ལུ་ཀ། 17
17
སྡིག༌པ།
1རོ་ཀི་ རོ་ཀ་སློ་མ་བ་ཀ་ གསུངས་མ་ལ་ སྡིག་པ་ ཨ་ལེ་བི་ལེ་དེན་གེ་ བར་ཆད་ཏ་ ཐེ་རི་བ་རི་རང་ ཇུང༌མེ། དག་པ་ཀབ་ཉི་ ཨུ་ཉུ་ད་བུ་ ཇུང་མེ་བི་ཁཱན་ག་ཐུང་ཀ་ ཧབ་ཏུར་ཀ་ལུ་ཨོ་ཕེ་ཡ། 2ཨོ་ཐ་ཟེ་མུ་བ་ཀ་པོང་ཀེ་ ཐུར་ག་བུ་ སྡིག་པ་ཨ་ལེ་ག་ བི་ཝ་གེ་ཏ་ ད་ཧ་ངང་གེ་ རང་ཐང་ལུང་ཇཱན་ཐཱན་ རྒྱམ་མཚོ་ནང་ཀ་ཐུབ་ཉི་ གེ་མ་དྲག༌པེ། 3ཨོ་ཉི་ཨ་དེན་གེ་ ནའི་ཏེན་གི་ རིག་པ་སྒྲིམ་ཉི་གོད༌ཅོ།
ཉི་ན་ཧ་ཡུང་ཟི་གི་ སྡིག་པ་ཨ་ནེ་ལ་ ཇུར་ཇང་ཕི། ཉི་རོ་ཀི་ཁ་དོག་ཉི་ སྡིག་པ་གེ་ལོག་ནེ་ལ་ བཀའ་དྲིན་བསྐྱང༌ཤོ། 4ཉི་རོ་ཀི་ ན་ག་ཏཱན་ ངམ་ཐུར་ག་ཤེབ་ཟུམ་ སྡིག་པ་ཨན་ཐཱན་ ཤེབ་ཟུམ་རང་ལོག་ཉི་ ན་ག་བཱརང་ཀ་ཨུན་ཐཱན་ ཇི་གི་ངཱད་པ་ལ་ བཀའ་དྲིན་བསྐྱང་ཤོ་དག་ཉི་ ཡེག་ནེ་ལ་ ནཱན་གི་ རོག་བཀའ་དྲིན་བསྐྱང་ཤོ་དག༌ཉི༎
དད༌པ།
5ཉི་སྐུ་ཚབ་བ་ཀི་ གཙོ་བོ་ག་ཞུ་ཝ་ལ་ ཨ་ཧ་དད་པ་ ཆི་ལུ་ཅོད་ཉི་གནང་ཤོ་དག༌ཉི།
6ཉི་རོ་ཀི་ རོག་ཏེ་བ་ཀ་ ལན་གནང་ཉི་ ན་ཧ་དད་པ་ མེམ་བ་ལི་ད་བུ་ཐུར་ ཆོ་ནེ་ལ་ ན་ཤི་ ཨོ་ཐ་ཤིང་ཀ་ཏང་ག་ ཨོ་ཐ་གེ་ཝུས་ཉི་དིན་ཐཱན་ རྒྱམ་མཚོ་ནང་ཀ་ ལིག་ཅོ་དག་ཉི་ ཡེག་ནེ་ལ་ ན་ཤི་ཡེག་ཁཱན་ཁེ་པ་ན༌ལེ༎
གཡོག་པ་ག་འགན་འཁོར།
7དཔེ་ཨ་ནེ་ལ་ ན་ཧ་པོང་ཀ་ཐུར་ག་ གཡོག་པ་ཐུར་ ཨུང་ཐ་ཉི་ཅ་གི་ཝ་ལ་ ཡང་ན་ལ་ ཤི་ཤ་གོད་ཅ་གི་ཝ༌ལ། ཧང་ལའི་གེམ་ཀེ་ ཤེག་པ་ཐུར་ག་རང་ རོ་ཀི་གཡོག་པ་ག་ ཡ་ཨོམ་གི་ནེ་ལ་ ཨུན་ཐཱན་ ལྟོ་ཟ་ལེ་ག་ལང་ཤོ་དག་ཉི་ ཡེག་པེ་སྨོ། 8ཨུ་ཉུ་མང་གི་ཝ་ ལག་ཏང་ རོ་ཀི་ཨོ་ཐེན་མ་ཡེག་པ་སྨོ་ ཇ་ག་དེན་གེ་ ལྟོ་ཅོད་ཐཱན་ ཐབ་ཉི་ག་ལེ་ག་ གྲ་སྒྲིག་ཨ་ཉི་ཆོའི། ཉི་ཇང་ཟ་ཉི་ཇམ་ཉི་ ཨ་ལ་ཀབ་ཉི་ ནཱན་ནོང་ཤོ་ ཉི་གེ་ཤ་ ནཱན་ཟ་ཉི་ཇམ་ཤོ་དག༌ཉི། 9རོ་ཀི་ ཧང་ཡེག་པ་ཐུར་ ན་ཝ་ཨ་དེན་གེ་ རོ་ཀ་གཡོག་པ་ག་ བཀའ་དྲིན་བསམ་ཅ་སྨོ། 10ཨུ་ཉུ་པུརུས་ཀིན་ཨ་ཉི་ ན་ཤི་བུ་ ན་ཧ་འགན་འཁོར་ ཐམས་ཅན་ ཨ་ཉི་ཆུམ་དེན་གེ་ ཨོ་ཐེན་ཡེག་པེ་ཁེ་ལེ་ ཨའི་གོ་མ་ཆོད་ཁཱན་ གཡོག་པ་གི་ཝ༌ལ། ཧང་ཡ་དག་ནེ་ལ་ ཨ་ཤི་ཨ་ལེ་ཁེ་ཁཱན་ ལའི་བ་ཤ་ཨ་ཝ་དག༌ཉི༎
ཀླུ་ནད་པ་སེ་དྲག་པ༌ལ།
11ཉི་ཡ་རུ་ཤ་ལེམ་ག་ཏཱན་ བྱོན་མེ་གང་ཀ་ ཡི་ཤུ་ ས་མ་རི་ཡ་དང་ ག་ལིལ་ག་བར་ཀ་ ས་མཚམས་གེ་ཨ་ཉི་ བྱོན་ཅ་གི་ཝ༌ལ། 12ཉི་རོག་ དུང་ཐུར་ག་ཏཱན་ བྱོན་ཅ་ཨ་ཉི་ ཀླུ་ནད་ཟུན་ཁཱན་ སོ་ངོ་སེ་ཁྲ་པ༌ལ། ཉི་རོག་ཏེ་བ་ ཇང་ཀིན་ག་ཐིང་ཉི་ 13ཀཱན་ཤུག་ཨ་ཉི་ཕི་ཉི་ ཞུ་ཝ་ལ་ སྦྱིན་བདག་ཡི་ཤུ་ ཨ་ཧ་ཐུང་ཀ་ ཐུགས་རྗེ་གཟིགས་ཉི་ གནང་ཤོ་དག༌ཉི།
14ཉི་རོ་ཀི་ རོག་ཏེ་བ་ཀ་ གཟིགས་ཐཱན་ གསུངས་མ་ལ་ དྲག་པ་ལ་སྨོ་ བརྟག་དཔྱད་ཕི་ལེ་དེན་གེ་ དིན་ཐཱན་ ནའི་ནའི་ཏེན་གི་ བླ་མ་ག་ གེན་ཤོ་དག༌ཉི། ཉི་རོག་ཏེ་བ་ དིན་ཅ་ཨ་ཉི་ ཐམས་ཅན་རང་ དྲག་པ༌ལ།
15ཉི་ཐུར་གི་ རོག་དྲག་པ་ག་སེ་ཉི་ ལོག་ཐཱན་ ཀཱན་ཤུག་ཨ་ཉི་ དཀོན་མཆོག་ག་ བསྟོད་པ་ཕུལ་ཉི་ 16ཉི་ཡི་ཤུ་ག་ཞབས་ར་ག་ ཕྱག་ཕུལ་ཐཱན་ བཀའ་དྲིན་བསམ་མ༌ལ། ཉི་རོག་ཤོ་ ས་མ་རི་པ་ གི་ཝ་ཆོ་ཝ༌ལ།
17ཡི་ཤུ་གི་ རོ་ཀ་ཇི་མ་ལ་ ནའི་སེ་ ཐམས་ཅན་རང་ དྲག་པ་མང་གི་སྨོ། ཨོམ་ཐུར་དགུ་ཤོ་ ཨོ་ག་ཡ། 18བཱརའ་ཐུར་གི་བུ་ དཀོན་མཆོག་ག་ བསྟོད་པ་ཕུལ་བེ་ག་ ལོག་པ་མ་ཐོང་ཤི། ཨོ་ཐ་ཕིས་ཀ་ སོ་ངོ་ཐུར་ཤ་ གི་ཝ་ལ་དག༌ཉི། 19ཉི་ཡི་ཤུ་གི་ རོ་ཀ་གསུངས་མ་ལ་ ཐིང་ཐཱན་ཇོང༌ཤོ། ན་ག་དད་པ་གི་ ནཱན་དྲག་པ་ན་དག༌ཉི༎
ཨུ་ཁཱན་ དཀོན་མཆོག་ག་རྒྱལ་སྲིད་ཀོར་གེ།
20ཤེབ་ཐུར་ ཕ་རི་སི་པ་བ་ཀི་ དཀོན་མཆོག་ག་རྒྱལ་སྲིད་ཤོ་ ཧང་ཏེན་ཨ་ཉི་ ཨོ་ཕེ་ཡ་དག་ཉི་ ཇི་མ་ཨ་དེན་གེ་
ཡི་ཤུ་གི་ལན་གནང་ཉི་ དཀོན་མཆོག་ག་རྒྱལ་སྲིད་ཤོ་ ན་ཧ་མིང་གི་ ཐོང་མེ་རེ་བ་ཨ་ཉི་ ཞིང་ཁམས་ག་ རྟགས་གེན་ཉི་ ཨོ་ཕེ་མང་གི། 21ཉི་སོ་ངོ་བ་ཀི་ ཨོ་ཐེན་ཨ་ཉི་བུ་ མ་ཡེག་པ་ དཀོན་མཆོག་ག་རྒྱལ་སྲིད་ཐ་ཅ་ ཡང་ན་ལ་ ལེ་ལ་ལ་དག༌ཉི། ཧང་ཡ་དག་ནེ་ལ་ དཀོན་མཆོག་ག་རྒྱལ་སྲིད་ཤོ་ ན་ཧ་ནང་ཀ་ཅ་དག་ཉི་ གསུངས་མ༌ལ།
22ཉི་རོ་ཀི་ རོ་ཀ་སློ་མ་བ་ཀ་ གསུངས་མ་ལ་ ན་ཤི་ སོ་ངོ་ག་ཟ་ག་ ནོང་བ་ཀ་པོང་ཀེ་ ཐུར་ཨ་ཝ་ཐུར་གི་ནེ་བུ་ གོད་པེ་ག་ཉོང་ནེ་ལ་ དྲིག་པེ་ལ་དག་ཉི་ དྲཱན་མེ་ག་ དུས་ཐུར་ཤར༌བེ། དག་པ་ཀབ་ཉི་ རང་དབང་མང་ཕ། 23སོ་ངོ་བ་ཀི་ཡེག་པེ་ གོད་ཅོ་ ཐ༌ཅ། ཡང་ན་ལ་ གོད་ཅོ་ ལེ་ལ་ལ་དག༌ཉི། རོག་ཏེ་བ་ཀ་ཚིང་ཚིང་ གོད་པེ་ག་མ་དི། 24ཧང་ཡ་དག་ནེ་ལ་ སོ་ངོ་ག་ཟ་ག་ནོང་ཤོ་ ངམ་ཐུང་ཀ་ ཏང་ལེ་ཕ་ཀབ་ཉི་ མི་ཝང་ཀེན་ཨ་ཉི་ འཛམ་གླིང་ལོག་ཐུར་གེ་ ལོག་ཐུར་ག་ ཆ་པ་པུརུས་ཀིན་གི༌ལ། 25དག་པ་ཀབ་ཉི་ གོ་མ་རང་ རོག་ ཨོ་ཐ་སོ་ངོ་བ་ཀི་ མ་ཟེས་པཱན་ མང་པུ་ཐུར་ དཀའ་ཝ་ཅཱད་པེ་ཁེ༌ལེ།
26ནོ་ཨ་ག་གང་ཀ་ ཇུང་མ་པུརུས་ཀིན་ཨ་ཉི་ སོ་ངོ་ག་ཟ་ག་གང་ཀ་བུ་ ཇུང༌མེ། 27ནོ་ཨ་ གྲུ་ནང་ཀ་ མ་ནུ་ཕ་སག་པུ་ སོ་ངོ་བ་ ཟ་ཉི་ཇམ་ཉི་ གཉེན་ཕི་ཉི་ གཉེན་ཕི་ལེ་ག་ བི་ཉི་ཆོ༌ཝ། ཉི་རོད་པ་ཤོན་ཨུ་ཉི་ རོག་ཏེ་བ་ ཐམས་ཅན་རང་ཤི༌ཝ།
28ཉི་ཨོམ་ཆང་རང་ ལོད་ག་གང་ཀ་ཆོ་ཁཱན་ པུརུས་ཀིན་རང་ཨོ་ཕེ། སོ་ངོ་བ་ ཟ་ཉི་ཇམ་ཉི་ ངོ་ཉི་ཙོང་ཉི་ ཉི་ཐོག་ཆེ་ཉི་ ཕའི་ཅོད་ཉི་ཨན་ཆོ༌ཝ། 29དག་པ་ཀབ་ཉི་ ལོད་ ཁྲོམ་ས་དོམ་གེ་ ཕིས་ཀ་དི་ཝ་ཐུར་ག་རང་ ཞིང་ཁམས་གེ་ མི་དང་ སཱལ་ཕར་ ཞུད་ཁེ་ཉི་ ས་དོམ་ག་ཆོ་ཁཱན་ རོག་ཏེ་ཐམས་ཅན་རང་ ཞུམ་ཉི་མེ་པ་ཕི༌ཝ། 30ཉི་སོ་ངོ་ག་ཟ་ག་ མཇལ་ཁ་ཉོང་པེ་ ནོང་ཀ་བུ་ ཨུ་ཉུ་པུརུས་ཀིན་རང་ཨོ་ཕེ། 31ཨོ་ཉ་ནོང་ཀ་ ཕའི་ཐུང་ཀ་ཆོ་ཁཱན་ ཨི་བི་རང་གི་ནེ་བུ་ ཅ་ལ་ཕ་ལེ་དེན་གེ་ ལོག་ཉི་དོང་ཕའི་ནང་ཀ་ མ་ནུབ་ཅེན། ཨུ་ཉུ་པུརུས་ཀིན་ཨ་ཉི་ ཨུང་ནང་ཀ་ལའི་ཨ་ཁཱན་ ཨི་བི་རང་གི་ནེ་བུ་ ལོག་ཉི་ཕའི་ག་ དི་ལེ་མང་ཕ། 32ལོད་ག་མེ་ཝག་ཙ་ ཡིད་ཀ་ཨའི། 33ཨི་བི་གི་ རང་རང་ཏེན་ག་ སྲོག་རྒྱབ་ཨ་ལེ་ གོད་པ་ཐུར་གེ༌མེ། ཉི་ཨི་བི་གི་ རང་ཏེན་ག་ སྲོག་གེ་མ་ཐུར་ སྲོག་རྒྱབ་ཉོང༌པེ། 34ཇི་གི་ ན་ཧ་ཡེག་པེ་ ཨོ་ཉ་བི་ནང་ག་ པ་ལང་ཐུང་ཀ་ སོ་ངོ་ཉིག་ཙིང་ཨོ་ཕེ། ཐུར་དུང་ཉི་བུ་ལ་ཀབ་ཉི་ ཐུར་ལུས༌པེ། 35མེ་ཝག་ཙ་ཉིག་ཙིང་ རང་ཐང་ཞུམ་ཉི་ཆོ་ཁཱན་གེ་ ཐུར་དུང་ཉི་བུ་ལ་ཀབ་ཉི་ ཐུར་ལུས༌པེ། 36སོ་ངོ་ཉིག་ཙིང་ ཨུང་ག་ ལའི་ཨ་ཉི་ཆོ་ཝ་གེ་ ཐུར་དུང་ཉི་བུ་ལ་ཀབ་ཉི་ ཐུར་ལུས༌པེ།
37ཨུ་ཐུ་ད་བུ་ ཨོ་ག་ཇུང་མེ་ཡ་ གཙོ་བོ་དག་ཉི་ སློ་མ་བ་ཀི་ ཞུ་ལ་ཀབ་ཉི་ རོ་ཀི་ རོག་ཏེ་བ་ཀ་ གསུངས་མ་ལ་ རོ་ཨོ་ག་ཆོ་ཝ་ཐུར་ རྒོད་ཨོ་ཉ་ག་རང་ ཨོ་ཕེ་ན་དག༌ཉི༎
Trenutno izabrano:
ལུ་ཀ། 17: TNTB
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Tshangla New Testament
© 2023, The Bible Society of India
all rights reserved
