Ebhikorwa bhya Abhatumwa 15
15
Obhuramusi iiguru ya bhanu bhatari Bhayawudi
1Mmbe, abhaanu abhandi mbasooka Ebhuyawudi, mbooromokera mu-musi gwa Antiyokiya ayo. Kimwi mbaamba okwiyigisha Abhakiriisitu mbaaikaga ati, “Emwe! Raabhe mutasaarirwe era, okuriingʼaana na gintungwa ginu Musa ꞉aakisigiiye, mutakutura okwerusibhwa.” 2Okuriingʼaana na amangʼana gayo, Pawuro na Bharinaabha mbayajana na abhaanu bhayo, mbabhambashaanya muno. Kimwi Abhakiriisitu bha Antiyokiya ayo mbasora Pawuro, Bharinaabha na abhaanu abhandi bhatooto agati wa abhaanu bha mw-ikanisa bhagende Yerusareemu okubhuusha ku-bhatumwa bha Yeesu na ku-bhakaruka bha riikanisa abheenda eyo, bhabharamure kw-ingʼana riyo. 3Mmbe, Abhakiriisitu bhayo, mbayaana Pawuro na abheejaabho ebhiinu bhinu ꞉bhyeendwaga mu-rugendo rwebhwe, mbabharaga. Pawuro na abheejaabho mbatura mu-kyaro kya Foyinike, na Samaariya okuringira Abhakiriisitu abheenda eyo, mbabhatondera na kutyo abhaanu bhanu bhatari Bhayawudi, bheekirisiishe Yeesu. Iingʼana iyo niijomisha muno Abhakiriisitu bhayo.
4Bhunu Pawuro na abheejaabho ꞉bhaayikire Yerusareemu, mbaramirwa kujomu na abhatumwa bha Yeesu, abhakaruka na abhaanu abhandi abha mw-ikanisa ryenda eyo. BhaaPawuro mbaamba okubhatondera goone kutyo ganu Nyamuwanga ꞉aakorere ari amwi nabho. 5Niwe abhaanu abhandi abha iidiini ya Abhafarisaayo bhanu ꞉bhaariga bheekirisiishe Yeesu, mbayambaara mbaaika ati, “Bhoone kutyo bhanu bhatari Bhayawudi, woori kibhasiige bhoone bhasaarwe, na bheeyigisibhwe okugwata ebhiraagiro bhya Musa bhyone kutyo.”
6Mmbe, abhatumwa bha Yeesu na bhakaruka bha riikanisa bhayo, mbakora ekiina, insonga bhaaikane kujomu iiguru ya riingʼana riyo. 7Akabhaga nkatura-wo kareera mbabhambashaanyaga, niwe Peetero ˆnaayambaara ˆnaabhabhwira ati, “Emwe abhayiiri bhaani, mumenyere kujomu ati okwambira mu-nsiku gya okwamba Nyamuwanga ꞉aansorere agati weemwe, insonga okuturira ku-munwa gwani bhanu bhatari Bhayawudi bhoongwe na okwikirisha Amangʼana Amajomu aga Nyamuwanga. 8Nyamuwanga niwe amenyere goone kutyo ganu gari mu-mitima gya abhaanu. Na ꞉eeresiishe ati eekirisiishe na bhanu bhatari Bhayawudi, kwa okubha bhoone abhayaaye Mwoyo Omutaakatiifu, rwa kutyo kyone ꞉aakiyaaye. 9Na Nyamuwanga woone ꞉ataakitaaganyiishe eswe na abheene, abhakoreeye rwa kutyo akikoreeye eswe Abhayawudi, kwa okubha abheene bhoone bheekirisiishe Raatabhugenyi Yeesu, kimwi Nyamuwanga ˆnaabheesha emitima gyebhwe. 10Mmbe! Ndora woori omwitwikya Abhakiriisitu bhayo omujigo gunu, enu eswe abheene gukitamire? Na bhaajaaji bheeswe bhoone omujigo guyo ꞉gwabhatamire! Okubhatwikya omujigo guyo ni kusaka amangʼana ga Nyamuwanga na okurema agaaye. 11Nawe eswe ekiikirisha ati ekyerusibhwa na iinema ya Raatabhugenyi weeswe Yeesu, rwa kutyo abheerusibhwa nayo.”
12Mmbe, abhaanu bhoone kutyo bhanu ꞉bhaariga bhabheeye mu-kisendo kiyo mbajibhira jibhi, mbeetegeereshaga kutyo Pawuro na Bharinaabha ꞉bhaariga mbaaika. Mmbe, bhaaPawuro bhoone mbagenderera okubhabhwira kutyo Nyamuwanga ꞉aariga eeresiishe ebhimenyegesho na ebhiruguusho mu-bhaanu bha mu-bhyaro ebhindi aturiiye ku-bheene. 13Bhunu ꞉bhaamarire okwaika, Yakobho woone ˆnaaika ati, “Emwe abhayiiri bhaani, munyiitegeereshe! 14Peetero aakibhwira kutyo Nyamuwanga aambire okunyankirira bhanu bhatari Bhayawudi, asore-mo abhandi mu-bhaanu bhayo bhabhe bhaanu bhaaye. 15Amangʼana gayo ageekirishaanya na riingʼana rinu ꞉ryakaamirwe mu-bhitabho bhya abharagi, anu Nyamuwanga ꞉aaikaga ati,
16‘Raabhe gayo gaawa, eniija okusubha,
okuumbaka kweki iinyumba ya Dawudi,
kwa okubha ikambukire.
Eniija okuumbaka bhuya riikindaasi,
niimushe na iinyumba yoone kutyo,
17insonga abhaanu abhandi bhoone kutyo bhanyaagare,
abhaanu bha mu-bhyaro ebhindi,
bhanu nisorere bhabhe bhaanu bhaani.’
Amangʼana ganu nigo Raatabhugenyi kaaika,
18niwe agakorere ati gamenyekane okwambira kara.”#15:16-18 Ringira Amoosi 9:11-12.
19Kimwi Yakobho ˆnaaika ati, “Ku-nsonga iyo anye enirora ati, kisige okunyansha abhaanu bha mu-bhyaro ebhindi enu bharamuuye okuyindukira ku-Nyamuwanga. 20Nawe kiisire kibhakaamire iinyarubha era, kibhabhwire ati, bhaasiga okubha ayeeyi na ebhiinu bhinu bhisoosiibhwe okushengera, bhaasiga okutaara ameega, bhaasiga okurya gintyanyi ginu gibhuutirwe,#15:20 Gintyanyi ginu gibhuutirwe. Abhayawudi ꞉bhaariga bharagiriiywe ati okwita intyanyi, eyeendwa ichinjwe amaanyinga geetike ansi. ꞉Gwariga guri musiro okurya intyanyi itasookere-mo rwamba. bhaasiga na okunywa orwamba. 21Kibhabhwire bhaasiga okukora gayo kwa okubha okwambira kara, ebhiraagiro bhya Musa ebhiraasibhwa misi gyone kutyo, na ebhisomwa mu-masunagoogi ga Abhayawudi ku-nsiku gyone kutyo egya Insabhaato.”
Iinyarubha ya okuja ku-Bhakiriisitu bhanu bhatari Abhayawudi
22Okumara gayo abhatumwa bha Yeesu bhayo na abhakaruka bha riikanisa, na Abhakiriisitu abhandi abha Yerusareemu ayo, mbaramura ati bhasore abhaanu agati weebhwe bhagende na Pawuro na Bharinaabha mu-musi gwa Antiyokiya. Kimwi mbasora abhatangasha bhabhiri, owumwi ni Yuuda unu riisiina ryaye erindi ꞉aatogwaga Bharisabha, na owundi ni Siira. Mmbe, mbatumwa bhasire iinyarubha iyo ikaamirwe ati,
23Eswe abhatumwa, na abhakaruka bha riikanisa, eswe Abhakiriisitu bheejaanyu, ekibhakeesha emwe abheejaasu bhanu mutari Bhayawudi abha mu-musi gwa Antiyokiya, na mu-kyaro kya Siiriya, na abha ekyaro kya Kirikiya. 24Kyunguuywe ati abhaanu ꞉bhaasookere kw-iswe enu, mbaaja okubhanyansha eyo na amangʼana geebhwe enu mbayabhyaga emyoyo gyemwe. Eswe ꞉kitaabhatumire. 25Okuriingʼaana na amangʼana gayo, kiikirishaanyiishe ati kisore abhaanu kibhatume eyo, bhaaje amwi na abheende bheeswe Bharinaabha na Pawuro. 26Pawuro na Bharinaabha ni bhaanu bhoongwani muno ku-Raatabhugenyi weeswe Yeesu Kiriisitu. Abhaanu bhanu, bheetuuye-wo na okufwa ku-nsonga ya Yeesu Kiriisitu.
27Mmbe, abhaanu bhayo kitumire kw-imwe eyo, ni Yuuda na Siira. Abheene bhoone abhaaja okubhabhwira amangʼana gayogayo kibhakaamiiye. 28Na amangʼana gayo gabheeye majomu ku-Mwoyo Omutaakatiifu na kw-iswe kyone ati, kisige okubhatwikya emwe mangʼana makomeeye, tari amangʼana ganu agaringirwa na bhaanu bhoone kutyo era. 29Ekibhabhwira era ati, mwasiga okurya ebhyokurya bhinu bhisoosiibhwe okushengera. Mwasiga na okunywa orwamba, na okurya gintyanyi ginu gibhuutirwe. Mwasiga na okubha bhataasi bha meega. Raabhe mukeekenga na gayo, omubha mukorere kujomu. Ambe mubhe-wo na omurembe.
30Mmbe, abhatumwa na abhaanu abhandi mbayeregesha Pawuro na abheejaabho bhayo. ꞉Bheejire bhaaragana nabho, Pawuro na abheejaabho mbooromokera Antiyokiya eyo. Mbakumanya Abhakiriisitu, mbabhayaana iinyarubha iyo. 31Bhunu Abhakiriisitu bhayo ꞉bhaayisomere, mbajomererwa muno amangʼana gayo ꞉gaariga gakaamirwe-mo, na emitima gyebhwe ngisaasamuka. 32Yuuda na Siira bheeki ꞉bhaariga bhari bharagi. Mmbe, mbabhwira Abhakiriisitu abheejaabho bhayo, amangʼana maafu aga okubhakomeesha emitima, okuyikira anu ꞉bhaarorere ati bhaakomeera. 33Anu Yuuda na Siira ꞉bhaamarire eyo ebhaga etooto, Abhakiriisitu bhayo mbabheekirisisha ati bhasubhe Yerusareemu na omurembe ku-bhanu ꞉bhaariga bhabhatumire. [34Nawe Siira omwene ˆnaarora ati ni kujomu asigare eyo.] 35Pawuro na Bharinaabha bhoone mbasigara Antiyokiya eyo. Abheene, na abhaanu abhandi bhaafu, mbagenderera okuraasha na okwiyigisha riingʼana rya Raatabhugenyi Yeesu ku-bhaanu.
Pawuro na Bharinaabha bhaasigana
36Anu ꞉gyaturire nsiku ntooto, Pawuro ˆnaabhwira Bharinaabha ati, “Kisubhe mu-misi ginu kyeeyigisiishe-mo riingʼana rya Raatabhugenyi, kiringire Abhakiriisitu bhanu kyasigire eyo kutyo abhagenderera.” 37Bharinaabha ˆneekirisha, ˆneenda ku-rugendo ruyo, bhagege Yowana unu ꞉aatogwaga Maariko bhagende nawe. 38Nawe Pawuro ˆnaarora ati itari kujomu bhagende na Maariko, kwa okubha ꞉aabhasigire mu-kyaro kya Pamufwiriya, ꞉ataagendereeye okukora emirimu amwi nabho.
39Amangʼana gayo ngakora mbabhambashaanya muno, mbayikira okutaana ginjira. Bharinaabha ˆnaagega Maariko, mbaambuka nawe mbaja kw-isinga rya Kiipuro. 40Pawuro woone ˆnaagega Siira. Anu Abhakiriisitu abheejaabho ꞉bhaamarire okubhasabhira iinema ya Raatabhugenyi, niwe Pawuro na Siira mbasooka ayo. 41Mbatura mu-kyaro kya Siiriya, na kya Kirikiya, mbakomeeshaga amakanisa.
Trenutno izabrano:
Ebhikorwa bhya Abhatumwa 15: kya
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. All rights reserved