमेश्वरोङ ईन। 2थेचेन च्याक थाङबो जुगनामेईराङ परमेश्वरताङ ङ्योम्बु ओतान। 3दि सा नाम थेमे सा नाम खाङ ओताते जति गाङे परमेश्वरगी थे बात सिराते छ्य्वापेकीराङ जोबा ओतान। दोक खाईन जोबातेबे नाङ थे बात सिराते छ्य्वापेकी मेन्दालाचेन छ्याःङज्यीक खाङज्यीगोङ थाराङ ठुङा मेतान। 4मिओनला नोमुङ मिसिन्च्येते जुनी तेरकान्तेङ थे बात सिरातेराङ ईन। बत्ती पारनामेकी नाम्दाक गाल्ला लेमु खाला थोङा च्योकराङ खाला होदि जुनी तेरकान्तेचेन मिओन लाईदु स्वर्गे नाम्दाक ओङसुङ। 5थे स्वर्गे नाम्दाक सिराते दि पापताङ लोभकी खाङाते सा लुङबे मिओन नाङ नाम्दाक ओङगीन वादुक। नाम्दाकला मुन्दाककी ग्याला माथुपा च्योकराङ खाईन थे स्वर्गे नाम्दाकलाङ दि सा लुङबे मेलेबाते कामताङ बात छ्याःङ कुरोकीङ ग्याला माथुप्सुङ।
6थेमे परमेश्वरगी यूहन्ना सिराते मिला मिओन नाङ ताङसुङ। 7वाकीन यूहन्नेकीचेन थे नाम्दाक सिराते सु ईन्दे, थेकी च्यि खिते सिन मिओनला लाप्सुङ। थेकी लापाते बात थोला थे नाम्दाक सिरातेला मि गाङेकी विश्वास खित्स्यीत सिनराङ परमेश्वरगी यूहन्नाला ताङा ओतान। 8यूहन्ना खोरोङ थे नाम्दाक मेन्दा ईन्सीनोङ थे नाम्दाक सिराते सु ईन्दे, थेकी च्यि खिते सिन सिराला वाबा ओतान।
9थे नाम्दाक सिराते पक्काराङ स्वर्गनेकी वाबाते ईन। थेमे दि सा लुङबे मि नाङ वाला गाङेला नाम्दाक तेरकान्ते थेराङ ईन। 10थे छ्य्वापेकीराङ परमेश्वरगी दि सा लुङबा जोबा ओतान। दोक खाईन थे खोरोङ छ्य्वापेई जोबाते दि सा लुङबादुराङ ओङजीनोङ थे सु ईन्दे सिन दि सा लुङबे मिओनगी छ्या मास्येसुङ। 11दाक्पोन लुङबाताङ मि नाङ देताला ओङजीन दाक्पोन मिओनगीराङ दिङ सु ईन्देरो सिराच्योक खाईन थेला वास्ता माक्यासुङ। 12दोक ईन्सीनोङ थे वादुक सिन मान खिन थेला विश्वास खित्कान्ते मिओनलाचेन थेकी परमेश्वर फुज्युङ फुमु ओङच्येते अधिकार बिन्सुङ। 13परमेश्वर फुज्युङ फुमु ओङच्येते साबाते ख्यावा फेम्मे ङ्योम्बु ङ्याल्गीन केबाते फिजा च्योक मेन। परमेश्वरगीराङ थेबाला साम्बाते जुनी बिन्ला थे खोरोङ फुज्युङ फुमु जोच्येते ईन्देकी दिचेन आमे कोखदु ठुङाते फिजा केबा च्योक्तेङ मेन।
14थे बात सिरातेचेन मि जुनी लाकीन केकीन ङ्योकोनताङराङ देता ओतान। थोक खाला ङ्योम्बुराङ देत्जीन परमेश्वर आउदी खाला दया खित्कान्ते ईन, थे सत्यते ईन सिन थेकी ङ्योकोनला लेमु खाईन तेन्गीन बिन्दा ओतान। थेला आबातेकी देमा ताङा ओतान। थेते दोक्पोईकामा ओताते फुज्युङ ईन्देकी थेत्ताङ छ्येज्यीक शक्ति ओताते ङ्योकोनगी थोङा ङेत्सुङ।
15यूहन्नेकी परमेश्वर फुज्युङ सु ईन्दे सिन मिओनला लाप्कीन बिन्सुङ। थेकी मि गाङे दोन्दु थेला छ्या स्येबा खाला तेरगीन “ङे ख्योकोनला गोमामेई ‘था ङे तिरी मिज्यीक ओङगो, थेचेन ङा भन्दा छ्येते ईन। थेनी ङा क्या भन्दाङ गोमामेई ओत्कीन ओतान,’ सिन साबाते मिचेन दिराङ ईन,” सिन बात खासुङ। 16परमेश्वर फुज्युङचेन आउदी दया खित्कान्ते ईन्देकी ङुरूङ गाङेकी आशी ङेता ओत। ङीमाईकामा मेन्देकी थेकी ङुरूङला दया खाला आशी तेरगीनराङ देत्क्यो। 17परमेश्वरगी थे खोरोङ नियम मिओनला मोशे लाःक्तुकी बिन्दा ओतान। थे खोरोङ दया खित्कान्ते थेमे सत्यते ईन सिनचेन येशू ख्रीष्ट छ्य्वापेई तेन्गीन बिन्सुङ। 18परमेश्वर दोकस्यिकराङ दुक सिन सुङगीङ नोमुङ थोङा मेत। आबातेताङ ङ्योम्बुराङ देताते दोक्पोईकामा ओताते थे खोरोङ फुज्युङगीकामा परमेश्वर सु ईन्दे, चुक्ते ईन्दे सिन ङुरूङला छ्या स्ये च्युत्कीन बिन्दा ओत।
बप्तिस्मा तेरकान्ते यूहन्नेकी खाबाते बात
(मत्ती ३:१-१२; मर्कूस १:१-८; लूका ३:१-१८)
19यूहन्नाला थे सु ईन्दे सिन ठिला स्योक सिन यहूदीओनते छ्ये छ्ये मिकी यरूशलेमदुई पूजारीओनताङ लेवी थरगी मिओनला ताङसुङ। थेमे थेबेकी यूहन्ना ओत्सादु लेप्कीन थेला “खो सु ईन्दे?” सिन ठिसुङ। 20थेमे यूहन्नेकी बातज्यीगोङ मोबोङा खाईन थेबाला गाङे बात लाःप्सुङ। थेकी थेबाला “परमेश्वरगी तोङगो साबाते ख्रीष्टचेन ङा मेन,” सिन सिदुक। 21थेमे थे मिओनगी “थोक सासीन खो सु ईन्दे ओना? ना खो एलिया ईन्दे?” सिन ठिसुङ। थोक सिरजीन थेकी “अहँ, मेन,” सिन सिदुक। लोईन थेबेकी “थोक ईन्सीन ना खो दुरू ओङगो साबाते परमेश्वर बात खित्कान्ते ईन्दे ओना?” सिन ठिसुङ। थोक सिरजीनोङ थेकीचेन “मेन मेन, ङा थेङ मेन,” सिन सासुङ। 22याङराङोङ थेबेकी “ङ्योकोनला साँचोते बात लोःपना ओना, खो सु ईन्दे। था ङ्योकोनगी दि बात ठिर तोङकान्ते मिओनला खो सु ईन्दाका सिन लाःपा फाप्क्यो। खो खोरोङला सु ईन सिते ओना?” सिन ठिसुङ। 23थेमे थेकी “परमेश्वर बात खित्कान्ते यशैयेकी ‘रीला मिज्यीगी छेरा खिनकामा मिवे, था प्रभु परमेश्वर ओङे बेला लेप्सुङ सिन थे ख्याम्बाला लाम सम्म जो सिन सिरकान्ते मिज्यीक ओङगो,’ सिन साबा ओतानना, ङाचेन होथेराङ ईन,” सिन सासुङ।#यशैया ४०:३
24यूहन्नाला बात ठाप्ला थेबाला फरिसी पाटी मिओनगी ताङा ओतान। 25थे मिओनगी याङराङ थेला “खोचेन परमेश्वरगी तोङगो साबाते ख्रीष्टोङ मेन खिदुक, एलियाङ मेनलो। ना परमेश्वर बात खित्कान्ते मि मेनलो। थोक ईन्सीन खो च्यिला मिओनला बप्तिस्मा तेरगीते ओना?” सिन ठिसुङ। 26थोक खाला ठिइनराङ देत्जीन थेकी “ङानी मिओनला खालि छ्युलाकामा लुक्ला बप्तिस्मा तेरग्यो। तर ख्योकोन नाङ ख्योकोनगी थे सु ईन्दे सिन ङो स्येबा मेताते मिज्यीक ओत। 27थे ङा भन्दा तिरी वाबाते ईन्सीनोङ ङानी थेते योक्पो ओङला थे काचाप टोल्ला तेरालाङ सोई मिक्किओ,” सिन सिदुक। 28दि बाततेबाचेन यूहन्नेकी यर्दन चाङबो फारकेनपा बेथानी सिरसादु खाबा ओतान। थेजीन थे थेरूराङ मिओनला बप्तिस्मा तेरगीन ओतान।
परमेश्वरगी मि लाईदु बिन्दाते लुई रीउ बात
29ङारो च्योक्ते येशूला थे खोरोङ ओत्सापा ओङगीन ओता थोङगीन यूहन्नेकी मिओनला “लो तो, परमेश्वरगी मि लाईदु बिन्दाते लुई रीउ उथेराङ ईन। सा लुङबा खाङगी मिओनगी खाबाते पापकी सजाय भोगे खाला मिओनला पापदुकी डेल्कान्तेचेन थेराङ ईन। 30ङे ख्योकोनला गोमामेई ‘ङा भन्दा तिरी मिज्यीक ओङगो, थेचेन ङा भन्दा छ्येते ईन। थेनी ङा क्या भन्दाङ गोमामेई ओत्कीन ओतान,’ साबा ओतानना, थेचेन उथेराङ ईन। 31ईन्दानी थे सु ईन्दे सिन ङाराङलाङ छ्या मेतान। थे सु ईन्दे सिन इस्राएलीओनगी छ्या स्येस्यीत सिनराङ ङे मिओनला छ्युला लुक्ला बप्तिस्मा तेरच्येते काम खाबाते ईन,” सिन सिदुक।
32थोरूमोङ बात खिन थेकी “ङेचेन स्वर्गनेकी परमेश्वर आत्मा गन्दीमा च्य्वाबेई गाल्गीन वाकीन थे लाक फाप्कीन थेत्ताङराङ देता थोङसुङ। 33मिओनला छ्युला लुक्ला बप्तिस्मा बिन सिरकान्ते परमेश्वरगी ङाला गोमाकाराङ ‘खुई ङे आत्मा वाला मिज्यीक लाक फाप्ला थेत्ताङ देता थोङगो। मिओनला परमेश्वर आत्मेकी बप्तिस्मा तेरकान्तेचेन थेराङ ईन सिन छ्या स्येबा खि,’ सिन साबा ओतेकीराङ ङे थेला छ्या स्येबाते ईन। 34थोक खाईन ङाराङला गोमाका साबाच्योक ओङा थोङेकी परमेश्वर फुज्युङचेन दिराङ ईन सिन ङा ख्योकोनला ठोके खाला सिओ,” सिन सासुङ।
येशूते गाङे भन्दा गोमे चेलाओन
35ङारो च्योक्तेङ यूहन्ना थे खोरोङ चेलातेबा मेन्दा ङिताङ थे ठाउँदुराङ ओतान। 36थेमे येशू थे खोरोङ दोन्नापेईराङ खाईन ड्वा थोङगीन थेकी “लो तो, परमेश्वरगी मि लाईदु बिन्दाते लुई रीउचेन दिराङ ईन,” सिन सिदुक। 37थेकी थोक सानामेई थे चेलातेबा ङिकाराङ येशू तिङ ङ्योगीन गाल्सुङ। 38ल्हाकनापा ग्युरला ताजीन येशूकी थेबा ङिबो तिङ ङ्योगीन वाबा थोङगीन “ख्योकोनगी च्यि चाले?” सिन ठिसुङ। 39थोक सिरजीन थेबेकी “रब्बी, खो खापा देत्कीते सिन ठाप साबाप,” सिन सिदुक। रब्बी साबातेचेन गुरू साबाते ईन। थेमे थेकी “लो स्योकना ओना, तार डुइ,” सिन थेबाला ङ्योम्बुराङ खेरसुङ। गाल्गीन ताकीन थेबेकी थे खापा देत्च्या ईन्दाका सिन छ्या स्येसुङ। थेमे थे छोमु थेबा ङिबोङ थेरूराङ देत्सुङ। थेजीन ग्वासे चार बजे खिता खाबा ओतान।
40यूहन्नेकी येशू सु ईन्दे सिन सानामेई येशू तिङ ङ्याकीन गालाते मि ङिबो नाङ दोक्पोईचेन शिमोन पत्रुस आज्यो अन्द्रियास ओतान। 41थेकी होत्ताराङ थे खोरोङ न्वाते शिमोनला ठेता खाईन “शिमोन, ङ्योकोनगी परमेश्वरगी तोङगो साबाते मसीहला ठेत्सुङ,” सिन लाःप्सुङ। मसीह साबातेचेन ख्रीष्ट साबाते ईन। 42थेमे थेकी न्वातेलाङ येशू ओत्सादु टीकीन खेरसुङ। थेबा थेपा लेप्नामेई येशूकी शिमोनताङ बात खिन “खोचेन योआनेस फुज्युङ शिमोन ईन। थरिङमेई खुई मिन केफास ईन,” सिन सिदुक। केफास साबाते पत्रुस साबाते ईन। पत्रुस अर्थचेन दो ईन।
येशूकी फिलिपताङ नथानेलला बात खाबाते
43दि ङारो च्योक्ते येशूकी गालील अञ्चलपा डोच्ये टुङ्गो खासुङ। थेमे फिलिपला ठेत्कीन थेकी “ए फिलिप, खो देपा स्योक, ङात्ताङ ख्योम,” सिन सिदुक। 44अन्द्रियासताङ पत्रुस च्योकराङ फिलिपोङ बेथसेदा सारगी मिराङ ओतान। 45थेमे फिलिपकीङ नथानेलला ठेता खाईन “मोशेकी टिबाते परमेश्वर नियमला तिरी इस्राएलीओन नाङ मिज्यीक ओङगो सिन साबा ओतान। थेमे परमेश्वर बात खित्कान्ते ज्येन ज्येनगीङ थे ओङगो सिन टिबा ओतानना, थेबेकी साबाते होथे मिला ङ्योकोनगी ठेत्सुङ। थेचेन नासरतपे यूसुफ फुज्युङ येशू ईन,” सिन सिदुक। 46थेकी थोक सिरजीन नथानेलगी “नासरतपेई लो? नासरतदुङ च्यि लेमु ओङगीतेरो?” सिन सिदुक। थोक सिरजीन फिलिपकी “पत्ते मिक्किसीन खो गाल्ला तोते ओना च्यिन्दाका,” सिन सिदुक।
47नथानेलला थे खोरोङ ओत्सापा ओङा थोङगीन येशूकी “लो तो, दिचेन लेमुते इस्राएली ईन। दि सेमगी नाङ मेलेबा सिराते छ्याःङ मिन्दुक,” सिन सासुङ। 48थेकी थोक साबा थोकीन नथानेलगी “ङा चुक्ते मि ईन्दाका सिन खुई चुक खाईन छ्या स्येसुङा?” सिन ठिसुङ। थेमे येशूकी “फिलिपकी देपा टीला खुलाङा भन्दा गोमा खो नेभारे दोङबो चावादु ओते बेलालाराङ ङे खोल्ला थोङाप,” सिन सिदुक। 49थेमे नथानेलगी “गुरू, खोनी परमेश्वर फुज्युङराङ ईन, खो इस्राएलीओनला राज्य खिताला ओङगो साबाते गेल्बो ईन,” सिन सिदुक। 50थेकी थोक सिरजीन येशूकी “खोल्ला ङे नेभारे दोङबो चावादु थोङाप सिरजीनराङ खुई ङाला विश्वास खासुङ। खुई था झन आउदी अचम्बतेन्दे काम थोङा ङेत्क्यो,” सिन सिदुक। 51याङराङ येशूकी “दि बात ङेन। च्यि सासीन स्वर्गे गो फेत्कीन सिन्दा ओत। था थेनेकी परमेश्वर दूतओन परमेश्वर ओत्सादुई वाबाते मि ङा ओत्सामा ओङगीन डुइन खाबाते ख्योकोनगी खेराङ मिगीराङ थोङगो,” सिन सिदुक।
Trenutno izabrano:
यूहन्ना 1: JUL
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1992 Wycliffe Bible Translators Inc. All rights reserved.
