लुका 22
22
येसुजिके पकडावेके योजना
(मति २६:१४-१६; मरकुस १४:१०-११)
1अखमिरि रोटि#२२:१ अखमिरि रोटि: सोडा हइने घालके पकावल रोटिके अखमिरि रोटि कहसइ। इअ रोटिया यहुदि मन्सावाह निस्तार-पबनियामा खाइ। खाएके पाबनि लजिके यवइ रहलइ। यकरेके निस्तार-पाबनि फेनि कहसइ।#प्रस्थान १२:१-२७ 2तखनहिँ मुख्य पुजेरिया हसे व्यवस्थाक-गुरुसभ येसुजिके चुपे-चुपे मारेके तहिँया दाउ खोजलइ, केहकेकि मन्सावाह किहो करतइ कहके हुनुका डेरेलइ।
3तखनहिँ येसुजिक बारह जन चेलवानि मधेसे इस्कोरियोत कहल यहुदाक मनवामा सइतान पेसलिय। 4उहेसे उअ येसुजिके कस्के पकडावेके मदत करे सकबहि कहके मुख्य पुजेरिया हसे मन्दिरवाक सिपहियावानि लघिना जाके सर-सल्लाह करलिय। 5हुनुका उअ बतवा सुनके गहनि खुसि हखके वकरेके पइसा देवेके सहमत भेलइ। 6तब यहुदा राजि भेलिय हसे मन्सावानिके थाहे नाहिँ पावे जोकर कस्के येसुजिके पकडावे सकबहि कहके दाउ खोजे लगलिय।
वराट भोज
(मति २६:१७-३०; मरकुस १४:१२-२६; युहन्ना १३:२१-३०)
7याबे अखमिरि रोटि खाएके पबनिक दिन यलइ। इअ निस्तार-पाबनिक दिनवामा भेडाक पाठा भोग चढावेके चलन रहलइ।#प्रस्थान १२:१८-२०; व्यवस्था १६:५-८ 8तब येसुजि पतरुस हसे युहन्नाके यसके कहके पठोलसि, “तोहरा जाके हमार तहिँया निस्तार-पाबनिक भोज तयार करिह।” 9तब हुनुका येसुजिके पुछलइ, “हमरा इअ भोजवा कहवाँ जाके तयार करेके त?” 10येसुजि हुनुकाके कहलसि, “सुनह, तोहरा सहरवामा पेसतेकि, एक जन मरदाना मन्से पानि भरल घइला बोकके जाइ भेटबह, उअ जुन घरवामा जेबिय तोहरा वकर पाछा-पाछा जइह। 11जब वहवाँ पुगबह, उअ घरवाक मलिकवाके पुछिह, हमार गुरुजि तोरके पुछेके पठोले बडसि कि, ‘मुइ यापन चेलवानिसाङे निस्तार-पाबनि मनावेके पहुनाक खोक कहवाँ बडइ?’ 12उअ मन्सावा तोहराके वपराक तलवामा खाँ डउलसे सजावल एगुडा जबड खोक देखोबिय। तोहरा वहवाँहिँ भोज तयार करिह।” 13वकरपाछा हुनुका सहरवामा गेलइ हसे जसने येसुजि कहके पठोले रहलसि वसने पउलइ हसे वहवाँहिँ हुनुका निस्तार-पाबनिक भोज तयार करलइ। 14जब भोज खाएके जुन भेलइ, येसुजि यापन प्रेरितवानिसाङे खाए बेठलसि। 15हसे येसुजि हुनुकाके कहलसि, “मुइ दुःख पावेकेसे यागा तोहारसाङे इअ निस्तार-पाबनिक भोज खाएके गहनि मन करले रहलहि।” 16मुइ याबे तोहराके कहइ बडहिँ, “परमेस्वरक राजमा इअ भोजवाक यरथ पुरा नाहिँ हखइलइ मुइ दोसर निस्तारक भोज नाहिँ खेबहिँ।” 17वकरपाछा येसुजि अंङगुरवाक रसवा भेलि कचोरवा लेलसि हसे परमेस्वरके धन्यवाद चढाके यापन चेलवानिके देते कहलसि, “इअ लेह हसे जम्मे जन बाँटके पियह। 18मुइ तोहराके कहइ बडहिँ, ‘परमेस्वरक राज नाहिँ यवइलइ फेरिसे अंङगुरक रस नाहिँ पियबहिँ’।” 19वकरपाछा येसुजि रोटिया लेके परमेस्वरके धन्यवाद देलसि हसे खाडा-खाडा बनाके चेलवानिके देते कहलसि, “तोहराके देलि इअ रोटिया मोर देहि हखइ। मोर सम्झनामा इअ करइरहिह।” 20वसनेकरते हुनुका खासकलेपर येसुजि अंङगुरवाक रसवाक कचोरवा लेके यसके कहलसि, “इअ कचोरवा मोर रकतावामा बन्हाइलि परमेस्वर हसे हुनेक वपरा विस्वास करलहरानिक बिचाक लउठा वाचा#२२:२० जुन मन्सावाह परमेस्वरक एक मतरे पुतर येसुजिमा विस्वास करलइ, हुनुका जम्मे जनके परमेस्वर उद्धार करेके प्रतिग्या कि बाँचा करलसि। यकरेके लउठा करार कहसइ। हखइ। इअ रकतावा तोहार तहिँया बहाइल बडइ।#यरमिया ३१:३१-३४
21 “बाकि सुनह! जुने मोरके सतरुवानिक हथवामा सपबिय, उअ मन्सावा मोरसाङे यहवाँ खाए बइठल बडिय। #
भजन ४१:९ 22मुइ मन्सेक पुतरके परमेस्वरक इछा यनुसार मरे परतइ, बाकि उअ मन्सावाके धिकार बडइ! जुने मोरके धोखा देबिय।” 23तब उअ सुनके चेलवाह एक-दोसरि जनसाङे यसके पुछे लगलइ, “हमारमधे कुने यसनुक काम करबिय?”
कुने बडके हखिय कहके ठोरा-बोलि?
24वकरपाछा चेलवानिक बिचा सबसे बडके कुने हखिय कहके ठोरा-बोलि हखे लगलइ।#मति १८:१; मरकुस ९:३४; लुका ९:४६ 25उहेसे येसुजि हुनुकाके कहलसि, “इअ संसारक रजवाह यापन परजावाह वपरा मनपरि सासन चलोसइ हसे उअ सासन चलोलहरा यपनहिँके ‘डउल’ कहे लगोसइ। 26बाकि तोहरा वसने झिन हखिह। तोहार मधेसे जुने सबसे बडके हखे खोजबह, उअ सबसे झिनिक हखे परतइ हसे यगुवा हखलाहर सेवक नहिँया हखे परतइ।#मति २०:२५-२७; मरकुस १०:४२-४४ 27याबे मोरके कहह, खाए बेठलाहर बडके हखिय कि बटलाहरा बडके हखिय? खाए बेठलाहर हइने त? बाकि मुइ तोहार बिचा बटलाहर सेवक नहिँया भेल बडहिँ।#युहन्ना १३:१२-१५
28 “तोहरा मोर जम्मे दुःखवाक जुनवामा मोरके साथ देलह, 29हसे मोर परमेस्वर पिता मोरके सासन करेके अधिकार देले बडसि। उहेसे मुइ फेनि तोहराके अधिकार देबहि, 30ताकि तोहरा मोर राजमा मोरसाङे खेबह-पिबह हसे सिंहासनमा बइठके इस्राएलक बारह कुलक मन्सावानिके न्याय करबह।”#मति १९:२८
पतरुस हुनेके इन्कार करबिय कहके येसुजि पहिनहिँ कहदेलसि।
(मति २६:३१-३५; मरकुस १४:२७-३१; युहन्ना १३:३६-३८)
31वकरपाछा येसुजि पतरुसके कहलसि, “सिमोन, अरे सिमोन, सुनहि त, जसने किसान गोहुँवा ओसाके भुसवा बेगरोसइ, वसने सइतनवा तोहार विस्वास जाँचेके अनुमति लेले बडिय।#अयुब १:६-१२; आमोस ९:९ 32बाकि तोर विस्वास झिन डगमगाइ कहके मुइ तोर तहिँया परमेस्वरसे परथाना करले बडहिँ। तुइ फेरि मोरवरि फिरके यइलेपर यापन ददेर-भयवानिके फेनि विस्वासमा बरियार बनोसि।” 33बाकि पतरुस कहलिय, “प्रभुजि, मुइ यपनहुँसाङे झ्यालखनवामा जायके हसे मरेके फेनि तयार बडहिँ।” 34तब प्रभुजि कहलसि, “पतरुस, याजु राति चिङनावा बसलिसे यागा तुइ तिन पारिलइ मोरके हइने चिनसहिँ कहके कहबहिँ।”
35तब येसुजि हुनुकाके कहलसि, “जब मुइ तोहराके सुसमाचार परचार करेके तहिँया पठोइखुनि, झोला, पइसाक थइलि कि जुता फेनि झिन लिगह कहके कहलहिँ, कथि तखनहिँ तोहार किहो चिजुक कमि भेल रहलइ?” हुनुका कहलइ, “हइने भेलइ।”#मति १०:९-१०; मरकुस ६:८-९; लुका ९:३; १०:४
36 “बाकि याबेसे, जाकरसाङे झोला हतइ, उअ बोकिह, जाकरसाङे थइलि हतइ, उअ बोकिह हसे जाकरसाङे तरवार नाहिँ हतइ, उअ यापन होडलि लुगवा बेचके भेले फेनि तरवार किनिह। 37केहकेकि मुइ तोहराके कहइ बडहिँ, परमेस्वरक वचनवामा ‘उअ अपरधियानिसाङे गनेबिय’ कहलि मोर बारेमा लिखइलि इअ बतवा पुरा हतइ।”#यसइया ५३:१२ 38तब चेलवाह कहलइ, “प्रभुजि हेरहुँ, हमारसाङे दु गो तरवार बडइ।” येसुजि कहलसि, “उतुरा भेले पुगतइ।”
जइतुन पहडावामा येसुजिक परथाना
(मति २६:३६-४६; मरकुस १४:३२-४२)
39वकरपाछा येसुजि सबदिनक नहिँया सहरवासे निकडके जइतुन पहडावामा गेलसि हसे चेलवाह फेनि हुनेसङहि गेलइ। 40जब हुनुका वहवाँ पुगलइ, येसुजि चेलवानिके कहलसि, “परिछामा नाहिँ परेके तहिँया परथाना करइरहिह।” 41हुनुकासे इचिका वताहुँ जाके येसुजि ठेहुँनाके यसके परथाना करलसि, 42“हे मोर पिता, यपनहुँक इछा हतइ जउँ इअ दुःखक कचोरवा मोरसे होटा देहुँ, मोर इछासे हइने, बाकि यपनहुँक इछा पुरा हखइ।” 43[तखनहिँ स्वरगसे एगुडा स्वरगदुत याके येसुजिके सहेके सक्ति देलिय। 44येसुजिक हृदय खाँ दुःखसे भरलेसे हुने झन बहुते परथाना करे लगलसि। तखनहिँ येसुजिक पसेनवा रकतक ठोपा नहिँया भुयवामा चुवइ रहलइ।]#२२:४४ इअ पदवा पहिलाक ग्रिकमा हइने रहलइ, बाकि पाछेसे जोडलेसे कतेक लउठा संस्करनमा कोस्ठमा राखल बडइ। 45जब येसुजि परथानासे उठके चेलवानिक लघिना फिरके यलसि, तब हुनुकाके दुःखित भके हरियाके सुतल देखलसि। 46येसुजि चेलवानिके कहलसि, “तोहरा केहके सुतल बडह? उठह! हसे परिछामा नाहिँ परेके तहिँया परथाना करह।”
येसुजिक पकडाउ
(मति २६:४७-५६; मरकुस १४:४३-५०; युहन्ना १८:३-११)
47जब येसुजि चेलवानिसाङे इअ बतवा फदकइ रहलसि, तखनहिँ वहवाँ मन्सेसभक एगुडा भिड यलइ। बारह जन चेलवाह मधेसे यहुदा नाउँक एक जन चेलवा उअ भिडवाक यगुवा भके येसुजिके चुमेके तहिँया येसुजिक लजिके यलिय। 48बाकि येसुजि वकरेके कहलसि, “यहुदा, कथि तुइ मन्सेक पुतरके चुमके धोखा देवे खोजइ बडहिँ?” 49जब येसुजिसाङे भेलि चेलवाह वहवाँक हाल देखलइ, हुनेके यसके कहके पुछे लगलइ “प्रभु, कथि हमरा याबे तरवार चलाउ?” 50तब एक जन चेलवा तरवरवा निकडाके प्रधान पुजेरियाक बहरियावाक दहिनि कनवा चट्टे काटदेलिय। 51बाकि येसुजि यापन चेलवानिके कहलसि, “भेलइ, याबे रहे देह।” तखनहिँ येसुजि उअ मन्सावाक कनवा छुके डउल बनादेलसि।
52येसुजिके पकडे यलहरवाह मुख्य पुजेरियाह, मन्दिरवाक सिपहियावाह हसे समाजक बडकि मन्सावानिके येसुजि यसके कहलसि, “कथि मुइ डाँकु हखहि? तोहरा मोरके डाङ हसे तरवार लेके पकडे यलह? 53मुइ तोहारसाङे मन्दिरवामा सबदिन रहइकि, तोहरा मोरके हइने पकडलह, बाकि इअ तोहार जुन हखइ, जब अन्धकारक सक्ति राज करइ बडिय।”#लुका १९:४७; २१:३७
पतरुस येसुजिके इन्कार करलिय
(मति २६:६९-७५; मरकुस १४:६६-७२; युहन्ना १८:१५-१८,२५-२७)
54हुनुका येसुजिके पकडके प्रधान पुजेरियाक घरवामा यनलइ। तब पतरुस फेनि तनाउसे हुनुकर पाछा-पाछा वहवाँ यलिय। 55वहवाँ मन्सावाह यङनावाक बिचा धुनि बारके तपइ रहलइ। तब पतरुस याके हुनुकरेसाङे बेठलिय। 56तखनहिँ वहवाँ एगुडि बहरिनिया पतरुसके धुनिया तपइ देखके डउलसे निङहारके हेरते कहलिय, “इअ मन्सावा फेनि त येसुसाङे रहलिय।” 57बाकि पतरुस जवाफ देके कहलिय, “अरि बहिनिया, मुइ त वकरेके हइने चिनसहिँ।”
58यघरिक रहके दोसरि एक जन मन्सावा पतरुसके देखके कहलिय, “तुइ फेनि येसुक चेला मधेसे एक जन हइने रहलहि त?” तब पतरुस जवाफ देके कहलिय, “अरे भयवा, मुइ हइने रहलहिँ।”
59लगभग एक घन्टा पाछा फेरि एक जन मन्से पतरुसके यसके कहलिय, “इअ मन्सावा सदियो येसुजिसाङे रहलिय, केहकेकि इअ फेनि त गालिलिक मन्से हखिय।” 60बाकि पतरुस वकरेके कहलिय, “तुइ कथि कहइ बडहिँ? मुइ त किहो हइने बुझइ बडहिँ।” पतरुस यसने कहते-कहते चिङनावा बसलिय। 61तखनहिँ प्रभुजि पतरुसवरि घुमके हेरलसि। तब “याजु राति चिङना बसलिसे यागा तुइ मोरके तिन पारि ‘मुइ हइने चिनसहिँ’ कहके कहबहिँ” कहलि प्रभुजिक उअ बतवा पतरुस सम्झलिय। 62पतरुस यङनावासे बाहरा जाके डोढा-डोढाके कनलिय।
येसुजिके यपमान
(मति २६:६७-६८; मरकुस १४:६५)
63तब येसुजिके पकडलराह सिपहियावाह हुनेके खिल्लि उडोते धुसलइ, 64हसे येसुजिक यखिया झापके यसके पुछे लगलइ, “याबे अगमवाडि करके कह ता, तोरके कुने धुसलइ?” 65यसने हुनुका येसुजिके बरबरइते बिजेत करे लगलइ।
येसुजिके महासभाक यागा यनलइ
(मति २६:५७-६८; मरकुस १४:५३-६५; युहन्ना १८:१९-२४)
66जब बिहान भेलइ समाजक बडकि मन्सावाह, मुख्य पुजेरियाह हसे व्यवस्थाक-गुरुसभ जामाजुट भेलइ। हुनुका येसुजिके महासभामा यानके यसके पुछलइ, 67“तुइ मुक्ति देलाहर ख्रिस्ट राजा हखहि जउँ हमराके कह।” तब येसुजि जवाफ देके कहलसि, “मुइ कहबहिँ जउँ फेनि यपनहुँसभ विस्वास नाहिँ करबहुँ, 68हसे तोहराके किहो पुछबहिँ जउँ तोहरा जवाफ नाहिँ देबह। 69बाकि याबेसे मुइ मन्सेक पुतर सरवसक्तिमान परमेस्वरक दहिनिकलहरवाक सिंहासनवामा बेठबहिँ।” 70तब हुनुका जम्मे जन येसुजिके फेरि पुछलइ, “कथि सदियो तुइ परमेस्वरक पुतर हखहि त?” येसुजि जवाफ देके कहलसि, “यपनहुँसभ कहइ बडहुँ, मुइ उहे हखहि कहके।” 71हुनुका जम्मे जन येसुजिक बतवा सुनके यसके कहे लगलइ, “याबे यकर विरुद्धमा हमराके कथि परमान चाहिँ त? हमरा यकरे मुहवासे जम्मे बतवा सुनलहुँ।”
Trenutno izabrano:
लुका 22: CTHR
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. and Nepal Bible Society
