Matta 19
19
Fǝɗkǝra Yeso ra a ɗuura pǝǝ toone wa
1Pa Yeso feɗsǝ nkee mbusǝsa wa, yǝ lee Galili yǝ ko a put Yahudiya u yǝ sǝ a tale aulaara Urdun wa ya. 2Ɓet kwausǝ dem ɓa, ɓaa ɓǝɗǝ, yǝ roɓ ɓaa sem kwakwa ra ɓa a ɗaaso ɓoso kǝnso. 3Ɓaata ɓaa Farisiyawa ka, ɓǝ wo a sanii me ɓaa pǝta. Ɓǝ taasǝ me, “Pamman keke ete yǝ pǝǝ toonesi me yǝ tomsǝ mbuka nǝu?”
4Pa yǝ kak me, “Sǝ pǝta kauwo a likarkar wa me, a ntiiri, yaa yǝ marsǝ put ntaandi wa ya, ‘yǝ mar ɓǝ parara ma toone rau?’ 5Ɗǝm yǝ nkee me, ‘Pa me maso, ete kiya lee pap ɓisi ma maasi yǝ tǝmba ma toonesi, ɓosa raɓ ɓǝ kang maabiri fin’. 6Waso ɓǝ sem raɓ ɗǝm ra, pa fin. Me maaso mbu Kaa tǝmɓasǝ ɓa, atike yǝ ɓaa ra.”
7Pa ɓǝ taa me, “Yaa tomtomni Musa yǝ nkeesǝ me, paraara yǝ nyor likarkar ɓaaɓaa wa, yǝ na toonesi, yaa pǝǝu?”
8Yeso yǝ kak me, “Musa yǝ na sǝ ɗǝɗa me sǝ pǝǝ toona ɓǝsaa, me kuɗa kwakwa ra ɓǝsa. Pa sem maaso a ntiiri ra. 9Nǝn nkeesǝ me, hana yamni yaa yǝ pǝǝsǝ toonesi ya, me sem a pepeto ra, ɗǝm yǝ kon toone ke ya, yǝn tom pepeto ma sase.”
10Emfǝɗkaa ɓǝsǝ ɓaa nkee me, “Me mbusa maaso a ɗaaso kere ma toone wa, ete yǝ kon toone ra.”
11Yeso yǝ kak me, “Sem ɓeta nsaad kaa yau ma mara ra wa ra, pa ndub ɓet ɓaa yau ɓǝsǝ ɓa seɗɗe. 12Me ɓaata ɓaa haa ɓǝ, ɓǝ nkaa ɓǝ kon toone ra, ɓaata ɗǝm ɓeta kang ɓǝ maaso, ɓaata ɗǝm ɓǝ ɓisi kon toone wa me ɓǝn taa kuɓsutu a liura wa. Yaa kiya nkaa yǝ kon mara sǝra maaso ya, yǝ kono.”
Em ngeek ngeek ɓa ma Yeso
13Pa ɓaa wo ma em ngeek ngeek ɓa a Yeso ni me yǝɓǝ ti neme, ɗǝm yǝɓǝ tom kǝnara. Pa emfǝɗkaa ka ɓa, ɓǝ nkwaakǝ ɓaa ɓǝ wosǝ ma em ngeek ngeek sǝɓa.
14Yeso yǝ nkee me, “Sǝ lee em ngeek ngeek ɓa ɓǝ wo a nani, sǝɓǝ sa ra, me kuɓsutu a liura wa ndǝ u nkaamǝra ɓora wa.” 15Ndiira yǝ ti ɓǝsǝ neme a ɗuura ɓora wa, yǝ faɗ a wiiyo.
Niinira an kǝnaa nya
16Pa atike yǝ wo a Yeso ni yaa taa yaa nkee me, “Malǝm, ǝn mbu kwalari na ɓa kǝna tom me nǝ taa huurtu pakarese yau?” 17Pa Yeso yaa kak yaa nkee me, “Tomtomni ngǝn taa nǝsǝ a mbu yǝsǝ kwalari ɓau? Ən Kaa fin yaa yǝsǝ kwalari ya. Me ngǝn taa me ngǝ ta huurtu, a ɓǝɗ mbu Kaa yǝ nkeesǝ me aa tom ɓa.”
18Eɗ kaya yǝ taa me, “Ɓaa na ɓau?”
Yeso yǝ kak me, ‘Ngǝ toɗ ete ra, ngǝ tom pepeto ra, ngǝ tom nkuura ra, ngǝ paa para a ɗuura ete ya ra, 19a na mbarta paange ma maange, ɗǝm ngǝ yau anndǝnsaatǝre nyaange nga nkweerange.” 20Niinira kaya yǝ kak me, “Nsaad mbu ɓa nǝ wee tomon, mbu pee mbi ɗǝmǝu?”
21Yeso yaa kak me, “Me ngǝn taa me ngǝ kaɗ kungsǝ ra, ngo ngǝ fang mbu ɓǝnga nsaad, ngǝ na hanhanta, kǝngǝ taa kǝnaa a liura. Pa ngǝ wo, ngǝ nǝ ɓǝɗɗǝ.” 22Pa Niinira kara yǝ kurasǝ maaso wa, yǝ faɗ ma kuɗa tebtebra me yǝ ma kǝnaa dem.
23Pa Yeso yǝ nkee emfǝɗkaa ɓisa me, “Nǝn nkeesǝ ɓongtǝra, kǝ tom ma kongsa an ma kǝnaa nya, yǝ kana kuɓsutu a liura wa. 24Ɗǝm nǝn nkeesǝ me, kǝ tom paapa a telǝm ni yǝ kan ma lau ee libɗa ya, ma an kǝnaa nya kiya kan a kuɓsutu Kaa wa ya.”
25Pa emfǝɗkaa ka ɓa kurasǝ maaso wa, ɓǝ tom mbu weɗara ɓa, pa ɓǝ taa me, “Yaa ndǝ yamni kiya taa kon nkweera wau?”
26Yeso yǝɓǝ sengge yǝ nkee me, “A ete ni mbu ɓa a tom ra, pa a Kaa ni mbusa nsaad ǝn mbu toma.”
27Bitrus yǝ kak me, “Tǝ lee mbusan nsaad me tǝngǝ ɓǝɗǝn, pa tǝ kǝ taa mbiu?”
28Yeso yǝɓǝ nkee me, “Nǝn nkeesǝ ɓongtǝra, a fer kaare nfiinfii ka wo ya, a fer Au Ete ya kiya kaɗ a ham kuɓsutu usu u kwang wa, saase ɓaa sǝ ɓǝɗnǝsǝ ɓa kǝn, sǝ kǝ kaɗ a ham kaɗ kuɓsa pu a nhaa raɓ ɓa, sǝn kankiita tuwa pu a nhaa raɓ u Isra'ila wa. 29Ɗǝm hana nyamni yaa yǝ leesǝ ɗuursa ma ɓaata ɓisa parata ma toona ma papsi ma maasi ma emba ma nyanya meen niina ya, kiya taa ɓaarǝta mbusata a faɗ pusa pu, ɗǝm ki yǝ taa huurtu pakarese wa. 30Pa dem ɓaa ɓǝsǝ a ntiiri ɓa, ɓǝ kǝ kang a ndiira, ɗǝm ɓaa ɓǝsǝ ma ndiira ɓa ɓǝ kǝ kang a ntiiri.
Trenutno izabrano:
Matta 19: LLA
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2023 Seed Company in collaboration with Language Developers and Bible Translators Association
