Yoane 20
20
Ebuhuna ono Yesu
Mt 28:1-10; Mk 16:1-8; Lk 24:1-12
1Oloŋ etteri ono esabit hara amotye hanyik beryen bwo fe heryok ottu Maria Madalena ilume ette nyurana amorwo itaboroni to hutuk ilume addi. 2Oŋeru inyi jyo Simone Petro iko jyo obo leyiyanani ol omuno Yesu ette jaran, Iyarai omuk laati Hobu t’elume bwo ebeŋ hohoi emijak ifihani isi inyi aja. 3Attati Petro iko leyiyanani abotye itteryo adaha ifwarri ilume. 4Oŋeri isi daŋ bwo leyiyanani abotye irwat Petro ette fanyan ilume ahosyere. 5Irrafa inyi ifau ette iluŋur ette igonyuna aboŋojin abubunita Yesu arasai imaji hosi. Ati obeŋ inyi ojiŋa itwa. 6Attati Petro ’tuna al ijifuno ette leten itwa ilume attati inyi mijo aboŋojin abubunita ihwa awoni isi. 7Bwo aboŋo abubuni hou obeŋ owon iko huno ahwan ati obubuna ta ahwan honyi hama imaji honyi. 8Bwo fe leyiyanani ebotye odwo afany’to ilume ahosyere ette jiŋana itwa ette igonyuna bwo fe ette iruk. 9Nyo obeŋi nya isi omijani jo ibuhu adi Yesu to ye ihwa igyoroni. 10Attati leyiyanak caharu imiji hosi.
Oleyo Yesu Jyo Maria
Mk 16:9-11
11Ati owotya Maria tottolet ilume on oyyo. Harasa inyi iyyo irrafa inyi ifau ette luŋur atwa lume. 12Ette igonyuna anjelohyen arrihai hul obwori aboŋojin. Itoŋo obo imaji hou bwo obo imaji hejek jyo odwo maji itaferehinierek Yesu. 13Ette isi jaran jihonyi, ?Ŋotte, anyo iyyo iye? Itarraŋ inyi, Iyarai omuk laati Hobu hoŋ addi bwo abeŋ ni amijak ifihani isi inyi aja. 14Hekyana inyi huna oyito inyi orwaŋai ette igonyuna Yesu owotya dia. Ati obeŋ inyi omijak jo Yesu alya. 15Ojo Yesu jihonyi, ?Hanioŋ, anyo iyyo iye? ?Ŋai al ittifya iye? Ati igigilo inyi ojo errirryani ginana adi alya ette jaran jihonyi, Leittok, kuyya dwo al iyaro iye inyi addi iramak jihoŋ amaji an ifihaniere iye inyi. Eyaro adi ni inyi addi ta ahwan hoŋ. 16Ojo Yesu jihonyi, Maria. Oyito inyi jihonyi ette iloŋo ojo, Raboni, on ojo Hettiyanani te ekyana Ebrei. 17Ojo Yesu, Henefatyo ani nyo habeŋ ni do adok jyo Monyoŋ. Ilo jyo illarak hoŋ ijara jihosi adok ni jyo Monyoŋ iko Monye hatai bwo fe jyo Hollum hoŋ iko Hollum hatai. 18Ette Maria Madalena leten jyo leyiyanak iramaniere asayyo ojo, Egonyu dwo ni Hobu bwo fe ojo inyi erre huna jihoŋ.
Aleyo Yesu Jyo Leyiyanak Honyi
Mt 28:16-20; Mk 16:14-18; Lk 24:36-49
19To oloŋ tania to otoryai, oloŋ etteri ono esabit, ihyanai dwadi bu ekatin haji jyo amaji on ottubarik leyiyanak ta abaŋi Yudea. Ottu Yesu ette wotya ihiji hosi ette jaran, Ijara elik tajya hatawana jihatai. 20Hekyana inyi huna itahutak inyi isi ahas iko amari honyi. Ette leyiyanak muno bebe nyo igonyuni isi Hobu. 21Inyyak Yesu ikyana jihosi ojo, Ijara elik tajya hatawana jihatai. Ihwa ifahu nya Monyoŋ ani, efak bwo fe ni itai. 22Ihalu ikyana inyi ana ette yirihina jihosi ette jaran, Ifwotuna Oloyiri ol Olibo. 23Al ihohina tai eyyata huno obo atulo ohohinie isi ahode ati hul ibyaŋata tai ihohina arasai eyyata hosi.
Abyaŋan Tomaso Iruk
24Ati obeŋ nya bu nyi Tomaso obo olo ’tomon harrihai ol iloŋoi aturoti owon ikosi to ninya ottuniere Yesu. 25Ati odulori leyiyanak iramyo inyi ojori, Egonyu dwo hohoi Hobu. Ette inyi iramana isi ojo, Al abeŋ ni egonyu ettuliti gusamari ihas honyi bwo fe abeŋ ni elutok afyala hoŋ ittuliti gusamari bwo fe aani hoŋ imari honyi abeŋ ni eruk.
26Ihalu oŋitek hottohunik inyyahi leyiyanak wanan itwa haji iko Tomaso daŋ. Ihyanai ekatin daŋ ati ottu Yesu ette wotya ihiji hosi ette jaran, Ijara nelik tajya hatawana jihatai. 27Bwo jyo Tomaso ojo inyi, Ihalamak aani hoi dini, imija ahas hoŋ, bwo ilutok aani hoi dini imari hoŋ. Hera aheharani hiram, ira ati aheruhoni. 28Ati itarraŋ Tomaso jihonyi ojo, Hobu hoŋ iko Hollum hoŋ. 29Ojo Yesu jihonyi, ?Iruk iye nyo igonyu iye ani? Hotomunohi hul obeŋi’to igonyuni ani ati iruhi.
Etahutana Awoyo Hiram ono Abuk
30Ihanio nya Yesu etamijanita arryai hun igonyuni leyiyanak honyi ati obeŋi ihwania igyoroni jyo abuk ana. 31Ati igyoroni huna oŋida itai iruhoto jo ara Yesu a Kristo Lonyi Hollum, bwo fe ta neruk jihonyi iwatta tai iko nesu ta afure honyi.
Trenutno izabrano:
Yoane 20: LOT1969
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
This text was originally published by the British and Foreign Bible Society in 1969.
