लूका 21
21
गरीब बिधबा कौ दान
(मरकुस 12:41–44)
1जब ईसू बड़े पिराथना घर में हतो तब बानें देखी कै अमीर आदमी दान पेटी में अपनों अपनों दान डार रये हैं। 2फिर बानें एक गरीब बिधबा कूं भी दान पेटी में दो दमड़ी डारते भये देखौ। 3तब बानें लोगन ते कही, “मैं तुमते सच कैहतूं कै जा गरीब बिधबा नें सबनते बढ़कै दान डारौ है। 4चौंकि इन सबन नें तौ अपनी बढ़ती में ते दान डारौ है पर जा बिधबा नें गरीब रैहते भये भी जो कछू जाके जौरें हतो बू सब कछू डार दियौ।”
बड़े पिराथना घर कौ बिनांस
(मत्ती 24:1–2; मरकुस 13:1–2)
5 जब कछू लोग बड़े पिराथना घर के बारे में कैह रये कै पिराथना घर भौत सुन्दर पत्थरन ते और दान करी गयी चीजन ते सजायौ है।
6तब ईसू नें कही, “बे दिन आबेंगे जिनमें ऐसौ होगो जो तुम अब जाँपै देखतौ बिनमें ते एक पत्थर पै दूसरो पत्थर नांय रैहबेगौ जो गिरायौ नांय जाबे।”
संकट और कलेस कौ समै
(मत्ती 24:3–14; मरकुस 13:3–13)
7लोगन नें ईसू ते पूछी, “हे गुरू जे सब कब होबेगौ? और जब जि बात होबेगी तौ बा समै कौ का निसान होबेगौ?”
8ईसू नें कही, “चौकन्ने रहियों तुमें कोई भैहका ना लै चौंकि भौत ते लोग मेरौ नाम लैके आबेंगे और कहिंगे कै ‘मैं मसीह हूं’ और जेऊ कहिंगे कै ‘बू समै जौरें आ गयौ है’ पर तुम बिनकी बातन में मत आ जईयों। 9और जब तुम लड़ाई और बलबो के बारे में सुनों तौ घबरईयों मत चौंकि इनकौ हैबौ जरूरी है। पर बा समै अन्त नांय होबेगौ।”
10और फिर ईसू नें बिनते कही, “कुल पै कुल और राज्य पै राज्य चढ़ाई करैगौ। 11और बड़े-बड़े भूकम्प आंगे, जगैह जगैह अकाल और महामारी फैलैगी, आकास में अजीब अजीब घटनाएँ घटेंगी और बड़े-बड़े डराबने निसान दिखाई दिंगे।”
12पर जि सब हैबे ते पहलै बू मेरे पीछे चलबे की बजैह ते तुमें पकड़िंगे, परेसान करिंगे और पंचायत में लै जांगे और जेल में बन्द कर दिंगे, राजाओं और राजपाल के सामने लै जांगे। 13लेकिन जि समै तुमारौ गबाही दैबे कौ मौंको होगौ 14#लूका 12:11,12जामारै अपने अपने मन कूं तईयार कर लेऔ और जा बात की चिन्ता मत करियों कै तुम अपने बचाब में का बोलोगे। 15चौंकि मैं तुमकूं ऐसौ वचन और ऐसी बुद्धी दुंगो जाते तुमारे सबरे बिरोधी ना तौ तुमारौ सामनों कर पाबेंगे ना तुमारी बातें काट पाबेंगे। 16तुमारे माँ-बाप, भईया, कुटुम्बी और मित्र तुमें पकरबांगे और तुमें ते कछुन कूं मरबा डारिंगे। 17और मेरी नाम लैबे की बजैह ते भौत ते लोग तुमते नफरत रखिंगे। 18फिरऊ तुमारे सिर को एक बारऊ नांस नांय हैबेगौ#21:18 जि एक मुहाबरो है, जाकौ अर्थ है कै “बू तुमारी आतमा को कछू नांय बिगाड़ पाबेंगे”। 19पर भरोसे में मजबूत बने रहबे की बजैह ते तुम अपने कबऊ नांय खतम हैबे बारे जीबनें पाओगे।
येरूसलेम कौ नांस
(मत्ती 24:15–21; मरकुस 13:14–19)
20“जब तुम लोग येरूसलेम कूं सेनान ते घिरौ भयौ देखौ तौ समझ जईयों कै वाकौ नांस हैबे बारौ है। 21तब जो यहुदिया में होबें बे पहाड़न पै भाग जाबें और जो येरूसलेम के भीतर होबें बे बाहर निकर जाबें और जो बाहर गांमन में होबै बे सहर के भीतर ना आबें। 22चौंकि जि दन्ड के ऐसे दिना होंगे, जिनके बारे में पबित्र सास्त्र में पैहले तेई लिखौ गयौ, बे सबरी बात पूरी है जाबेंगी। 23और बिन औरतन के काजै बे दिना भौत भयानक होंगे जो पेट ते हुंगी और जो बालकन कूं दूध पियावत हुंगी। चौंकि बिन दिनान में जा धरती पै भौत बड़ी बिपत्ति आबेगी और इन लोगन पै परमेस्वर कौ क्रोध पड़ेगौ। 24लोग तलबार ते मारे जांगे और बिनकूं बन्दी बनांयकै दूसरे देसन में सौंप दयौ जाबेगौ और येरूसलेम गैर यहुदियन के द्वारा जब तक रौंदौ जाबेगौ जब तक परमेस्वर के द्वारा दयौ गयौ समै पूरौ ना होगो।
मनुस्य के बेटा कौ आयबौ
(मत्ती 24:29–31; मरकुस 13:24–27)
25 #
प्रका 6:12,13 “सूरज, चन्दा और तारेन में निसान दिखाई दिंगे और धरती पै देस देस के लोगन पै बिपत्ति आंगीं, बे समुनदर के गरजबे ते और लहरन के उठबे ते घबरा जांगे। 26लोग संसार पै आबे बारी बिपत्तीन ते डरकै अधमरे है जांगे चौंकि आकास की सक्ती हिलाई जाबेंगी। 27#प्रका 1:7तब लोग मुझ, ‘मनुस्य के बेटाए’ अपार सामर्थ और बड़ी महिमा के संग बादर पै आतौ भयौ देखिंगे। 28जब जे बात हैबे लगिंगी तौ खड़े हैके ऊपर देखियों चौंकि तुमारौ उद्धार जौरें होगौ।”
ईसू कौ वचन अमर है
(मत्ती 24:32–35; मरकुस 13:28–31)
29ईसू नें बिनते एक दृस्टान्त में कही, “कै अंजीर के पेड़ कूं और दूसरे सब पेड़न नें देखौ, 30जैसेई बिनकी कोंपलें निकरतै तौ तुम देखकै खुदई समझ जाबें कै गरमी आबे बारी हैं। 31जाई तरैह ते जब तुम इन बातन नें होते भये देखौ तौ समझ जईयों कै परमेस्वर कौ राज आबे बारौ है।
32“मैं तुमते सच कह रयौऊं जब तक मेरी कही जि बात नांय घटेंगी तब तक जा पीढ़ी कौ अन्त नांय होबेगौ 33एक बार कूं धरती और आकास टल जायेंगे पर मेरौ वचन हमेसा अटल बनो रैहबेगौ।
सदा तईयार रहो
34“जामारै साबधान रहौ ऐसौ ना होबे कै तुम भोग-बिलास, खाने पीबें और इन संसार की चिन्तान ते तुमारौ मन हटीलौ है जाबें और बू दिना फन्दे की तरैह ते अचानक तुम पै आ पड़े। 35चौंकि बू दिना सबरी धरती के सब रैहबे बारेन पै आ पड़ेगौ। 36जामारै जागते रहो और हर समै पिराथना करते रहो जाते तुम इन सब आबे बारे संकट ते बचबे और भरोसे के संग मुझ, ‘मनुस्य के बेटा’ के सामने खड़े है होबे लायक बन जाऔ।”
37 #
लूका 19:47
रोजाना ईसू बड़े पिराथना घर में परमेस्वर की वचन की सिछा देतौ और रात बिताबे काजै साम कूं जैतून नाम की पहाड़ी पै चलौ जातौ 38और सब लोग परमेस्वर की वचन की सिछा सुनबे काजै सबेरे सबेरे बड़े पिराथना घर में आ जाते।
Trenutno izabrano:
लूका 21: BRAJ
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
NonCommercial-NoDerivatives 4.0 International (CC BY-NC-ND 4.0)
