Matta 17
17
Maabiri Yeso ya paki ɓol
1Ndiira tǝro mindike wa, Yeso yǝ too Bitrus, ma Yakubu, ma ate isi Yohanna, yǝ ɓǝn taa a yolko ɓoti a han ɓǝ kaɗsǝ seɗe ɓobɓǝsa ɓǝsa ɓa. 2Pa maabiri isi a paaki a wii ɓoso. Ota ita weɗ a tom pengpeng nga kaa, ɗǝm luktaa isa a kang hursǝ pengpeng. 3Nok kǝnso, pa ɓǝ wǝr Musa ma Iliya a wii ɓoso, ɓǝn kankan ma Yeso.
4Bitrus nkee Yeso me, Ankundi, tomon yaɓ ndǝsa a ham ɓa wa, me ngǝ yawan, kǝnǝ werkǝ pilang taatǝn, fin nwaango, fin u Musa wa, fin ɗǝm u Iliya wa.”
5Yaa kanmǝra nding, pa liuta pengpeng a ham ɓǝ liki, ɗǝm kwaro fiɗ a liuta, yǝn nkee me, “U nwa ndǝ auwane, yaa nǝn yausǝsǝ ya, ɗǝm nǝn hur kuɗa dem ma sase. Saa kura!”
6Pa emfǝɗkaa ɓisa kurasǝ maaso wa, ɓǝ nwii a putu me kokto maɓǝn dem. 7Pa Yeso yǝ wo yǝɓǝ ntee, yǝ nkee me, “Sǝ nii kokto sǝ ma ra.” 8Ɓǝ niksǝ ɗuura wa, ɓǝ wǝr atike ra, ndub Yeso fin mbusa.
9Ɓǝn hamsǝn ham a yol kawa wa, Yeso yǝɓǝ wiin ngwee me, “Sǝ nkee yaake mbu sǝ wǝrsǝ ɓa ra, ndub me ɓaa nik Au Ete ya, a tiinan nhe.”
10Emfǝɗkaa ka ɓa ɓaa taa me, “Yaa tomtomni malǝmmaa masaka sa, nkeesǝ me Iliya kiya nkaa wo saseu?”
11Yeso yǝ kak me, “Maaso ɓongtǝra Iliya kǝ yǝ wo, ɗǝm kiya werkǝ mbusa nsaad. 12Pa nǝn nkeesǝ me Iliya yǝ wee won, ɗǝm ɓǝ maasǝ ra. Pa ɓǝ tomsǝ nsaad mbu ɓǝn yausǝ ɓa. A ɗǝɗa finda Au Ete ya kiyǝ wee kongsa a nema ɓosa wa.” 13Pa emfǝɗkaa ɓisa ɓǝ maa me yǝn kan a ɗuura Yohanna an tom baptisma nya.
Yeso roɓ au ke ma siyo nsaa nwa
14Ɓǝ wosǝ a han ɓeta kwausǝ dem ɓa wa, eɗ ke yǝ wo ngwang ma Yeso, yǝ kwirsǝ a wii usu. 15Yaa nkee me, “Ankundi, a kura nyorataara auwane ra, yǝma mǝrkǝm ɗǝm yǝn wee kongsa dem. Nfee yǝn nwii a ara hana a mbraa ɗaan. 16Nǝ wosǝ a emfǝɗkaa ɓǝnga nii, pa ɓǝ nkaa ɓaa roɓ ra.”
17Yeso yǝ kak me, “Saa ɓaa kaareyase ɓa, ɓaa semma na ɓongto ra ɓa, tǝro miniu kǝnǝ kaɗ ma saaseu? Kǝnǝ sǝm ma saase tǝro miniu? Nga woma au sisi a nani a ham ɓa.” 18Yeso yǝ kwaakǝ nsaa ka wa, pa yǝ fiɗ a maabiri au sisi ya, ɗǝm yǝ roɓ a fer siso nok.
19Pa emfǝɗkaa ɓǝ wo a Yeso ni a nhuukǝra ɓaa taa me, “Tomtomni tǝ nkaa tǝ hik rau?”
20-21Yeso yǝ kak me, “Mbu kwaasǝ ɓa sǝma na ɓongto wa ngeek. Nǝn nkeesǝ ɓongtǝra, me sǝma na ɓongto wa ngeek nga nkaama karaɓa ma, sǝ kǝ nkaa sǝ nkee yol wa me, ‘A pǝɗ a ham ɓa, ngǝ ko kǝna’ ɗǝm kiya pǝɗǝ. Mbu saa nkaa sǝ tom ra ɓa sem ra.”#17:20-21 Ɓaata ɓan nyora ɓǝ nyor me, mbusǝsa tomaa sal ra, me sem ma kǝnara ma ɓisi mbuseya wa ra. 22Pa ɓǝ wosǝ Galili ke wa, Yeso yǝɓǝ nkee me, “Ɓaa kǝ fang Au Ete ya a nema ɓeta sa. 23Ɓǝ ka toɗɗo, ɗǝm a kaa tǝro taatǝn ɓa, ɓaa ka nik ma huurtu.” Pa emfǝɗkaa ka ɓa, ɓǝ kung ma kuɗa tebteb ta.
Kwan samra a hit Kaa Urshalima wa
24Pa Yeso ma emfǝɗkaa ɓisa wosǝ Kafarnahum nwa, ɓan kon samra a hit Kaa wa ɓa, ɓǝ wo a Bitrus ni ɓaa taa me, “Malǝm waaso yǝ kwanaa samra u hit Kaa Urshalima wa rau?”
25Yǝ kak me, “Ee nwa yǝn kwana.” Pa Bitrus wosǝ ɗuuru wa, Yeso yǝ ntii yaa nkee me, “Siman, ngǝn sen mbiu? A ɓauniniu Kuɓsa put ntaandi wa sa, ɓǝn konsǝ samrau, a emɓosa niu hana a ɓaatani ɓolǝu?”
26Bitrus yǝ kak me, “A ɓaata ni ɓol.”
Pa Yeso yaa nkee me, “Nwa, em ɓosa ɓǝ kwana ra. 27Pa kǝnǝsǝ weɗa me sǝ tǝblǝ kuɗa ɓet ɓa ra, ngo a aulaara ngǝ yaɓ langtanga nwaango, nsenyo ngǝ ntiisǝ ngǝ ma wa, ngǝ will ee isi kǝngǝ wǝr koɓaa asin, ngǝ haa ngǝ ɓǝn ko, me samra na ma nwaango.”
Trenutno izabrano:
Matta 17: LLA
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2023 Seed Company in collaboration with Language Developers and Bible Translators Association
