Ehanita 8
8
1Tania iruk Saulo hotottohorohi inyi.
Ettigemyo Saulo Eklesya
To oloŋ ania itteryo ettigemyo on obolo jyo eklesya imiji Yerusalem bwo itisarrahini eruhok daŋ ifau Yudea iko Samaria, arari lefahat hama. 2Omuk hulo eruhok iyarai Setefano inuhaniere ette isi ihanana atwari tenyi. 3Ati itattur Saulo eklesya. Ojiŋak inyi asik daŋ bwo ipihuta alyawa iko aŋorwo ihanata ibabus.
Ettiyenio Sayyo hun Oyiji Samaria
4Attati hul itisarrari ittittoyo ekyana ono Hollum. 5Alo nya Filipo limiji obo ono Samaria ette ittittoyo jihosi eram Kristo. 6Bwo eluluŋ wati ette fwanna arabotye jyo Filipo. Itaniŋuni isi ekyanita honyi bwo fe igonyuni isi etamijanita hun ihanio inyi. 7Ta nelulwo, ofuhorutai nya ajohin hun orrohoji’to addi jyo laati hul isitaji’to, bwo hul ogolyori hwattek iko aŋurak ette ŋidari. 8Tania owon nya amuno on obolo jyo amiji ania.
9Ati owon obo atulo dia afure honyi Simone al ara ahebwanani bwo odemyo inyi, attati laati illilliha bwo ojori jo ara inyi atulo eleittok. 10Bwo fe iruhi isi jihonyi jo, Atulo olo, ara inyi ol odwara olo Hollum. 11Iruhi isi inyi nyo igonyuni isi amuroyo honyi many beryen. 12Ati al itaniŋuni isi Filipo ittittoyo asayyo hun oyiji huno olobye Hollum iko ta afure Yesu, iruhi isi ette ifwotuna batisimo, alyawa iko aŋorwo daŋ. 13Attati Simone bwo fe iruk ette ifwotuna batisimo bwo adahai inyi iko Filipo igonyuniere etamijanita iko edwariti hun ihanio inyi. Ette inyi illilliha bebe.
14Ninya litaniŋuni lefahat hutto Yerusalem jo ifwotuni laati Samaria ekyanita huno Hollum ette isi ifahina Petro iko Yoane dia. 15Lafanyi isi dia ette isi mojo ta aati, oŋida ifwotuni Oloyiri ol Olibo. 16Nyo hobeŋ nya inyi ottu jihosi, ati ibatisye nya isi ta afure ono Hobu Yesu. 17Tania iyyabani isi ahas hosi jyo laati itifwotuniere isi Oloyiri ol Olibo. 18Ninya ligonyu Simone jo isyori Oloyiri te eyyabana lefahat ahas hosi, awak inyi inyyaŋa adwaran jihosi ta agurusi, 19bwo ojo inyi jihosi, Isyatta bwo fe ani adwaran ana oŋida bwo fe lya el eyyabak ni ahas hoŋ jihonyi ifwotu Oloyiri ol Olibo. 20Ati ojo Petro jihonyi, Olitohina iko agurusi hoi ihima on osyo fur, nyo igigilo iye inyyaŋari esyoryo ono Hollum ta agurusi. 21Obeŋ amaji jihoi dini te egyama ana nyo orroho ataji hoi to hosyere Hollum. 22Iloito ataji hoi to ’rohoji bwo omojoi jyo Hollum ibusaniere ewahiti hoi hun orrohoji’to hunia. 23Nyo egonyu ni ahaini otto taji hoi bwo ifitani eyyata hoi ihwania iye. 24Itarraŋ Simone ojo, Omojoi jyo Hobu toni jo hetebyaŋahi erre hun ikyana iye hunia idwoŋi jihoŋ.
25Ihwania ninya latuhoni Petro iko Yoane iramana neram Hollum iko netamijanita hosi, acaharai isi Yerusalem bwo ittittoye asayyo hun oyiji’to jyo aati hutto misihi omuk daŋ huno Samaria.
Filipo iko Abasetanani
26Ati ojo anjelo olo Hollum jyo Filipo, Otte, ilo te ekoi otto hani iŋet, inyi ekoi on ottu’to to Yerusalem many Gasa. Owon ekoi ania litwa mur. 27Odyoto Filipo ette leten. Ihwania owon obo atulo olo Abasa, egyamani olo Kandase nobu an ara Abasetanani. Ara inyi aherrirryani gurusi daŋ. Ottu nya inyi Yerusalem imojori. 28Attati inyi caharu. Ninya hetoŋo inyi litoromile honyi, ihenio nya inyi ekyana ono Hollum ninya igyorok eyani sayyo Isaya. 29Ojo Oloyiri jyo Filipo, Ilo, adak jyo atoromile ania. 30Oŋer Filipo jihonyi bwo itaniŋu inyi lya ihenio ekyanita huno eyani sayyo Isaya. Ette ifiyo inyi jo, ?Itaniŋu iye ekyanita hun ihenio iye hunia? 31Itarraŋ atulo alya ojo, ?Aŋai etaniŋu ni bwo tulo ani ebeŋ etahutak? Attati inyi iloŋuna Filipo hotojiŋu itoromile itoŋori ikonyi. 32Ekyanita huna hun ihenio inyi ojo,
“Orihoroi nya inyi ittohori ihwa aker ol ofwoi ’tohoro.
Obeŋ nya inyi ikyana omuk erre ihwa lonyo ker ol obeŋ amala ihosyere herrirryabani honyi.
33Iholoŋ on omoryerek laati inyi obeŋ aŋoco honyi obis.
?Bwo ŋai adi igonyu awoyo honyi?
Nyo iyari isi nesu honyi addi to fau.”
34Ojo atulo alya jyo Filipo, ?Arai ekyanita huno eyani sayyo alya tenyi kuyya ikyana inyi to obo atulo? 35Ette Filipo ikyana jihonyi ette itter jyo ekyanita hodwo iramaniere inyi asayyo huno Yesu. 36Ninya hadahai isi likoi afanyi isi jyo obo aari bwo ojo atulo alya jyo Filipo, Imijye aari ana. ?Aremik ni ifwotuna batisimo? 37Ojo Filipo jihonyi, Iremik iye al iruk iye ta ataji hoi daŋ luŋa. Itarraŋ inyi ojo, Eruk ni jo ara Yesu Kristo Lonyi Hollum. 38Ette inyi itawoj atoromile. Ette isi isuruna litwa hari ette Filipo ibatis inyi. 39Lafwoni isi totwa hari inef Oloyiri olo Hobu Filipo ette iyaro inyi addi bwo obeŋ atulo lya inyyak igonyuna inyi. Bwo olo inyi imiji hosi ta namuno on obolo. 40Ati idwoŋ nya Filipo imiji Asoto ette inyi leten ittittoyo asayyo hun oyiji imisihi daŋ many Cesarea.
Trenutno izabrano:
Ehanita 8: LOT1969
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
This text was originally published by the British and Foreign Bible Society in 1969.